دوستىقتى قاستەرلەپ، جۇڭگو − وزبەكستان ”جاڭا جىبەك جولى“ حيكاياسىن جالعاستىرا جازدى
□ انار بۇلت \ شينجياڭ گازەتىنىڭ تىلشىلەرى لي حۋا، حي حۇڭۋي، ليۋ شياڭ
شەكسىز قۇم تەڭىزىندەگى ۇزىننان - ۇزاق سوزىلعان كەرۋەننىڭ قورجىنىنا نە وزبەكستاننان كەلگەن حوش ءيىستى زاتتار، كەن رۋداسى تولتىرا سالىنادى، نە جۇڭگودان كەلگەن فارفور جابدىق، شاي، جىبەك تولتىرىلادى... بايىرعى جىبەك جولىنىڭ ماڭىزدى بەكەتى سانالاتىن وزبەكستاننىڭ ”ورتا ازيانىڭ جۇرەگى“ دەگەن اتى بار، جۇڭگو مەن وزبەكستاننىڭ بارىس - كەلىس تاريحى ارىدان جالعاسىپ كەلەدى. بۇگىنگى تاڭدا، جۇڭگو مەن وزبەكستان ەكى ەل مىڭ جىلدىق دوستىقتى باستان وتكەرىپ، ”ءبىر بەلدەۋ، ءبىر جولدى“ بىرگە قۇرۋ اياسىندا ءارقايسى سالاداعى سەلبەستىكتى ۇزدىكسىز تەرەڭدەتىپ، بايىرعى ازيا - ەۆروپا قۇرلىعىندا ”جاڭا جىبەك جولى“ حيكاياسىن جالعاستىرىپ جازۋدا.
قاتتى بايلانىس
ۇلاستىرۋ - تۇتاستىرۋ سەلبەستىگىن ۇزدىكسىز تەرەڭدەتتى
9 - ايدىڭ 22 - كۇنى وزبەكستاننىڭ استاناسى تاشكەنتتەگى ەرەكشە ترانسفورماتور جارنا شەكتى سەرىكتەستىگىنىڭ وزبەكستانداعى ءىس باسقارماسىنا بارعانىمىزدا، ەلەكتر ينجەنەرلەرى قۇرىلىسى باستالعالى تۇرعان وزبەكستان مۇرىنتاۋ 500 كيلوۆولتتىق كەرنەۋ اۋىستىرۋ پۋنكتى نىسانى جوباسىنىڭ چەرتوجىنا ەڭ سوڭعى رەت وزگەرىس ەنگىزىپ جاتىر ەكەن.
”بۇل نىسان وزبەكستاننىڭ مەملەكەت ەكونوميكاسىن دامىتۋىندا ماڭىزدى رول اتقاراتىن بولادى“. ەرەكشە ترانسفورماتور جارنا شەكتى سەرىكتەستىگى يمپورت - ەكسپورت سەرىكتەستىگى حالىقارالىق ىستەر 3 - ءبولىمىنىڭ ورىنباسار باس باقىلاۋشىسى تان چي بىلاي دەدى: نىسان وزبەكستاننىڭ ناۋويى وبلىسىنا ورنالاسقان، بۇل وبلىستا ءىرى كولەمدى ونەركاسىپ رايونى بار، نىسان قۇرىلىسى جەرگىلىكتى ورىننىڭ دامۋىن سەنىمدى ەلەكتر قۋاتىمەن قامدايدى ءارى قىرۋار جۇمىس ورنىن ازىرلەيدى.
ەرەكشە ترانسفورماتور 2005 - جىلى وزبەكستاندا كاسىبىن باستاعان. بيىل 4 - ايدا وزبەكستاننىڭ شاۋدار جانە 50 + 135 سۋ ەلەكتر ستانسياسى نىسانى رەسمي پايدالانۋعا بەرىلىپ، سامارقانداعى اۋىل شارۋاشىلىعىن سۋلاندىرۋدا ەلەكتردەن پايدالانۋدىڭ قىسىلتاياڭ بولۋ ماسەلەسىن بارىنشا باسەيتتى ءارى ەلەكتردەن پايدالانۋ قامتاماسىزدىعىن ازىرلەپ، ەلەكتردەن پايدالانۋ وزىندىك قۇنىن تومەندەتتى.
