80 ورىن مەن كاسىپورىن تاۋار ساۋدا كورمەسىندە كوپ ءتۇرلى سيلىققا يە بولدى
انار بۇلت \ شينجياڭ گازەتىنىڭ ءتىلشىسى ياڭ شۋحان، پراكتيكانت گى ياننيڭ 8 - ايدىڭ 21 - كۇنى ۇرىمجىدەن حابارلايدى. 8 - ايدىڭ 21 - كۇنى 5 كۇنگە جالعاسقان 2023 - جىلعى (جۇڭگو) ازيا - ەۆروپا تاۋار ساۋدا كورمەسى تولىق تابىسپەن اياقتادى، ءبىر ۋاقىتتا وتكىزىلگەن سيلىق تاراتۋ قيمىلىندا وسى كەزەكتى تاۋار ساۋدا كورمەسىنە كورنەكتى ۇلەس قوسقان 80 ورىن مەن كاسىپورىن جەكە - جەكە ”ەڭ تانىمال كاسىپورىن“ سياقتى سيلىقتارعا يە بولدى.
ەل ىشىندەگى 26 ولكە، رايون، قالا جانە شەكارا سىرتىنداعى 40 مەملەكەت پەن ءوڭىر كورمەگە، ماجىلىسكە قاتىناسىپ، ەل ءىشى - سىرتىنان كەلگەن 1400گە جۋىق كاسىپورىن ءبىر ارادا باس قوستى... وسى كەزەكتى تاۋار ساۋدا كورمەسىندە ەل ءىشى - سىرتىنداعى ءار سالا قايراتكەرلەرى ”جىبەك جولى رۋحىن اسقاقتاتىپ، ازيا - ەۆروپا سەلبەستىگىن تەرەڭدەتۋ“ باستى تاقىرىبىن ارقاۋ ەتىپ، دامۋدى بىرگە اقىلداسىپ، تاۋار ساۋدا كورمەسىن تۇعىر ەتىپ ىشكەرىلەي اۋىس - كۇيىس جانە سەلبەستىك جاساپ، اناعۇرلىم كوپ دوس تاۋىپ، اناعۇرلىم كوپ ساۋدا ورايىن جاراتىپ، اناعۇرلىم كوپ جەتىستىككە قول جەتكىزدى.
سيلىق تاراتۋ قيمىلى كورمەگە قاتىناسقان ساۋدا ۇيىرمەلەرى، كورمەگە قاتىناسقان ورىندار، قىزمەت وتەيتىن ورىندار بويىنشا ءۇش ۇلكەن تۇردە 9 سيلىق ءتۇرى ورنالاستىرىلدى. كورمەگە قاتىناسقان ساۋدا ۇيىرمەسى تۇرىندە ساۋدا ۇيىرمەلەرىنىڭ كورمە كولەمى، جەلىدە كورمەگە قاتىناسۋ جاعدايى سياقتى جالپىلىق سالىستىرۋعا نەگىزدەلىپ، ەڭ تاڭداۋلى ساۋدا ۇيىرمەسى، تاڭداۋلى ساۋدا ۇيىرمەسى سىندى ەكى سيلىقتى باعالاپ شىقتى؛ كورمەگە قاتىناسقان ورىندار تۇرىندە جەكە كورمە تۇعىرىنىڭ كورمە كولەمى، بۇقارالىق جەلىدە داۋىس بەرۋ جانە جاسىل كورمە تۇعىرىن باعالاۋ سياقتى تاسىلدەر ارقىلى ەڭ ىقپالدى كاسىپورىن، ەڭ قارسى الۋعا بولەنگەن توقىماشىلىق، كيىم - كەشەك كاسىپورنى، ەڭ قارسى الۋعا بولەنگەن اۋىل شارۋاشىلىق ەرەكشە ونىمدەرى كاسىپورنى، ەڭ قارسى الۋعا بولەنگەن دايىن قۋىرماش كاسىپورنى، ەڭ قارسى الۋعا بولەنگەن ”كونە ماركا“ سىندى جيىنى 5 ءتۇرلى سيلىقتى باعالاپ شىقتى؛ قىزمەت وتەيتىن ورىندار تۇرىندە ەرەكشە جابدىقتالاتىن كورمە ورنىن قۇراتىن ورىنداردىڭ كورمە تۇعىرىن ورناتۋ حاۋىپسىزدىگى مەن ماتەريالداردىڭ ورتانى قورعاۋ سيپاتى سياقتىلارىن ۋنيۆەرسال باعالاۋ ارقىلى كورمە تۇعىرىن جوبالاۋدىڭ ەرەكشە جاڭالىق سيلىعى مەن جاسىل ورتانى قورعاۋ سيلىعى سىندى جيىنى 2 ءتۇرلى سيلىقتى باعالاپ شىقتى.
