جۇڭگو (شينجياڭ) − قىرعىزستان ساۋدا تانىستىرۋ ءماجىلىسى ۇرىمجىدە وتكىزىلدى
ا. جاپاروۆ، ما شيڭرۇي ارناۋ ءسوز سويلەدى
ەركىن تۇنياز باسقاردى، لي يفي، جاڭ چۇنلين، حى جۇڭيوۋ قاتىناستى
انار بۇلت \ شينجياڭ گازەتىنىڭ تىلشىلەرى ۋاڭ شيڭرۇي، ليۋ شياڭ 8 - ايدىڭ 19 - كۇنى ۇرىمجىدەن حابارلايدى. جۇڭگو (شينجياڭ) − قىرعىزستان ساۋدا تانىستىرۋ ءماجىلىسى 8 - ايدىڭ 19 - كۇنى ۇرىمجىدە وتكىزىلدى، ەكى جاقتىڭ ۇكىمەت قۇرىلىمدارى، ساۋدا قوعامدارى، كاسىپورىنشىلارى، ت.ب تانىستىرۋ، اۋىس - كۇيىس جاساسىپ، سەلبەستىكتى بىرگە قاراستىرىپ، دامۋدى بىرگە جەبەپ، بولاشاقتى بىرگە اشىپ، جان - جاقتى ناقتى سەلبەستىكتىڭ ۇزدىكسىز تەرەڭدەۋىن ىلگەرىلەتتى. قىرعىزستاننىڭ زۇڭليى ا. جاپاروۆ، اۆتونوميالى رايوندىق پارتكومنىڭ شۋجيى ما شيڭرۇي ماجىلىسكە قاتىناستى ءارى ارناۋ ءسوز سويلەدى.
اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ءتوراعاسى ەركىن تۇنياز ءماجىلىستى باسقاردى. اۆتونوميالى رايوندىق پارتكومنىڭ ورىنباسار شۋجيى، بيڭتۋاننىڭ جىڭۋيى لي يفي، اۆتونوميالى رايوندىق پارتكومنىڭ ورىنباسار شۋجيى جاڭ چۇنلين، اۆتونوميالى رايوندىق پارتكومنىڭ ورىنباسار شۋجيى، ءۇرىمجى قالالىق پارتكومنىڭ شۋجيى حى جۇڭيوۋ ماجىلىسكە قاتىناستى.
ما شيڭرۇي ارناۋ سوزىندە اۆتونوميالى رايوندىق پارتكوم مەن ۇكىمەت اتىنان ماجىلىسكە قاتىناسقان جۇڭگولىق، شەتەلدىك سيلى قوناقتاردى قىزۋ قارسى الاتىندىعىن ءبىلدىردى. ول بىلاي دەدى: قىرعىزستان بايىرعى جىبەك جولىنداعى جارقىراعان مەرۋەرت، جۇڭگو − قىرعىزستان ەكى ەل ۇرپاقتان - ۇرپاققا جالعاسقان تاتۋ كورشى، تاتۋ دوس بولۋ، ءوزارا تيىمدىلىك جەتكىزىپ سەلبەسۋ ارناسىمەن ۇزدىكسىز العا باسىپ، جوعارى دەڭگەيلى جاڭا داۋىردەگى جان - جاقتى ستراتەگيالىق سەرىكتەستىك قارىم - قاتىناس ورناتتى. جۇڭگو − ورتا ازيا باسشىلار ماجىلىسىندە ءتوراعا شي جينپيڭ قىرعىزستاننىڭ زۇڭتۇڭىمەن كوپ سالاداعى سەلبەستىكتى ورىستەتۋ جونىندە كەڭ كولەمدە ورتاق تانىمعا كەلىپ، ەكى ەلدىڭ بىرگە گۇلدەنىپ دامۋىن ىلگەرىلەتۋگە قۋاتتى قوزعاۋشى كۇش ۇستەدى. ”ءبىر بەلدەۋ، ءبىر جولدى“ بىرگە قۇرۋ باستاماسىنىڭ ۇزدىكسىز ىشكەرىلەي ىلگەرىلەۋىنە بايلانىستى جۇڭگو مەن قىرعىزستاننىڭ ەكونوميكا - ساۋدا بارىس - كەلىسى كۇن سايىن