□ انار بۇلت \ شينجياڭ گازەتىنىڭ تىلشىلەرى ءرايدا، ليۋ دۇڭلاي
گۋدوك ۇنىنە ىلەسە، قىزىل، اق، سارى، جاسىل ءتۇستى... ”الىپ كولىكتەر“ جانىمىزدان جۇيتكىپ ءوتىپ جاتىر. 8 - ايدىڭ 23 - كۇنى شينجياڭ گازەتى مەكەمەسى (توبى) ”سامعاۋ جولى − ’ءبىر بەلدەۋ، ءبىر جول‘ جەلى بويى جالپىلىق مەديالارىنىڭ كولەمدى حابارى“ تىلشىلىك شاعىن بولىمشە اترەتى شي - ان ەكونوميكالىق - تەحنيكالىق اشۋ رايونى جيڭۋي ونەركاسىپ باقشا رايونىنا ورنالاسقان شانشي اۆتوكولىگى جارنا تىزگىندەۋ توبى شەكتى سەرىكتەستىگىنىڭ باس شتابىنا كەلدى، ءوندىرىس باقشا رايونىنداعى قاربالاس كورىنىس تىلشىلەردى ەرىكسىزدەن تاڭداي قاقتىردى.
شانشي اۆتوكولىك توبى شي - ان ساۋداعا پايدالانىلاتىن اۆتوكولىك كاسىپ سالاسى باقشاسىندا، اق حالات كيىنگەن رىن مينكاڭ ءارقايسى بولشەك قويمالار اراسىندا شاپقىلاپ ءجۇر ەكەن.
ءوندىرىس كەزەكتى ءماجىلىسىن اشۋ، تاپسىرىستى تەكسەرۋ، ءوندىرىس جوسپارىن اقتارىپ كورۋ، اۆتوكولىك ورنالاستىرۋ، ماتەريالداردى ۇيىمداستىرۋ، اۆتوكولىككە تيەلگەن ۇساق بولشەكتەردى تۇگەندەۋ... بۇل شانشي اۆتوكولىك توبى شينجياڭ اۆتوكولىك شەكتى سەرىكتەستىگى شي - ان ءىس باسقارماسىنىڭ مەڭگەرۋشىسى رىن مينكاڭنىڭ كۇندەلىكتى قىزمەتى.
”تاۋارلار وسى ارادان جونەلتىلىپ، اۆتوكولىكپەن 80 نەشە ساعاتتا ۇرىمجىگە جەتەدى. ءبىز شينجياڭ سەرىكتەستىگىنە قاجەتتى بولشەكتەردى، ءسوز جوق، دالمە - ءدال، اينا - قاتەسىز تولىق دايىنداپ بەرۋىمىز كەرەك، ءبىر بۇراندا شەگەسى كەم بولسا دا، ءوندىرىستىڭ اياق الىسىنا اسەرىن تيگىزەدى“، - دەدى رىن مينكاڭ.
رىن مينكاڭنىڭ شانشي اۆتوكولىك توبى باس شتابىنان شانشي اۆتوكولىك توبى شينجياڭ سەرىكتەستىگى شي - ان ءىس باسقارماسىنا اۋىسىپ مىندەت اتقارعانىنا 6 جىل بولدى. وسى ارالىقتا ونىڭ العان ەڭ ۇلكەن اسەرى بارعان سايىن قاربالاس بولىپ بارا جاتقانى بولدى. ”اسىرەسە، 2021 - جىلدان باستاپ وسى ارادان شينجياڭ سەرىكتەستىگىنە جەتكىزىلەتىن دۆيگاتەل، كابينكە، بەرىلىس قورابى سياقتى بولشەكتەر بارعان سايىن كوبەيدى. مولشەرى ارتقان سوڭ، قىزمەتىمنىڭ قاربالاس بولۋى دا تابيعي“، - دەدى رىن مينكاڭ.
2011 - جىلى شانشي اۆتوكولىك توبى شينجياڭ سەرىكتەستىگى شينجياڭدا ىرگە تەپتى، 2012 - جىلى وندىرىسكە قوسىلعاننان بەرى جالپى 35 مىڭ تۇتاس كولىك ءوندىرىپ ساتىپ، ءونىم قۇنى جالپى 10 ميلليارد 100 ميلليون يۋانعا جەتتى.
”2017 - جىلدان باستاپ شينجياڭ سەرىكتەستىگى وندىرگەن اۋىر جۇك اۆتوموبيلى ۇساق بولشەكتەرىنىڭ ءبارىن مەن ۇيىمداستىرىپ جونەلتتىم“، - دەدى رىن مينكاڭ ماقتانىشپەن.
