تبيليسيدەگى شينجياڭ ماحابباتى
انار بۇلت \ شينجياڭ گازەتىنىڭ ءتىلشىسى ليۋ دۇڭلاي
9 - ايدىڭ 21 - كۇنى ءتۇن قاراڭعىلىعىندا گرۋزيانىڭ استاناسى تبيليسي مۇلگىگەن تىنىشتىققا شومعان، حۋاليڭ پرەفەرەنسى قوناقسارايىنىڭ كوگىلدىر اينەكتى سىرتقى قابىرعاسىنا سۇتتەي جارىق اي ساۋلەسى توگىلىپ تۇر.
دۇنيەنىڭ باسقا جەرىندەگىلەر دە وسى كەزدە ايدى تاماشالايتىنى قاتىران كاكەشكە وتە تانىس. وسى ساتتە اي ساۋلەسىنىڭ اتا مەكەنى التايدىڭ ۇزىننان - ۇزاققا سوزىلعان بەل - بەلەستى تاۋلارىنا توگىلىپ جاتقاندىعىن بۇل قازاق جىگىت تە اڭعارىپ جەتكەن - دى.
”ءبىر ادامنىڭ اۋىل ساعىنىشىن باساتىنى جانۇيا“. قاتىران: ”مەن بۇل ارادان تاونامدى كەزدەستىردىم“، - دەدى.
ازيا − ەۆروپا ۇلى قۇرلىعىنىڭ تۇتاسقان جەرىنە ورنالاسقان گرۋزيادا ورىس ءتىلى ەجەلدەن جەرگىلىكتى ورىننىڭ ماڭىزدى ءتىلى بولىپ كەلەدى. 2011 - جىلى 6 - ايدا قاتىران مەملەكەت قاقپاسىنان شىعىپ، گرۋزياعا كەلدى. جۇڭگونىڭ شينجياڭ حۋاليڭ ونەركاسىپ - ساۋدا (توبى) شەكتى سەرىكتەستىگى جەرگىلىكتى ورىننان قوناقساراي سالدى، ورىس تىلىنە جەتىك قاتىران فۋدى قوناقسارايىنىڭ ءبىر قىزمەتكەرىنە اينالدى.
”ورىس ءتىلىن سويلەي العاندىعىمنان، كوپ ۇزاماي كادرلار ءىسى ءبولىمىنىڭ ديرەكتورىمەن بىرگە جاڭا قىزمەتكەر قابىلداۋعا ورنالاستىم“. قاتىران: ”جۇڭگو كاسىپورىندارىنىڭ گرۋزياداعى بەدەلى وتە جاقسى، قىزمەتكەرلەرگە دە وتە جاقسى، سول جىلى مەن بارعاندا كوپتەگەن گرۋزيالىق جاستار جۇڭگو كاسىپورنىنا كەلىپ، شاقىرۋ بويىنشا قىزمەت ىستەپ جاتىپتى“، - دەدى.
ياعني ءبىر بويجەتكەن بەتپە - بەت ەمتيحان بولمەسىنە كىرگەن سول كۇنگە دەيىن، قاتىران جات ەل، جات جەردە ماحابباتتى ويلاپ تا كورمەگەن - دى. ”سول ساتتە ودان باسقا ەشتەڭە كوزىمە كورىنبەدى، ونىڭ ءسوزى ويىما كىرىپ تە قويمادى، جانارىمدا ونىڭ ايداي اجارى عانا تۇردى“.
بۇل ءبىر قىرسىق شالعان بەتپە - بەت ەمتيحان بولدى، قاتىران ۇيقىسىراعان ادامنىڭ كۇيىن كەشتى، ءبىر ءتاۋىرى، ول كومەكشى قىزمەت ىستەگەن ەدى. تاونام گوكاز جونىنەن العاندا جاعداي ءتىپتى ناشار بولىپ شىقتى، بەينەسى جالپى جاقتان العاندا ءتاۋىر بولعانىمەن، ورىس ءتىلى ناشار بولعاندىقتان سوڭىندا قابىلدانباي قالدى.
