شينجياڭدىق بويجەتكەن شيا شين - ي قايراڭ ۆولەيبول جارىسىندا التىن مەدال الدى
جۇڭگو ايەلدەر قايراڭ ۆولەيبول كومانداسى ازيا سپورت جارىسىندا ءۇرتىس 6 رەت اعا جۇلدەگەر بولدى
9 - ايدىڭ 27 - كۇنى حاڭجوۋ ازيا سپورت جارىسىنىڭ ايەلدەر قايراڭ ۆولەيبول گرۋپپاسىنىڭ سيلىق ساحناسىندا، شينجياڭدىق بويجەتكەن شيا شين - ي (وڭدا) سەرىگىمەن بىرگە كورەرمەندەرگە قۇرمەت بىلدىرۋدە.
□ سۋرەتتى انار بۇلت \ شينجياڭ گازەتىنىڭ ءتىلشىسى لۇي يحان تۇسىرگەن
انار بۇلت \ شينجياڭ گازەتىنىڭ ءتىلشىسى رىن جياڭ 9 - ايدىڭ 27 - كۇنى نيڭبودان حابارلايدى. ”جۇڭگو! جۇڭگو! جۇڭگو! قايراتتان! قايراتتان! قايراتتان“! 9 - ايدىڭ 27 - كۇنى تۇستەن كەيىن نيڭبوداعى بانبيانشان قايراڭ ۆولەيبول ورتالىعىندا كورەرمەندەردىڭ قولدارىنداعى كىشكەنە مەملەكەت تۋىن بۇلعاپ، سپورتشىلاردى ريتىمدى تۇردە جىگەرلەندىرگەن ءۇنى كەڭىستىكتى جاڭعىرتتى. حاڭجوۋ ازيا سپورت جارىسى ايەلدەردىڭ قايراڭ ۆولەيبول جارىسىنىڭ شەشۋشى جارىسى قيان - كەسكى جۇرىلۋدە، جۇڭگو قۇراماسى شۋە چىن مەن شيا شين - يدىڭ ارىپتەسى جاپونيا قۇراماسى ەدى.
1 - اينالىمدا، جۇڭگو كومانداسى 11: 21 ۇپايمەن وپ - وڭاي جەڭىسكە جەتتى. 2 - اينالىمدا ۇپاي الۋدا ءبىر مەزگىل تىرەسكەننەن كەيىن، جۇڭگو كومانداسى تەز ارادا جاعدايدى ورنىقتىرىپ، باسىمدىعىن بارىنشا زورايتتى.
13：20! جۇڭگو ايەلدەر قايراڭ ۆولەيبول كومانداسى شەشۋشى ۇپاي تۇيىنىنە كەلدى! بۇكىل الاڭ دۇرلىگىپ، جارىستى كوپتەگەن ادامدار ورىندارىنان تۇرىپ كوردى. شينجياڭدىق بويجەتكەن شيا شين - ي دوپ باستادى، جاپونيا كومانداسىنىڭ مۇشەسى دوپتى ايتارلىقتاي الا الماي، تورعا ارەڭ جەتكىزىپ، سەكىرىپ قاقتى، سىزىقتان شىعىپ كەتتى! جۇڭگو كومانداسى جەڭدى!
سول ساتتە دوپ الاڭى شاتتىق تەڭىزىنە شومدى، ادامدار الاقايلاپ، قولدارىنداعى مەملەكەت تۋىن بۇلعاپ، گاز تولتىرىلعان تاياقشالارىن بار كۇشتەرىمەن قاقتى. شيا شين - ي مەن شۋە چىن قۇشاقتاسىپ جەڭىستەرىن قۇتتىقتادى. وسى اعا جۇلدەگەرلىك جۇڭگو ايەلدەر قايراڭ ۆولەيبول كومانداسىنىڭ ازيا سپورت جارىسىندا ءۇرتىس 6 رەت اعا جۇلدەگەر بولعاندىعىن كورسەتتى، شيا شين - ي ءۇرتىس 3 كەزەك ازيا سپورت جارىسىندا وسى تۇردەن جالعاستى التىن مەدال الىپ كەلەدى.
