شينحۋا اگەنتتىگىنىڭ 9 - ايدىڭ 10 - كۇنى بەيجيڭنەن بەرگەن حابارى. 9 - ايدىڭ 10 - كۇنى مەملەكەت ءتوراعاسى شي جينپيڭ 2023 - جىلعى پۋجياڭ جاڭالىق اشۋ تالقى مىنبەرىنە قۇتتىقتاۋ حاتىن جولدادى.
شي جينپيڭ بىلاي دەپ اتاپ كورسەتتى: قازىر دۇنيە جۇزىندە 100 جىلدا بولماعان زور وزگەرىس جەدەل قۇبىلىپ، جاڭا كەزەكتى عىلىم - تەحنيكا توڭكەرىسى مەن كاسىپ سالاسى وزگەرىسى تەرەڭدەي دامىدى. عىلىم - تەحنيكادا جاڭالىق اشۋ − ادامزاتتىڭ حاۋىپ - قاتەر مەن سىن - سايىستارعا بىرگە توتەپ بەرۋىندەگى، بەيبىتشىلىك پەن دامۋدى جەبەۋىندەگى ماڭىزدى كۇش. جۇڭگو ءوزارا تيىمدىلىك جاساپ، تەڭ يگىلىكتەنۋ سىندى ەسىك اشۋ ستراتەگياسىن تاباندىلىقپەن اتقارىپ، جوعارى دەڭگەيدەگى سىرتقا ەسىك اشۋ تەبىنىن ۇزدىكسىز كۇشەيتىپ، اناعۇرلىم اشىق ويمەن جانە شارالارمەن حالىقارالىق عىلىم - تەحنيكا اۋىس - كۇيىسى مەن سەلبەستىگىن ۇزدىكسىز ىلگەرىلەتىپ، الەمدىك باسەكەلىك قۋاتقا يە اشىق جاڭالىق اشۋ ەكولوگياسىن قۇرىپ، ءار ەلمەن قول ۇستاسا وتىرىپ اشىق، ءادىل، ادىلەتتى، كەمسىتپەيتىن عىلىم - تەحنيكالىق دامۋ ورتاسىن قالىپتاستىرادى. پۋجياڭ جاڭالىق اشۋ تالقى مىنبەرىنىڭ جاڭالىق اشۋدى نەگىزگى تاقىرىپ ەتۋگە تاباندى بولىپ، جاڭالىق اشۋ يدەياسىنا شابىت بەرىپ، جاڭالىق اشۋ ۇستانىمىن تاراتىپ، جاڭالىق اشۋ رۋحىنا دەم بەرىپ، حالىقارالىق عىلىم - تەحنيكا سەلبەستىگىن ىلگەرىلەتۋگە، ادامزاتتىڭ ورتاق قۇت - ىرىسىن ارتتىرۋعا تىڭ ۇلەس قوسۋىن ءۇمىت ەتەمىن.
2023 - جىلعى پۋجياڭ جاڭالىق اشۋ تالقى مىنبەرىنىڭ نەگىزگى تاقىرىبى − ”اشىق جاڭالىق اشۋ ەكولوگياسى: جاڭالىق اشۋدى بۇكىل الەممەن ۇلاستىرۋ“، عىلىم - تەحنيكا مينيسترلىگى مەن شاڭحاي قالالىق حالىق ۇكىمەتى بىرلەسىپ ۇيىمداستىرعان، سول كۇنى شاڭحاي قالاسىندا اشىلدى.
