جەدەل جولداما جەتكىزۋشى، ەگىنشى، كاۋاپشى...
مىنە وسىنداي شينجياڭدىق ازاماتتار ۇيىرمە قۇراپ، مەملەكەتتىك ”قىستاق BA“جارىسىندا بوي كورسەتتى
□ انار بۇلت \ شينجياڭ گازەتىنىڭ ءتىلشىسى ۋاڭ جيڭجيڭ
8 - ايدىڭ 28 - كۇنى بەسارىق قالاشىعى قۇراماسىنىڭ دوپشىسى جارىستا سەكىرىپ بارىپ گارعا دوپ سالۋدا. سول كۇنى شيجي اۋدانىنىڭ باسكەتبول ساياباعىندا شينجياڭ قاعىلىق اۋدانى بەسارىق قالاشىعىنىڭ باسكەتبول قۇراماسى وسى رەتكى مەملەكەتتىك ”قىستاق BA“ جارىسىنىڭ العاشقى كەزدەسۋىن قارسى الدى. ەڭ سوڭىندا بەسارىق قالاشىعى قۇراماسى 50 : 44 ۇپايمەن حىنان ولكەسى سانمىنشيا قالاسى ليڭباۋ قالاسى جياۋسۇن قالاشىعى قۇراماسىنان قاپيادا جەڭىلىپ قالدى.
□ سۋرەتتى انار بۇلت \ شينجياڭ گازەتىنىڭ ءتىلشىسى ارمان رازاق تۇسىرگەن
قۇمىلدان تىزگىن ۇشىمەن قايتىپ كەلگەن جەدەل جولداما جەتكىزۋشى جىگىت، ساۋداسى كۇسەت كاۋاپ جايماسىنداعى كاۋاپشى ۇستاز، ونداعان مۋ جەرگە ەگىن سالىپ باپتاپ وتىرعان ەگىمشى باي ديقان، كۇندىك كىرىسى 600 يۋاندىق تيەۋىش ماشينا جۇرگىزۋشىسى... نيڭشيا حۇيزۋ اۆتونوميالى رايونىندا مەملەكەتتىك جاراسىمدى دا كورىكتى اۋىل - قىستاق باسكەتبول جارىسىنىڭ ”قىستاق BA“ جارىسى باتىس سولتۇستىك جارىس رايونىندا جارىسقا قاتىناسىپ جاتقان قاعىلىق اۋدانى بەسارىق قالاشىعى باسكەتبول قۇراماسى بولعان وسى 15 ادامدىق قوسىن اۋىل - قىستاق جاستارىنىڭ كاسىپ سۋرەتتەر جيناعى، سونداي - اق جاڭا داۋىردەگى شينجياڭنىڭ اۋىل - قىستاق تۇرمىسىنىڭ شاعىن كارتيناسى ىسپەتتى.
8 - ايدىڭ 28 - كۇنى نيڭشيانىڭ شيجي اۋدانىنا جەتكەننەن كەيىنگى 4 - كۇنى شيجي اۋدانىنىڭ باسكەتبول ساياباعىندا بەسارىق قالاشىعى باسكەتبول قۇراماسىنىڭ جىگىتتەرى وسى رەتكى مەملەكەتتىك ”قىستاق BA“ جارىسى باتىس سولتۇستىك جارىسىنىڭ العاشقى كەزدەسۋىن قارسى الدى. اۆتوبۋزدان پويەزگە اۋىسىپ، 3000 كيلومەتردەن استام جول باسقان جىگىتتەر شيجي اۋدانىنا 40 نەشە ساعاتتا ارەڭ جەتتى.
العاشقى استان اۋىز تيە بەرگەندە، سيىر ەتى كەسپەسى دۇكەنىنىڭ قوجايىنى ولاردىڭ مەملەكەتتىك ”قىستاق BA“ جارىسىنا قاتىناسۋ ءۇشىن شينجياڭنان كەلگەندىگىن بىلگەن سوڭ، ولارعا ۇندەمەي كاۋاپ اكەلىپ بەردى. ”تاماقتان سوڭ اقشا المايمىن دەدى، بۇيتسە قايتىپ بولادى؟ ءبىز قوياردا قويماي ءجۇرىپ ءوزىمىز ەسەپتەپ ەكىلىكتى جايمالاپ، ەسەبىن جاۋىپ كەتتىك“. قۇراما مۇشەسى مامەتازەز وبۇل بىلاي دەدى: ”كوڭىلىن قابىل الدىق، ءبىراق اقشانى، ءسوز جوق، تولەۋىمىز كەرەك“.