10 جىلدان بەرى جۇڭگو جاسىل دامۋ ۇستانىمىن ”ءبىر بەلدەۋ، ءبىر جولدى“ بىرگە قۇرۋدىڭ ءار سالاسىمەن توعىستىرىپ، جاسىل ءتۇستى ”ءبىر بەلدەۋ، ءبىر جولدى“ بىرگە قۇرۋدىڭ ءتۇپ بوياۋىنا اينالدىردى.
2022 - جىلى 9 - ايدا جينفىڭ عىلىم - تەحنيكاسى وزبەكستاننىڭ521MW جەل ەلەكتر نىسانىنا ءساتتى قول قويىستى. ”قازىر نىسان ينجەنەريالىق قۇرىلىس جۇرگىزۋ كەزەڭىندە تۇر، جيىنى 10 جەل كۇشىمەن ەلەكتر تاراتۋ گەنەراتور اگراگاتتارىن ورناتىپ بولدى“. جينفىڭ عىلىم - تەحنيكاسى وزبەكستان بولىمشە سەرىكتەستىگىنىڭ باس ديرەكتورى ليۋ چۇنحاي تىلشىگە بىلاي دەدى: نىسان سالىنىپ بولعاننان كەيىن، جەرگىلىكتى ورىننىڭ ەلەكتر قۋاتى قۇرىلىمىن كورنەكتى جاقسارتىپ، ءار جىلى ءبىر ميلليون 100 مىڭ توننا كومىر قىشقىل گازىنىڭ شىعارىلۋىن ازايتىپ، وزبەكستاننىڭ 2030 - جىلى جاسىل ەلەكتر قۋاتىنىڭ سالىستىرماسىن ％25كە كوتەرۋ نىساناسىن جۇزەگە اسىرۋىنا دەم بەرەدى.
”ءبىر بەلدەۋ، ءبىر جول“ باستاماسى العا قويىلعان 10 جىلدان بەرى جۇڭگو مەن وزبەكستاننىڭ سەلبەستىك جەتىستىكتەرى مول بولدى. سەلبەستىك جولىنىڭ بەرىكتىگىن نەگىزدىك قۇرىلعىلاردىڭ ”قاتتى بايلانىسۋىنان“ بولە قاراۋعا بولمايدى.
10 - ايدىڭ 15 - كۇنىنەن باستاپ، جۇڭگو وڭتۇستىك اۆياتسياسى ۇرىمجىدەن سامارقانعا دەيىنگى اۋە جەلىسىن جاڭادان اشۋدى جوسپارلاپ وتىر. وسى اۋە جەلىسى اشىلعاننان كەيىن، جۇڭگو مەن سامارقان اراسىنداعى مەرزىمدى تۇردە تىكە قاتىناۋ تۇڭعىش رەت جۇزەگە اسىپ، سول كەزدە وڭتۇستىك اۆياتسيانىڭ شينجياڭنان وزبەكستانعا ۇشاتىن اۋە جەلىسى ەكىگە مولايىپ، جۇڭگو مەن وزبەكستان ەكى ەلدىڭ ساياحات - سەرۋەنىنە، ساۋدا بارىس - كەلىسىنە قولايلى دا جوعارى ءونىمدى ”كەڭىستىك كوپىرىن“ سالادى.
قازىرگى ۋاقىتتا، جۇڭگو − قىرعىزستان − وزبەكستان تەمىر جولى نىسانىنىڭ الدىڭعى مەرزىمدىك جارامدىلىعىن زەرتتەۋ جۇمىستارى سوڭىنا تاياپ قالدى، نىسان سالىنىپ بولعاننان كەيىن، جەلى بويىنداعى ەلدەر مەن وڭىرلەردىڭ حالقىن باقىتقا كەنەلتەتىن تاعى ءبىر ۇلى ينجەنەرياعا اينالادى.