جۇرەگىن جاۋلاعان بويجەتكەننىڭ ىلىنبەي قالعانىنان حاباردار بولعاندا، كينودا عانا كورەتىن ءبىر كورىنىس جارىققا شىقتى. قىزمەت ىستەگەنىنە ەندى عانا بىرنەشە كۇن بولعان، قوناقسارايدا بەت - ءجۇزىن ءالى ەشكىم تاني قويمايتىن شينجياڭدىق بۇل جىگىت ديرەكتور جاڭ شينلياڭنىڭ الدىنا بارىپ، تاونامدى الىپ قالۋدى ءوتىندى.
”نە ءۇشىن“؟ - دەپ سۇرادى جاڭ شينلياڭ.
”مەن ونى سۇيەمىن“! - دەدى قاتىران.
جاڭ شينلياڭ قولىنداعى حۇجاتپەن قاتىراندى باستان پەرىپ كەتۋگە از قالدى. ول ارتىنا بۇرىلىپ جۇرە بەرگەندە، قاتىران العا ءوتىپ ديرەكتوردىڭ بىلەگىنەن تارتتى.
”مەن ونى سۇيەمىن“! جىگىت مۇقيات ءارى ىقىلاستى بەينەدە ديرەكتوردىڭ كوزىنە قادالا قارادى، ”وعان ورىس ءتىلىن مەن جاۋاپتى بولىپ ۇيرەتەمىن“!
جاڭ شينلياڭ كەلگەنىنە بىرنەشە كۇن بولعان وسى جاسقا قارادى، جانارلار ءتۇيىلىسىپ قاتىران دا ودان كوز اۋدارمادى. ءبىراز ۋاقىت وتكەننەن كەيىن جاڭ شينلياڭ قاتىراننىڭ قولىن باياۋ بوساتىپ، ارتىنا بۇرىلىپ سىرتقا قاراي كەتىپ قالدى. ”سەرىكتەستىككە قىزمەتكەر قابىلداپ جاتىرمىز، ساعان قالىڭدىق ىزدەپ جاتقان جوقپىز“. ول ءسال ايالدادى، ”وعان 3 اي پراكتيكا مەزگىلىن بەرۋگە بولادى، بۇل ءبىر رەتكى وراي بولسىن“.
كوڭىلدى تۇسىنە بىلگەن سول ءبىر ساتتە، قاتىران جاڭ شينلياڭنىڭ اعاسىنداي ەزۋ تارتقانىن بايقاماي قالدى، جاڭ شينلياڭ قاتىراننىڭ سىبىرلاي ”يە“ دەگەن داۋىسپەن ءماز - ءمايرام بولىپ قوس جۇدىرىعىن تۇيە سەرمەگەنىن كورگەن جوق. انادايدا ۇنجىرعاسى تۇسكەن تاونا ۇيىنە قايتار جولدا كەتىپ بارا جاتقان ەدى.
وسىدان كەيىنگى 3 اي، تاونا پراكتيكا قىزمەتىن ەرەكشە قۇلشىنىسپەن ىستەدى. ”مەن باستاپتا ونىڭ مەن ءۇشىن ىستەگەن ءىسىن بىلمەدىم، وسى ورايدى، ءسوزسىز، جاقسى قاستەرلەيىن دەگەندى عانا ويلادىم. قاتىران ماعان ورىس ءتىلىن ۇيرەتتى، ول تاعى گرۋزيا ءتىلىن وتە مۇقيات ۇيرەندى“. تاونا جاتىق جۇڭگو تىلىندە: ”3 ايدان كەيىن مەنىڭ ورىس تىلىمدە وتە زور ىلگەرىلەۋشىلىك بولىپ، وسىندا قالدىم، مەنىڭ قانشالىق قۋانعانىمدى بىلمەيسىڭ! وسى ارالىقتا مەن دە قاتىراننىڭ ويىن ءتۇسىندىم“، - دەدى كۇلىمسىرەي.
