شينحۋا اگەنتتىگىنىڭ 8 - ايدىڭ 22 - كۇنى پرەتوريادان بەرگەن حابارى (تىلشىلەر يىڭ چياڭ، حان مو). جەرگىلىكتى ۋاقىت 8 - ايدىڭ 22 - كۇنى تۇستە مەملەكەت ءتوراعاسى شي جينپيڭ پرەتورياداعى زۇڭتۇڭ سارايىندا وڭتۇستىك افريكا زۇڭتۇڭى رامافوسامەن كەڭەس وتكىزگەننەن كەيىن بىرگە تىلشىلەرمەن كەزدەستى.
شي جينپيڭ بىلاي دەپ اتاپ كورسەتتى: رامافوسا زۇڭتۇڭنىڭ ۇسىنىسىمەن تاعى دا كورىكتى ”كەمپىر قوساق ەلى“ وڭتۇستىك افريكادا مەملەكەتتىك ساپاردا بولعانىما ايرىقشا قۋانىشتامىن. بۇل مەنىڭ جۇڭگونىڭ مەملەكەت ءتوراعاسى رەتىندە وڭتۇستىك افريكادا 4 - رەت مەملەكەتتىك ساپاردا بولۋىم. بيىل جۇڭگو مەن وڭتۇستىك افريكا ديپلوماتيالىق قارىم - قاتىناس ورناتقاندىعىنىڭ 25 جىلدىعى. 25 جىلدان بەرى جۇڭگو − وڭتۇستىك افريكا قارىم - قاتىناسى قارىشتاپ دامۋدى جۇزەگە اسىرىپ، ستراتەگيالىق ءوزارا سەنىمدىلىك تىڭ جوعارى دەڭگەيگە جەتىپ، ءار سالاداعى سەلبەستىك جاپپاي ىلگەرىلەپ، كوپ جاقتىلى ىستەستىك ونان ارى قويۋلاستى. جۇڭگو − وڭتۇستىك افريكا قارىم - قاتىناسى ەكى جاقتى كولەمنەن الدەقايدا اسىپ ءتۇسىپ، بارعان سايىن ستراتەگيالىق مانگە جانە الەمدىك ىقپال كۇشكە يە بولدى.
كەزەكتە جۇڭگو كوممۋنيستىك پارتياسى جۇڭگو حالقىن ىنتىماقتاستىرىپ، باستاپ، جۇڭحۋا ۇلتىنىڭ ۇلى گۇلدەنۋىن جۇڭگو ۇلگىسىندەگى وسىزامانداندىرۋ ارقىلى جاپپاي ىلگەرىلەتۋدە، وڭتۇستىك افريكا دا ءوز ەلىنىڭ مەملەكەت جاعدايىنا ۇيلەسەتىن دامۋ جولىن بەلسەندىلىكپەن دەربەس قاراستىرۋدا. جۇڭگو − وڭتۇستىك افريكا قارىم - قاتىناسى جاڭا دامۋ ورايىنا ءدوپ كەلدى. الگىندە مەن رامافوسا زۇڭتۇڭمەن اسا ناتيجەلى كەڭەس وتكىزىپ، جاڭا داۋىردەگى ەكى ەل قارىم - قاتىناسىنىڭ دامۋى جانە ورتاق كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە پىكىر اۋىستىرىپ، ماڭىزدى ورتاق تانىمعا كەلدىك. ءبىز ءبىرسىپىرا ماڭىزدى ەكى جاقتى سەلبەستىك حۇجاتتارىنا قول قويۋعا كۋا بولدىق. مەن ەكى ەلدىڭ دوستىق سەلبەستىك قارىم - قاتىناسىنىڭ بولاشاعىنا تولىق سەنىمدەمىن.
رامافوسا زۇڭتۇڭ ەكەۋىمىز دە جۇڭگو مەن وڭتۇستىك افريكا ەكى ەل وسكەلەڭ ءوزارا سەنىمدى ستراتەگيالىق سەرىكتەر بولۋى كەرەك دەپ قارايمىز. ءبىز جوعارى جىكتەگىلەردىڭ ارالاسۋىنىڭ تاماشا بەتالىسىن ساقتاپ، ءار سالاداعى اۋىس - كۇيىستى، سەلبەستىكتى كۇشەيتىپ، ساياسي ءوزارا سەنىمدىلىكتى ۇزدىكسىز تەرەڭدەتىپ، ەل باسقارۋ تاجىريبەلەرىن اۋىستىرۋدى كۇشەيتىپ، ءبىر - ءبىرىمىزدىڭ وزەكتى مۇددەمىزگە ساياتىن جانە ءجىتى قاداعالاپ وتىرعان كەلەلى ماسەلەلەردە ۇزدىكسىز ءوزارا قولداۋ كورسەتەمىز.