”جۇڭگو كومانداسى كەرەمەت وينادى“، - دەدى شاۋشيڭنەن جارىستى ارنايى كورۋگە كەلگەن كورەرمەن جوۋ گولياڭ. جۇڭگو كومانداسى اعا جۇلدەگەرلىكتى العاندا بۋرىل شاشتى وسى كاريا بالاشا شاتتانىپ، وتىرعىدا بيگە باستى.
جۇڭگو كومانداسىنىڭ دوپشىلارى دوپشىلار ارناسىنا قاراي بارىپ، الاڭنان شەگىنەر كەزدە، وتىرعىداعى ءبىر ادام زور داۋىسپەن: ”شيا شين - ي، ءبىز شينجياڭنان سەنى كورگەلى كەلدىك“! - دەپ ايعايلادى، شيا شين - ي كىدىرىپ، وتىرعىداعى ادامدارعا كۇلىمسىرەپ قول بۇلعاپ قۇرمەت ءبىلدىردى. ”بۇگىن جارىس الاڭىنداعى راي توتەنشە جاقسى بولدى، كورەرمەندەردىڭ جىگەرلەندىرۋى ءبىز ءۇشىن كۇشتى قولداۋ بولدى“. جارىستان كەيىن وتكەن اقپار جاريالاۋ ماجىلىسىندە شيا شين - ي بىلاي دەدى: ”بۇگىن الاڭدا شينجياڭدىق اۋىلداستاردىڭ ءبىزدى جىگەرلەندىرگەن داۋىسىن ەستىدىم، اتا مەكەندەگى حالىققا توتەنشە راقىمەت ايتامىن“.
2014 - جىلعى رىنچۋان ازيا سپورت جارىسىنان باستاپ، 2018 - جىلعى جاكارتا ازيا سپورت جارىسىنا، ودان حاڭجوۋ ازيا سپورت جارىسىنا دەيىن، ءۇرتىس 3 رەت اعا جۇلدەگەرلىكتى العان شيا شين - ي سول كەزدەگى ”قايراڭ ۆولەيبولىنداعى بالاۋسادان“ ”بايشەشەككە“ اينالدى. ”مەن جۇڭگودا وتكەن حالىقارالىق جارىس الاڭىندا بەس جۇلدىزدى قىزىل تۋدى جەلبىرەتەمىن“. ونىڭ حاڭجوۋ ازيا سپورت جارىسى باستالاردان بۇرىن بەرگەن ۋادەسى بۇگىن ورىندالدى.
بيىل 26 جاستاعى شيا شين - ي جاس ءوسپىرىم شاعىنان تانىلىپ، دۇنيە جۇزىلىك قايراڭ ۆولەيبول اينالمالى جارىسىندا اعا جۇلدەگەرلىكتى العاندا 16 جاستا عانا بولىپ، ەل ىشىندەگى قايراڭ ۆولەيبول سالاسىنداعى ەڭ جاس دۇنيە جۇزىلىك اعا جۇلدەگەر بولدى، رىنچۋان ازيا سپورت جارىسى ايەلدەردىڭ قايراڭ ۆولەيبول جارىسىنىڭ التىن مەدالىن العاندا 17 جاستا عانا ەدى. ال بۇگىندەرى 3 رەت ازيا جۇلدەسىنە تالاسۋ جارىسىنا، 3 رەت ازيا سپورت جارىسىنا قاتىناسقان شيا شين - ي 6 رەت ازيا اعا جۇلدەگەرلىگىن الدى.
سايىس ءالى جالعاسۋدا. وسى رەتكى جارىس اياقتاعاننان كەيىن، شيا شين - ي مەن شۋە چىن شەتەلگە شىعىپ جارىسقا قاتىناسادى. ”ءبىز ءالى دە ۇزاق جول باسامىز، كوپ بەكەتتەگى جارىسقا قاتىناسامىز. ءبىز نىق قاداممەن، بەلگىلەگەن نىسانانى كوزدەپ العا ۇمتىلىپ، پاريج وليمپياداسىندا جاقسى ناتيجەگە قول جەتكىزۋگە قۇلشىنامىز“، - دەدى شيا شين - ي.