وزبەكستان جۇڭگو كاسىپورىندارى ساۋدا قوعامىنىڭ اتقارۋشى باستىعى ليۋ يۇي مىنانى ءبىلدىردى: جۇڭگو − قىرعىزستان − وزبەكستان تەمىر جولى سالىنىپ بولعاننان كەيىن، جاڭا ازيا − ەۆروپا ۇلى قۇرلىق كوپىرىنىڭ وڭتۇستىك داڭعىل جولىن قالىپتاستىرىپ قانا قويماي، تاعى جاڭا قۇرلىق - تەڭىز ارناسىن قالىپتاستىرىپ، ازيا − ەۆروپا ۇلى قۇرلىعى قاتىناس - تاسىمال جەلىسىنىڭ، ۇلگىسىنىڭ كوپ نەگىزدەنۋىن جۇزەگە اسىرادى، سونداي - اق شينجياڭ، ءتىپتى، ەلىمىزدىڭ باتىس بولىگىنىڭ قاتىناس جۇلگەسىن وزگەرتىپ، ”ءبىر بەلدەۋ، ءبىر جول“ قۇرىلىسىنىڭ تەڭىز بەن قۇرلىقتىڭ قوسىلا ارەكەتتەنىپ، ءبىر تۇلعالى دامۋىن جەبەيدى.
جۇمساق بايلانىس
ساۋدا، قارجى قوسۋ اناعۇرلىم ەركىن دە قولايلى بولدى
كولىكپەن تاشكەنتتىڭ كوشەلەرىندە جۇرگەنىمىزدە، سىرتقى فورماسى زاماناۋي، يقۋاتى وزىق ”جۇڭگو جاساعان“ جاڭا ەنەرگيالى كولىكتەر نازارىمىزدى اۋداردى.
سوناۋ 4 جىلدىڭ الدىندا ىلە شيڭحى ساۋدا شەكتى جاۋاپكەرشىلىك سەرىكتەستىگىنىڭ باس ديرەكتورى دياۋ جىڭلين تەكسەرۋ جۇرگىزگەننەن كەيىن وسى بازارعا نازارى اۋىپ، وزبەكستاننىڭ جانە ورتا ازيا ءوڭىرىنىڭ جاڭا ەنەرگيالى اۆتوكولىك بازارىن ورنالاستىرا باستاعان ەدى.
دياۋ جىڭليننىڭ نازارىندا كۇللى الەمنىڭ جاسىل، تومەن كومىر قىشقىل گازدى بولۋعا قاراي تيپ وزگەرتۋىنە ىلەسە، جۇڭگونىڭ جاڭا ەنەرگيالى اۆتوكولىكتەرى ءتۇرىنىڭ مولدىعى، ساپاسىنىڭ مىقتىلىعىمەن بازاردىڭ مويىنداۋىنا يە بولىپ، ىقپال كۇشى ۇزدىكسىز ارتىپ، ”سىرتقا شىعارۋ“ اياق الىسىنىڭ جەدەلدەۋى ىڭعايلى بولا ءتۇستى.
قازىرگى ۋاقىتتا جۇڭگو مەن وزبەكستان ەكى جاق قارجى قۇراۋ، ساۋدا، ەنەرگيا، سيفرلى ينفورماتسيا، اۋىل شارۋاشىلىعى سياقتى سالالارداعى ولشەمدەنگەن ناقتى سەلبەستىكتى ۇزدىكسىز تەرەڭدەتىپ، ساۋدا، قارجى قوسۋدىڭ ەركىن، قولايلى بولۋ ورەسى ۇزدىكسىز جوعارىلاپ، ”ءبىر بەلدەۋ، ءبىر جول“ قۇرىلىسىنا جاڭا داۋىرلىك تۇسىنىك ۇستەدى.
وزبەكستاننىڭ جۇڭگوداعى باس ەلشىلىگىنىڭ ساۋدا كەڭەسشىسى يحتيار نيازمۇراتوۆ مىنانى ءبىلدىردى: جۇڭگونىڭ شينجياڭى ازيا - ەۆروپا التىن ارناسى جانە باتىسقا ەسىك اشۋدىڭ الدىڭعى قامالى رەتىندە ەل ءىشى، حالىقارا سىندى ”ەكى بازاردىڭ، ەكى ءتۇرلى بايلىقتىڭ“ ەڭ ابزال ۇشتاسۋ بولىگى، تابيعي بايلانىسۋ ءتۇيىنى بولىپ، بۇكىل الەمنىڭ بايلىق فاكتورلارىن توپتالۋعا، دامۋعا باۋرايتىن تابيعي باسىمدىققا يە بولىپ وتىر.
قارجى دا مەملەكەت قاقپاسىنان بىرگە شىقتى.
