2023 - جىلعى ازيا − ەۆروپا كورمەسى . وقۋ - اعارتۋ حالىقارالىق تالقى مىنبەرى ۇرىمجىدە اشىلدى
ما شيڭرۇي قاتىناستى، ەركىن تۇنياز، حۋاي جينپىڭ، ماداد الي سيندي ارناۋ ءسوز سويلەدى، ءزۇمىرات وبۇل، نۇرلان ءابىلماجىن قاتىناستى، جاڭ چۇنلين باسقاردى
2023 - جىلعى ازيا − ەۆروپا كورمەسى . وقۋ - اعارتۋ حالىقارالىق تالقى مىنبەرى 9 - ايدىڭ 15 - كۇنى شينجياڭ حالىقارالىق ءماجىلىس - كورمە ورتالىعىندا وتكىزىلدى.
□ سۋرەتتى انار بۇلت \ شينجياڭ گازەتىنىڭ ءتىلشىسى تاڭ يۇڭ تۇسىرگەن
انار بۇلت \ شينجياڭ گازەتىنىڭ ءتىلشىسى لي ياڭ 9 - ايدىڭ 15 - كۇنى ۇرىمجىدەن حابارلايدى. 2023 - جىلعى ازيا − ەۆروپا كورمەسى . وقۋ - اعارتۋ حالىقارالىق تالقى مىنبەرى 9 - ايدىڭ 15 - كۇنى شينجياڭ حالىقارالىق ءماجىلىس - كورمە ورتالىعىندا وتكىزىلدى.
تالقى مىنبەرى ”وقۋ - اعارتۋ اۋىس - كۇيىسىن تەرەڭدەتىپ، كوركەم بولاشاقتى بىرگە قۇرۋدى“ نەگىزگى تاقىرىپ ەتتى، پاكيستان، قازاقستان سياقتى ”ءبىر بەلدەۋ، ءبىر جولدى“ بىرگە قۇراتىن مەملەكەتتەردىڭ وقۋ - اعارتۋ تاراۋلارىنىڭ ءمانساپتىلارى مەن 18 مەملەكەتتىڭ 56 جوعارى مەكتەبىنىڭ باستىقتارى، ماماندارى قاتىناستى. اۆتونوميالى رايوندىق پارتكومنىڭ شۋجيى ما شيڭرۇي اشىلۋ سالتىنا قاتىناستى، اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ءتوراعاسى ەركىن تۇنياز ارناۋ ءسوز سويلەدى، وقۋ - اعارتۋ مينيسترلىگى پارتيا باسشىلىق گرۋپپاسىنىڭ شۋجيى، مينيسترى حۋاي جينپىڭ بەينە ەكراندا ارناۋ ءسوز سويلەدى، پاكيستان وقۋ - اعارتۋ جانە كاسىپتىك تاربيەلەۋ مينيسترلىگىنىڭ مينيسترى ماداد الي سيندي ارناۋ ءسوز سويلەدى. اۆتونوميالى رايوندىق حالىق قۇرىلتايى تۇراقتى كوميتەتىنىڭ مەڭگەرۋشىسى ءزۇمىرات وبۇل، اۆتونوميالى رايوندىق ساياسي كەڭەستىڭ ءتوراعاسى نۇرلان ءابىلماجىن قاتىناستى، اۆتونوميالى رايوندىق پارتكومنىڭ ورىنباسار شۋجيى، وقۋ - اعارتۋ قىزمەت كوميتەتىنىڭ شۋجيى جاڭ چۇنلين باسقاردى.
