شينحۋا اگەنتتىگىنىڭ 9 - ايدىڭ 22 - كۇنى حاڭجوۋدان بەرگەن حابارى (تىلشىلەر ۋاڭ بين، ما جيان). 9 - ايدىڭ 22 - كۇنى تۇستەن كەيىن مەملەكەت ءتوراعاسى شي جينپيڭ حاڭجوۋداعى شيحۋ مەملەكەتتىك قوناق ۇيىندە جۇڭگوعا 19 - كەزەكتى ازيا سپورت جارىسىنىڭ اشىلۋ سالتىنا قاتىناسۋعا كەلگەن سيريا زۇڭتۇڭى باشارمەن كەزدەستى. ەكى ەلدىڭ مەملەكەت باسشسى جۇڭگو − سيريا ستراتەگيالىق سەرىكتەستىك قارىم - قاتىناسىن ورناتاتىندىعىن بىرگە جاريالادى.
شي جينپيڭ بىلاي دەپ اتاپ كورسەتتى: سيريا جاڭا جۇڭگومەن ەڭ ەرتە ديپلوماتيالىق قارىم - قاتىناس ورناتقان اراب ەلدەرىنىڭ ءبىرى ءارى سول كەزدە جاڭا جۇڭگونىڭ بىرلەسكەن مەملەكەتتەر ۇيىمىنداعى زاڭدى ورنىن قالپىنا كەلتىرۋ ۇسىنىسىن ورتاعا قويعان ەلدەردىڭ ءبىرى. ديپلوماتيالىق قارىم - قاتىناس ورناتقان 67 جىلدان بەرى جۇڭگو − سيريا قارىم - قاتىناسى حالىقارالىق الماعايىپ وزگەرىستىڭ سىنىنان ءوتىپ، ەكى ەل دوستىعى ۋاقىت وتكەن سايىن بەكەمدەلدى. جۇڭگو مەن سيريانىڭ ستراتەگيالىق سەرىكتەستىك قارىم - قاتىناس ورناتۋى ەكى ەل قارىم - قاتىناسى تاريحىنداعى بولاشاققا جول اشاتىن ماڭىزدى بەلەسكە اينالادى. جۇڭگو جاق سيريا جاقپەن بىرگە ەكى ەل قارىم - قاتىناسىنىڭ ىشكى ءمانىن ۇزدىكسىز مولايتىپ، جۇڭگو − سيريا ستراتەگيالىق سەرىكتەستىك قارىم - قاتىناسىنىڭ ۇزدىكسىز العا قاراي دامۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: جۇڭگو جاق سيريا جاقپەن بىرگە ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىر - ءبىرىن ۇزدىكسىز باتىل قولداپ، ەكى ەلدىڭ جانە قالىڭ وركەندەپ كەلە جاتقان ەلدەردىڭ ورتاق مۇددەسىن قورعاپ، حالىقارالىق ادىلدىكتى، ادىلەتتىلىكتى قورعاۋدى قالايدى. جۇڭگو جاق سيريانىڭ سىرتتىڭ كيلىگۋىنە قارسى تۇرۋىن، سىڭار جاقتى زورەكەرلىككە قارسى تۇرۋىن، مەملەكەتتىڭ تاۋەلسىزدىگىن، يەلىك ۇقىعىن، تەرريتوريا تۇتاستىعىن قورعاۋىن قولدايدى، سيريانىڭ قايتا قۇرۋ ىستەرىن قانات جايدىرىپ، لاڭكەستىككە قارسى تۇرۋ قابىلەتى قۇرىلىسىن كۇشەيتىپ، ”سيريالىقتار جەتەكشىلىك ەتۋ، سيريالىقتاردىڭ مەنشىگىندە بولۋ“ پرينسيبى ارقىلى سيريا ماسەلەسىن ساياسي جولمەن شەشۋدى ىلگەرىلەتىپ، باسقا دا اراب ەلدەرىمەن قارىم - قاتىناستى جاقسارتىپ، حالىقارالىق جانە وڭىرلىك ىستەردە اناعۇرلىم زور رول اتقارۋىن قولدايدى. جۇڭگو جاق سيريا جاقپەن بىرگە ”ءبىر بەلدەۋ، ءبىر جولدى“ بىرگە قۇرۋ سەلبەستىگىن كۇشەيتىپ، سيريادان ساپالى اۋىل شارۋاشىلىق ونىمدەرىن يمپورت ەتۋدى زورايتىپ، الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن بىرگە ويداعىداي تياناقتاندىرىپ، ءوڭىردىڭ جانە دۇنيە ءجۇزىنىڭ بەيبىتشىلىگى مەن دامۋىنا بەلسەنە ۇلەس قوسۋدى قالايدى.