”جۇڭگو مەن وزبەكستان ەكى ەلدىڭ كاسىپ سالالارىنىڭ ءبىرىن - ءبىرى تولىقتاۋىمەن ەكى جاقتىڭ كاسىپورىندارىنىڭ سەلبەستىك تىلەگى كۇشەيىپ، بولاشاعى جارقىن بولدى“. شينجياڭ بانكەسىنىڭ باستىعى لي شينپيڭ مىنانى ءبىلدىردى: الداعى جەردە جۇڭگو مەن وزبەكستان ەكى جاق كاسىپورىندارىنىڭ فينانستىق قىزمەت كورسەتۋ قاجەتىن ونان ارى ۇعىسىپ، ونىمدەردە جاڭالىق اشۋعا سۇيەنىپ، شەكارا اتتاعان حالىق اقشاسى كاسىبىن اناعۇرلىم ويداعىداي ىلگەرىلەتىپ، ءوزارا تيىمدىلىك جەتكىزىپ، بىرگە يگىلىككە كەنەلۋدى جۇزەگە اسىرامىز.
9 - ايدىڭ 23 - كۇنى تىلشىلەر جۇڭگو تاۋارلارىنىڭ وزبەكستانداعى شەتەل قويماسى ونىمدەر كورمە زالىنا كىرگەندە، جۇڭگونىڭ جۇزدەن استام ساپالى ونىمدەرى كوزدىڭ جاۋىن الىپ تۇر ەكەن.
”قويماداعى تاۋارلار ءتىپتى كوپ“! جۇڭگو تاۋارلارىنىڭ وزبەكستانداعى شەتەل قويماسىنىڭ جۇرگىزۋشىسى، شينجياڭ ازيا - ەۆروپا حالىقارالىق زات اينالىم ساۋدا ورتالىعى شەكتى سەرىكتەستىگىنىڭ كەڭەسشىسى تۇرسۇنالى كۇزيەۆ وسىلاي دەدى.
”بۇرىن الارماندار تاپسىرىس بەرگەن سوڭ، ءبىز زاتتى ەل ىشىنەن جەدەل جەتكىزۋمەن شەتەلگە شىعاراتىنبىز، زات اينالىم ۋاقىتى ۇزاق، وزىندىك قۇنى جوعارى بولاتىن“. شينجياڭ ازيا - ەۆروپا حالىقارالىق زات اينالىم ساۋدا ورتالىعى شەكتى سەرىكتەستىگىنىڭ القا باستىعى جاڭ حۇڭپيڭ بىلاي دەدى: شەتەل قويماسى ىسكە قوسىلعاننان كەيىن، زاتتاردى الدىمەن مولداپ شەتەل قويماسىنا جەتكىزىپ، الارماندار تاپسىرىس بەرگەندە تىكەلەي سالىپ جىبەرۋگە بولاتىن بولدى.
”ءبىر بەلدەۋ، ءبىر جولدى“ بىرگە قۇرۋ باستاماسى العا قويىلعاننان كەيىن، شەكارا اتتاعان ەلەكتروندىق ساۋدا كوپكە تانىلدى. جاڭ حۇڭپيڭ مەن ونىڭ جۇمىس توبى ۇزدىكسىز قۇلشىنىپ، ازيا - ەۆروپا حالقارالىق شەكارا اتتاعان كوپ تۇتىنىلاتىن تاۋار ساۋداسى تۇعىرىن ورناتىپ، شەكارا اتتاعان سەنىمدىلىك، شەكارا اتتاعان زات اينالىمى، شەكارا اتتاعان ەسەپ جابۋ، قامداۋ تىزبەگى فينانسى سياقتى قىزمەت وتەۋلەردى دامىتۋ ارقىلى بۇكىل الەمنىڭ كوپ تۇتىنىلاتىن شيكىزات تاۋارلارى دايىن بۇيىمدارىنىڭ شەكارا اتتاپ دەر كەزىندە ساۋدالانۋىن جۇزەگە اسىردى.
