شينحۋا اگەنتتىگىنىڭ 9 - ايدىڭ 9 - كۇنى بەيجيڭنەن بەرگەن حابارى. 9 - ايدىڭ 9 - كۇنى مەملەكەت ءتوراعاسى شي جينپيڭ 10 - كەزەكتى جۇڭگو − ورتا ازيا سەلبەستىك تالقى مىنبەرىنە قۇتتىقتاۋ حاتىن جولدادى.
شي جينپيڭ بىلاي دەپ اتاپ كورسەتتى: جۇڭگو − ورتا ازيا سەلبەستىك تالقى مىنبەرى قۇرىلعاننان بەرى، كولەمى ۇزدىكسىز كەڭەيىپ، ىقپال كۇشى كۇن سايىن ارتتى. جۇڭگو ورتا ازياداعى 5 ەلمەن وسى تالقى مىنبەرى ارقىلى سەلبەستىك جاساسۋدى بىرگە اقىلداسىپ، دامۋدان تەڭ يگىلىكتەنىپ، ءوزارا ءتۇسىنىسۋدى جانە ءداستۇرلى دوستىقتى پارمەندى نىعايتىپ، تاتۋ كورشىلەس دوستىقتىڭ، قول ۇستاسىپ بىرگە العا ىلگەرىلەۋدىڭ جاڭا تاراۋىن جازدى.
شي جينپيڭ بىلاي دەپ باسا دارىپتەدى: بيىل ”ءبىر بەلدەۋ، ءبىر جولدى“ بىرگە قۇرۋ باستاماسى العا قويىلعاندىعىنىڭ 10 جىلدىعى، جۇڭگونىڭ ورتا ازياداعى ەلدەرمەن ”ءبىر بەلدەۋ، ءبىر جولدى“ بىرگە قۇرۋ سەلبەستىگى حالىقارالىق قوعامنىڭ الدىڭعى لەگىندە كەلەدى. بيىل 5 - ايدا جۇڭگو − ورتا ازيا باسشىلار ءماجىلىسى تابىسپەن وتكىزىلىپ، جۇڭگونىڭ ورتا ازياداعى ەلدەرمەن قارىم - قاتىناسى جاڭا داۋىرگە قادام تاستادى. جاڭا جاعدايدا، جۇڭگو − ورتا ازيا سەلبەستىگىنىڭ بولاشاعى نۇرلى ءارى ءسوزسىز كەلەلى تابىستارعا قول جەتكىزەتىن بولادى. تاراپتاردىڭ 10 - كەزەكتى جۇڭگو − ورتا ازيا سەلبەستىك تالقى مىنبەرىن وتكىزۋدى وراي ەتىپ، تالقى مىنبەرىنىڭ تۇعىرلىق رولىن تولىق ساۋلەلەندىرىپ، ءوزارا ۇيرەنۋدى، ءوزارا ۇلگى الۋدى كۇشەيتىپ، ”ءبىر بەلدەۋ، ءبىر جولدى“ بىرگە قۇرۋ سەلبەستىگىن تەرەڭدەتىپ، جۇڭگونىڭ ورتا ازياداعى ەلدەرمەن قارىم - قاتىناسىنىڭ دامۋىندا ءتىپتى دە سۇبەلى تابىستارعا قول جەتكىزۋىن ىلگەرىلەتۋىن ءۇمىت ەتەمىن.
10 - كەزەكتى جۇڭگو − ورتا ازيا سەلبەستىك تالقى مىنبەرى 9 - ايدىڭ 9 - كۇنى فۋجيان ولكەسىنىڭ شيامىن قالاسىندا باستالدى، تالقى مىنبەرىن شاڭحاي سەلبەستىك ۇيىمى تاتۋ كورشىلەس دوستىق سەلبەستىك كوميتەتى مەن فۋجيان ولكەلىك حالىق ۇكىمەتى بىرلىكتە ۇيىمداستىرىپ وتكىزەدى، نەگىزگى تاقىرىبى − ”دوستىق قارىم - قاتىناستى جالعاستىرىپ، ءوزارا تيىمدىلىك جەتكىزۋ سەلبەستىگىن تەرەڭدەتۋ“.
