شينحۋا اگەنتتىگىنىڭ 8 - ايدىڭ 23 - كۇنى يوحاننەسبۋرگتەن بەرگەن حابارى (تىلشىلەر حان لياڭ، لۋ جيافي). مەملەكەت ءتوراعاسى شي جينپيڭ يوحاننەسبۋرگتە بريكس ەلدەرى باسشىلارىنىڭ ديدارلاسۋىنا قاتىناسىپ جاتقان كەزىندە جەرگىلىكتى ۋاقىت 8 - ايدىڭ 23 - كۇنى تۇستەن كەيىن سەنەگال زۇڭتۇڭى ساللمەن كەزدەستى.
شي جينپيڭ بىلاي دەپ اتاپ كورسەتتى: سەنەگال جۇڭگونىڭ افريكاداعى ماڭىزدى سەلبەستىك سەرىگى. سوڭعى جىلدارى ەكى جاقتىڭ بىرگە قۇلشىنۋىندا جۇڭگو مەن سەنەگالدىڭ ساياسي ءوزارا سەنىمدىلىگى ۇزدىكسىز تەرەڭدەپ، ءارقايسى سالاداعى سەلبەستىگى سۇبەلى جەتىستىكتەرگە قول جەتكىزدى. جۇڭگو جاق سەنەگال جاقتىڭ مەملەكەتتىڭ ورنىقتىلىعى مەن دامۋىن قورعاۋ جولىندا جاساعان قۇلشىنىستارىن تاباندىلىقپەن قولدايدى، سەنەگال جاقپەن ءبىر - ءبىرىن قولداۋدى كۇشەيتىپ، ونەركاسىپ، اۋىل شارۋاشىلىعى، نەگىزدىك قۇرىلعىلار قۇرىلىسى، ادام كۇشى بايلىعىن اشۋ سياقتى سالالارداعى سەلبەستىكتى تەرەڭدەتىپ، ورىندى دامۋ ۇقىق - مۇددەسىن بىرگە قورعاپ، ەكى ەلدىڭ جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ اناعۇرلىم زور دامۋشىلىقتارعا قول جەتكىزۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: قازىرگى تاڭدا حالىقارالىق جاعدايدا تەرەڭ دە كۇردەلى وزگەرىس تۋىلدى، جۇڭگو مەن افريكا ىنتىماقتى، سەلبەستىكتى كۇشەيتۋدى بۇرىنعى ءارقانداي كەزدەگىدەن دە اناعۇرلىم قاجەت ەتەدى. جۇڭگو افريكا وداعىنىڭ 20 ەل توبىنا كىرۋىن قولدايدى، ۇزدىكسىز تۇردە شىنايى، بۇكپەسىز، باۋىرمال، ادال بولۋ ۇستانىمى مەن دۇرىس ادىلەت - مۇددە كوزقاراسىنان جازباي، ءوزىنىڭ دامۋ تاجىريبەسى مەن ورايىن افريكالىق باۋىرلاستارمەن ءبولىسىپ، جاڭا داۋىردەگى جۇڭگو − افريكا تاعدىرلاس ورتاق تۇلعاسىن قۇرۋدى ىلگەرىلەتەدى. جۇڭگو − افريكا سەلبەستىك تالقى مىنبەرىنىڭ ورتاق ءتوراعا ەلى رەتىندە، جۇڭگو مەن سەنەگال ءبىر - ءبىرىن قولداپ، سايكەسىپ، جۇڭگو مەن افريكانىڭ ىندەتكە ىنتىماقتاسا قارسى اتتانۋ جونىندەگى باسشىلار ەرەكشە كەڭەسى سياقتى ءبىر قىدىرۋ ماڭىزدى قيمىلداردى ءساتتى وتكىزدى. جۇڭگو جاق سەنەگال جاقپەن تىلدەسۋدى، سايكەستىكتى ۇزدىكسىز كۇشەيتىپ، جۇڭگو مەن افريكا سەلبەستىگىنىڭ ”9 ءتۇرلى ينجەنەرياسىن“ ويداعىداي تياناقتاندىرۋدى ىلگەرىلەتىپ، جۇڭگو مەن افريكانىڭ ىنتىماعىن، سەلبەستىگىن بەكەمدەۋگە جاڭا ۇلەس قوسۋدى قالايدى.