وسىدان كەيىن ولار ءبىر - ءبىرىنىڭ تۇرمىسىنىڭ ءبىر بولىگىنە اينالدى. جاپ - جاسىل بايتاق دالادا، ارماندارى ءۇشىن ايانباي قۇلشىنعان ەكى جاس تۇرمىس كەشىرۋدە، كىرشىكسىز كوڭىلدە مەملەكەت شەكاراسىن اتتاپ وتكەن ءبىر جۇپ تاتۋ جۇبايلار جەتىلىپ شىقتى.
2013 - جىلى قاتىران مەن تاونا ۇيلەنۋدى جوسپارلادى. وسى جىلى جۇڭگو ”ءبىر بەلدەۋ، ءبىر جولدى“ بىرگە قۇرۋ باستاماسىن العا قويدى، ەكەۋى تاتۋ - ءتاتتى جۇبايلار بولعان كەزدە جىبەك جولى ەكونوميكالىق بەلدەۋى گرۋزيا مەن ءبىرتالاي ەلدەردى اناعۇرلىم تىعىز بايلانىستىرا ءتۇستى.
الايدا سول كەزدە قاتىراننىڭ وسىنشاما ۇلكەن ماسەلەنى ويلاۋعا مۇرساسى جوق ەدى. ۇيلەنۋدىڭ الدىندا ونىڭ بار زەيىنى بولاشاق قايىن اتام ماعان قالاي قارايدى دەگەندى ويلاۋمەن بولدى. ”مەندە پالەندەي جيناعان اقشا جوق ءارى شەتەلدىكپىن، تۇڭعىش رەت ونىڭ ۇيىنە سويلەسە بارعانىمدا ىشتەي قاتتى ابىرجىدىم“. قاتىران: ”الايدا ونىڭ اكەسى سول كەزدە ماعان ەگەر قىزىمدى شىن نيەتىڭمەن جاقسى كورسەڭ، سەندەردىڭ ۇيلەنۋلەرىڭە قوسىلامىن دەپ ايتارىن مۇلدە ويلاماعان ەدىم. سونىمەن دەرەۋ جەڭىلدەپ سالا بەردىم، ءبىزدىڭ جۇرەگىمىز قاشاندا بىرگە“.
قاتىران مەن تاونا گرۋزيادا ۇيلەنۋ تويىن وتكىزدى. ۇيلەنۋ تويى بولعان كۇنى ەرلى - زايىپتى ەكەۋى قىزمەت ىستەيتىن جۇڭگو شاراپحاناسى اۆتوكولىك دايىندادى، تاعى ءبىر بولمەلى ساۋلەتتى ۇيلەنۋ ءۇيىن ازىرلەپ بەردى. ال قايىن اتاسىنىڭ قاتىرانعا بەرگەنى ونان دا كوپ بولدى. ”مەنىڭ گرۋزيادا ەشتەمەم جوق ەدى، الايدا ونىڭ اكە - شەشەسى ماعان ەشقانداي تالاپ قويمادى، ۇيلەنۋ تويىمىزدى ونىڭ ۇيىندەگىلەر وتكىزىپ بەردى“. قاتىران: ”ۇيلەنۋ تويىمىز 3 كۇن ءوتتى، ەرەكشە دابىرالى بولدى، ءبىزدىڭ اينالامىز ىزگى تىلەكتەرمەن تولدى“، - دەدى.
