جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك كەڭەستىڭ، ورتالىق اسكەري ىستەر كوميتەتىنىڭ
في جۇنلۇڭعا ”2 - دارەجەلى عارىش ۇلەسكەرى مەدالىن“ بەرۋ، دىڭ چيڭميڭگە، جاڭ لۋعا ”قاھارمان عارىشكەر“ داڭق اتاعىن بەرۋ جانە ”3 - دارەجەلى عارىش ۇلەسكەرى مەدالىن“ بەرۋ جونىندەگى قاۋلىسى
(2023 - جىلى 9 - ايدىڭ 7 - كۇنى)
2022 - جىلى 11 - ايدىڭ 29 - كۇنى شىنجوۋ 15 - ءنومىرلى عارىشكەرلى الەم كەمەسى ءساتتى ۇشىرىلىپ، عارىشكەر في جۇنلۇڭ، دىڭ چيڭميڭ، جاڭ لۋ الەم كەمەسىنە وتىرىپ، تيانحى وزەكتى بولمەسىنە ءساتتى جايعاسىپ، وربيتادا 6 اي تۇرىپ، ىلگەرىندى - كەيىندى 4 رەت كەمە بولمەسىنەن شىعىپ قيمىل جاساپ، ءبىر قىدىرۋ كەڭىستىك عىلمي تاجىريبەلەرى مەن تەحنيكالىق سىناقتاردى جاساپ، كەڭىستىك بەكەتى قۇراما تۇلعاسىنىڭ ءتۇرلى جۇمىستارىن باسقارۋ مىندەتتەرىن تولىعىمەن ءساتتى ورىنداپ، 2023 - جىلى 6 - ايدىڭ 4 - كۇنى امان - ەسەن ورالدى. شىنجوۋ 15 - ءنومىرلىنىڭ ادام الىپ ۇشۋ مىندەتى − جۇڭگو كەڭىستىك بەكەتىنىڭ قۇرىلۋ كەزەڭىندەگى شەشۋشى جەڭىسكە قول جەتكىزۋ شايقاسى، ول تۇڭعىش رەت كەڭىسىتىك بەكەتىنىڭ ”ءۇش بولمە، ءۇش كەمە“ سىندى ەڭ ۇلكەن قۇرىلىمدىق تيبىن قالىپتاستىرىپ، تۇڭعىش رەت 2 عارىشكەرلەر توبىنىڭ ”عارىشتا كەزدەسۋىن“ جۇزەگە اسىرىپ، جۇڭگو عارىشكەرلەرىنىڭ جەكە توپ بولىپ بولمەدەن شىعىپ قيمىل جۇرگىزۋ سانى رەكوردىن جاڭالادى، بۇل جۇڭگونىڭ عارىش ىستەرىنىڭ جوعارى دەڭگەيدەگى عىلىم - تەحنيكادا ءوز كۇشىنە سۇيەنۋدە، ءوزىن الۋەتتەندىرۋدە تىڭ قادام تاستاعاندىعىنىڭ، عارىش ىستەرىندە قۋاتتى ەل قۇرۋدى جەدەلدەتۋدە تىڭ سەرپىلىستى جۇزەگە اسىرعاندىعىنىڭ بەلگىسى، ەلىمىزدىڭ جالپىلىق مەملەكەت قۋاتىن ارتتىرىپ جانە جۇڭحۋا ۇلتىنىڭ ۇيىسۋ قۋاتىن كۇشەيتىپ، بۇكىل پارتيانى، بۇكىل ارميانى، بۇكىل ەلدەگى ءار ۇلت حالقىن سەنىمدى بەكەمدەپ، تاباندىلىقتى ساقتاپ، اسقاق جىگەرمەن قايراتتانا ۇمتىلىپ، ەرلىكپەن العا ىلگەرىلەپ، جۇڭگو ۇلگىسىندەگى وسىزامانداندىرۋدىڭ جاڭا تاراۋىن قۇلشىنا جازۋعا جىگەرلەندىرۋدە كەلەلى مانگە يە.
