انار بۇلت \ شينجياڭ گازەتىنىڭ تىلشىلەرى رىن جياڭ، دۇڭ لياڭ 10 - ايدىڭ 7 - كۇنى حاڭجوۋدان حابارلايدى. 10 - ايدىڭ 7 - كۇنى تۇستەن كەيىن، لين - ان دەنە تاربيە، مادەنيەت ءماجىلىس - كورمە ورتالىعىندا حاڭجوۋ ازيا سپورت جارىسى ەرلەر ەركىن كۇرەسى 97 كيلوگرامدىق دەڭگەيدەگى قولا مەدالعا تالاسۋ جارىسى سوڭىنا شىعىپ، جۇڭگو ساڭلاعى كابيران ءابۋشايمان 2: 1 ۇپايمەن كورەيا ساڭلاعى شۇي جوۋحۋاننان وزدى. بۇكىل جارىس بارىسىندا قورعانىستى نەگىز ەتكەن كورەيا ساڭلاعى الاسۇرا قايتا تاپ بەرگەندە، كورەرمەندەر ”جۇڭگو كومانداسى قايراتتان“! دەپ ءور داۋىسپەن ايعايلادى، كەيبىر كورەرمەندەر داۋىستاپ سەكۋند سانادى. ۋاقىت تولعاندا بۇكىل الاڭداعىلارالاقايلاي جونەلدى! كابيران باسىمدىعىن ساقتاپ، ەڭ سوڭىندا قولا مەدالعا يە بولدى. بۇل شينجياڭ ەرلەر ەركىن كۇرەسى شەبەرىنىڭ مەملەكەت قۇراماسى اتىنان ازيا سپورت جارىسىنا قاتىناسىپ قول جەتكىزگەن ەڭ تاماشا ناتيجەسى.
سول كۇنگى 1 / 8 جارىسىندا كابيران دۇنيە ءجۇزى بويىنشا 1 - ورىنداعى باحرەين ساڭلاعى احمەتكە جولىعىپ، قايراتتانا ارپالىسسا دا، سوڭىندا 3: 7 ۇپايمەن جەڭىلىپ قالعان بولاتىن. قايتا ەڭسە كوتەرۋ جارىسىندا كابيران قىرعىزستان ساڭلاعى كانەيبەككە كەزدەسكەندە ءسال باسىمىراق ءتۇسىپ، 12: 2 ۇپايمەن جەڭىسكە جەتىپ، قولا مەدالعا تالاسۋ جارىسىنا كىرگەن ەدى.
كابيراننىڭ قولا مەدالعا تالاسۋ جارىسىنداعى قارسىلاسى كورەيادان كەلگەن شۇي جوۋحۋان. ەكەۋىنىڭ كۇشى قارايلاس. جارىس بارىسىندا كابيران اناعۇرلىم بەلسەندى دە ىرىقتى شابۋىلعا وتكەنىمەن، شۇي جوۋحۋاننىڭ قورعانىسى بەرىك بولعاندىقتان، الاڭدا ءنومىر الۋ وتە قيىنعا سوقتى. ەكەۋىنىڭ تىرەسكەن كۇيىنە مەڭزەس، تورەشى جەكە - جەكە ەكەۋىن دە كۇشتەپ شابۋىلداۋعا بۇيىردى. شۇي جوۋحۋاننىڭ قورعانىس كۇيدە تۇرۋى كوبىرەك بولعاندىقتان، 2 رەت كۇشتەپ شابۋىلداۋعا بۇيىرىلعانىمەن، كابيران ءبارىبىر وپ - وڭاي قۇتىلىپ كەتتى جانە كۇشپەن تۇقىرجىلاتىپ تاستادى. ەڭ سوڭىندا كابيران جالپى ءنومىر بويىنشا 2: 1 ۇپايمەن جەڭىسكە جەتتى.
”ازيا سپورت جارىسى ارقىلى ءوزىمنىڭ جەتەرسىزدىگىمدى كوردىم، سونداي - اق سەنىمىم دە ارتا ءتۇستى. بۇدان كەيىن مەن ۇزدىكسىز قۇلشىنامىن، بارعان سايىن جاقسارا ءتۇسۋىمدى، جۇڭگو كۇرەسىنىڭ بارعان سايىن جاقسارا ءتۇسۋىن ءۇمىت ەتەمىن“، - دەدى جارىستان كەيىن 25 جاستاعى كابيران.