2013 - جىلى ”ءبىر بەلدەۋ، ءبىر جولدى“ بىرگە قۇرۋ باستاماسى العا قويىلدى. جۇڭگونىڭ تۇڭعىش توپتاعى تۇتاس اۆتوكولىك جانە ۇساق بولشەكتەر ەكسپورت ەتەتىن كاسىپورنى رەتىندە، شانشي اۆتوكولىك توبى ”ءبىر بەلدەۋ، ءبىر جولدى“ بىرگە قۇرۋ ورايىن مىقتى يگەرىپ، حالىقارالىق بازارداعى باسىمدىققا يە بايلىقتى تولىق بىرىكتىرىپ، حالىقاراداعى تاڭداۋلى سەرىكتەرمەن تىعىز سەلبەستى، شەتەلدە، اسىرەسە، ”ءبىر بەلدەۋ، ءبىر جول“ بويىنداعى ورنالاستىرىمىنىڭ قارقىنى دا ۇزدىكسىز ارتتى.
ورتا ازيا ءوڭىرى ”ءبىر بەلدەۋ، ءبىر جول“ باستاماسى العاش ورتاعا قويىلعان ورىن ءارى شانشي اۆتوكولىك توبىنىڭ ءداستۇرلى باسىمدىققا يە بازارى.
”سوڭعى جىلدارى’بىر بەلدەۋ، ءبىرجولدى‘ بىرگە قۇرۋدىڭ ىشكەرىلەي ىلگەرىلەتىلۋىنە ىلەسە، شينجياڭنىڭ ورتا ازياداعى 5 ەلمەن ەكونوميكا - ساۋدا بارىس - كەلىسى بارعان سايىن قويۋلاي ءتۇستى، ۇرىمجىگە ىرگە تەپكەن شانشي اۆتوكولىك توبىنىڭ شينجياڭ سەرىكتەستىگى’ وزەن جاعالاعاننىڭ وزەگى تالماس‘ دەگەندەي باسىمدىققا يە بولدى“. رىن مينكاڭ بىلاي دەدى: 2021 - جىلى شانشي اۆتوكولىك توبى شينجياڭ سەرىكتەستىگى ورتا ازياعا 300 نەشە اۆتوكولىك ەكسپورت ەتتى، 2022 - جىلى 1600دەن استام اۆتوكولىك ەكسپورت ەتتى، بيىل جىل باسىنان 8 - ايدىڭ سوڭىنا دەيىن ەكسپورت ەتىلگەن اۆتوكولىك سانى 2900دەن اساتىندىعى مەجەلەنىپ وتىر.
بۇگىندەرى شينجياڭ ەرەكشە وڭىرلىك ورىن باسىمدىعىن ساۋلەلەندىرىپ، جاڭا دامۋ ارناسىنا بەلسەنە قىزمەت وتەپ جانە ونىمەن توعىسىپ، ءىس جۇزىندىكتى شىعار ءتۇيىن ەتىپ سىرتقا ەسىك اشۋ قىزمەتىن ويداعىداي يگەرىپ، ەلىمىزدىڭ باتىسقا ەسىك اشۋىنداعى الدىڭعى شەبىنە اينالدى.
”1 - ايدان 8 - ايعا دەيىن شينجياڭ سەرىكتەستىگىنىڭ وندىرگەن اۆتوكولىگى 4000نان استى، ونىڭ تەڭ جارىمىنان استامى ورتا ازياعا ەكسپورت ەتىلدى. ءدال وسى ساتتە شينجياڭنىڭ الاتاۋ ساعاسى شەكارا وتكەلىندە، قورعاس شەكارا وتكەلىندە، باقتى شەكارا وتكەلىندە، ت. ب، ءبىزدىڭ اۋىر جۇك اۆتوموبيلدەرىمىز زىمىراپ مەملەكەت قاقپاسىنان شىعۋدا“، - دەدى رىن مينكاڭ.
”وسى جىلدارى مەن شانشي اۆتوكولىك توبى شينجياڭ سەرىكتەستىگىنىڭ دامۋىنا كۋا بولىپ قانا قويماي، شينجياڭنىڭ سىرتقى ساۋداسىنىڭ دامۋىنا دا كۋا بولدىم. بۇگىندەرى شينجياڭنىڭ ورتا ازيا ەلدەرىمەن ارا ساۋدا بارىس - كەلىسى بارعان سايىن جيىلەي ءتۇستى، ءارقايسى شەكارا وتكەلدەرىنىڭ كەدەننەن وتكىزۋ ونىمدىلىگى بارعان سايىن جوعارىلاۋدا، بۇل ءبىزدىڭ اۋىر جۇك اۆتوموبيلى ەكسپورتىمىزعا كوپتەگەن قولايلىلىق جاراتتى. شانشي اۆتوكولىك توبى شينجياڭ سەرىكتەستىگىنىڭ ءبىر مۇشەسى رەتىندە، بۇدان كەيىن مەن، ءسوزسىز، بۇرىنعىداي سەرىكتەستىكتىڭ وندىرىسىنە قاجەتتى بولشەكتەردى ويداعىداي سەپتەپ،’ ءبىر بەلدەۋ، ءبىر جولدى‘ بىرگە قۇرۋعا كۇش قوسامىن“، - دەدى رىن مينكاڭ.