جۇڭگو مەن وڭتۇستىك افريكانىڭ ءوزارا تيىمدىلىك جەتكىزەتىن ناقتى سەلبەستىگى مول جەتىستىككە قول جەتكىزدى، ءبىز ەكى جاقتىڭ بىرگە العا باساتىن دامۋ سەرىكتەرى بولۋىنا بىردەي قوسىلدىق. دامۋ ستراتەگياسىن ءتۇيىلىستىرۋدى كۇشەيتىپ، جۇڭگو − افريكا سەلبەستىك تالقى مىنبەرىنىڭ ”9 ءتۇرلى ينجەنەرياسىن“ جانە «جۇڭگو مەن وڭتۇستىك افريكانىڭ 10 جىلدىق سەلبەستىك ستراتەگيالىق جوباسىن» تياناقتاندىرۋدى نەگىزگى جەلى ەتىپ، باسىمدىققا يە سالالارداعى سەلبەستىكتى بەكەمدەپ، سەلبەستىكتىڭ جاڭا ارتۋ ءتۇيىنىن جەتىلدىرەمىز. جۇڭگو جاق وڭتۇستىك افريكانىڭ اناعۇرلىم كوپ ساپالى ونىمدەرىن يمپورت ەتىپ، جۇڭگو كاسىپورىندارىن وڭتۇستىك افريكاعا كەلىپ قارجى قوسىپ، شارۋاشىلىعىن گۇلدەندىرۋگە ۇزدىكسىز ىنتالاندىرىپ، ەكى ەلدىڭ ەلەكتر قۋاتى، جاڭا ەنەرگيا، عىلىم - تەحنيكادا جاڭالىق اشۋ سياقتى سالالارداعى سەلبەستىگىن ۇزدىكسىز تەرەڭدەتۋدى قالايدى.
ءبىز بىردەي جۇرت تىلەگىن توعىستىرۋعا ايرىقشا ءمان بەرەمىز، ەكى جاقتىڭ ءوزارا تۇسىنىسەتىن، ءوزارا جاقىن دوس سەرىكتەر بولۋىن دارىپتەيمىز. ءبىز سەلبەستىك بارىسىندا حالىقتى وزەك ەتۋگە تاباندى بولىپ، سەلبەستىك جەتىستىكتەرىنەن ەكى ەل حالقىن اناعۇرلىم كوپ يگىلىكتەندىرەمىز. جۇڭگو جاق وڭتۇستىك افريكا ۇكىمەتىنىڭ كاسىپتىك وقۋ - اعارتۋدى كۇشەيتۋىن، جاستاردىڭ جۇمىستانۋىن جەبەۋ قۇلشىنىسىن قولدايدى. ەكى جاق وقۋ - اعارتۋ، عىلىم - تەحنيكا، مادەنيەت، ساياحات سياقتى سالالاردا اۋىس - كۇيىستى، سەلبەستىكتى كۇشەيتۋگە قوسىلدى.
ءبىز ءبىر اۋىزدان بىلاي دەپ قارايمىز: جۇڭگو دا، وڭتۇستىك افريكا دا ماڭىزدى ىقپالعا يە وركەندەپ كەلە جاتقان ءىرى ەلدەر جانە بازارى جاڭادان گۇلدەنگەن ەلدەر، ەكى جاق ادىلدىكتى قورعاۋداعى دۇنيە جۇزىلىك سەرىكتەر بولۋى كەرەك. ستراتەگيالىق ىستەستىكتى كۇشەيتىپ، ناعىز كوپ جاقتىلىقتى امالياتتا ايگىلەپ، قالىڭ ”الەمدىك وڭتۇستىك“ ەلدەرىنىڭ الەمدىك باسقارۋداعى ۋاكىلدىك سيپاتى مەن ءسوز سويلەۋ ۇقىعى دەڭگەيىن جوعارىلاتۋدى ىلگەرىلەتۋىمىز كەرەك. جۇڭگو جاق افريكانىڭ ءبىر تۇلعالانۋ قۇرىلىسىن باتىل قولدايدى، افريكا وداعىنىڭ 20 ەل توبىنا كىرۋىنىڭ بيىل ماندىك ىلگەرىلەۋشىلىككە قول جەتكىزۋىن قولدايدى، وڭتۇستىك افريكانىڭ حالىقارالىق جانە وڭىرلىك ىستەردە اناعۇرلىم زور رول اتقارۋىن قولدايدى.
شي جينپيڭ بىلاي دەپ اتاپ كورسەتتى: بريكس ەلدەرى باسشىلارىنىڭ ديدارلاسۋى باستالۋ الدىندا تۇر. قازىرگى جاعدايدا بۇل رەتكى ديدارلاسۋ بريكس ەلدەرىنىڭ ىنتىماقتى، سەلبەستىكتى كۇشەيتۋىندە، بريكس سەلبەستىك مەحانيزمىنىڭ دامىپ زورايۋىن ىلگەرىلەتۋدە ماڭىزدى مانگە يە. بريكس ەلدەرىنىڭ كەزەكتى ءتوراعا ەلى رەتىندە، وڭتۇستىك افريكا ديدارلاسۋعا دايىندالۋ ءۇشىن قىرۋار توتەنشە ءونىمدى قىزمەتتەر ىستەدى، جۇڭگو جاق مۇنى ايرىقشا القايدى. ءار جاقتىڭ ورتاق قۇلشىنۋىندا وسى رەتكى بريكس ەلدەرى باسشىلارى ديدارلاسۋىنىڭ تولىق تابىستى بولاتىندىعىنا سەنەمىن.
