□ انار بۇلت \ شينجياڭ گازەتىنىڭ ءتىلشىسى ساي زىڭلىنىڭ سۋرەتتى حابارى
8 - ايدىڭ 22 - كۇنى كۇندەلىكتى تۇتىنۋ بۇيىمدارى، اۋىل شارۋاشىلىعى ونىمدەرى جانە قۇرىلىس ماتەريالدارى تولتىرا تيەلگەن ”TIR“ بەلگىسى جاپسىرىلعان 5 اۆتوكولىك قاشقار كەدەنىنىڭ باقىلاۋ - باسقارۋ قامباسىنان شىقتى، شينجياڭ حونجيراپ شەكارا وتكەلىنەن ءوتىپ، 3 كۇن اينالاسىندا پاكيستاننىڭ استاناسى ءىسلامابادقا جەتەدى. بۇل جۇڭگو − پاكيستان ەكى ەلدىڭ ديپلوماتيالىق قارىم - قاتىناس ورناتقاننان بەرگى تۇڭعىش TIR تاسىمال كاسىبى بولىپ، شينجياڭنىڭ شەكارا اتتاعان تاسىمال ۇلگىسىن بايىتتى.
TIR بىرلەسكەن مەملەكەتتەر ۇيىمى شارتى نەگىزىندە قۇرىلعان الەمدىك شەكارا اتتاعان زات تاسىمالىنىڭ كەدەننەن ءوتۋ جۇيەسى، كەدەننەن ءوتۋ ءتارتىبىن ىقشامداۋ ارقىلى كەدەننەن ءوتۋ ونىمدىلىگىن جوعارىلاتىپ، كوپ جاقتى ساۋدا مەن حالىقارالىق تاسىمالدىڭ قولايلىلاسۋى مەن حاۋىپسىزدىگىن ىلگەرىلەتۋدى ماقسات ەتكەن. ەلىمىز 2016 - جىلى TIRعا رەسمي قاتىناستى. قازىر دۇنيە جۇزىندە TIR كەلىسىمى جونىنەن شارت جاساسقان 77 ەل بار، ”ءبىر بەلدەۋ، ءبىر جول“ بويىنداعى ەلدەردى دەرلىك قامتيدى. TIR تاسىمال زاتتارى باستالعان جەردەگى كەدەننەن كوزەۋلى جەردەگى كەدەنگە تاسىمالدانۋدىڭ تۇتاس بارىسىندا، شەكارادان وتەتىن بارلىق ەل كەدەندەرىنىڭ ەرەكشە جاعداي بولماسا، ساندىقتى اشىپ زاتتاردى تەكسەرۋى قاجەتسىز، كاسىپورىنداردىڭ شەكارادان وتۋگە كەپىلدىك ەتۋ قاراجاتىن دا تاپسىرۋى قاجەتسىز.