سالل مىنالاردى ءبىلدىردى: سەنەگال مەن جۇڭگو جوعارى ساپالى جان - جاقتى ستراتەگيالىق سەرىكتەر، ءتوراعا شي جينپيڭ افريكا مەن سەنەگالدىڭ ۇلى دوسى. ەكى جاق شىنايى دوستىق رۋحىن نەگىزگە الىپ، نەگىزدىك قۇرىلعى، ونەركاسىپ، اۋىل شارۋاشىلىعى، وقۋ - اعارتۋ سياقتى كەڭ كولەمدى سالالاردا ءوزارا تيىمدىلىك جەتكىزۋ سەلبەستىگىن ورىستەتتى. سەنەگال جاق ءبىر جۇڭگو ساياساتىن تاباندىلىقپەن اتقارادى، جۇڭگو جاق اتقارىپ وتىرعان بەيبىت ديپلوماتيا ساياساتىن القايدى، جۇڭگو جاقپەن ەكى جاقتى، كوپ جاقتى سەلبەستىكتى تەرەڭدەتۋدى ءۇمىت ەتەدى. افريكا مەن جۇڭگو سەلبەستىگى ومىرشەڭدىك كۇشكە تولى، افريكا جاقتىڭ دامۋ قاجەتىنە ۇيلەسەدى، ونىڭ ۇستىنە جوعارى ونىمدىلىكپەن تياناقتاندىرىلدى، بۇل افريكا ەلدەرىنىڭ ەكونوميكالىق، قوعامدىق دامۋىن پارمەندى قولدادى. جۇڭگو جاقتىڭ افريكا وداعىنىڭ 20 ەل توبىنا كىرۋىن الدىمەن اشىق قولداعاندىعىنا العىس ايتامىن. جۇڭگو مەن افريكا سەلبەستىگى تالقى مىنبەرىنىڭ ورتاق ءتوراعا ەلى رەتىندە، سەنەگال جاق جۇڭگو جاقپەن تىلدەسۋدى، سەلبەسۋدى ۇزدىكسىز قويۋلاتىپ، افريكا − جۇڭگو قارىم - قاتىناسىنىڭ اناعۇرلىم دامۋىن ىلگەرىلەتۋدى قالايدى.
ساي چي، ۋاڭ ي قاتارلىلار كەزدەسۋگە قاتىناستى.
شينحۋا اگەنتتىگىنىڭ 8 - ايدىڭ 23 - كۇنى يوحاننەسبۋرگتەن بەرگەن حابارى (تىلشىلەر ياڭ يجۇن، جۋ چاۋ). مەملەكەت ءتوراعاسى شي جينپيڭ يوحاننەسبۋرگتە بريكس ەلدەرى باسشىلارىنىڭ ديدارلاسۋىنا قاتىناسىپ جاتقان كەزىندە جەرگىلىكتى ۋاقىت 8 - ايدىڭ 23 - كۇنى تۇستەن كەيىن كۋبا مەملەكەت ءتوراعاسى دياز - كانەلمەن كەزدەستى.
شي جينپيڭ بىلاي دەپ اتاپ كورسەتتى: بىلتىر 11 - ايدا ءتوراعا جولداس جۇڭگودا ءساتتى تۇردە مەملەكەتتىك ساپاردا بولدى، ءبىز جاڭا داۋىردەگى جۇڭگو − كۋبا قارىم - قاتىناسىن ۇزدىكسىز تەرەڭدەتۋ جونىندە كەڭ كولەمدى ورتاق تانىمعا كەلىپ، جۇڭگو مەن كۋبا تاعدىرلاس ورتاق تۇلعاسىن قول ۇستاسا بىرگە قۇرۋعا ءبىر اۋىزدان ماقۇل بولدىق. ەكى جاقتىڭ بىرگە قۇلشىنۋىندا، وسى ورتاق تانىمدار اسا تاماشا تياناقتاندىرىلۋدا. جۇڭگو جاق كۋبا جاقپەن بىرگە ساياسي ءوزارا سەنىمدىلىكتى ۇزدىكسىز تەرەڭدەتىپ، ناقتى ىستەر سەلبەستىگىن كەڭەيتىپ، ستراتەگيالىق ىستەستىكتى قويۋلاتىپ، جۇڭگو − كۋبا ەكى پارتيانىڭ، ەكى ەلدىڭ ەرەكشە دوستىق قارىم - قاتىناسىنىڭ ۇزدىكسىز جاڭا دامۋشىلىقتارعا قول جەتكىزۋىن ىلگەرىلەتۋدى قالايدى. جۇڭگو جاق كۋبا جاقتىڭ جۇڭگونىڭ وزەكتى مۇددەسىنە ساياتىن ماسەلەلەردە باستان - اياق تاباندىلىقپەن جۇڭگو جاقتى قولداعاندىعىن ايرىقشا القايدى، كۋبانىڭ مەملەكەتتىڭ يەلىك ۇقىعىن قورعاۋىن، سىرتتىڭ كيلىگۋىنە جانە قۇرساۋلاۋىنا قارسى تۇرۋىن ۇزدىكسىز تاباندىلىقپەن قولدايدى ءارى كۋبانىڭ ەكونوميكالىق، قوعامدىق دامۋىنا مۇمكىندىگىنشە قولداۋ كورسەتەدى.