جارىسقا قاتىناسۋ ءۇشىن 27 جاستاعى مامەتازەز قۇمىلدان اۋىلىنا قايتىپ توپتىق جاتتىعۋعا قاتىناستى. قۇمىلدا جەدەل جولداما جەتكىزۋشى بولعان 3 جىلدا اۋىلىن ساعىنىپ، شەشەسىنىڭ ءدامدى تاماعىن اڭساعان ول قىستاقتاعى باسكەتبول جارىسىن دا قيماي جۇرگەن - دى.
بەسارىق قالاشىعى ءۇرتىس 6 جىل بويى قىستاق باسكەتبول جارىسىن وتكىزىپ كەلەدى، 19 قىستاق اراسىنداعى قيان - كەسكى بەلدەسۋدە ءبىرىنشى ورىنعا يە بولعان دوپشى سيلىق سوماسىنا قول جەتكىزسە، جەڭىسكە جەتكەن قوسىننىڭ ءبارى قوي، تاۋىق شوجەسى، قاز بالاپانى سياقتىلارمەن سيلاندى.
مامەتازەز ءار جولعى جارىستىڭ بارلىعىنا قاتىناسىپ كەلەدى. بيىلعى قىستاقتار اراسىنداعى گرۋپپالار جارىسىندا ول قۇمىلدا جۇمىستا بولعاندىقتان، قول تەلەفونداعى تىكە تاراتۋ ارقىلى باسكەتبول قۇراماسىنىڭ تاكتيكاسىن رەتتەۋىنە كومەكتەستى. قۇراما شيرەك شەشۋشى جارىسقا كىرگەندە ول رۇقسات الىپ اۋىلىنا قايتىپ، جارىسقا قاتىناستى، ”تۋىسشىلاۋ دەمالىسىن الۋعا بولادى، بار بولعانى جالاقى تاراتقاندا تەك نەگىزگى ەڭبەكاقىنى عانا الا الامىن“. بيىل ول قىستاق باسكەتبول قۇراماسىن باستاپ بۇكىل قالاشىق بويىنشا 3 - ورىندى يەلەپ، ءبىر قويمەن سيلاندى.
بيىل بەسارىق قالاشىعىنداعى 19 قىستاق 170 نەشە مايدان جارىس وتكىزدى، جەتەكشى ابدۇقيۇم ابلەت پەن جاتتىقتىرۋشى ءادىل ءسىلام بۇكىل قالاشىقتاعى 280 نەشە دوپشىنىڭ ىشىنەن بەينەسى ءبىرشاما جاقسى 40 دوپشىنى ىرىكتەپ الدى. بۇكىل شينجياڭنىڭ ”قىستاق BA“ جارىسىنىڭ حابارلاندىرۋىن تاپسىرىپ العان سوڭ، ولار دوپشىلارعا حابارلاسىپ، قوسىن ۇيىمداستىردى.
جەتەكشىنىڭ تەلەفونىن قابىلداعان كەزىندە، مامەتازەر قۇمىلعا قايتىپ بارىپ، قىزمەتىن ىستەپ جاتقان بولاتىن. جەتەكشى ودان قاشقارعا ۋاكىل بولىپ بۇكىل شينجياڭنىڭ ”قىستاق BA“ جارىسىنا قاتىناسۋى ءۇشىن ونىڭ تاعى دا قايتىپ كەلە الاتىن - المايتىندىعىن سۇراعان كەزدە ول ءارى - ءسارى بولىپ قالدى.