وزبەكستان تاشكەنت مەملەكەتتىك قاتىناس داشۋەسىنىڭ ورىنباسار باستىعى تۇرايەۆ باھودۇر حاتاموۆيچ بىلاي دەپ قارادى: الەمدىك سيفرلانۋ ساۋدا جانە حالىقارالىق بايلانىستاردى وزگەرتۋدە ەلەكتروندىق ساۋدا وسى بارىستا شەشۋشى رول اتقارىپ وتىر، ”ءبىر بەلدەۋ، ءبىر جول“ باستاماسى ءار ەل اراسىنداعى ساۋدا مەن سەلبەستىكتى جەبەۋگە وزگەشە وراي ازىرلەدى، مەكتەبىمىز دە وسى ورايدا جۇڭگونىڭ كاسىپورىندارىمەن بەلسەنە سەلبەسىپ، سيفرلى ءداۋىردىڭ سىن - سايىستارى مەن ورايلارىن قارسى الادى.
جۇرەكتەر جالعاندى
گۋمانيتارلىق بارىس - كەلىس جاڭا جالىندى كۇشتى جارىققا شىعاردى
1300نەشە جىلدىڭ الدىندا جۇڭگونىڭ تاڭ داۋىرىندەگى موناعى شۋانزاڭ ”توپىراعى قۇنارلى، ەگىنى جايقالعان، اعاشتارى ماۋەلى، جەمىس - جيدەگى مول، سايگۇلىك كوپ شىعاتىن جەر ەكەن“ دەپ سامارحاننىڭ شۇرايلى كورىنىسىن سۋرەتتەگەن بولاتىن.
جىبەك جولى ارقىلى جۇڭگو مەن وزبەكستان ەكى ەلدىڭ گۋمانيتارلىق بارىس - كەلىسى ۇزدىكسىز تەرەڭدەي ءتۇستى.
كۇڭزى شۋەيۋانى تاشكەنتتە جانە سامارحاندا قارىشتاپ دامىپ، جۇڭگو ءتىلىن بىلەتىن دارىندىلاردى مولىنان تاربيەلەپ شىقتى؛ حورەزم وبلىسىنىڭ تاريحي مادەنيەت مۇرالارىن قالپىنا كەلتىرۋ ءساتتى اياقتادى، مىڭتاپ ەسكى جۇرتى، كاڭجۇي مادەنيەتى سياقتى ارحەولوگيالىق سەلبەستىك قانات جايىپ كەلە جاتىر. وزبەكستاننىڭ جۇڭگو ازاماتتارىنىڭ 10 كۇن ۆيزاسىز كىرۋىن اتقارۋىنا ىلەسە، جۇڭگو مەن وزبەكستان ەكى ەلدىڭ ساياحات سەلبەستىگى كۇش جيىپ دامۋ الدىندا تۇر.
جىبەك جولى حالىقارالىق ساياحات جانە مادەنيەت مۇرالارى داشۋەسىنىڭ ورىنباسار باستىعى زوۋ تۇڭچيان مىنانى ءبىلدىردى: كەلەشەكتە جۇڭگو مەن وزبەكستان ەكى ەلدىڭ كوپتەگەن سالادا تاماشا سەلبەستىك جاساسۋ بولاشاعى بار، اسىرەسە، جىبەك جولى ەكونوميكالىق بەلدەۋىنىڭ وزەكتى رايونىنا ورنالاسقان شينجياڭدى بولاشاقتا ءتىپتى زور وراي كۇتىپ وتىر. ساياحات جانە مادەنيەت سالاسىندا وزبەكستاننىڭ مول ساياحات بايلىعىن جۇڭگونىڭ كەڭ تۇتىنۋ بازارىمەن ۇشتاستىرۋعا بولادى.
”ءبىز كولىكتەردى جالعا بەرۋدەن پايدالانىپ، شەكارا اتتاعان ساياحاتتى دامىتپاقشىمىز“. شينجياڭ يوۋچىڭ اۆتوكولىك قىزمەت وتەۋ شەكتى سەرىكتەستىگىنىڭ باس ديرەكتورى سۇن شين وزبەكستاننىڭ ساياحات بازارىنا باسا ءمان بەرىپ كەلەدى. ول بىلاي دەدى: ”ءبىر بەلدەۋ، ءبىر جول“ باستاماسىنىڭ جۇرت جۇرەگىنە تەرەڭ ۇيالاۋىنا ىلەسە، جۇڭگولىق ساياحاتشىلاردىڭ ورتا ازيا وڭىرىنە قىزىعۋشىلىعى ارتا تۇسۋدە، سونىمەن بىرگە جۇڭگوعا كەلگىسى كەلەتىن ورتا ازيا ەلدەرىندەگى ساياحاتشىلاردىڭ دا قاتارى مولايىپ كەلەدى.
