ازيا سپورت جارىسىنىڭ جاڭا كارتيناسىن بىرگە كەسكىندەپ، ازيانىڭ كوركەم بولاشاعىن بىرگە جاراتايىق
− 19 - كەزەكتى ازيا سپورت جارىسىنىڭ باستالعاندىعىن قىزۋ قۇتتىقتايمىز
حالىق گازەتى باسماقالاسى
وسى ساتتە اسقاق سەزىم مەن كۇش - قۋات ايگىلەندى؛ وسى ساتتە ءۇمىت پەن ارمان الاۋلادى.
9 - ايدىڭ 23 - كۇنى كەشتە 19 - كەزەكتى ازيا سپورت جارىسى جىجياڭ ولكەسىنىڭ حاڭجوۋ قالاسىندا سالتاناتپەن باستالادى. مول ءونىمنىڭ سيمۆولى بولعان جۇڭگونىڭ ەسكىشە كالەندارىنداعى كۇن مەن ءتۇننىڭ كۇزگى تەڭەلۋى شاعىندا ازياداعى ءار ەلدەن، ءار وڭىردەن كەلگەن دەنە تاربيە ساڭلاقتارى شيحۋ كولىنىڭ جاعاسىندا باس قوسىپ، ”بىرگە قىزۋ ءسۇيۋ، بىرگە قاتىناسۋ، بىرگە ءبولىسۋ“ جىگەرلى اۋەنىن قول ۇستاسا اسقاقتاتىپ، بەيبىتشىلىكتىڭ، دوستىقتىڭ، العا باسۋدىڭ شىت جاڭا تاراۋىن بىرگە جازادى.
حاڭجوۋ ازيا سپورت جارىسى پارتيا 20 - قۇرىلتايى جەڭىسپەن اشىلعاننان كەيىن، ەلىمىز وتكىزگەن كولەمى ەڭ ۇلكەن، دەڭگەيى ەڭ بيىك حالىقارالىق امبەباپ دەنە تاربيە جارىسى. وعان بۇكىل ەل نازار اۋدارۋدا، بۇكىل دۇنيە ءجۇزى كوز تىگۋدە. بۇل بەيجيڭ، گۋاڭجوۋدان كەيىن ازيا سپورت جارىسىنىڭ 3 - رەت جۇڭگونىڭ قالاسىندا وتكىزىلۋى. باس شۋجي شي جينپيڭ بىلاي دەپ اتاپ كورسەتتى: ”جۇڭگو ۇكىمەتى مەن حالقى حاڭجوۋدا ءبىر كەزەك كەرەمەت تارتىمدى ازيا سپورت جارىسىن وتكىزۋ جونىنەن تولىق سەنىمدى“.
حاڭجوۋ ازيا سپورت جارىسىن، ازيا مۇگەدەكتەر سپورت جارىسىن ويداعىداي وتكىزۋ − پارتيا مەن مەملەكەتتىڭ بيىلعى قىزمەتىندەگى ءبىر ءىرى ءىس. ءساتتى ءوتىنىش ەتكەننەن بەرى شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا جىجياڭ ”جاسىل، زەردەلى، ۇنەمشىل، وركەنيەتتى“ جارىس وتكىزۋ ۇستانىمىن دايەكتىلەندىرۋگە تاباندى بولىپ،”قاراپايىم، حاۋىپسىز، تارتىمدى“ جارىس وتكىزۋ تالابىن جاپپاي تياناقتاندىرىپ، تۇتاس تىزبەكتىڭ بارلىق بۋىندارىنداعى دايىندىق قىزمەتىن بار قايراتىن سالىپ كەمەلىنە كەلتىرە، ويداعىداي ىستەدى. 8 جىل قاجىماي - تالماي قۇلشىنۋ ارقىلى ءبىزدىڭ دۇنيە جۇزىنە ءبىر كەزەك ”جۇڭگوشا ەرەكشەلىككە يە، ازيا كەلبەتىن ايگىلەگەن، تارتىمدى دا تاماشا“ دەنە تاربيە سالتاناتىن ۇسىنۋ جونىنەن سەنىمىمىز كامىل، قابىلەتىمىز دە قاپتال جەتەدى.