شي جينپيڭ بىلاي دەپ باسا دارىپتەدى: ”77 ەل توبى مەن جۇڭگو“ − وركەندەپ كەلە جاتقان ەلدەردىڭ ماڭىزدى سەلبەستىك تۇعىرى. كۋبا ”77 ەل توبى مەن جۇڭگونىڭ“ بيىلعى ءتوراعا ەلى رەتىندە، وركەندەپ كەلە جاتقان ەلدەردىڭ ىنتىماعىن كۇشەيتۋگە بەلسەندى ۇلەس قوستى. جۇڭگو جاق كۋبانىڭ كەلەر ايدا ”77 ەل توبى مەن جۇڭگو“ باسشىلار ءماجىلىسىن ءساتتى وتكىزۋىنە ايرىقشا ءمان بەرەدى ءارى مۇنى قولدايدى، كۋبامەن جانە 77 ەل توبىنداعى باسقا مۇشەلەرمەن بىرگە وركەندەپ كەلە جاتقان ەلدەردىڭ ورتاق مۇددەسى مەن دامۋ ۇقىق - مۇددەسىن اناعۇرلىم ويداعىداي قورعاۋدى قالايدى.
دياز - كانەل مىنالاردى ءبىلدىردى: مەنىڭ بىلتىر 11 - ايداعى جۇڭگوداعى مەملەكەتتىك ساپارىم ءساتتى بولدى، ەكى جاق ءبىز كەلىسكەن ماڭىزدى ورتاق تانىمداردى مۇقيات تياناقتاندىرۋدا. كۋبا − جۇڭگو قارىم - قاتىناسى قازىر تاريحتاعى ەڭ جوعارى دەڭگەيدە تۇر. كۋبا حالقى ءتوراعا شي جينپيڭگە ەرەكشە سۇيىنەدى، جۇڭگونىڭ كۋبانىڭ ادىلەت ىستەرىن تۇسىنگەندىگىنە جانە بۇعان قىمباتتى قولداۋ كورسەتكەندىگىنە شىن جۇرەكتەن العىس ايتادى. كۋبا جاق ءتوراعا شي جينپيڭ العا قويعان الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن تاباندىلىقپەن قولدايدى، جۇڭگو جاقپەن ”ءبىر بەلدەۋ، ءبىر جولدى“ بىرگە قۇرۋ سەلبەستىگىن تەرەڭدەتىپ، كۋبا − جۇڭگو تاعدىرلاس ورتاق تۇلعاسىن قۇرىپ، ءوز ەرەكشەلىكتەرىنە يە سوتسياليزم قۇرۋ جولىندا قول ۇستاسا العا ىلگەرىلەۋدى قالايدى. كۋبا جاق جۇڭگو جاقپەن سەلبەستىكتى نىعايتىپ، ”77 ەل توبى مەن جۇڭگو“ باسشىلار ءماجىلىسىنىڭ تابىسقا قول جەتكىزۋىن ىلگەرىلەتۋدى قالايدى.
ساي چي، ۋاڭ ي قاتارلىلار كەزدەسۋگە قاتىناستى.