ىزگى تىلەك جان - جاقتان كەلىپ جاتتى، كاۆكاز تاۋ سىلەمدەرىنەن اتتاپ ءوتىپ، اۋىلى شينجياڭدا توعىستى. التايدا قاتىران اۋىلىنداعى شەتەلدىكپەن ۇيلەنگەن تۇڭعىش ادامعا اينالدى. جىگىت جاقتىڭ اۋىلىندا ۇيلەنۋ تويى وتكەندە، قاتىراننىڭ گرۋزيادا يە بولعان مامىلەسىندەي، تاونا دا بارلىق ادامنىڭ ىزگى تىلەگىنە يە بولدى. ”وتە كوپ تۋىستار مەن دوستار كەلدى، ەرەكشە سالتاناتتى بولدى، مەن قاتتى قىسىلدىم. ادام وتە كوپ بولعاندىقتان، مەن ەشكىمدى دە ەسىمدە ساقتاي الماي قالدىم“. تاونا قازىر وتكەندى ەسكە العاندا ءالى دە قىمسىنادى.
قاتىران كۇلىمسىرەي كەلىنشەگىنە بولىسا سويلەدى. ”ەشتەمە ەتپەيدى، سەن تەك مەنىڭ اكە - شەشەمدى تانىساڭ بولعانى“. 10 جىلدا ەنە مەن كەلىن وتە تاتۋ ءوتتى، تاونا ەنەسىنەن كۇيەۋىنىڭ اۋىلىنىڭ قۋىرماشتارىن جاساۋدى ۇيرەندى. ”شەشەم شەتەلدىك وسى كەلىنىنە وتە ريزا، ەكەۋىنىڭ بايلانىسى وتە قويۋ“، - دەدى قاتىران.
بىرتىندەي قاتىران مەن تاونا اناعۇرلىم زور وسى ”تۇتاستىقتىڭ“ وزدەرىنىڭ تۇرمىستارىنا اكەلگەن وزگەرىستەرىن سەزىندى. ”’ءبىر بەلدەۋ، ءبىر جول‘ باستاماسى ورتاعا قويىلعان 10 جىلدان بەرى ءتىپتى دە كوپ كاسىپورىندار گرۋزياعا باردى، جۇڭگودان بار، توڭىرەكتەگى ەلدەردەن دە بار، تبيليسي اناعۇرلىم گۇلدەندى. تاونا سياقتى ءتىپتى دە كوپ گرۋزيالىق جاس وتە تاماشا قىزمەت تاپتى“، - دەدى قاتىران.
كۇن سايىن گۇلدەنىپ كەلە جاتقان ەكونوميكا وسى باقىتتى وتباسىنىڭ تۇرمىسىنا ءتىپتى دە تاتتىلىك سيلادى. قازىرگى تاڭدا قاتىران كۋتايسى حۋاليڭ ەركىن ونەركاسىپ باقشا رايونى كەڭسەسىنىڭ ورىنباسار مەڭگەرۋشىسى، ايەلى دە باقشا رايونىنىڭ جۇڭگو اسحاناسىندا قىزمەت ىستەيدى. ال ەرلى - زايىپتى ەكەۋى ”ءبىر بەلدەۋ، ءبىر جول“ قۇرىلىسى جەتىستىگىن ەڭ ايگىلەيتىن جەرىمىز ۇلكەن ۇلىمىز دارقان قاتىراننىڭ ءتىل قابىلەتى دەپ قارايدى.
”دۇنيە ءجۇزىنىڭ وتە كوپ جەرلەرىنەن كەلگەن ادامداردىڭ بارلىعى وسى ارادا قىزمەت ىستەپ، تۇرمىس كەشىرۋدە، دارقان 9 جاستا، كوپ ءتىلدى تىڭداپ تۇسىنە الادى، ەڭ جۇيرىگى گرۋزين ءتىلى، حانزۋ ءتىلى، ورىس ءتىلى جانە قازاق ءتىلى“. قاتىران: ”ءبىز گرۋزيادان ءۇي ساتىپ الدىق، بولاشاقتان ءبىز اناعۇرلىم زور ءۇمىت كۇتەمىز“، - دەدى كۇلىمسىرەي.