دەنە تاربيە − قوعامنىڭ دامۋى مەن ادامزاتتىڭ العا باسۋىنداعى ماڭىزدى بەلگى، حالىقتاردىڭ دوستىعىن كۇشەيتەتىن دانەكەر. ازيا وڭىرىندەگى ەڭ كولەمدى امبەباپ دەنە تاربيە سپورتى رەتىندە، ازيا سپورت جارىسى دەنە تاربيە رۋحىن اسقاقتاتىپ، ازيا كەلبەتىن ايگىلەپ، دوستىقتى، ىنتىماقتى جەبەپ، ازيا ءوڭىرىنىڭ باسەكەلىك دەنە تاربيە دەڭگەيىن ۇزدىكسىز جوعارىلاتىپ، ازيا دەنە تاربيەسىنىڭ ىنتىماقتاسىپ، سەلبەستىك ورناتۋىنداعى ماڭىزدى تۇعىرعا اينالدى. جۇڭگو حالقى دەنە تاربيەنى قىزۋ سۇيەدى، ازيا سپورتىن قىزۋ سۇيەدى، قاي - قاشان دا ازيا دەنە تاربيە ىستەرىنىڭ باتىل ات سالىسۋشىسى، بەلسەندى ىلگەرىلەتۋشىسى، ماڭىزدى ۇلەس قوسۋشىسى بولىپ كەلەدى. ازيا سپورت جارىسى جۇڭگو حالقىنىڭ دەنە تاربيە سپورتىنا قاتىناسۋ قىزعىندىلىعىن تاسقىنداتىپ، جۇڭگونىڭ دەنە تاربيە ىستەرىندە تابىسقا قول جەتكىزۋىنە كۋا بولدى. حاڭجوۋ ازيا سپورت جارىسىنا قاتىناسۋعا تىزىمدەلگەن ادام سانى تاريحتاعى ەڭ جوعارى دەڭگەيگە جەتىپ، ازيا سپورت جارىسى تاريحىندا كولەمى ەڭ ۇلكەن، تۇرلەرى ەڭ كوپ، قامتىمى ەڭ كەڭ بولعان ءبىر كەزەك بولىپ، ازيا دەنە تاربيە مادەنيەتىنىڭ الۋان تۇرلىلىگى مەن باۋرامدىلىعىن تولىق ايگىلەپ، ازيا سپورت تاريحىندا بوياۋى قانىق ءبىر ءىز قالدىرىپ، وسىناۋ ماڭىزدى دەنە تاربيە سالتاناتىنا جاڭا ومىرشەڭدىك كۇش قوساتىندىعى داۋسىز.
ازيا سپورت جارىسى − دەنە تاربيە باسەكە ساحناسى، دەنە تاربيە ساڭلاقتارىنىڭ ايانباي كۇرەس جاسايتىن، وزدەرىن ايگىلەيتىن تۇعىر. حاڭجوۋ ازيا سپورت جارىسىندا ازياداعى 45 مەملەكەت پەن رايوننان كەلگەن ۋاكىلدەر ۇيىرمەسىندەگى 12 مىڭنان استام سپورتشى جارىسقا قاتىناسۋعا تىزىمدەلدى. قالىڭ دەنە تاربيە ساڭلاقتارىنىڭ ءوزارا قۇرمەت ەتىپ، ءوزارا شابىت بەرىپ، جوعارى شەككە سايىس جاريالاپ، قىزعىندى جارىس بارىسندا دەنە تاربيەنىڭ قۇدىرەتىن ايگىلەۋىن، تاماشا ءومىردى كەسكىندەۋىن اسىعا كۇتەمىز. جۇڭگو 1329 ادامنان قۇرام تاپقان دەنە تاربيە ۋاكىلدەر ۇيىرمەسىن شىعارىپ، 38 ۇلكەن تۇردەگى، 407 شاعىن تۇردەگى جارىسقا قاتىناسادى. وليمپيادا رۋحى مەن جۇڭحۋا دەنە تاربيە رۋحىن كۇش سالا اسقاقتاتىپ، ”بورىش ارقالايمىن، كۇرەس جۇرگىزەمىن“ دەيتىن جاۋاپكەرشىلىك ارقالاۋمەن قايىسپاس قايسارلىقپەن تالپىنىپ، وزدەرىن ايگىلەپ، وتانعا داڭق اپەرۋگە ۇمتىلعاندا، دۇنيە جۇزىنە جۇڭگو ۇلگىسىندەگى وسىزاماندانعان دەنە تاربيە امالياتىنىڭ قۇدىرەتتى كۇشىن ايگىلەيتىندىگى ءسوزسىز.
