اناربۇلت \ شينجياڭ گازەتىنىڭ ءتىلشىسى ۋاڭ شيڭرۇي 8 - ايدىڭ 16 - كۇنى ۇرىمجىدەن حابارلايدى. اۆتونوميالى رايوندىق پارتكومنىڭ شۋجيى ما شيڭرۇي، اۆتونوميالى رايوننىڭ ءتوراعاسى ەركىن تۇنياز 8 - ايدىڭ 16 - كۇنى ۇرىمجىدە 2023 - جىلعى (جۇڭگو) ازيا − ەۆروپا تاۋار ساۋدا كورمەسىنە قاتىناسۋعا كەلگەن موڭعۇليانىڭ قوبدا ولكەسىنىڭ باستىعى بولورمامەن جانە ونىڭ ساپارلاستارىمەن كەزدەستى.
ما شيڭرۇي اۆتونوميالى رايوندىق پارتكوم مەن ۇكىمەت اتىنان بولورمانىڭ اراعا 5 اي سالىپ تاعى دا جۇڭگونىڭ شينجياڭىنا ساپاردا بولۋعا ءارى كورمەگە قاتىناسۋعا كەلگەندىگىن قارسى الاتىندىعىن ءبىلدىردى، سونداي - اق ونىڭ موڭعۇليانىڭ قوبدا ولكەسى مەن جۇڭگو شينجياڭىنىڭ جان - جاقتى اۋىس - كۇيىسىن، سەلبەستىگىن تەرەڭدەتۋدەگى، جەبەۋدەگى بەلسەندى قۇلشىنىسىن جوعارى باعالادى. ما شيڭرۇي مىنالاردى ءبىلدىردى: جۇڭگو مەن موڭعۇليا تاۋ - سۋى تۇتاسقان جاقىن كورشى، ەكى ەلدىڭ جەرگىلىكتى ورىندار ارا سەلبەستىگىن ۇزدىكسىز تەرەڭدەتۋ ءتوراعا شي جينپيڭنىڭ ەلدەرىڭىزدىڭ مەملەكەت باسشىسىمەن كەلىسكەن ماڭىزدى ورتاق تانىمىن تياناقتاندىرىپ، اناعۇرلىم كوپ ناقتى سەلبەستىك جەتىستىكتەرى ارقىلى ەكى جاقتىڭ ءار ۇلت حالىقتارىن يگىلىككە كەنەلدىرۋ ءۇشىن بولىپ تابىلادى. كەزەكتە جۇڭگونىڭ شينجياڭى ءتوراعا شي جينپيڭنىڭ كەسكىندەگەن اسەم كارتيناسى بويىنشا، جىبەك جولى ەكونوميكالىق بەلدەۋى وزەكتى رايون قۇرىلىسىن جەدەلدەتۋدى قوزعاۋشى كۇش ەتىپ، جوعارى دەڭگەيدەگى سىرتقا ەسىك اشۋدى ۇزدىكسىز كەڭەيتىپ، جۇڭگو ۇلگىسىندەگى وسىزامانداندىرۋ قۇرىلىسىن جەدەل ىلگەرىلەتۋدە. قوبدا ولكەسى شينجياڭنىڭ سىرتقا ەسىك اشۋىنىڭ، سەلبەستىك جاساسۋىنىڭ ماڭىزدى كورشىلەس ءوڭىرى، ەكى جاقتىڭ ءوزارا تيىمدىلىك جاسايتىن، ءوزارا پايدا جەتكىزەتىن، ءوزارا تولىقتايتىن سەلبەستىك ءورىسى كەڭ. ەكى جاقتىڭ ناقتى، جارامدى قالىپتى سەلبەستىك مەحانيزمىن ونان ارى كەمەلدەندىرىپ، سەلبەستىك جاساسۋ مازمۇنىن بايىتىپ، سەلبەستىك جاساسۋدىڭ ساپاسى مەن ونىمدىلىگىن جوعارىلاتىپ، سەلبەستىك جاساسۋ بارىسىنداعى كەلەلى ماسەلەلەردى دەر كەزىندە اقىلداسىپ شەشىپ، ەكى جاقتىڭ جان - جاقتى اۋىس - كۇيىسىن، سەلبەستىگىن