باشار مىنالاردى ءبىلدىردى: جۇڭگو وزىندىك قۇلشىنىسى ارقىلى تابىستى جۇڭگوشا سوتسياليزم جولىن سالدى. جۇڭگو حالىقارالىق ىستەردە باستان - اياق حالىقارالىق ادىلدىك پەن ادىلەتتىلىك جاعىندا تۇرىپ، حالىقارالىق زاڭ جانە حالىقارالىق ادامگەرشىلىك جاعىندا تۇرىپ، ماڭىزدى سىندارلى رول اتقارىپ كەلەدى. ءتوراعا شي جينپيڭ ورتاعا قويعان”ءبىر بەلدەۋ، ءبىر جولدى“ بىرگە قۇرۋ باستاماسىنىڭ، الەمدىك دامۋ باستاماسىنىڭ، الەمدىك حاۋىپسىزدىك باستاماسىنىڭ، الەمدىك وركەنيەت باستاماسىنىڭ ماقساتى − سەلبەستىك ارقىلى بارلىق ادامنىڭ حاۋىپسىزدىكتى جانە دامۋدى جۇزەگە اسىرۋىنا كومەكتەسىپ، بەيبىت، گۇلدەنىپ - كوركەيگەن بولاشاقتان بىرگە يگىلىكتەنۋ، سيريا جاق مۇنى ايرىقشا القايدى، باتىل قولدايدى ءارى بەلسەندىلىكپەن قاتىناسادى. سيريا جاق جۇڭگونىڭ ۇلى تابىسقا قول جەتكىزگەندىگىن شىن جۇرەكتەن قۇتتىقتايدى، جۇڭگو ۇكىمەتىنىڭ سيريا حالقىنا كورسەتكەن قىمباتتى قولداۋىنا العىس ايتادى، جۇڭگونىڭ ىشكى ىسىنە كيلىگەتىن ءارقانداي ارەكەتكە باتىل قارسى تۇرادى، جۇڭگونىڭ ۇزاق ۋاقىتتىق اينىماس دوسى جانە سەرىگى بولۋدى قالايدى. سيريا جاق سيريا − جۇڭگو ستراتەگيالىق سەرىكتەستىك قارىم - قاتىناسىن ورناتۋدى وراي ەتىپ، ەكى جاقتى دوستىق سەلبەستىكتى كۇشەيتۋدى، حالىقارالىق جانە وڭىرلىك ىستەردە بايلانىس جاساۋدى، سايكەسۋدى قويۋلاتۋدى قالايدى.
كەزدەسۋدەن كەيىن ەكى ەلدىڭ مەملەكەت باسشىسى ”ءبىر بەلدەۋ، ءبىر جولدى“ بىرگە قۇرۋ، ەكونوميكالىق دامۋ اۋىس - كۇيىسى، ەكونوميكالىق، تەحنيكالىق سەلبەستىك سياقتى كوپ ءتۇرلى ەكى جاقتى سەلبەستىك حۇجاتتارى جونىندە كەلىسىم جاسالۋىنا بىرگە كۋا بولدى.
ەكى جاق «جۇڭحۋا حالىق رەسپۋبليكاسى مەن اراب سيريا رەسپۋبليكاسىنىڭ ستراتەگيالىق سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جاريالادى.
ساي چي، ديڭ شۋەشياڭ، ۋاڭ ي، شىن يچين قاتارلىلار جوعارىداعى قيمىلدارعا قاتىناستى.
