شينجياڭنىڭ كۇزگى استىقتان ءونىم الۋ جۇمىسى وڭتۇستىكتەن سولتۇستىككە قاراي ىركەس - تىركەس باستالدى
جالپى ءونىمنىڭ 14 ميلليون توننادان اسۋىنان ءۇمىت بار
انار بۇلت \ شينجياڭ گازەتىنىڭ ءتىلشىسى ليۋ ي 9 - ايدىڭ 9 - كۇنى ۇرىمجىدەن حابارلايدى. اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسىنەن ۇعىسۋىمىزشا، شينجياڭنىڭ كۇزگى استىقتان ءونىم الۋ مەزگىلى باستالىپ، ءونىم الۋ جۇمىسى وڭتۇستىكتەن سولتۇستىككە قاراي ىركەس - تىركەس باستالعان. تۇتاس رايوندا 2 ميلليون مۋعا تاياۋ جەردەگى كۇزگى استىق جينالىپ بولدى، ءونىم الۋ جۇمىسى ءساتتى جۇرىلۋدە.
بيىل تۇتاس رايونداعى كۇزگى استىق داقىلدارى، باستىسى، تۇقىمدىق جۇگەرى، سويا بۇرشاق، كۇرىش، تۇينەك جەمىستىلەردى، ت. ب قامتيدى. قازىر جۇگەرىدەن ءونىم الۋ نەگىزىنەن قاشقار ايماعىنا، اقسۋ ايماعىنا جانە حوتان ايماعىنا شوعىرلانعان، سويا بۇرشاقتان ءونىم الۋ قاشقار ايماعىنا جانە اقسۋ ايماعىنا شوعىرلانعان، تۇينەك جەمىستىلەر ەگىلگەن وڭىرلەر ءونىم الۋدى تۇگەلدەي باستاپ ۇلگىردى. جەر - جەر ەگىلەتىن ورىن جانە تۇقىم تاڭداۋ، تۇقىم ىستەتۋ قىزمەتىن الدىن الا ويداعىداي تياناقتاندىرىپ، ديقانداردىڭ ەگىس ۋاقىتىن مىقتى ۇستاۋىنا جەتەكشىلىك ەتىپ، كۇزگى جيىن - تەرىننەن كەيىنگى شەكتى تەرەزەلىك مەزگىلدەن پايدالانىپ، دۇمبە ءبيدايدى ۇيلەسىمدى ۋاقىتتا ەگۋگە شىنايى كەپىلدىك ەتىپ، كەلەر جىلى ءبيدايدان مول ءونىم الۋعا نەگىز قالاۋ كەرەك.
تانىستىرۋعا قاراعاندا، شينجياڭ مەملەكەتتىڭ 100 ميلليارد جىڭ استىق ءوندىرۋ قۋاتىن جوعارىلاتۋ ارەكەتىن مىقتاپ ارقاۋ ەتىپ، بيىل 41 ميلليون 300 مىڭ مۋ استىق ءوندىرۋ نىسانالىق مىندەتىن تۇسىرگەن، بۇل الدىڭعى جىلداعى ءىس جۇزىندىك ەگىلگەن جەر اۋدانىنان 4 ميلليون 800 مىڭ مۋ ارتقان. بيىل كۇزدە جيناپ الىناتىن استىقتىڭ ەگىلگەن جەر اۋدانى 24 ميلليون مۋ اينالاسىنا جەتىپ، الدىڭعى جىلداعىدان 4 ميلليون مۋدىڭ ۇستىندە ارتقان، جالپى ءونىم 14 ميلليون توننادان اسۋىنان ءۇمىت بار. كەزەكتە تۇتاس رايوندا كۇزدە جيناپ الىناتىن استىق داقىلدارىنىڭ ءوسۋى جاقسى، كۇزگى جيىن - تەرىننەن مول ءونىم الۋ جاعدايى ادامدى قۋانتادى.
”بيىلعى كۇزگى استىقتان ءونىم الۋ ۋاقىتى شۇعىل، مىندەت اۋىر“. اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسى ەگىمشىلىك كاسىبى جانە ەگىس دارىلەرىن باسقارۋ باسقارماسىنىڭ باستىعى تاڭ ي - ۋ بىلاي دەدى: كەزەكتە ءار دارەجەلى اۋىل شارۋاشىلىعى، اۋىل - قىستاق تاراۋلارى نازاردى تىڭايتقىش پەن سۋدى باسقارۋعا جانە دەرت - دەربەزدەن، زياندى جاندىكتەردەن ساقتانۋعا شوعىرلاندىرىپ، كۇشتى شوعىرلاندىرىپ كۇزگى جيىن - تەرىننەن كەيىنگى اتىزدى باسقارۋ جانە ورۋ ماشينالارىن تەكسەرۋ - رەمونتتاۋ، ورنالاستىرۋ، رايون اتتاپ جۇمىس ىستەۋ سياقتى قىزمەتتەردى ويداعىداي يگەرىپ وتىر. اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسى جۇمىس باسىندا كوزدەن كەشىرۋ ءماجىلىسىن اشۋ سياقتى تاسىلدەر ارقىلى جۇگەرىنىڭ ءونىم مولشەرىن ارتتىرۋ، ساپاسىن جوعارىلاتۋدىڭ تەحنيكالىق جولىن ىشكەرىلەي زەرتتەپ اقىلداسىپ، ءونىم مولشەرىن ارتتىرۋ، ساپانى جوعارىلاتۋدىڭ كومەسكى كۇشىن اشىپ، استىقتىڭ جالپىلىق ءوندىرىس قۋاتىن جوعارىلاتادى، كۇزگى استىقتىڭ ورنىقتى وندىرىسىنە، مول ءونىم الۋعا، ءتۇيىر ءدان قالماي قامباعا الىنۋىنا شىنايى كەپىلدىك ەتىپ، اۆتونوميالى رايوننىڭ جىل باسىندا بەلگىلەگەن 20 ميلليون توننادان جوعارى استىق ءوندىرۋ نىسانالىق مىندەتىن تابىسپەن ورىندايدى.