شينحۋا اگەنتتىگىنىڭ 8 - ايدىڭ 23 - كۇنى يوحاننەسبۋرگتەن بەرگەن حابارى (تىلشىلەر مياۋ شياۋجۋان، جىڭ كايجۇن). مەملەكەت ءتوراعاسى شي جينپيڭ يوحاننەسبۋرگتە بريكس ەلدەرى باسشىلارىنىڭ ديدارلاسۋىنا قاتىناسىپ جاتقان كەزىندە جەرگىلىكتى ۋاقىت 8 - ايدىڭ 23 - كۇنى تۇستەن كەيىن ەفيوفيا زۇڭليى ابيمەن كەزدەستى.
شي جينپيڭ بىلاي دەپ اتاپ كورسەتتى: جۇڭگو ەفيوفيانىڭ سەنىمدى دوسى جانە شىنايى سەرىگى. سوڭعى جىلدارى ەكى ەل جوعارى جىكتەگىلەردىڭ ءجيى اۋىس - كۇيىسىن، تىلدەسۋىن ساقتاپ، ”ءبىر بەلدەۋ، ءبىر جولدى“ بىرگە قۇرۋ، جۇڭگو − افريكا سەلبەستىك تالقى مىنبەرى سياقتى جۇلگەلەردەگى سەلبەستىكتەردە مول جەتىستىكتەرگە قول جەتكىزدى. جۇڭگو جوعارى ساپالى دامۋ ارقىلى جۇڭگو ۇلگىسىندەگى وسىزامانداندىرۋدى ىلگەرىلەتۋدە، بۇل جۇڭگو − ەفيوفيا سەلبەستىگىنە جاڭا وراي اكەلەدى. جۇڭگو جاق ەفيوفيامەن قارىم - قاتىناستى دامىتۋعا ايرىقشا ءمان بەرەدى، ەفيوفيانىڭ ەل ىشىندەگى بەيبىتشىلىك اياق الىسىن جانە دامۋىن، گۇلدەنۋىن قولدايدى، ەفيوفيا جاقپەن ەكى جاقتى قارىم - قاتىناستى قويۋلاتىپ، جان - جاقتى سەلبەستىكتى كەڭەيتىپ، ەكى ەل دوستىعىن جۇرت جۇرەگىنە اناعۇرلىم تەرەڭ ۇيالاتىپ، جۇڭگو مەن ەفيوفيانىڭ جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ اناعۇرلىم دامۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: ەكى جاق ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ۇزدىكسىز ءبىرىن - ءبىرى تاباندىلىقپەن قولداپ، ”ءبىر بەلدەۋ، ءبىر جولدى“ بىرگە قۇرۋ باستاماسىن ەفيوفيانىڭ ”2021 − 2030 - جىلعا دەيىنگى 10 جىلدىق دامۋ جوباسىمەن“ تىعىز ءتۇيىلىستىرىپ، ادديس ابەبا − جيبۋتي تەمىر جولى، جاسىل دامۋ سياقتى سەلبەستىك نىساندارىن جەدەل ىلگەرىلەتۋى كەرەك. جۇڭگو جاق اناعۇرلىم كوپ جۇڭگو كاسىپورىندارىن ەفيوفياعا بارىپ قارجى قوسىپ، كاسىپتى گۇلدەندىرۋگە ىنتالاندىرادى، ەفيوفيا جاقتىڭ افريكانىڭ اۋىل شارۋاشىلىعى ونىمدەرىن جۇڭگوعا جەتكىزەتىن ”جاسىل ارنادان“ ويداعىداي پايدالانىپ، ەكى ەلدىڭ ەكونوميكا - ساۋدا سەلبەستىگىن كەڭەيتۋىن قارسى الادى. جۇڭگو جاق ەفيوفيا جاقپەن بىرگە ”افريكا ءمۇيىسى بەيبىت دامۋ ويىن“ تياناقتاندىرۋدى ىلگەرىلەتىپ، ءوڭىردىڭ بەيبىتشىلىگى مەن ورنىقتىلىعىنا ۇلەس قوسۋدى قالايدى.
