اۆتونوميالى رايوندىق 14 - كەزەكتى سپورت جارىسى تابىسپەن اياقتادى
51 ادام (رەت) 27 تۇردەن شينجياڭ رەكوردىن جاڭالادى، كەلەسى كەزەكتى سپورت جارىسى ىلە قازاق اۆتونوميالى وبلىسىندا وتكىزىلەتىن بولدى
8 - ايدىڭ 15 - كۇنى ارتيستەر اۆتونوميالى رايوندىق 14 - كەزەكتى سپورت جارىسىنىڭ اياقتالۋ سالتىندا ويىن ءنومىرىن ورىنداۋدا.
□ سۋرەتتى انار بۇلت \ شينجياڭ گازەتىنىڭ ءتىلشىسى حان لياڭ تۇسىرگەن
انار بۇلت \ شينجياڭ گازەتىنىڭ ءتىلشىسى تاڭ كاندۇڭ 8 - ايدىڭ 15 - كۇنى كورلادان حابارلايدى. 8 - ايدىڭ 15 - كۇنى تۇستەن كەيىن اۆتونوميالى رايوندىق 14 - كەزەكتى سپورت جارىسىنىڭ اياقتالۋ سالتى بايىنعولين موڭعۇل اۆتونوميالى وبلىسىنىڭ كورلا قالاسى بايىن دەنە تاربيە سارايىندا سالتاناتپەن وتكىزىلدى.
”تيانشان سۇيىسپەنشىلىگى، بايىنعولين وبلىسىنداعى جاراسىمدى جارىس“. سپورت جارىسى كەزىندە، بۇكىل شينجياڭنىڭ 14 ايماق، وبلىس، قالاسىنان جانە شىحىزى قالاسىنان كەلگەن سپورتشىلار ارمان اتىمەن بايىنعولين وبلىسىندا باس قوسىپ، جاستىق قايراتتارىن ايگىلەپ، جاستىق جالىنىن لاۋلاتىپ، تاسقىنداعان ىنتامەن، ۇزدىك بەينەمەن جاستىقتىڭ، ىنتىماقتىڭ، دوستىقتىڭ جاڭا تاراۋىن جازدى. بۇل بۇكىل شينجياڭداعى ەڭ جوعارى دەڭگەيدەگى باسەكەلىك دەنە تاربيە سالتاناتتى جينالىسى، دەنە تاربيە زاپاس كۇشتەرىن تاڭدايتىن، دايىندايتىن ءبىر رەتكى ”جارىس مايدانىنداعى قوسىندى كوزدەن كەشىرۋ“ سانالادى. وسى كەزەكتى سپورت جارىسىندا باسەكەلىك دەنە تاربيە جارىسى بويىنشا جالپى 20 ۇلكەن ءتۇر، 687 شاعىن ءتۇر ورنالاستىرىلىپ، جالپى 826 التىن مەدال، 640 كۇمىس مەدال، 861 قولا مەدال جارىققا شىقتى، 51 ادام (رەت) 27 تۇردەن اۆتونوميالى رايون رەكوردى جاڭالانىپ، ءبىر توپ كومەسكى كۇشى زور زاپاس دارىندىلار كوزگە ءتۇستى.
اۆتونوميالى رايوندىق دەنە تاربيە مەكەمەسى پارتيا باسشىلىق گرۋپپاسىنىڭ شۋجيى، ورىنباسار مەكەمە باستىعى ديڭ يوۋميڭ بىلاي دەدى: وسى كەزەكتى سپورت جارىسى ايرىقشا وزگەشە، ايرىقشا تابىستى سپورت جارىسى بولىپ، بۇرىنعى ءار كەزەكتەگى اۆتونوميالى رايوندىق سپورت جارىستارى ىشىندە گرۋپپالاردىڭ ۇيىمداستىرىلۋى ەڭ كەمەلدى، تۇرلەردىڭ ورنالاستىرىلۋى ەڭ تولىق، قاتىناسقان ادام سانى ەڭ كوپ بولعان ءبىر كەزەك بولدى. بۇكىل شينجياڭنان 7654 سپورتشى، جاتتىقتىرۋشى جانە 996 تورەشى باسەكەلىك دەنە تاربيە جارىسىنا قاتىناستى. بۇدان سىرت، تاعى تۇڭعىش رەت بۇقارالىق دەنە تاربيە جارىس قيمىلدارىن ورنالاستىرىپ، ءار ۇلت بۇقاراسىن كەڭىنەن ات سالىسۋعا باۋرادى.
جارىستى ”حاۋىپسىز، قاراپايىم، جوعارى ءونىمدى، تارتىمدى“ وتكىزۋ ۇستانىمىنان جازباي، بايىنعولين وبلىسى بۇكىل وبلىستىڭ كۇشىن اتتانىسقا كەلتىرىپ، بۇكىل حالىقتىڭ اقىل - پاراساتىن توپتاپ، بۇكىل حالىقتىڭ ىنتاسىن قوزعاپ، ”جاقسى داياشى بولۋ، 14 - كەزەكتى سپورت جارىسىن ويداعىداي وتكىزۋ“ ايبىندى ۋادەسىن امالياتتا ايگىلەدى. اياقتالۋ سالتىندا مەدال تاقتاسىندا الدىڭعى سەگىزدىكتەن ورىن العان، جالپىلىق قۋات تاقتاسىنداعى الدىڭعى سەگىزدىكتەن ورىن العان ۋاكىلدەر ۇيىرمەلەرىنە مەدال تاراتىلدى، جارىسقا قاتىناسقان 15 ۋاكىلدەر ۇيىرمەسى دەنە تاربيە ءمورال سيلىعىن الدى.
اياقتالۋ سالتىندا تاعى شينجياڭ ۇيعۇر اۆتونوميالى رايوندىق سپورت جارىسىنىڭ جارىس تۋىن وتكىزىپ بەرۋ - وتكىزىپ الۋ سالتى وتكىزىلدى. اۆتونوميالى رايوندىق 15 - كەزەكتى سپورت جارىسىن ىلە قازاق اۆتونوميالى وبلىسى ۇستىنە الىپ وتكىزەتىن بولدى.
اياقتالۋ سالتىنىڭ سوڭىندا «تيانشان جىرى» مادەنيەت، دەنە تاربيە قويىلىمى قويىلدى.