ەركىن تۇنياز ارناۋ سوزىندە تالقى مىنبەرىنىڭ باستالعاندىعىن قىزۋ قۇتتىقتادى، وقۋ - اعارتۋ مينيسترلىگىنىڭ ۇزاق ۋاقىتتان بەرى شينجياڭنىڭ وقۋ - اعارتۋ ىستەرىنىڭ دامۋىنا كوڭىل ءبولىپ، قولداۋ كورسەتىپ كەلگەندىگىنە شىنايى العىس ايتتى، وسى رەتكى تالقى مىنبەرىنە قاتىناسقان ءار ەلدىڭ سيلى قوناقتارىن، ماماندارىن، وقىمىستىلارىن قىزۋ قارسى الاتىندىعىن ءبىلدىردى. ول بىلاي دەپ اتاپ كورسەتتى: بيىل 5 - ايدا ءتوراعا شي جينپيڭ جۇڭگو − ورتا ازيا باسشىلار ماجىلىسىنە قاتىناسىپ ءارى ارقاۋ ءسوز سويلەپ، وقۋ - اعارتۋ سياقتى سالالاردا ديدارلاسۋ جانە تىلدەسۋ مەحانيزمىن قۇرۋ باستاماسىن ورتاعا قويدى. وسى رەتكى تالقى مىنبەرىن وتكىزۋدەگى ماقسات − جۇڭگو − ورتا ازيا باسشىلار ءماجىلىسىنىڭ رۋحى مەن ءتوراعا شي جينپيڭنىڭ ماڭىزدى ءسوزىنىڭ رۋحىن دايەكتىلەندىرىپ، تياناقتاندىرىپ، ”ءبىر بەلدەۋ، ءبىر جول“ وزەكتى رايونى قۇرىلىسىن جەدەل ىلگەرىلەتىپ، ەلىمىز بەن ”ءبىر بەلدەۋ، ءبىر جولدى“ بىرگە قۇراتىن مەملەكەتتەردىڭ وقۋ - اعارتۋ سالاسىنداعى اۋىس - كۇيىسىن، سەلبەستىگىن تەرەڭدەتۋگە تاماشا نەگىز قالاۋ. سيلى قوناقتاردىڭ، مامان - وقىمىستىلاردىڭ تالقى مىنبەرى جەتكىزگەن اقىل - پاراسات ۇنىنەن تولىق پايدالانىپ، تاماشا كوزقاراستارىن ءبولىسۋىن ءۇمىت ەتەمىن. ءبىز وسى رەتكى تالقى مىنبەرىن وراي ەتىپ، شينجياڭ مەن ”ءبىر بەلدەۋ، ءبىر جولدى“ بىرگە قۇراتىن مەملەكەتتەردىڭ، سونداي - اق ەل ىشىندەگى جوعارى مەكتەپتەردىڭ دارىندى باۋلۋ، عىلمي زەرتتەۋ سەلبەستىگى، ءىلمي اۋىس - كۇيىس، وقىتۋشى - وقۋشىلاردىڭ ءوزارا ساپاردا بولۋى سياقتى جان - جاقتى، كوپ سالالى، تەرەڭ ساتىداعى اۋىس - كۇيىستى، سەلبەستىكتى ۇزدىكسىز تەرەڭدەتىپ، وقۋ - اعارتۋدىڭ جوعارى ساپالى دامۋىن ىلگەرىلەتەمىز.