اناعۇرلىم جوعارى دەڭگەيگە كوتەرۋدى جەبەۋدى، ەكى ەلدىڭ مەملەكەت باسشىلارىنىڭ ماڭىزدى ورتاق تانىمىن شىن مانىندە ناقتاپ تياناقتاندىرىپ، جۇڭگو مەن موڭعۇليانىڭ جان - جاقتى ستراتەگيالىق سەرىكتەستىك قارىم - قاتىناسىن ىلگەرىلەتۋگە كۇش قوسۋىن ءۇمىت ەتەمىز. ما شيڭرۇي قوبدا ولكەسىنىڭ شەكارا وتكەلىن اشىق ۇستاۋ، داشۋە وقۋ - اعارتۋى، قالانىڭ دامۋى سياقتى جاقتارداعى اۋىس - كۇيىستى، سەلبەستىكتى كۇشەيتۋ جونىندەگى ناقتى ۇسىنىستار جايلى بولورمامەن ىشكەرىلەي پىكىرلەستى، ۇشتاستىرۋدى بەلسەنە زەرتتەپ، قولداۋ تەبىنىن ارتتىرىپ، ەكى جاقتىڭ ءتۇيىندى سالالارداعى سەلبەستىك ىستەرىنىڭ تياناقتانىپ ونىمدىلىك كورسەتۋىن ىلگەرىلەتەتىندىگىن ءبىلدىردى.
بولورما جۇڭگو شينجياڭىنىڭ جۇڭگو مەن موڭعۇليانىڭ جەرگىلىكتى ورىندار ارا سەلبەستىگىن تەرەڭدەتۋگە ايرىقشا ءمان بەرگەندىگىنە جانە زور كۇشپەن قولداعاندىعىنا العىس ايتتى. ول مىنالاردى ءبىلدىردى: موڭعۇليا مەن جۇڭگو ەكى ەلدىڭ مەملەكەت باسشىلارى كەلىسكەن ماڭىزدى ورتاق تانىم ەكى جاقتىڭ ءوزارا پايدا جەتكىزۋ سەلبەستىگىن تەرەڭدەتۋگە تاماشا شارت - جاعداي ازىرلەدى. ەكى ەل موڭعۇليانىڭ ”جاڭا گۇلدەنۋ ساياساتى“، ”ۇزاق بولاشاق − 2050“ ۇزاق مەرزىمدىك دامۋ ساياساتى مەن ”ءبىر بەلدەۋ، ءبىر جولدى“ بىرگە قۇرۋ باستاماسىن، الەمدىك دامۋ باستاماسىن ۇشتاستىرۋ بارىسىندا ەكى ەلدىڭ جەرگىلىكتى ورىندار ارا اۋىس - كۇيىسى، سەلبەستىگى جاڭا ورايدى قارسى الدى، وسى جولعى كەڭەستىڭ موڭعۇليانىڭ باتىس بولىك ءوڭىرى مەن جۇڭگونىڭ شينجياڭى اراسىنداعى سەلبەستىكتىڭ جاڭا تاراۋىن باستايتىندىعىنا سەنەمىن. تۇڭعىش رەت كورىكتى جۇڭگو شينجياڭىنىڭ ءۇرىمجى قالاسىندا ساپاردا بولدىم، وسى رەتكى كەڭەستى وراي ەتىپ، ەكى جاقتىڭ ناقتى سەلبەستىگىن ونان ارى تەرەڭدەتىپ، شەكارا وتكەلىن اشىق ۇستاۋ جانە كوركەيتۋ دەڭگەيىن جوعارىلاتىپ، شەتەلدە وقيتىن وقۋشىلاردىڭ قوس باعىتتاعى اۋىس - كۇيىسىن، تاربيەلەۋىن كەڭەيتىپ، قالا قۇرىلىسىنىڭ جانە الەۋمەتتىك ىستەردىڭ دامۋىن بەلسەنە جەبەپ، ءار ۇلت حالقىن اناعۇرلىم ويداعىداي يگىلىككە كەنەلدىرۋدى ءۇمىت ەتەمىن.
قايسار ابدىكەرىم قاتارلىلار كەزدەسۋگە قاتىناستى.