قايتا - قايتا وي ەلەگىنەن وتكىزە كەلە، مامەتازەز ءوزى سەكىلدى اۋىلعا قايتىپ جارىسقا قاتىناسۋعا ۇسىنىس ەتىلگەن، قورعاستا ترۋبا جۇمىسكەرى بولىپ ىستەيتىن وبۇلقاسىم ابدۇللاعا تەلەفون سوعىپ اقىلداستى. ”قوجايىنىما باسكەتبولدى جاقسىراق ويناساق شينجياڭعا ۋاكىل بولىپ مەملەكەتتىك ’قىستاق BA‘ جارىسىنا قاتىناسۋىمىزعا بولاتىندىعىن ايتتىم. ول كىسى دە باسكەتبولدى ۇناتۋشى ەدى، ەگەر دە شينجياڭدا جۇلدەگەر بولساق، جالاقىنىڭ اۋەلگىدەي تاراتىلا بەرەتىندىگىن ايتتى“. وبۇلقاسىم تەلەفوندا تەبىرەنە سويلەپ، بۇكىل شينجياڭ بويىنشا وتكىزىلگەن جارىسقا قاتىناسۋعا اۋىلعا قايتۋ ءۇشىن بەلەت الىپ قويعاندىعىن ايتتى.
سونىمەن مامەتازەز بەلىن بەكەم بۋىپ باسشىسىنان رۇقسات سۇرايدى. ”ول ءالى باس قۇرامادى، ەشقانداي تۇرمىستىق اۋىرتپاشىلىعى جوق، مەن ونىڭ ارمانى مەن اۋەسى ءۇشىن جاساعان قۇلشىنىسىن قولداۋ ءۇشىن تاباندا رۇقسات بەردىم“، - دەدى باسشىسى.
شينجياڭ ”قىستاق BA“ جارىسىنىڭ جالپى شەشۋشى جارىسى وتكىزىلەردەن ءبىر كۇن بۇرىن عانا، 15 ادامدىق قوسىنداعىلار ارەڭ جينالىپ ۇلگىردى. بۇدان بۇرىن كوپشىلىك تۇگەل قىستاققا ۋاكىل بولىپ باسكەتبول جارىسىنا قاتىناسقاندىقتان ارىندارى ءالى قايتا قويماعان ەدى ، شەشۋشى جارىسقا دەيىن قايراتتانىپ، ەڭ سوڭىندا اعا جۇلدەگەر بولدى.
تيەۋىش ماشينانىڭ رولىنا جابىسىپ تۇرىپ، قول تەلەفونىندا جىگىتتەردىڭ اعا جۇلدەگەر بولعان جارىسىن كورگەن سوڭ، ورتاڭعى اتويشى مۇحتار نۇراحىمەت قۇرىلىس ورنىندا: ”مەن مەملەكەتتىك جارىسقا ءسوزسىز قاتىناسامىن“ دەپ داۋىستاپ جىبەردى. A جاقپەن توقتامعا قول قويىسقاندىقتان، ءسوز جوق، بەلگىلەنگەن شەكتى مەرزىم ىشىندە جۇمىستى اياقتاتۋى كەرەك بولعاندىقتان، ول شينجياڭ ”قىستاق BA“ جارىسىنىڭ جالپى شەشۋشى جارىسىنا قاتىناسا الماي قالعان بولاتىن. مۇحتار قولىنداعى جۇمىستاردى جەدەلدەتە ءبىتىرىپ، اكەسىنەن ءوزىنىڭ كەلەسى قۇرىلىس جۇمىسىن ىستەپ بەرۋدى ءوتىندى دە، قۇراماعا قايتىپ شوعىرلى جاتتىعۋعا قاتىناسىپ، مەملەكەتتىك ”قىستاق BA“ جارىسىنىڭ باتىس سولتۇستىك جارىسىنا قاتىناسۋعا دايىندالدى.
