شينحۋا اگەنتتىگىنىڭ 9 - ايدىڭ 9 - كۇنى بەيجيڭنەن بەرگەن حابارى. 9 - ايدىڭ 9 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ چاۋشيان مەملەكەت مەرەكەسىنىڭ 75 جىلدىعى بايلانىسىمەن چاۋشيان ەڭبەك پارتياسىنىڭ باس شۋجيى، مەملەكەت ىستەرى كوميتەتىنىڭ باستىعى جين جىڭىنگە قۇتتىقتاۋ تەلەگرامماسىن جولدادى.
شي جينپيڭ بىلاي دەپ اتاپ كورسەتتى: 75 جىلدان بەرى چاۋشيان ەڭبەك پارتياسىنىڭ پارمەندى باسشىلىعى مەن چاۋشيان حالقىنىڭ ۇزبەي قۇلشىنىس جاساۋىنىڭ ارقاسىندا، چاۋشياننىڭ سوتسياليستىك قۇرىلىس ىستەرى ۇزدىكسىز جاڭا تابىستارعا قول جەتكىزدى. سوڭعى جىلدارى، باس شۋجي جولداس چاۋشيان پارتياسىن جانە حالقىن باستاپ، چاۋشيان پارتياسى 8 - قۇرىلتايىنىڭ جانە ءار رەتكى جالپى ءماجىلىستىڭ رۋحىن بار كۇشپەن دايەكتىلەندىرىپ، تياناقتاندىرىپ، كۇش سالا ەكونوميكانى دامىتتى، حالىق تۇرمىسىن جاقسارتتى ءارى ماڭىزدى تابىستارعا قول جەتكىزدى. باس شۋجي جولداستىڭ جانە چاۋشيان ەڭبەك پارتياسىنىڭ باسشىلىعىندا، باۋىرلاس چاۋشيان حالقىنىڭ، ءسوزسىز، چاۋشياننىڭ سوتسياليزم ىستەرىن ىلگەرىلەتۋدە ۇزدىكسىز جاڭا دامۋعا قول جەتكىزىپ، جاڭا ساتىعا قادام تاستايتىندىعىنا سەنەمىن.
شي جينپيڭ بىلاي دەپ باسا دارىپتەدى: جۇڭگو مەن چاۋشيان تاۋ - سۋى تۇتاسقان دوس، كورشى ەلدەر. جۇڭگو مەن چاۋشياننىڭ ءداستۇرلى دوستىعىن ەكى پارتيانىڭ، ەكى ەلدىڭ اعا بۋىن باسشىلارى ءوز قولدارىمەن ورناتقان، جەتىلدىرگەن، ەكى ەل حالقىنىڭ جۇرەك تۇكپىرىنە تەرەڭ تامىر تارتىپ، ۋاقىت وتكەن سايىن بەكەمدەلىپ كەلەدى. مەن باس شۋجي جولداسپەن جاقىنعى جىلدارى ىلگەرىندى - كەيىندى 5 رەت ديدارلاستىم، ءتۇرلى فورمالارمەن تىعىز بايلانىستى ساقتاۋ ارقىلى جۇڭگو مەن چاۋشياننىڭ ءداستۇرلى دوستىق سەلبەستىك قاتىناسىنىڭ تىڭ تاريحي كەزەڭگە وتۋىنە بىرگە جەتەكشىلىك ەتتىك. 100 جىلدا بولماعان زور وزگەرىس تەز قۇبىلۋ جاعدايىندا، مەيلى حالىقارا جانە ءوڭىر جاعدايىندا قانداي وزگەرىس بولسىن، جۇڭگو مەن چاۋشياننىڭ ءداستۇرلى دوستىق سەلبەستىك قارىم - قاتىناسىن ويداعىداي قورعاۋ، ويداعىداي بەكەمدەۋ، ويداعىداي دامىتۋ جۇڭگو پارتياسى مەن ۇكىمەتىنىڭ باستان - اياق بۇلجىماي تاباندى بولاتىن تۇرعىسى. جاڭا جاعدايدا، جۇڭگو جاق چاۋشيان جاقپەن بىرگە، ستراتەگيالىق بايلانىستى كۇشەيتىپ، ناقتى سەلبەستىكتى تەرەڭدەتىپ، جۇڭگو مەن چاۋشيان قارىم - قاتىناسىنىڭ داۋىرمەن بىرگە العا باسۋىن ىلگەرىلەتىپ، ءتىپتى دە زور دامۋعا قول جەتكىزىپ، ەكى ەل حالقىنا ءتىپتى دە ويداعىداي باقىت جاراتىپ، ءوڭىردىڭ بەيبىتشىلىگىن، ورنىقتىلىعىن جانە دامۋىن، گۇلدەنۋىن قورعاۋعا ءتىپتى دە زور ۇلەس قوسۋدى قالايدى.