جيىلەپ، ءتۇرلى سالاداعى اۋىس - كۇيىسى، سەلبەستىگى ۇزدىكسىز تەرەڭدەپ، ەكى جاق حالقىنا ناقتى قۇت - ىرىس اكەلدى. جۇڭگو (شينجياڭ) − قىرعىزستان ساۋدا تانىستىرۋ ءماجىلىسىنىڭ وسى جولعى تاۋار ساۋدا كورمەسىنىڭ ماڭىزدى مازمۇنى رەتىندە ەكى جاقتىڭ ساۋدا سالاسىنداعىلاردىڭ اۋىس - كۇيىستى، بارىس - كەلىستى تەرەڭدەتۋىنە، جاڭا داۋىردەگى جۇڭگو − قىرعىزستان ەكونوميكا - ساۋدا سەلبەستىگىنىڭ جاڭا جاعدايىن قالىپتاستىرۋعا جاڭا بەلسەندى ۇلەس قوساتىندىعى داۋسىز. ءبىز ەكى ەلدىڭ مەملەكەت باسشىلارىنىڭ ماڭىزدى ورتاق تانىمىن دەن قويا ويداعىداي تياناقتاندىرىپ، قىرعىزستاننىڭ ەلەكتر، كومىر، قاتىناس، اۋىل شارۋاشىلىعى، ەلەكتروندىق ساۋدا، فينانس، ءوندىرىس قۋاتى جانە جاسىل دامۋ سياقتى سالالاردا سەلبەستىكتى جاپپاي تەرەڭدەتۋدى قالايمىز. ەكى جاقتىڭ اۋىس - كۇيىس، سەلبەستىك مەحانيزمى جونىندە بەلسەنە ىزدەنىس جاساپ، ونى كەمەلدەندىرىپ، ادامداردىڭ بارىس - كەلىسى مەن ەكونوميكا - ساۋدا سەلبەستىگىنە تاماشا شارت - جاعداي جاساپ، جان - جاقتى، تەرەڭ دەڭگەيلى اۋىس - كۇيىس، سەلبەستىك جاڭا جاعدايىن ۇزدىكسىز اشۋىن ءۇمىت ەتەمىز.
ا.جاپاروۆ ارناۋ سوزىندە ماجىلىسكە قاتىناسقاندارعا ىقىلاستى سالەم جولدادى ءارى قىرعىزستاننىڭ بايلىق ارتىقشىلىعى، كاسىپ سالالارىنىڭ دامۋى، قارجى قوسۋ ساياساتى جانە شارۋاشىلىق - ساۋدا ورتاسى سياقتى جاقتارداعى جاعدايىن تانىستىردى. ول مىنالاردى ءبىلدىردى: جۇڭگو قىرعىزستاننىڭ دوس كورشىسى، شىنايى دوسى، سەنىمدى سەرىگى. قىرعىزستان − جۇڭگو ەكى ەل بايىرعى جىبەك جولى داۋرەندەگەن مەزگىلدە دوستىق سەلبەستىك قارىم - قاتىناسىن ورناتقان، ول جاڭا تاريحي شارت - جاعدايدا ۇزدىكسىز بەكەمدەلدى جانە دامىدى. وسى جولعى تانىستىرۋ ءماجىلىسى ارقىلى ەكى جاقتىڭ ناقتى ىستەر سەلبەستىگىن تەرەڭدەتۋگە، وڭىرلەردىڭ دامۋدى جەدەلدەتۋىن جەبەۋگە قۋاتتى قوزعاۋشى كۇش ازىرلەۋدى ءۇمىت ەتەمىن. قىرعىزستان قارجى قوسۋدىڭ زور كومەسكى كۇشىنە يە، سونىمەن بىرگە، جۇڭگوداعى قارجى قوسۋشىلاردىڭ ەۆروپا وداعى بازارىنا كىرۋىندەگى تەرەزەگە اينالا الادى. قىرعىزستان جاق قاشاندا اشىق پوزيتسيادان جازباي، ءونىمدى شارالار قولدانا وتىرىپ قارجى قوسۋ ورتاسىن ۇزدىكسىز جاقسارتىپ، ساياساتتىق قامالدار مەن شەكتەۋلەردى