شىنجوۋ 15 - ءنومىرلى عارىشكەرلى الەم كەمەسىنىڭ ۇشۋ مىندەتىنىڭ تولىق تابىستى بولۋىنا قالىڭ عىلىم - تەحنيكا قىزمەتكەرلەرىنىڭ، عارىشكەرلەردىڭ، كادرلار مەن جۇمىسشى - قىزمەتكەرلەردىڭ، ازاتتىق ارميا كوماندير - جاۋىنگەرلەرىنىڭ اقىل - پاراساتى مەن جۇرەك قانى سىڭگەن. في جۇنلۇڭ، دىڭ چيڭميڭ، جاڭ لۋ جولداستار وسىلاردىڭ ۇزدىك ۋاكىلى، ولار وتاننىڭ ءۇمىتىن اقتاۋدى مۇرات ەتىپ، بورىشقا ادال بولىپ، تاباندى قايىسپاس جان قيارلىقپەن، شىن پەيىلمەن ىنتىماقتاسىپ، دۇنيە جۇزىنە قۇدىرەتتى جۇڭگو رۋحىن، جۇڭگو كۇشىن ايگىلەدى. في جۇنلۇڭ جولداس اراعا 17 جىل سالىپ تاعى دا عارىشقا شىعىپ ءارى 2 رەت بۇيرىق بەرۋشى مىندەتىن اتقارىپ، جۇڭگو كەڭىستىك بەكەتى جاپپاي قۇرىلعاننان كەيىنگى تۇڭعىش كەمە بولمەسىنەن شىعىپ قيمىل جاساعان عارىشكەرگە اينالدى. دىڭ چيڭميڭ جولداس 25 جىل بويى عارىشقا ۇشۋ اۋەلگى ماقساتىنان اينىماي، ارمانعا تالپىنۋدان جازباي، ءبىر قىدىرۋ تاجىريبە جانە سىناق مىندەتىن ايتارلىقتاي ورىندادى. جاڭ لۋ جولداس 12 جىلدى ءبىر كۇنگىدەي وتكىزىپ تىڭعىلىقتى جاتتىعۋ جاساپ، تۇڭعىش رەت عارىشقا ۇشتى ءارى 4 رەت كەمە بولمەسىنەن شىعىپ قيمىل جاساۋ مىندەتىن تىڭعىلىقتى ورىندادى. ولاردىڭ ەلىمىزدىڭ عارىشقا ادام الىپ ۇشۋ ىستەرىنە قوسقان ەرەن ەڭبەگىن ماراپاتتاۋ ءۇشىن، جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس، ورتالىق اسكەري ىستەر كوميتەتى في جۇنلۇڭ جولداسقا ”2 - دارەجەلى عارىش ۇلەسكەرى مەدالىن“ بەرۋدى، دىڭ چيڭميڭ جولداسقا، جاڭ لۋ جولداسقا ”قاھارمان عارىشكەر“ داڭق اتاعىن بەرۋدى جانە ”3 - دارەجەلى عارىش ۇلەسكەرى مەدالىن“ بەرۋدى ۇيعاردى.
في جۇنلۇڭ، دىڭ چيڭميڭ، جاڭ لۋ جولداستار اۋەلگى ماقساتتى ۇمىتپاي، بورىشتى ەستە بەرىك ساقتاپ، وسكەلەڭ ىسكە ءوزىن ارناعان ءداۋىر اۆانگاردتارى، الەمدى زەرتتەۋدىڭ، عارىش كەڭىستىگى ارمانىنا قانات قاعۋدىڭ، عارىش ىستەرىندە قۋاتتى ەل قۇرۋدىڭ ونەگەلى ۇلگىلەرى. پارتيا ورتالىق كوميتەتى مىناعان ۇندەيدى: بۇكىل پارتيا، بۇكىل ارميا، بۇكىل ەلدەگى ءار ۇلت حالقى شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، پارتيا 20 - قۇرىلتايىنىڭ رۋحىن جاپپاي دايەكتىلەندىرىپ، ماراپاتتالعان عارىشكەرلەردى ونەگە ەتىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ۇعىنىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، ”ەكى بومبى، ءبىر جاساندى سەرىك“ رۋحى مەن عارىشقا ادام الىپ ۇشۋ رۋحىن زور كۇشپەن اسقاقتاتىپ، وزىنە سەنىپ، ءوزىن الۋەتتەندىرىپ، ءبىر نيەت، ءبىر تىلەكتە بولىپ، قايراتتانا العا ۇمتىلىپ، ەكپىندەي العا ىلگەرىلەپ، جاپپاي سوتسياليستىك وسىزاماندانعان مەملەكەت قۇرۋ، جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋ جولىندا ىنتىماقتاسا كۇرەس جۇرگىزۋ كەرەك!
(شينحۋا اگەنتتىگىنىڭ 9 - ايدىڭ 7 - كۇنى بەيجيڭنەن بەرگەن حابارى)