كەزەكتە دۇنيە ءجۇزى وزگەرىسى، ءداۋىر وزگەرىسى، تاريحي وزگەرىس بۇرىن بولماعان تاسىلدە جۇرىلۋدە، ادامزاتتىڭ تاعدىرلاس ورتاق تۇلعاسىن قۇرۋ − دۇنيە جۇزىندەگى ءار ەل حالىقتارىنىڭ بولاشاق ارقاۋى. باس شۋجي شي جينپيڭ بىلاي دەپ باسا دارىپتەدى: ”ءبىز ازيانى ۇزدىكسىز ويداعىداي دامىتىپ، ويداعىداي كوركەيتىپ، ازيانىڭ سەرپىمدىلىگىن، اقىل - پاراساتىن، كۇش - قۋاتىن ايگىلەۋىمىز كەرەك“. ”ازيا تاعدىرلاس ورتاق تۇلعاسىنا قاراي قادام تاستاۋ ارقىلى ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ كەرەك“. حاڭجوۋ ازيا سپورت جارىسىنىڭ ”جۇرەكتەردى توعىستىرىپ، سۇيىسپەنشىلىكتى بولاشاققا جالعاۋ“ سىندى ۇرانى ”اناعۇرلىم تەز، اناعۇرلىم ورەلى، اناعۇرلىم قۋاتتى − اناعۇرلىم ىنتىماقتى بولۋ“ سىندى وليمپيادا ناقىلىمەن بارىنشا ۇيلەسكەن، بولاشاققا بەت الۋ، ازيانىڭ جانە ادامزاتتىڭ تاعدىرلاس ورتاق تۇلعاسىن بىرگە قۇرۋ تاماشا ارمانىن ارقالاعان. ”ازيادان كوتەرىلگەن تولقىن“ دەگەندى نەگىزگى تاقىرىپ ەتكەن باستالۋ سالتىنان تارتىپ جۇڭحۋانىڭ تاڭداۋلى ءداستۇرلى مادەنيەتىمەن نارلەنگەن الاۋ، قۇت بەلگى، مەدال قاتارلىلاردى جوبالاۋعا دەيىن، ونان ارى جۇڭحۋا دەنە تاربيە مادەنيەت كورمەسى، ”دەنە تاربيە شۇعىلاسىن بويعا جيىپ، كورىكتى بولاشاققا بىرگە اتتانۋ“ كورمەسى سياقتى سايكەستى قيمىلداردى وتكىزۋگە دەيىن... دەنە تاربيە ارقىلى جول سالىپ، كوپىر سالىپ، وركەنيەت اۋىس - كۇيىسىن، ءوزارا ۇلگى الۋىن جەبەۋ، ءسوز جوق، ازيانىڭ گۋمانيتارلىق اۋىس - كۇيىسىنىڭ، مادەنيەت توعىسۋىنىڭ، حالىقتىڭ تىلەكتەس بولۋىنىڭ جاڭا جاعدايىن اشۋعا پايدالى، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە تەرەڭ قاتپارلى، باياندى مادەنيەت كۇش - قۋاتىن ۇستەيدى.
شىعىستان سامال ەستى، چيانتاڭجياڭدا تولقىن كوتەرىلدى، اسەم اۋەن شىعاندادى. بۇگىن كەش لياڭجۋ بايىرعى قالاسىنىڭ جۇرتىنان تاراعان ”وركەنيەت ساۋلەسى“ ازيانىڭ ۇلى ىنتىماعىنىڭ سيمۆولى بولعان دەنە تاربيە ۇشقىنىن تۇتاندىرادى، تاريحى ۇزاق جۇڭحۋا وركەنيەتى مەن اسقاق سەزىم الاۋلاعان دەنە تاربيە سالتاناتى ءبىر - بىرىنە ءار بەرەدى. ارماندى جەلكەن، كۇرەس جاساۋدى ەسكەك ەتىپ، ازيا سپورت جارىسىنىڭ جاڭا تاراۋىن بىرگە كەسكىندەپ، ازيانىڭ كورىكتى بولاشاعىن بىرگە جاراتايىق!
19 - كەزەكتى ازيا سپورت جارىسىنىڭ تابىستى بولۋىن تىلەيمىز!
(شينحۋا اگەنتتىگىنىڭ 9 - ايدىڭ 22 - كۇنى حاڭجوۋدان بەرگەن حابارى)