مۇنىڭ ىشىندە شينجياڭ جۇڭتاي حيميا جارنا شەكتى سەرىكتەستىگى قاتارلىلار ”2023 - جىلعى تاۋار ساۋدا كورمەسىندە ەڭ ىقپالدى كاسىپورىن“ سيلىعىن، شينجياڭ بايچىڭ جاڭا ازىق - تۇلىك (توبى) قامداۋ تىزبەگى شەكتى سەرىكتەستىگى قاتارلىلار ”2023 - جىلعى تاۋار ساۋدا كورمەسىندە ەڭ قارسى الۋعا يە بولعان دايىن قۋىرماش كاسىپورنى“ سيلىعىن الدى.
”2023 - جىلعى تاۋار ساۋدا كورمەسىنىڭ ەڭ تاڭداۋلى ساۋدا ۇيىرمەسى“ سيلىعىنا يە بولعان جەلىدەگى پاكيستان مەملەكەتتىك سارايىنىڭ ۋاكىلى لو شياڭدۇڭ تىلشىگە بىلاي دەدى: تاۋار ساۋدا كورمەسىنىڭ ارقاسىندا پاكيستاننان اكەلىنگەن 3 توننا ماڭگو جەمىسى تۇگەل ساتىلىپ كەتتى، كورمەگە كەلگەن بۇقارا ونىڭ تاتتىلىگىنە، حوش يىسىنە ەرەسەن جاقسى باعا بەردى، ”ءبىز جيڭدۇڭ سياقتى ەلەكتروندى ساۋدا تۇعىرلارىندا ون نەشە ’مەملەكەت سارايىن اشتىق‘، كەلەسى قادامدا ماڭگو پىسقان مەزگىلدى مىقتى يگەرىپ، شينجياڭ جيۋديڭ اۋىل شارۋاشىلىعى توبىنىڭ ەلەكتروندى ساۋدا تۇعىرى، سونداي - اق ينتەرنەتتە تانىمالى قولونەر بۇيىمدار دۇكەنى سياقتىلار ارقىلى پاكيستاننىڭ ماڭگوسى مەن قولونەر بۇيىمدارىن شينجياڭعا، ءتىپتى، بۇكىل ەل بازارىنا تانىستىرامىز“.
وسى كەزەكتى تاۋار ساۋدا كورمەسىن ۇيىمداستىرۋ كوميسسياسىنىڭ ۇنەمىلىك ىستەرگە جاۋاپتى ورىنباسار باس حاتشىسى، شينجياڭ حالىقارالىق كورمە ىستەرى مەكەمەسى پارتيا باسشىلىق گرۋپپاسىنىڭ شۋجيى جۋ حىشياڭ بىلاي دەدى: تاۋار ساۋدا كورمەسىنىڭ حالىقارالانۋ، ارنايىلانۋ، ماركالانۋ، بازارلانۋ دەڭگەيىن ۇزدىكسىز جوعارىلاتىپ، كورمەنىڭ اسقىن ونىمدىلىگىن ۇزدىكسىز ارتتىرىپ، ەسىك اشۋدى جان - جاقتى كەڭەيتىپ، ەكونوميكانىڭ جوعارى ساپالى دامۋىن جۇزەگە اسىرۋعا اناعۇرلىم زور ۇلەس قوسامىز.
