ىنتىماق − كۇش، سەنىم التىننان دا قىمبات
− باس شۋجي شي جينپيڭنىڭ جۇڭحۋا حالىق رەسپۋبليكاسى قۇرىلعاندىعىنىڭ 74 جىلدىعىن قۇتتىقتاۋ قوناعاسىندا سويلەگەن ماڭىزدى ءسوزىن ۇيرەنۋ، دايەكتىلەندىرۋ جونىندە
□ حالىق گازەتىنىڭ شولۋشىسى
”ىنتىماق − كۇش، سەنىم التىننان دا قىمبات“. جۇڭحۋا حالىق رەسپۋبليكاسى قۇرىلعاندىعىنىڭ 74 جىلدىعىن قۇتتىقتاۋ قوناعاسىندا باس شۋجي شي جينپيڭ ”سەنىمدى بەكەمدەپ، رۋحتى سەرپىلتىپ، ىنتىماقتاسا كۇرەس جۇرگىزۋ“ كەرەكتىگىن باسا دارىپتەپ، ميلليارد حالىقتى جاڭا جورىققا ارشىندى قادام تاستاپ، كوكىرەك كەرە بولاشاققا بەت الۋعا ىنتالاندىردى جانە جىگەرلەندىردى.
جاڭا ءداۋىر باستالعاننان بەرى، ەلىمىزدىڭ رەفورما، دامۋ، ورنىقتىلىق مىندەتىنىڭ سالماعى بۇرىن بولىپ كورىلمەدى، قايشىلىقتىڭ، حاۋىپ - قاتەردىڭ، سىن - سايىستىڭ كوپتىگى بۇرىن بولىپ كورىلمەدى، ەل باسقارۋ سىن - سىناعىنىڭ ۇلكەندىگى بۇرىن بولىپ كورىلمەدى. كەدەيلىك ىشىندەگى كەدەيلىكتى، قيىنشىلىق ىشىندەگى قيىنشىلىقتى، قامال ىشىندەگى قامالدى تالقانداۋداي اۋىر مىندەت الدىندا بۇكىل ەل ءبىر نيەتتە بولىپ، كۇش بىرىكتىرىپ قامال الىپ، جاپپاي دوڭگەلەك داۋلەتتىلىك سىندى جۇڭحۋا ۇلتىنىڭ مىڭ جىلدىق ارمانىن جۇزەگە اسىردى، بارلىق جەردەن تاۋلى اۋىل وراسان جاڭارعان، تاۋ مەن وزەن ماساتىداي قۇلپىرعان ءداۋىر كارتيناسى كورىندى؛ قىم - قۋىت، كۇردەلى حالىقارالىق، ەل ءىشى جاعدايىنا مەڭزەس، ءبىز ءبىر نيەت، ءبىر تىلەكتە بولىپ، باعىتتاس، ساپارلاس بولىپ، العان بەتتەن قايتپايتىن قايسارلىقپەن بەلگىلەنگەن نىسانانى قۇلشىنا ىسكە اسىرىپ، ”ەكى ۇلكەن كەرەمەتتىڭ“ جاڭا تاراۋىن جازدىق؛ بايلىقتىڭ، قورشاعان ورتانىڭ شەكتەۋى، قىسىلتاياڭدىعى سياقتى ماسەلەلەرگە مەڭزەس، ءبىز بارلىعىمىز كىرىسىپ، بارلىعىمىز جاۋاپكەرشىلىكتى ادا ەتىپ، ۇلان - بايتاق وزەن - تاۋلار ءتىپتى دە تۇلەجىپ قۇلپىردى، كورىكتى جۇڭگو قۇرىلىسى ماڭىزدى قادام تاستادى... جاڭا داۋىردەگى ۇلى تابىس پەن وزگەرىس شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىمەن، شي جينپيڭ جاڭا ءداۋىر جۇڭگوشا سوتسياليزم يدەياسىنىڭ عىلمي جەتەكشىلىگىمەن بۇكىل پارتيانىڭ، بۇكىل ەلدەگى ءار ۇلت حالقىنىڭ ىنتىماقتاسا كۇرەس جۇرگىزۋىنىڭ ارقاسىندا قولعا كەلگەن. اماليات ىنتىماقتىڭ جۇڭگو حالقى مەن جۇڭحۋا ۇلتىنىڭ العا باسۋ جولىنداعى بارلىق حاۋىپ - قاتەرلەردى، سىن - سايىستاردى جەڭۋىنىڭ، جەڭىستەن جاڭا جەڭىسكە ۇزدىكسىز بەت الۋىنىڭ ماڭىزدى كەپىلى ەكەندىگىن تولىق دالەلدەدى. ءبىر ميلليارد 400 ميلليوننان استام جۇڭگو حالقى ويدى ءبىر اراعا شوعىرلاندىرىپ، كۇشتى ءبىر اراعا جۇمساپ، تار جول، تايعاق كەشۋدەن بىرگە ءوتىپ، ەل بىرلىگىنەن بەرىك قامال السا، تىندىرمايتىن ءىسى، وتپەيتىن بوگەتى بولمايدى.