جويىپ، زاڭ ورتاسىن ساپالىلاندىرىپ، ساۋدا ءتۇزىمىن كەمەلدەندىرىپ، جۇڭگو جاق كاسىپورىندارىنىڭ قىرعىزستانعا بارىپ قارجى قوسىپ، شارۋاشىلىعىن شالقىتۋىنا، سەلبەستىكتەر ورىستەتۋىنە تاماشا شارت - جاعداي جاسايدى. قىرعىزستان − جۇڭگو ەكى ەلدىڭ ساۋدا سالاسىنداعىلاردىڭ اناعۇرلىم جوعارى دەڭگەيدەگى اۋىس - كۇيىس، سەلبەستىك قارىم - قاتىناسىن ورناتىپ، جىبەك جولى ەكونوميكالىق بەلدەۋىنىڭ كەڭ تۇعىرىنان پايدالانىپ، وڭىرلەر ارا نىساندارعا قارجى قوسۋدى جانە كاسىپورىنداردىڭ دامۋىن ۇزدىكسىز جەبەپ، ەكى ەلدىڭ ەكونوميكالىق دامۋ كومەسكى كۇشىن قاۋلاتىپ، باياندى دامۋ مەن ەكونوميكانى ءبىر تۇلعالاندىرۋ ءۇردىسىن ىلگەرىلەتۋگە، ەكى جاق حالقىنىڭ تۇرمىس دەڭگەيىن جوعارىلاتۋعا ۇلەس قوسۋىن ءۇمىت ەتەمىن.
قىرعىزستان مەملەكەتتىك قارجى قوسۋ مەكەمەسىنىڭ، ەكونوميكا جانە ساۋدا ىستەرى مينيسترلىگىنىڭ، ەنەرگيا مينيسترلىگىنىڭ، اۋىل شارۋاشىلىعى مينيسترلىگىنىڭ، جۇڭگو شينجياڭ ۇيعۇر اۆتونوميالى رايوندىق ساۋدانى جەبەۋ قوعامىنىڭ، اۋىل شارۋاشىلىعى، اۋىل - قىستاق مەڭگەرمەسىنىڭ قاتىستى جاۋاپتىلارى باسىمدىققا يە كاسىپ سالاسى، قارجى قوسۋ ورتاسى سياقتىلاردى ارقاۋ ەتە وتىرىپ تانىستىرۋ جاسادى.
قىرعىزستاننىڭ قاتىستى تاراۋلارى، ساۋدا قوعامدارى، كاسىپورىندارى، جوعارى مەكتەپتەرى جۇڭگو جاقتىڭ قاتىستى كاسىپورىندارىمەن، اۆتونوميالى رايوننىڭ ايماق، وبلىستارىمەن جانە جوعارى مەكتەپتەرىمەن 29 نىسان سەلبەستىك كەلىسىمىن جاساستى، كەلىسىم سوماسى شامامەن ءبىر ميلليارد دوللار بولدى. ەكى جاق كاسىپورىندارى ساۋدا - زات اينالىمى، ەنەرگيا، اۋىل شارۋاشىلىعى، فينانس سياقتى كاسىپتەردى، سالالاردى ارقاۋ ەتە وتىرىپ پىكىر اۋىستىردى، ءتۇيىلىستىردى.
قىرعىزستاننىڭ جۇڭگودا تۇراتىن باس ەلشىسى، قاتىستى تاراۋلار جانە ايماق، وبلىس قاتارلى ۇكىمەت قۇرىلىمدارى ۋاكىلدەرى، سونداي - اق ساۋدا قوعامدارىنىڭ، كاسىپورىنداردىڭ ۋاكىلدەرى تانىستىرۋ ماجىلىسىنە قاتىناستى.
چىن ۋيجۇن، قادەن كابەن، سۇن حۇڭمەي، شۋە بين، ءماردان مۇحيت، اۆتونوميالى رايوننىڭ قاتىستى تاراۋلارىنىڭ جانە ايماقتىق، وبلىستىق، قالالىق ۇكىمەتتەردىڭ نەگىزگى جاۋاپتى جولداستارى، قاتىستى ساۋدا قوعامدارىنىڭ جانە كاسىپورىنداردىڭ ۋاكىلدەرى تانىستىرۋ ماجىلىسىنە قاتىناستى.