جىگىتتەر بىرگە جينالىپ، شوعىرلى جاتتىعۋعا قاتىناسىپ، قولدارى بوساعاندا باسكەتبول قۇراماسىنىڭ باستىعى مامەت امەتتوحتىنىڭ ۇيىنە كاۋاپ جەۋگە بارادى، ”مەنىڭ جاسىم بارىنەن ۇلكەن، بالا كەزىمىزدە ولاردى باستاپ باسكەتبول وينايتىنبىز، قازىر ولار ازامات بولىپ، سىرتتا جۇمىس ىستەۋدە، قايتىپ كەلسە بولدى مەنى ىزدەي كەلىپ، امانداسىپ قايتادى“. قۇرامانىڭ باستىعى مامەت ءۇيىنىڭ ماڭىنداعى ءبىر شاعىن كەشكى بازارداعى جايمادا تيجارات جۇرگىزەدى، 10 نەشە ۇستەل قويىپ، ءار كۇنى تاڭەرتەڭ ەت اكەلىپ، ەت تۋراپ، سودان كەيىن اعاسىمەن بىرگە ىستىككە كاۋاپ تۇيرەيدى. تۇنگى ساعات 11دە قوناقتار تاراعان سوڭ، ول باسكەتبولىن الىپ تاياۋ جەردەگى باسكەتبول الاڭىندا ءبىراز دوپ وينايدى، ”ءبىر كۇندىك بەيمازالىق پەن قالجىراۋ ازىراق باسكەتبول ويناعان سوڭ - اق لەزدە عايىپ بولادى“.
قىستاقتاعى ەگىمشى باي ديقان ابدۇراحمان اتاۋۇللا مەن قۇراما باستىعى مامەت ەكەۋى دوپسەرىكتەر. ورتا مەكتەپ وقىعان كەزدەرىندە بىرگە دوپ وينايتىن، مەكتەپ بىتىرگەن سوڭ بىرگە جۇمىس ىستەدى، اۋىلعا قايتقان سوڭ وتاۋ تىگىپ، تىرشىلىك قۇرعان سوڭ دا بىرگە دوپ ويناپ ءجۇردى. بۇرىندارى دوپ ويناۋ سياقى، سيلىق الۋ ءۇشىن بولسا، قازىر ءبارىنىڭ تۇرمىسى جاقسى، ”تيەۋىش ماشينا جۇرگىزىپ كۇنىنە 500 − 600 يۋان اقشا تاباتىن جىگىتتەر نەلىكتەن كەلىپ دوپ وينايدى؟ ارينە ابىروي ءۇشىن. شينجياڭ اتىنان مەملەكەتتىك جارىسقا قاتىناسۋدى ىشتەي ماقتانىش ەتەمىن“، - دەدى ابدۇراحمان.
بەسارىق قالاشىعى بۇكىل شينجياڭداعى ءتۇرلى باسكەتبول جارىستارىندا تالاي رەت تاماشا ناتيجەگە قول جەتكىزدى، سوڭعى 8 جىلدان بەرى ءار دارەجەلى مەكەمە - ورىندار ولاردىڭ قالاشىعىنا 8000عا جۋىق باسكەتبول تارتۋ ەتتى، بۇكىل قالاشىقتاعى 8000 وتباسىنىڭ اربىرىنە نەگىزىنەن تەگىن باسكەتبول تاراتىلىپ بەرىلدى، قىستاق بىتكەننىڭ بارىندە 1 − 2 باسكەتبول الاڭى بار. ”باسكەتبول الدەقاشان ءبىر رۋحقا اينالىپ، كوپشىلىكتىڭ جۇرەگىنەن تەرەڭ ورىن الدى“، - دەدى جەتەكشى ابدۇقيۇم.
8 - ايدىڭ 28 - كۇنى حىنان ولكەسى سانمىنشيا قالاسى ليڭباۋ قالاسى جياۋسۇن قالاشىعىنىڭ باسكەتبول قۇراماسىمەن سايىسقا تۇسكەندە باسكەتبول الاڭىنىڭ تاماشالاۋ تەكشەسى جىپىرلاعان ادامعا تولدى، مامەت الىستان 3 ءنومىرلى دوپ سالدى، ابدۇراحمان قايسارلىقپەن قورعاندى، مۇحتار سەكىرىپ بارىپ گارعا دوپ سالدى... تۇرمىستا سالماقتى دا كەم ءسوزدى ولاردىڭ باسكەتبول الاڭىندا جايساڭ دا اشىق - جارقىن بەينەلەرى نۇر شاشتى. باسكەتبول ولاردىڭ باسىن ءبىر اراعا قوستى، وسى زامانعى اۋىل - قىستاقتىڭ ومىرشەڭدىگى جارىس الاڭىندا تولىق ايگىلەندى.