شينحۋا اگەنتتىگىنىڭ 9 - ايدىڭ 22 - كۇنى حاڭجوۋدان بەرگەن حابارى (تىلشىلەر ياڭ يجۇن، جاڭ شۋان). 9 - ايدىڭ 22 - كۇنى تۇستەن كەيىن مەملەكەت ءتوراعاسى شي جينپيڭ حاڭجوۋداعى شيحۋ مەملەكەتتىك قوناق ۇيىندە جۇڭگوعا 19 - كەزەكتى ازيا سپورت جارىسىنىڭ اشىلۋ سالتىنا قاتىناسۋعا كەلگەن كۆەيت پاتشا مۇراگەرى ميشالمەن كەزدەستى.
شي جينپيڭ بىلاي دەپ اتاپ كورسەتتى: جۇڭگو مەن كۆەيتتىڭ ءداستۇرلى دوستىعى تەرەڭ. كۆەيت جاڭا جۇڭگومەن ەڭ ەرتە ديپلوماتيالىق قارىم - قاتىناس ورناتقان شىعاناقتاعى اراب ەلى، سونداي - اق ەڭ ەرتە جۇڭگومەن ”ءبىر بەلدەۋ، ءبىر جولدى“ بىرگە قۇرۋ سەلبەستىك حۇجاتى جونىندە كەلىسىم جاساسقان ورتا شىعىس ەلى. ديپلوماتيالىق قارىم - قاتىناس ورناتقان 52 جىلدان، اسىرەسە، ەكى ەل ستراتەگيالىق سەرىكتەستىك قارىم - قاتىناس ورناتقان 5 جىلدان بەرى جۇڭگو − كۆەيت قارىم - قاتىناسى قارىشتاپ العا باسىپ، ءار سالاداعى سەلبەستىك جەتىستىگى سۇبەلى بولدى. جۇڭگو جاق كۆەيت جاقپەن بىرگە قۇلشىنىپ، جۇڭگو − كۆەيت قارىم - قاتىناسىنىڭ اناعۇرلىم زور دامۋشىلىققا قول جەتكىزۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: جۇڭگو جاق كۆەيتتىڭ مەملەكەتتىڭ يەلىك ۇقىعى مەن تەرريتوريا تۇتاستىعىن قورعاۋىن قولدايدى، كۆەيت جاقپەن بىرگە ىشكى ىسىنە كيلىكپەۋ سىندى وركەندەپ كەلە جاتقان ەلدەردىڭ تابان تىرەپ تۇرۋىنىڭ ”التىن قاعيداسىن“ بىرگە قورعاۋدى قالايدى. جۇڭگو جاق كۆەيت جاقتىڭ ”ءبىر بەلدەۋ، ءبىر جولدى“ بىرگە قۇرۋ سەلبەستىگىنە بەلسەنە قاتىناسقاندىعىن القايدى، كۆەيت جاقتىڭ ”2035 - جىلعا دەيىنگى مەملەكەت جوسپارىن“ اتقارۋىن قولدايدى، كۆەيت جاقپەن دامۋ ستراتەگياسىن ءتۇيىلىستىرۋدى تەرەڭدەتىپ، قارجى قوسۋ، ەنەرگيا، نەگىزدىك قۇرىلعى، قورشاعان ورتانى وڭاۋ، سيفرلى ەكونوميكا سياقتى سالالارداعى سەلبەستىكتى كۇشەيتىپ، زاڭ اتقارۋ حاۋىپسىزدىگى جانە لاڭكەستىككە قارسى تۇرۋ سەلبەستىگىن تەرەڭدەتىپ، گۋمانيتارلىق اۋىس - كۇيىستى قويۋلاتۋدى قالايدى. كۆەيت جاقتىڭ جۇڭگونىڭ اۋىل - قىستاقتى گۇلدەندىرۋ ستراتەگياسىن ۇزدىكسىز قولداۋىن ءارى جۇڭگو كاسىپورىندارىنىڭ كۆەيتكە بارىپ قارجى قوسۋىنا ۇزدىكسىز ءادىل، جاريا، كەمسىتپەيتىن بازار ورتاسىن ازىرلەۋىن ءۇمىت ەتەدى. جۇڭگو جاق كۆەيت جاقپەن بىرگە تۇڭعىش كەزەكتى جۇڭگو − اراب ەلدەرى باسشىلار ءماجىلىسى مەن جۇڭگو − شىعاناقتاعى اراب ەلدەرى سەلبەستىك كوميتەتى باسشىلار ءماجىلىسىنىڭ جەتىستىكتەرىن ويداعىداي تياناقتاندىرىپ، جۇڭگو − اراب ەلدەرى، جۇڭگو − شىعاناقتاعى اراب ەلدەرى سەلبەستىك كوميتەتىنە مۇشە ەلدەر توپتىق سەلبەستىگىنىڭ دەڭگەيىن ۇزدىكسىز جوعارىلاتىپ، بىرلەسكەن مەملەكەتتەر ۇيىمى سياقتى كوپ جاقتى تۇعىرداعى تىلدەسۋدى، سەلبەستىكتى كۇشەيتىپ، وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.