كۇش - قۋات بەرىك سەنىم بارىسىندا ۇيىسادى، نىسانا زەيىن - زەردەنى شوعىرلاندىرىپ، كۇش - قۋاتتى ۇيىستىرۋ بارىسىندا جۇزەگە اسادى. بۇگىنگى تاڭداعى جۇڭگو كوممۋنيستىك پارتياسى، جۇڭحۋا حالىق رەسپۋبليكاسى، جۇڭحۋا ۇلتى ەڭ سەنىمدى بولۋعا قاقىلى. ورشەلەنگەن عاسىرلىق ىندەت جۇڭگو حالقىن ۇرەيلەندىرە المادى، قايتا جىر ەتەرلىك، جان تەبىرەنتەرلىك ايبىندى تاراۋ جازىپ، سەنىمدىلىك پەن ماقتانىش سەزىمىن، ۇيىسۋ كۇشى مەن سەنترگە تارتۋ كۇشىن بارىنشا ارتتىردى. ەكونوميكالىق قىزمەت شىم - شىتىرىق، جەر - جەر، تاراۋلار ەلىمىزدىڭ دامۋىنداعى ستراتەگيالىق سيپاتتى ءتيىمدى شارت - جاعدايلاردى ىشكەرىلەي يگەرىپ، قوعامدىق پسيحيكالىق مەجەنى جاقسارتۋدان، دامۋ سەنىمىن سەرپىلتۋدەن باستاپ كىرىسىپ، ەكونوميكانىڭ جوعارى ساپالى دامۋ ارناسىندا ورنىقتى قاداممەن الىسقا جەتۋىن ىلگەرىلەتتى. اسىرەسە، بيىل جىل باسىنان بەرى ءبىز حۋاڭحى، حۋايحى وڭىرىندە سيرەك كەزدەسەتىن اق جاۋىن، حۋابەيداعى، شىعىس سولتۇستىكتەگى ءىشىنارا وڭىرلەردە تۋىلعان اۋىر تاسقىن، باتىس سولتۇستىكتەگى ءىشىنارا وڭىرلەردە تۋىلعان قۋاڭشىلىق سياقتى اپاتتاردىڭ ىقپالىق جەڭىپ، ءتۇرلى قيىنشىلىقتار مەن سىن - سايىستاردى جەڭىپ، دامۋدىڭ ىرىقتىلىق ۇقىعىن قولىمىزدا بەرىك ۇستادىق. بۇگىنگى تاڭداعى جۇڭگو حالقىنىڭ العا باسۋ قوزعاۋشى كۇشى ءتىپتى دە قۇدىرەتتى، كۇرەس جۇرگىزۋ رۋحى ءتىپتى دە اسقاق، جەڭىسكە جەتۋ سەنىمى ءتىپتى دە بەرىك بولا ءتۇستى. ءدال باس شۋجي شي جينپيڭ باسا دارىپتەگەندەي: ”قاي كەزدە قيىنشىلىق بولماعان؟ ءبىر - بىردەن باسىپ وتەمىز، جىلدان - جىلعا ارتقا تاستاپ، جىل سايىن جاقسارا بەرەمىز، جۇڭحۋا ۇلتى بەس مىڭ جىلدان استام ۋاقىتتان بەرى وسىلاي بولىپ كەلەدى. كەزەڭ اسىپ، كەدەرگىدەن ءوتۋدىڭ تەتىگى سەنىمدى سەرپىلتۋدە“.