شي جينپيڭ بىلاي دەپ باسا دارىپتەدى: بۇرسىكۇنى مەن رامافوسا زۇڭتۇڭمەن بىرگە جۇڭگو − افريكا باسشىلارىنىڭ كەڭەسىن باسقارامىن، بۇل جاڭا تيپتى ايدارشا ۆيرۋس ىندەتىنەن بەرى جۇڭگو − افريكا باسشىلارىنىڭ تۇڭعىش رەتكى توپتىق بەتپە - بەت كەزدەسۋى بولماق. ءبىز كەڭەسكە قاتىناساتىن باسقا افريكا ەلدەرى باسشىلارىمەن بىرگە جۇڭگو مەن افريكانىڭ ىنتىماقتاسا سەلبەسۋىنىڭ جاڭا جوباسىن كەسكىندەپ، جۇڭگو − افريكا جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ دامۋىنا جاڭا قۋاتتى قوزعاۋشى كۇش ۇستەيمىز.
رامافوسا مىنانى ءبىلدىردى: وڭتۇستىك افريكا مەن جۇڭگو ديپلوماتيالىق قارىم - قاتىناس ورناتقاندىعىنىڭ 25 جىلدىعى قارساڭىندا ءتوراعا شي جينپيڭنىڭ وڭتۇستىك افريكادا 4 - رەت مەملەكەتتىك ساپاردا بولۋىن قارسى العانىما ايرىقشا قۋانىشتامىن. وڭتۇستىك افريكا حالقى جۇڭگو ۇكىمەتى مەن حالقىنىڭ وڭتۇستىك افريكانىڭ ناسىلدىك وقشاۋلاۋعا قارسى تۇرۋ كۇرەسىنە، مەملەكەتتىڭ دامۋ ىستەرىنە قۇندى قولداۋ كورسەتكەندىگىنە ءارى وڭتۇستىك افريكانىڭ جاڭا تيپتى ايدارشا ۆيرۋس ىندەتىنە قارسى اتتانۋىن قىرۋار ەمدەۋ زاتتىق ماتەريالدارىمەن قامداعاندىعىنا شىن جۇرەكتەن العىس ايتادى. مەن ءتوراعا شي جينپيڭمەن بىرگە ءبىر - ءبىرىمىزدىڭ وزەكتى مۇددەمىزگە ساياتىن جانە ءجىتى قاداعالاپ وتىرعان كەلەلى ماسەلەلەردە ۇزدىكسىز باتىل ءوزارا قولداۋ كورسەتەتىنىمىزدى قايتالاي دارىپتەيمىن. ءبىز ەكى جاقتى ساۋدا قارجى قوسۋ سەلبەستىگىن تەرەڭدەتىپ، نەگىزدىك قۇرىلعى، ساياحات، وقۋ - اعارتۋ، سيفرلى ەكونوميكا سياقتى سالالارداعى ءوزارا تيىمدىلىك جەتكىزەتىن سەلبەستىكتى ونان ارى كەڭەيتىپ، كەلەلى حالىقارالىق، وڭىرلىك ماسەلەلەر جونىندە حالىقارالىق ىستەستىكتى كۇشەيتۋدى قالايمىز. جۇڭگو جاقتىڭ وڭتۇستىك افريكانىڭ بريكس ەلدەرى باسشىلارىنىڭ 15 - رەتكى ديدارلاسۋىن تابىستى وتكىزۋىن باتىل قولداعاندىعىنا العىس ايتامىن. مەن ءتوراعا شي جينپيڭمەن جانە باسقا بريكس ەلدەرى باسشىلارىمەن بىرگە قۇلشىنىپ، بريكس ەلدەرى مەن الەمدىك وڭتۇستىك ەلدەرىنىڭ حالىقارالىق باسقارۋداعى ءسوز سويلەۋ ۇقىعى دەڭگەيىن جوعارىلاتىپ، اناعۇرلىم ءادىل، ۇيلەسىمدى حالىقارالىق ءتارتىپ ورناتۋدى ىلگەرىلەتۋدى ءۇمىت ەتەمىن. مەن تاعى ءتوراعا شي جينپيڭمەن بىرگە جۇڭگو − افريكا باسشىلار كەڭەسىن باسقارىپ، افريكا − جۇڭگو سەلبەستىگىن تەرەڭدەتۋدى تالقىلاۋدى ءۇمىت ەتەمىن، مۇنىڭ، ءسوز جوق، افريكانىڭ ونەركاسىپتەنۋ جانە ءبىر تۇلعالانۋ اياق الىسىن ىلگەرىلەتۋگە كۇش ۇستەپ، الەمدىك وڭتۇستىك ەلدەرىنىڭ بىرگە دامىپ، گۇلدەنىپ - كوركەيۋدى جۇزەگە اسىرۋىنا كۇش ۇستەيتىندىگىنە سەنەمىن.