ميشال مىنالاردى ءبىلدىردى: دوس جۇڭگو حالقىنىڭ الدا جۇڭحۋا حالىق رەسپۋبليكاسى قۇرىلعاندىعىنىڭ 74 جىلدىعىن قارسى الاتىندىعىن قۇتتىقتايمىن. كۆەيت ۇكىمەتى مەن حالقى كۆەيت − جۇڭگو قارىم - قاتىناسىن ايرىقشا ماقتان ەتەدى، ەكى ەل سەلبەستىگىندە قول جەتكىزگەن سۇبەلى جەتىستىكتەرگە ايرىقشا رازى. ءتوراعا شي جينپيڭ العا قويعان ”ءبىر بەلدەۋ، ءبىر جولدى“ بىرگە قۇرۋ باستاماسى مەن الەمدىك دامۋ باستاماسى، الەمدىك حاۋىپسىزدىك باستاماسى، الەمدىك وركەنيەت باستاماسى ادامزاتتىڭ بەيبىت العا باسۋىن ىلگەرىلەتەتىن وسكەلەڭ نىسانا مەن نەگىزگى ماقساتتى نەگىز ەتكەن، ونىڭ ءمانى زور، كۆەيت جاق تاباندىلىقپەن قولدايدى ءارى وعان بەلسەنە قاتىسادى. كۆەيت جاق جۇڭگو جاقتىڭ كۆەيتتىڭ ءوز يەلىك ۇقىعى مەن تەرريتوريا تۇتاستىعىن قورعاۋىن قولداعاندىعىن ايرىقشا القايدى، ءبىر جۇڭگو ساياساتىن ۇزدىكسىز تاباندىلىقپەن اتقارىپ، جۇڭگونىڭ وزەكتى مۇددە ماسەلەلەرىندەگى تۇرعىسىن باتىل قولدايدى، جۇڭگو جاقپەن بىرگە ءار ەل حالقىنىڭ ءوز ەلىنىڭ مەملەكەت جاعدايىنا ۇيلەسەتىن جانە ءوز ەلىنىڭ ەرەكشەلىگىنە يە دامۋ جولىن دەربەس تاڭداۋىن قولدايدى. كۆەيت جاق جۇڭگو جاقپەن بىرگە ءارقايسى سالاداعى ناقتى ىستەر سەلبەستىگىن تەرەڭدەتىپ، ورتا شىعىس، شىعاناق وڭىرىندەگى تىلدەسۋدى، سەلبەستىكتى قويۋلاتۋدى قالايدى.
كەزدەسۋدەن كەيىن، ەكى ەل باسشىسى «جۇڭحۋا حالىق رەسپۋبليكاسى مەن كۆەيت مەملەكەتىنىڭ ەكى جاقتى سەلبەستىگى 5 جىلدىق جوباسى بىرلەسكەن مالىمدەمەسى (2024 - جىلدان − 2028 - جىلعا دەيىنگى)»، سونداي - اق قايتا تۋىندايتىن ەنەرگيا، نەگىزدىك قۇرىلعىلار قۇرىلىسى، قورشاعان ورتانى وڭاۋ سياقتى سالالارداعى كوپتەگەن ەكى جاقتى سەلبەستىك حۇجاتتارى جونىندە كەلىسىم جاسالۋىنا بىرگە كۋا بولدى.