اسقار تاۋلار مەن اساۋ وزەندەردەن وتكەننەن كەيىن تاعى دا تاۋ اسىپ، تاس باسۋعا تۋرا كەلەدى؛ ورەڭ وتكەل، تەرەڭ شاتقالداردان وتكەننەن كەيىن تاعى دا قامال بۇزىپ، اسۋلاردى بويسۇندىرۋعا تۋرا كەلەدى. ۇلى جوبا وڭاي - وسپاق جۇزەگە اسپايدى، العا باسۋ جولىمىزدا بوران - شاشىننىڭ بولاتىندىعى داۋسىز، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋدا، ءسوز جوق، اناعۇرلىم جاپالى، اناعۇرلىم ماشاقاتتى قۇلشىنىس جاساۋعا دايىندالۋ قاجەت. مەيلى جاعداي قالاي قۇبىلسا دا، مەيلى سىن - سايىس قانداي قاتاڭ بولسا دا، ءبىز جاڭا ءداۋىردىڭ جاڭا جورىعىنداعى بۇكىل پارتيانىڭ، بۇكىل ەل حالقىنىڭ وزەكتى مىندەتىن كوزدەپ، ىنتىماقتاسا كۇرەس جاساۋداي ءداۋىر تالابىن مىقتاپ يگەرىپ، تاريحي سەنىمدى كۇشەيتىپ، تاريحي ىرىقتىلىقتى يگەرىپ، ستراتەگيالىق تاباندىلىقتى ساقتاپ، ءسوز جوق، جەڭىسكە جەتۋ سەنىمىن بەكەمدەپ، مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋدى ىلگەرىلەتۋگە ءبىز وسى ۇرپاق ادامداردىڭ تيەسىلى ۇلەسىن قوسۋىمىز كەرەك. ىنتىماقتاسا كۇرەس جۇرگىزۋ − جۇڭگو حالقىنىڭ تاريحي ۇلى ىستەر جاراتۋىندا، ءسوز جوق، باسىپ وتەتىن جولى. ءبىز پارتيا تۋى استىندا ”بەرىك قۇرىش“ بولىپ ىنتىماقتاسىپ، پارتيا، ۇكىمەت، ارميا، حالىقتىق قۇرىلىمدار، عىلىم - ءبىلىم سالاسى سياقتى بارلىق سالا كۇش - قۋاتتى ءبىر اراعا جۇمساپ، بارلىق جەر جۇدىرىقتاي جۇمىلىپ، ءار جاقتىڭ اقىل - پاراساتى مەن كۇش - قۋاتىن ۇيىستىرىپ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋدى ارقاۋ ەتە وتىرىپ بىرگە ويلاپ، بىرگە ىستەۋىمىز كەرەك. وراي مەن ءتيىمدى جاعداي ءبىز جاقتا، بۇل ءبىزدىڭ تاباندىلىعىمىز بەن قايراتىمىزدىڭ تياناعى، سونداي - اق بەكىمىمىز بەن سەنىمىمىزدىڭ دە تياناعى. ءبىز ”كوشپەلى بۇلتتىڭ كوزىمىزدى كولەگەيلەۋىنەن قورىقپايتىن“ كوز ايانى ساقتاپ، ”سان سوققىدا مۇقالماعان، سوقسا دا داۋىل بۇيىم با“ دەيتىن تاباندىلىقتى جەتىلدىرىپ، ”نەعۇرلىم جاپا - ماشاقاتتى بولعان سايىن سولعۇرلىم العا ىلگەرىلەيتىن“ جىگەردى جانىپ، ءارقانداي حاۋىپ - قاتەردەن قورىقپاي، ءارقانداي كەدەرگىگە بوگەلمەي، كۇش - قۋاتتى شوعىرلاندىرىپ ءوز ءىسىمىزدى ويداعىداي تىندىرىپ، بۇرىنعىلار ىستەپ كورمەگەن ۇلى ىستەردى نىق قاداممەن ۇزدىكسىز العا ىلگەرىلەتۋىمىز كەرەك.
الداعى ەكپىندەي ىلگەرىلەۋ جولىنا كوز جىبەرەر بولساق، جۇڭگونىڭ بايتاق جەرى گۇلدەنىپ - كوركەيىپ، ميلليارد حالىقتىڭ جىگەرى تاسقىنداۋدا. شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ەكىنى قورعاۋدى“ باتىل ورىنداپ، سەنىمدى بەكەمدەپ، رۋحتى سەرپىلتىپ، ىنتىماقتاسا كۇرەس جۇرگىزگەندە، جاپپاي سوتسياليستىك وسىزاماندانعان قۇدىرەتتى مەملەكەت قۇرۋ نىساناسى، ءسوز جوق، جۇزەگە اسادى، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانى، ءسوز جوق، جۇزەگە اسادى!
(شينحۋا اگەنتتىگىنىڭ 9 - ايدىڭ 30 - كۇنى بەيجيڭنەن بەرگەن حابارى)