ابي مىنالاردى ءبىلدىردى: ەفيوفيا مەن جۇڭگونىڭ دوستىعى توتەنشە تەرەڭ، ەكى ەل قارىم - قاتىناسى تاماشا دامۋ جاعدايىن ساقتادى. جۇڭگو جاقتىڭ ۇزاق ۋاقىتتان بەرى ەفيوفياعا قىرۋار قىمباتتى قولداۋ كورسەتكەنىنە شىن جۇرەكتەن العىس ايتامىن، جۇڭگونىڭ كومەگى مەن سەلبەستىگىنىڭ ارقاسىندا، ەفيوفيادا تاياۋ جىلداردان بەرى اسا زور دامۋ، وزگەرىستەر تۋىلدى. ەفيوفيانىڭ جۇڭگومەن ۇقساس كەشىرمەسى بار، كوپتەگەن كەلەلى ماسەلەلەردە تۇرعىسى ۇقساس. ەفيوفيا جۇڭگومەن دوستىعىن ايرىقشا قاستەرلەيدى، ءبىر جۇڭگو ساياساتىن تاباندىلىقپەن اتقارادى، ءتوراعا شي جينپيڭ العا قويعان الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن قولدايدى، ”ءبىر بەلدەۋ، ءبىر جولدى“ بىرگە قۇرۋ سەلبەستىگىنە بەلسەنە ات سالىسادى، جۇڭگونىڭ ەل باسقارۋداعى تاجىريبەلەرىن ۇيرەنىپ، ۇلگى الىپ، ءوز ەلىنىڭ دامۋىن اناعۇرلىم ويداعىداي جۇزەگە اسىرۋدى قالايدى. ەفيوفيا جۇڭگومەن اۋىل شارۋاشىلىعى، كەن شارۋاشىلىعى سياقتى سالالارداعى سەلبەستىكتى تەرەڭدەتۋدى قالايدى، بريكس ەلدەرىنە مۇشە بولىپ، كوپ جاقتى مەحانيزم سەلبەستىگىن نىعايتىپ، ەكى ەلدىڭ اناعۇرلىم كوركەم ورتاق بولاشاعىن اشۋدى ءۇمىت ەتەدى.
ساي چي، ۋاڭ ي قاتارلىلار كەزدەسۋگە قاتىناستى.
شينحۋا اگەنتتىگىنىڭ 8 - ايدىڭ 23 - كۇنى يوحاننەسبۋرگتەن بەرگەن حابارى (تىلشىلەر ما جىڭ، شيە جياڭ). مەملەكەت ءتوراعاسى شي جينپيڭ يوحاننەسبۋرگتە بريكس ەلدەرى باسشىلارىنىڭ ديدارلاسۋىنا قاتىناسىپ جاتقان كەزىندە جەرگىلىكتى ۋاقىت 8 - ايدىڭ 23 - كۇنى تۇستەن كەيىن بانگلادەش زۇڭليى حاسينامەن كەزدەستى.
شي جينپيڭ بىلاي دەپ اتاپ كورسەتتى: جۇڭگو مەن بانگلادەش ءداستۇرلى دوس. 2016 - جىلى ءبىز جۇڭگو − بانگلادەش قارىم - قاتىناسىن ستراتەگيالىق سەلبەستىك سەرىكتەستىك قارىم - قاتىناس دەڭگەيىنە كوتەرىپ، ەكى ەلدىڭ سەلبەستىكتى تەرەڭدەتۋىنە ايقىن بەتالىس كورسەتتىك. قازىر جۇڭگو مەن بانگلادەش ەكى ەل وزدەرىنىڭ دامۋىنىڭ، گۇلدەنۋىنىڭ شەشۋشى كەزەڭىندە تۇر. جۇڭگو جاق بانگلادەش جاقپەن دامۋ ستراتەگيالارىن ءتۇيىلىستىرۋدى كۇشەيتىپ، ءار سالاداعى ناقتى سەلبەستىكتى تەرەڭدەتىپ، جۇڭگو مەن بانگلادەشتىڭ ستراتەگيالىق سەلبەستىك سەرىكتەستىك قارىم - قاتىناسىنىڭ تىڭ ساتىعا كوتەرىلۋىن ىلگەرىلەتىپ، ەكى ەل حالقىنا اناعۇرلىم مول قۇت - ىرىس اكەلۋدى قالايدى.
