انار بۇلت \ شينجياڭ گازەتىنىڭ ءتىلشىسى ران حۋ 9 - ايدىڭ 20 - كۇنى ۇرىمجىدەن حابارلايدى. 9 - ايدىڭ 19 - كۇنى كەشتە شاڭحاي اكتسيا ساۋدا بازارىنىڭ ينفورماتسياسىندا كورسەتىلۋىنشە، شينتى ەنەرگيا جارنا شەكتى سەرىكتەستىگى شاڭحاي اكتسيا بازارىنىڭ نەگىزگى تاقتاسىندا تۇڭعىش رەت اشىق جارنا توپتاۋى（IPO ) شاڭحاي اكتسيا بازارىنىڭ بازارعا سالۋدى تەكسەرۋ كوميتەتىنىڭ قاراپ ماقۇلداۋىنان وتكەن.
شينتى ەنەرگياسىنىڭ وسى رەتكى A جارناسىنىڭ IPO تاراتىلىمى 300 ميلليوننان اسپايتىن A جارناسىنىڭ ادەتتەگى جارنا بەلەتى، جارنا توپتاۋ قارجىسى 8 ميلليارد 800 ميلليون يۋاننان اسپايدى، جىلىنا 200 مىڭ توننا جوعارى دەڭگەيلى ەلەكترون دارەجەلى كوپ كريستالدى كرەمني وندىرەتىن جاسىل، تومەن كومىر قىشقىل گازدى اينالمالى ەكونوميكالىق قۇرىلىس نىسانىنا پايدالانىلادى. كاسىپ سالاسىنداعى قايراتكەرلەردىڭ قاراۋىنشا، شينتى ەنەرگياسىنىڭ A جارناسىنىڭ بازارعا سالىنۋى بيىلعى الەمدىك ەڭ ۇلكەن حالىقتىق فوتوۆولت كاسىپ سالاسىنىڭ IPO ءىسى ەكەن.
شينتى ەنەرگياسىنىڭ جارنا شاقىرۋ تۇسىندىرمەسىندە كورسەتىلۋىنشە، 2022 - جىلى شينتى ەنەرگياسى شينجياڭنىڭ كوپ كريستالدى كرەمني ءوندىرىس جەلىسى تەحنيكاسىن وزگەرتۋدى جانە بولىمشە سەرىكتەستىك − ىشكى موڭعۇل شينتى سەرىكتەستىگىن اتقارۋ نەگىزگى تۇلعاسى ەتكەن جىلىنا 100 مىڭ توننا كوپ كريستالدى كرەمني ءوندىرۋ نىسان قۇرىلىسىن ورىنداعان ءارى ساپا ولشەمىنە، ءونىم ولشەمىنە جەتكەن. 2022 - جىلدىڭ سوڭىنا دەيىن شينتى ەنەرگياسىنىڭ كوپ كريستالدى كرەمني ءوندىرىس جەلىسىنىڭ ءوندىرىس قۋاتى جىلىنا 200 مىڭ تونناعا جەتىپ، كاسىپ سالاسىندا الدىڭعى قاتاردان ورىن الدى. بۇل رەتكى A جارناسىنىڭ قارجى توپتاۋ نىسانى وندىرىسكە قوسىلعاننان كەيىن، سەرىكتەستىكتىڭ جوعارى ساپتىق دەڭگەيدەگى كوپ كريستالدى كرەمني ءوندىرۋ قۋاتى جىلىنا 400 مىڭ تونناعا جەتەدى.
ۇعىسۋعا قاراعاندا، 2022 - جىلى شينتى ەنەرگياسىنىڭ كوپ كريستالدى كرەمني ءونىم مولشەرى 125 مىڭ 900 توننا، ساتىلىم مولشەرى 106 مىڭ 700 توننا بولىپ، ەلىمىزدەگى كوپ كريستالدى كرەمني سالاسىنداعى وزىق كاسىپورىن سانالعان.
اشىق ماتەريالداردا كورسەتىلۋىنشە، شينتى ەنەرگياسى 2008 - جىلى قۇرىلعان، باستىسى، جوعارى ساپتىقتىقتاعى كوپ كريستالدى كرەمني زەرتتەۋ - اشۋمەن، ءوندىرۋ جانە ساتۋمەن، سونداي - اق جەل ەنەرگيالى، فوتوۆولتتىق ەلەكتر ستانسياسىن سالۋ جانە جۇرگىزۋ جۇمىسىمەن شۇعىلدانادى، ەرەكشە ترانسفورماتور جارنا شەكتى سەرىكتەستىگىنىڭ جارناسى مەڭگەرىلەتىن بولىمشە سەرىكتەستىگى. سەرىكتەستىك 2015 - جىلى 12 - ايدا شياڭگاڭ بىرلەسكەن اكتسيا بازارىنىڭ نەگىزگى تاقتاسىندا بازارعا سالىنعان. وسى رەت شاڭحاي اكتسيا بازارىندا IPOدى بازارعا سالۋدى ءساتتى ورىنداعاننان كەيىن، شينتى ەنەرگياسى ”H＋A“ ەكى جەردە جارناسى بازارعا سالىنعان فوتوۆولت كاسىپورنىنا اينالادى.
شينتى ەنەرگياسىنىڭ جارنا توپتاۋ تۇسىندىرمەسىندە جاريالانعان قازىنا ساندى مالىمەتىنەن قاراعاندا، سوڭعى 3 جىلدا شينتى ەنەرگياسىنىڭ تيجارات كىرىسى 2019 - جىلداعى 14 ميلليارد 182 ميلليون يۋاننان 2022 - جىلى 37 ميلليارد 541 ميلليون يۋانعا ارتىپ، ۋنيۆەرسال ارتۋ جىلدامدىعى شامامەن ％7. 62 بولعان؛ سايكەستى باس سەرىكتەستىككە تاۋەلدى ناق تابىس 635 ميلليون يۋاننان 13 ميلليارد 395 ميلليون يۋانعا ارتىپ، ۋنيۆەرسال ارتۋ جىلدامدىعى ％29. 359كە جەتىپ، كاسىپ ناتيجەسىنىڭ تولىسۋ سيپاتى كورنەكتى بولعان. 2022 - جىلعى ناق تابىس اۋەلى 10 ميلليارد يۋاندىق دەڭگەيدەن ءوتىپ، تاريحتاعى تىڭ ورەگە جەتتى.