ساي چي، ديڭ شۋەشياڭ، ۋاڭ ي، شىن يچين قاتارلىلار جوعارىداعى قيمىلدارعا قاتىناستى.
شينحۋا اگەنتتىگىنىڭ 9 - ايدىڭ 22 - كۇنى حاڭجوۋدان بەرگەن حابارى (تىلشىلەر ياڭ يجۇن، جۋ حان). 9 - ايدىڭ 22 - كۇنى تۇستەن كەيىن مەملەكەت ءتوراعاسى شي جينپيڭ حاڭجوۋداعى شيحۋ مەملەكەتتىك قوناق ۇيىندە جۇڭگوعا 19 - كەزەكتى ازيا سپورت جارىسىنىڭ اشىلۋ سالتىنا قاتىناسۋعا كەلگەن ازيا وليمپيادا القالار كەڭەسىنىڭ ۋاقىتشا ءتوراعاسى سينگپەن كەزدەستى.
شي جينپيڭ سينگ پەن ازيا وليمپيادا القالار كەڭەسىنىڭ ۇزاق ۋاقىتتان بەرى جۇڭگو دەنە تاربيە ىستەرىنىڭ دامۋىن جەبەۋگە، اسىرەسە، حاڭجوۋ ازيا سپورت جارىسىنىڭ دايىندىق قىزمەتتەرىنە بەلسەندى ۇلەس قوسقاندىعىنا العىس ايتتى. شي جينپيڭ بىلاي دەپ اتاپ كورسەتتى: ازيا وليمپيادا القالار كەڭەسى ۇزاق ۋاقىتتان بەرى ازيا وليمپيادا سپورتىن ىلگەرىلەتۋگە كۇش سالىپ، ازيانىڭ بەيبىتشىلىگىن جانە دامۋىن جەبەپ، بەلسەندى جەتىستىكتەرگە قول جەتكىزدى. جۇڭگو جاق ازيا وليمپيادا القالار كەڭەسىمەن سەلبەستىكتى كۇشەيتىپ، ازيا وليمپيادا سپورتى ىستەرىن بىرگە ىلگەرىلەتىپ، ازيا حالقىنىڭ ىنتىماعىن نىعايتۋدى قالايدى.
شي جينپيڭ بىلاي دەپ باسا دارىپتەدى: ازيا وليمپيادا القالار كەڭەسى مەن ازيا وليمپيادا ۇلكەن شاڭىراعىنىڭ بىرگە قولداۋىندا، حاڭجوۋ ازيا سپورت جارىسى باستالۋ الدىندا تۇر. بۇل جۇڭگونىڭ 1990 - جىلى بەيجيڭ ازيا سپورت جارىسىنان جانە 2010 - جىلى گۋاڭجوۋ ازيا سپورت جارىسىنان كەيىن 3 - رەت ازيا سپورت جارىسىن وتكىزۋى. وسى كەزەكتى ازيا سپورت جارىسىندا جارىسقا قاتىناساتىن سپورتشىلاردىڭ سانى، تۇرلەردىڭ ورنالاستىرىلۋى، جالپى تۇلعالىق كولەمى تۇگەلدەي تاريحتاعى جاڭا رەكورد جاراتتى. جۇڭگو ۇكىمەتى مەن حالقىنىڭ ءبىر كەزەك ”جۇڭگوشا ەرەكشەلىككە يە، ازيا كەلبەتىن ايگىلەگەن، تارتىمدى“ دەنە تاربيە سالتاناتتى جينالىسىن وتكىزىپ، ازيا حالقىنىڭ ىنتىماعى مەن دوستىعىن نىعايتىپ، بۇكىل دۇنيە جۇزىنە ەستەن كەتپەستەي حاڭجوۋ ەستەلىگىن قالدىراتىندىعىنا سەنىمى بار، قابىلەتى جەتەدى.