شي جينپيڭ بىلاي دەپ باسا دارىپتەدى: جۇڭگو جاق بانگلادەش جاقتىڭ مەملەكەتتىڭ يەلىك ۇقىعىن، تاۋەلسىزدىگىن، تەرريتوريا تۇتاستىعىن قورعاۋىن، سىرتقى كيلىگۋگە قارسى تۇرۋىن، ەل ىشىندەگى ىنتىماق پەن ورنىقتىلىقتى قورعاۋىن، دامۋدى، گۇلدەنۋدى جۇزەگە اسىرۋىن قولدايدى، بانگلادەش جاقپەن ءبىر - ءبىرىنىڭ وزەكتى مۇددەسىنە ساياتىن ماسەلەلەردە ۇزدىكسىز ءبىرىن - ءبىرى تاباندىلىقپەن قولداۋدى قالايدى. ەكى جاق ستراتەگيالىق بايلانىستى كۇشەيتىپ، ءارقايسى تاراۋلاردىڭ، ءارقايسى جىكتەگىلەردىڭ بارىس - كەلىسىن نىعايتۋى كەرەك. ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى ىلگەرىلەتىپ، ەكى ەل ەكونوميكاسىنىڭ ءبىرىن - ءبىرى تولىقتاۋ باسىمدىعىن تولىق ساۋلەلەندىرىپ، نەگىزدىك قۇرىلعى، ينفورماتسيا تەحنيكاسى، جاڭا ەنەرگيا، اۋىل شارۋاشىلىعى سياقتى سالالارداعى سەلبەستىكتى كۇشەيتۋى كەرەك. ادامدار ارا بارىس - كەلىستى كۇشەيتىپ، گۋمانيتارلىق اۋىس - كۇيىستى تەرەڭدەتۋ كەرەك. بانگلادەشتىڭ بريكس ەلدەرىنىڭ جاڭا وركەندەتۋ بانكەسىنە مۇشە بولعاندىعىن قۇتتىقتايمىن، جۇڭگو جاق بانگلادەشپەن كوپ جاقتى ىستەردەگى سايكەسۋ مەن سەلبەسۋدى كۇشەيتىپ، حالىقارالىق ادىلدىك پەن ادىلەتتىلىكتى جانە وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.
حاسينا مىنالاردى ءبىلدىردى: ءتوراعا شي جينپيڭنىڭ 2016 - جىلعى بانگلادەشتەگى ءساتتى مەملەكەتتىك ساپارى ەكى ەل قارىم - قاتىناسىنداعى بەلەستىك ىسكە اينالدى. جۇڭگو جاقتىڭ بانگلادەشتىڭ جاڭا تيپتى ايدارشا ۆيرۋس ىندەتىنە قارسى اتتانۋىنا جانە ەكونوميكالىق دامۋىنا قىمباتتى قولداۋ كورسەتكەندىگىنە، بانگلادەشتىڭ دامۋى مەن حالىق تۇرمىسىنىڭ جاقسارۋىنا كومەكتەسكەندىگىنە العىس ايتامىن. بانگلادەش پەن جۇڭگونىڭ تاماشا قارىم - قاتىناسى ءوزارا قۇرمەت ەتۋدى جانە ءبىر - ءبىرىنىڭ ىشكى ىسىنە كيلىكپەۋدى نەگىز ەتكەن. ءتوراعا شي جينپيڭنىڭ ”ءبىر بەلدەۋ، ءبىر جول“ باستاماسىن العا قويعاندىعىنىڭ 10 جىلدىعىن قۇتتىقتايمىن، ”ءبىر بەلدەۋ، ءبىر جولدى“ بىرگە قۇرۋ بانگلادەشكە دامۋدىڭ جاڭا قاقپاسىن اشتى. بانگلادەش جاق ءبىر جۇڭگو ساياساتىن باتىل اتقارادى، جۇڭگو جاقتىڭ ءوڭىردىڭ بەيبىتشىلىگى مەن ورنىقتىلىعىن جەبەۋدە ماڭىزدى رول اتقارعاندىعىن القايدى. بانگلادەش جاق جۇڭگو جاقپەن ەكى جاقتى قارىم - قاتىناستى تەرەڭدەتۋدى، بريكس سياقتى كوپ جاقتى مەحانيزمدەگى سەلبەستىكتى كۇشەيتۋدى قالايدى، بريكس مەحانيزمى دامۋىنىڭ، زورايۋىنىڭ وركەندەپ كەلە جاتقان ەلدەرگە جاڭا دامۋ ورايىن اكەلەتىندىگىنە سەنەدى.
ساي چي، ۋاڭ ي قاتارلىلار كەزدەسۋگە قاتىناستى.