حۋاي جينپىڭ ارناۋ سوزىندە مىنالاردى ءبىلدىردى: شينجياڭ − ەجەلدەن بەرى جىبەك جولىنداعى ماڭىزدى ارنا، بۇگىندەرى، اۋەلى، ازيا − ەۆروپا قۇرلىق كوپىرىنىڭ، ءسوز جوق، باسىپ وتەتىن جولى جانە ”ءبىر بەلدەۋ، ءبىر جولدىڭ“ شەشۋشى ءتۇيىنى. وسى رەتكى تالقى مىنبەرىن وتكىزۋدەگى ماقسات − جۇڭگونىڭ ازيا - ەۆروپا قۇرلىعىمەن، اسىرەسە، توڭىرەكتەگى مەملەكەتتەرمەن وقۋ - اعارتۋ سەلبەستىگىن، اۋىس - كۇيىسىن جاساسۋدىڭ جاڭا تۇعىرىن ورناتىپ، قول ۇستاسا وتىرىپ ”ءبىر بەلدەۋ، ءبىر جولدىڭ“ وقۋ - اعارتۋ ورتاق تۇلعاسىن ورناتۋدى ىلگەرىلەتۋ. جۇڭگو ازيا − ەۆروپاداعى ءارقايسى ەلمەن قول ۇستاسا قۇلشىنىس جاساپ، جوعارى ساپالى وقۋ - اعارتۋ سەلبەستىگى ارقىلى ”ءبىر بەلدەۋ، ءبىر جولدى“ بىرگە قۇرۋعا دارىندى جانە جاڭالىق اشا دامۋ تىرەگىن ازىرلەۋدى، جوعارى دەڭگەيدەگى گۋمانيتارلىق ىستەر اۋىس - كۇيىسى ارقىلى ”ءبىر بەلدەۋ، ءبىر جولدى“ بىرگە قۇرۋعا قوعامدىق جانە حالىق تىلەگى نەگىزىن بەكەمدەۋدى قالايدى. ول مىنالاردى دارىپتەدى: وقۋ - اعارتۋ تىرەگىن ويداعىداي ازىرلەپ، ورتا ازيا ەلدەرىندە ءتىپتى دە كوپ لۋبان شەبەرحاناسىن قۇرىپ، جۇڭگو جاقتىڭ تاڭداۋلى كاسىپتىك شۋەيۋان، مەكتەپتەرىنىڭ ءوندىرۋ مەن وقىتۋدى توعىستىرۋ ارقىلى ازيا − ەۆروپا ەلدەرىمەن سەلبەسىپ مەكتەپ قۇرۋىن قولداپ، ”ءبىر بەلدەۋ، ءبىر جولدى“ گۇلدەنىپ - كوركەيۋ جولى ەتىپ قۇرىپ شىعۋ؛ وقۋ - اعارتۋ ارقىلى جەتەكتەۋدى جاقسى ىستەپ، ءارقايسى ەلدەگى جوعارى مەكتەپتەردىڭ جىبەك جولى داشۋەلەر وداعىنا قاتىناسۋىن قولداپ، ”ءبىر بەلدەۋ، ءبىر جولدى“ جاڭالىق اشۋ جولى ەتىپ قۇرىپ شىعۋ؛ وقۋ - اعارتۋ بايلانىسىن ويداعىداي ىستەپ، كوپ ارنامەن جاستاردىڭ اۋىس - كۇيىسىن كەڭەيتىپ، ”جۇڭگوعا وقۋعا كەلۋ“ دوستىق ماركاسىن ۇزدىكسىز بايىتىپ، كەمەلدەندىرىپ، ”ءبىر بەلدەۋ، ءبىر جولدى“ دوستىق جولى ەتىپ قۇرىپ شىعۋ كەرەك.
ماداد الي سيندي ارناۋ سوزىندە مىنانى ءبىلدىردى: پاكيستان اۋىل شارۋاشىلىعى ەكونوميكاسىن نەگىز ەتەدى، اۋىل شارۋاشىلىعىن دامىتۋ − قوعامدىق وزگەرىستى جانە كەدەيلىكتى ازايتۋدى ىلگەرىلەتۋدىڭ ماڭىزدى ىلگەرىلەتۋ كۇشى. بولاشاقتا دالمە - ءدال اۋىل شارۋاشىلىعى، جوعارى ءونىمدى سۋارۋ تەحنيكاسى، دەرت - دەربەز جانە زياندى جاندىكتەردى جالپىلىق تىزگىندەۋ، اۋىل شارۋاشىلىعى ونىمدەرىن ءبىر جاقتى ەتۋ جانە وڭدەۋ سياقتى جاقتاردا جۇڭگوداعى قاتىستى جوعارى مەكتەپتەرمەن ءىلمي اۋىس - كۇيىستى، سەلبەستىكتى جانە دارىندى تاربيەلەۋدى كۇشەيتىپ، حالىقارالىق دەڭگەيدە الەمدىك استىق حاۋىپسىزدىگىنە ۇلەس قوسۋدى ءۇمىت ەتەدى.