ءبىر ءورىم ءدارىنىڭ جۇپار ءيىسى ارعى زاماننان بۇگىنگى زامانعا جەتتى. سوناۋ 2000نەشە جىلدىڭ الدىندا جۇڭي شيپاگەرلىگى، ءدارى - دارمەگى جىبەك جولىن بويلاپ دۇنيە جۇزىنە تارالدى. ”ءبىر بەلدەۋ، ءبىر جول“ باستاماسى العا قويىلعان 10 جىلدان بەرى جۇڭگونىڭ ءداستۇرلى شيپاگەرلىگى، ءدارى - دارمەگى شەتەلگە قارقىندى بەت الدى.
«جۇڭگو − ورتا ازيا باسشىلار ءماجىلىسى شي - ان جارناماسىندا»، «جۇڭگو − ورتا ازيا باسشىلار ءماجىلىسىنىڭ تابىس تىزىمدىگىندە» جۇڭي شيپاگەرلىگىن، ءدارى - دارمەگىن قامتىعان كوپتەگەن ناقتى سەلبەستىكتەر بار. حالىق تىلەگىن ۇلاستىرعان ماڭىزدى كوپىر، دانەكەر رەتىندە، جۇڭي شيپاگەرلىگى، ءدارى - دارمەگى الدەقاشان جۇڭگو مەن ورتا ازيا ەلدەرى اراسىنداعى سەلبەستىكتىڭ ماڭىزدى قۇرامداس بولىگىنە اينالىپ ۇلگەردى.
9 - ايدىڭ 22 - كۇنى ءتىلشى تاشكەنتتەگى جۇڭگو - وزبەكستان شيپاگەرلىك، ءدارى - دارمەك عىلىم - تەحنيكا قالاشىعىنا باردى. جۇڭگو عىلىم اكادەمياسىنىڭ ورتا ازيا ءدارى - دارمەك زەرتتەۋ - اشۋ ورتالىعىنىڭ تابىستاردى كادەگە جاراتۋ بازاسى رەتىندە، بۇل جەر شەتەلدەگى جۇڭي ەمدەۋ، ءدارى - دارمەك زەرتتەۋ - اشۋ، جوعارى دەڭگەيدەگى دارىندىلاردى باۋلۋ ءبىر تۇلعالانعان كەشەندى بازاعا اينالدى.
وزبەكستان عىلىم اكادەمياسى وسىمدىك حيمياسىن زەرتتەۋ ورنىنىڭ باستىعى شامانسۇر ساعدوللايەۆ مىنانى ءبىلدىردى: وزبەكستان مەن جۇڭگو ەكى ەل بيولوگيالىق ەمدەۋ، ءدارى - دارمەك سالاسىندا قوماقتى جەتىستىكتەرگە قول جەتكىزدى. بولاشاقتا ەكى جاقتىڭ باسىمدىعىن ۇزدىكسىز ساۋلەلەندىرىپ، جۇڭگونىڭ تەحنيكاسىنىڭ جانە ونىمدەرىنىڭ وزبەكستاندا جانە ورتا ازياداعى باسقا دا ەلدەردە كادەگە جاراۋىن ىلگەرىلەتىپ، جەرگىلىكتى بۇقارانى باقىتقا كەنەلتۋدى ءۇمىت ەتەمىن.
تاۋ - سۋىمىز باسقا بولسا دا، ءبىر اسپاننىڭ استىندا جاسايمىز. وزبەكستان − جۇڭگو − ورتا ازيا سەلبەستىك مەحانيزمىنىڭ ماڭىزدى قاتىسۋشىسى. ”ءبىر بەلدەۋ، ءبىر جولدىڭ“ شىعىس جەلى ورايىندا ەكى جاق جۇڭگو مەن وزبەكستاننىڭ ءتىپتى دە بەرىك تاعدىرلاس ورتاق تۇلعاسىن قۇرىپ، ۇزدىكسىز تۇردە ”ءبىر بەلدەۋ، ءبىر جول“ سەلبەستىگىنىڭ ساپاسىن ءوسىرىپ، دارەجەسىن جوعارىلاتىپ، ءتىپتى دە كەڭ اياداعى سەلبەستىكتى جۇزەگە اسىرۋعا شەكسىز مۇمكىندىك ازىرلەۋدە.