سينگ مىنالاردى ءبىلدىردى: مەن ازيا وليمپيادا القالار كەڭەسى اتىنان جۇڭگو ۇكىمەتىنىڭ ازيا وليمپيادا ىستەرىنىڭ دامۋىن ۇزاق ۋاقىتتان بەرى قولداعاندىعىنا، سونداي - اق وسى رەتكى حاڭجوۋ ازيا سپورت جارىسىن وتكىزگەندىگىنە العىس ايتامىن. حاڭجوۋداعى ءتۇرلى الاڭ - سارايلارداعى قۇرىلعىلاردىڭ ءبارى ەرەكشە ادەمى، وزىق، ادامعا تەرەڭ اسەر قالدىرادى ەكەن، سپورتشىلار ەرەكشە رازى. جۇڭگو حالقى ەرەكشە ىقىلاستى، دوس، ءار ەل سپورتشىلارىنا جانە سيلى قوناقتارعا ءوز ۇيىنە كەلگەندەي اسەر بەردى. حاڭجوۋ ازيا سپورت جارىسىنىڭ، ءسوز جوق، تارتىمدى دا تابىستى بولاتىندىعىنا سەنەمىن! جۇڭگونىڭ ازيا سپورت ىستەرىنىڭ دامۋىنا ۇزدىكسىز ماڭىزدى ۇلەس قوسا بەرۋىن ءۇمىت ەتەمىن.
ساي چي، ديڭ شۋەشياڭ، ۋاڭ ي، شىن يچين قاتارلىلار كەزدەسۋگە قاتىناستى.
شينحۋا اگەنتتىگىنىڭ 9 - ايدىڭ 22 - كۇنى حاڭجوۋدان بەرگەن حابارى (تىلشىلەر ۋاڭ بين، يىن شياۋشىڭ). 9 - ايدىڭ 22 - كۇنى تۇستەن كەيىن مەملەكەت ءتوراعاسى شي جينپيڭ حاڭجوۋداعى شيحۋ مەملەكەتتىك قوناق ۇيىندە جۇڭگوعا 19 - كەزەكتى ازيا سپورت جارىسىنىڭ اشىلۋ سالتىنا قاتىناسۋعا كەلگەن حالىقارالىق وليمپيادا كوميتەتىنىڭ ءتوراعاسى باحپەن كەزدەستى.
شي جينپيڭ باحتىڭ جانە حالىقارالىق وليمپيادا كوميتەتىنىڭ ۇزاق ۋاقىتتان بەرى جۇڭگونىڭ وليمپيادا سپورتى مەن دەنە تاربيە ىستەرىنىڭ دامۋىنا قولداۋ كورسەتىپ كەلگەندىگىنە العىس ايتتى. شي جينپيڭ بىلاي دەپ اتاپ كورسەتتى: 100 جىلدىق وزگەرىس پەن عاسىرلىق ىندەتتىڭ ءوزارا قاباتتاسۋى الا كەلگەن قاتاڭ سايىستار الدىندا، حالىقارالىق وليمپيادا كوميتەتى وليمپيادا اۋەلگى ماقساتىنان اينىماي، وليمپيادا رۋحىن اسقاقتاتىپ، وليمپيادا نەگىزگى ماقساتىن امالياتتا ايگىلەپ، دەنە تاربيەنى ساياسيلاندىرۋعا قارسى تۇرىپ، حالىقارالىق وليمپيادا سپورتىنىڭ قيىندىقتاردى ەڭسەرە العا ىلگەرىلەۋىن جەبەپ، دۇنيە ءجۇزىنىڭ بەيبىتشىلىگى مەن دامۋىن قورعاۋدا، ادامزاتتىڭ ىنتىماقتاسا العا باسۋىن ىلگەرىلەتۋدە وزگەشە ماڭىزدى رول اتقاردى.