قازاقستان عىلىم جانە جوعارى وقۋ - اعارتۋ مينيسترلىگىنىڭ ورىنباسار مينيسترى كامىل اقاتوۆ، قىرعىزستان وقۋ - اعارتۋ جانە عىلىم مينيسترلىگىنىڭ ورىنباسار مينيسترى بەكجان سوپاناليەۆ، تاجىكستان وقۋ - اعارتۋ، عىلىم مينيسترلىگىنىڭ ءبىرىنشى ورىنباسار مينيسترى جۋلازودا جيماشەد، وزبەكستان جوعارى وقۋ - اعارتۋ، عىلىم جانە جاڭالىق اشۋ مينيسترلىگىنىڭ ورىنباسار مينيسترى كامران كارىموۆ قاتارلىلار ينتەرنەت جەلىسىنەن تىس نەمەسە بەينە ەكران تاسىلىندە ارناۋ ءسوز سويلەدى. جۇڭگو اۋىل شارۋاشىلىعى داشۋەسىنىڭ باستىعى سۇن چيشين، تيانجين داشۋەسىنىڭ باستىعى جين دۇڭحان، جۇڭگو ينجەنەريالىق عىلىمدار اكادەمياسىنىڭ اكادەميگى، شينجياڭ داشۋەسىنىڭ پروفەسسورى وشۇر ءسىلام قاتارلى جۇڭگو جاق جوعارى مەكتەپتەرىنىڭ ۋاكىلدەرى ءسوز سويلەدى. قىرعىزستان مەملەكەتتىك تەحنيكا داشۋەسىنىڭ باستىعى سياقتى شەتەل جاق مەكتەپتەردىڭ جاۋاپتىلارى ءسوز سويلەدى.
تۇركمەنستاننىڭ، گرۋزيانىڭ جۇڭگودا تۇراتىن باس ەلشىلەرى، بىرلەسكەن مەملەكەتتەر ۇيىمى وقۋ - اعارتۋ، عىلىم - تەحنيكا، مادەنيەت ۇيىمىنىڭ، شاڭحاي سەلبەستىك ۇيىمى حاتشىلار باسقارماسىنىڭ قاتىستى جاۋاپتىلارى بەينە ەكراندا باستالۋ سالتىنا قاتىناستى ءارى ارناۋ ءسوز سويلەدى.
سول كۇنى تاعى ءىلىم - ءپان ەتەنە توعىسقان جاعدايدا ەنەرگيا، كەن بايلىعىن اشۋ جانە پايدالانۋ حالىقارالىق اۋىس - كۇيىس، سەلبەستىك تالقى مىنبەرى سياقتى 5 بولىمشە تالقى مىنبەرى وتكىزىلدى. «2023 - جىلعى ازيا − ەۆروپا كورمەسى . وقۋ - اعارتۋ حالىقارالىق تالقى مىنبەرى ءۇرىمجى باستاماسى» جاريالاندى.
وقۋ - اعارتۋ مينيسترلىگىنىڭ قاتىستى مەكەمەلەرى جانە توتە قاراستى ورىندارى، اۆتونوميالى رايوننىڭ جانە بيڭتۋاننىڭ قاتىستى تاراۋلارى، باۋىرلاس ولكە، اۆتونوميالى رايون، قالالارداعى 92 جوعارى مەكتەپ، اۆتونوميالى رايونداعى جانە بيڭتۋانداعى 34 جوعارى مەكتەپ پەن كاسىپتىك شۋەيۋان - مەكتەپتىڭ قاتىستى جاۋاپتىلارى مەن ماماندارى قيمىلعا قاتىناستى.
وقۋ - اعارتۋ مينيسترلىگىنىڭ ورىنباسار مينيسترى سۇن ياۋ، اۆتونوميالى رايوننىڭ جانە بيڭتۋاننىڭ باسشىلارىنان قادەن كابەن، قايسار ابدىكەرىم، لي جىنگو قاتارلىلار قيمىلعا قاتىناستى.