شي جينپيڭ بىلاي دەپ باسا دارىپتەدى: جۇڭگو دەنە تاربيە ىستەرىن دامىتۋعا باستان - اياق ءمان بەرىپ، حالىقارالىق وليمپيادا ىستەرىنە بەلسەنە ات سالىسىپ، ”اناعۇرلىم تەز، اناعۇرلىم جوعارى، اناعۇرلىم مىقتى − اناعۇرلىم ىنتىماقتى بولۋ“ سىندى وليمپيادا اقىلياسىن امالياتتا ايگىلەدى. بىلتىر جۇڭگو جاڭا تيپتى ايدارشا ۆيرۋس ىندەتى سياقتى سايىستاردى جەڭىپ، بۇكىل دۇنيە جۇزىنە ءبىر كەزەك ”قاراپايىم، حاۋىپسىز، تارتىمدى“ بەيجيڭ قىسقى وليمپيادا سپورت جارىسىن تارتۋ ەتتى. بەيجيڭ بۇكىل الەمدەگى تۇڭعىش “قوس وليمپيادا قالاسىنا“ اينالدى. جۇڭگونىڭ وليمپيادا رۋحىن تاراتۋ قادامى ماڭگى توقتامايدى، حالىقارالىق وليمپيادا كوميتەتىمەن بىرگە دەنە تاربيەنى ساياسيلاندىرماۋ پرينسيبىنە تاباندى بولىپ، بەيجيڭ قىسقى وليمپيادا سپورت جارىسى مۇرالارىنان تولىق پايدالانىپ، وليمپيادا ىستەرىن ىلگەرىلەتۋ جانە ادامزاتتىڭ تاعدىرلاس ورتاق تۇلعاسىن قۇرۋ ءۇشىن تىڭ دا اناعۇرلىم زور ۇلەستەر قوسۋدى قالايدى. كەزەكتە حاڭجوۋ ازيا سپورت جارىسىنىڭ دايىندىق قىزمەتتەرى تولىق ءبىتتى. جۇڭگو ۇكىمەتى مەن جۇڭگو حالقى ءبىر كەزەك ”جۇڭگوشا ەرەكشەلىككە يە، ازيا كەلبەتىن ايگىلەگەن، تارتىمدى“ دەنە تاربيە سالتاناتتى جينالىسىن كورسەتىپ، وليمپيادا سپورتىنىڭ دامۋىن ىلگەرىلەتۋگە، ازيا حالقىنىڭ ىنتىماعىن جانە دوستىعىن جەبەۋ ءۇشىن تىڭ ۇلەس قوسۋعا تولىق سەنىمدى.
باح مىنالاردى ءبىلدىردى: مەن ءار جولى جۇڭگوعا ساپارلاي كەلگەندە ىقىلاستى شىن نيەت پەن قۋانىشتى سەزىنەمىن. جۇڭگو ۇكىمەتى دەنە تاربيە ىستەرىن دامىتۋعا وسكەلەڭ ءمان بەرىپ، حالىقارالىق وليمپيادا سپورتىنا ماڭىزدى ۇلەستەر قوستى. بەيجيڭ قىسقى وليمپيادا سپورت جارىسى اسا تارتىمدى، تابىستى ءوتىپ، جۇڭگو حالقى مەن دۇنيە ءجۇزى حالقى بەيجيڭ قىسقى وليمپيادا سپورت جارىسىنىڭ مۇرالارىنان ۇزدىكسىز يگىلىككە كەنەلەدى. كەزەكتە دۇنيە ءجۇزى وڭىرلىك قاقتىعىس سياقتى ءتۇرلى قيىنشىلىقتارعا ءدوپ كەلۋدە، حالىقارالىق وليمپيادا كوميتەتى كوپ جاقتىلىقتى قورعاۋعا كۇش سالىپ، دەنە تاربيەنى ساياسيلاندىرۋعا قارسى تۇرادى، جۇڭگو جاقتىڭ وسى جونىنەن قولدانعان دۇرىس تۇرعىسىن القايدى. حالىقارالىق وليمپيادا كوميتەتى جۇڭگومەن تابىستى سەلبەستىك جاساعاندىعىنا ريزا، جۇڭگونىڭ حالىقارالىق وليمپيادا سپورت ىستەرىنە قولداۋ كورسەتكەندىگىنە العىس ايتادى، جۇڭگومەن سەلبەستىكتى اناعۇرلىم كۇشەيتۋدى ءۇمىت ەتەدى. حاڭجوۋ ازيا سپورت جارىسىنىڭ تابىستى دا تارتىمدى بولاتىندىعىنا، ازيانىڭ ىنتىماعى مەن دوستىعىن جەبەيتىندىگىنە سەنەمىن.
ساي چي، ديڭ شۋەشياڭ، ۋاڭ ي، شىن يچين قاتارلىلار كەزدەسۋگە قاتىناستى.
