اشىق - جارقىن، جاراسىمدىلىقتىڭ، ءوزىن الۋەتتەندىرىپ، بىرگە يگىلىككە كەنەلۋدىڭ تاماشا سيمفونياسىن قول ۇستاسا اسقاقتاتايىق
− حاڭجوۋ 4 - كەزەكتى ازيا مۇگەدەكتەر سپورت جارىسىنىڭ اشىلعاندىعىن قىزۋ قۇتتىقتايمىز
□ حالىق گازەتىنىڭ شولۋشىسى
”كوڭىلدەر توعىسسا، ارمان ساۋلەسى جارقىرايدى“. 10 - ايدىڭ 22 - كۇنى 4 - كەزەكتى ازيا مۇگەدەكتەر سپورت جارىسى جىجياڭ ولكەسىنىڭ حاڭجوۋ قالاسىندا سالتاناتپەن باستالادى. ازياداعى 40 نەشە مەملەكەت پەن رايوننان كەلگەن 3000نان استام مۇگەدەك سپورتشى بۇل ارادا ءومىر ارماندارىنا قۇلاش سەرمەپ، ءوزىن الۋەتتەندىرۋ كەلبەتىن ايگىلەپ، بەرەكە - بىرلىكتى، دوستىقتى بىرگە اڭگىمەلەپ، اشىق - جارقىن، جاراسىمدىلىقتىڭ، ءوزىن الۋەتتەندىرىپ، بىرگە يگىلىككە كەنەلۋدىڭ تاماشا سيمفونياسىن قول ۇستاسا اسقاقتاتىپ، ازيانىڭ ىنتىماقتاسا ەكپىندەي ىلگەرىلەگەن تەلەگەي كۇشىن ۇيىستىرادى.
حاڭجوۋ ازيا سپورت جارىسىن، ازيا مۇگەدەكتەر سپورت جارىسىن ويداعىداي وتكىزۋ − بيىلعى پارتيا مەن مەملەكەت قىزمەتىندەگى كەلەلى ءىس. وتكىزۋ ءوتىنىشى تابىستى بولعاننان بەرى شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، ازيا مۇگەدەكتەر سپورت جارىسىنىڭ ءتۇرلى دايىندىق قىزمەتتەرى ءساتتى ىلگەرىلەتىلدى. ازيا سپورت جارىسىن ءساتتى وتكىزۋدەگى قىمباتتى تاجىريبەلەردى قورىتىندىلاپ، قولدانعان جىجياڭ ولكەسى مەن حاڭجوۋ قالاسى ازيا سپورت جارىسى مەن ازيا مۇگەدەكتەر سپورت جارىسى اراسىنداعى اۋىسۋ قىزمەتىن تىڭعىلىقتى، ءتارتىپتى تۇردە ويداعىداي ىستەپ، ۇتىمدى ساتتەن پايدالانىپ حاڭجوۋ ازيا مۇگەدەكتەر سپورت جارىسىن ويداعىداي وتكىزۋگە ۇمتىلىپ، ”ەكى ازيا سپورت جارىسىنىڭ بىردەي تارتىمدى بولۋىنا“ شىنايى كەپىلدىك ەتتى. حاڭجوۋ ازيا مۇگەدەكتەر سپورت جارىسىن وتكىزۋ مۇگەدەك سپورتشىلارعا باسەكە ورەسى مەن رۋحاني بەت - بەينەسىن ايگىلەيتىن ساحنا ازىرلەپ قانا قويماي، مۇگەدەكتەردىڭ اۋىس - كۇيىس تۇعىرىن دا قۇرىپ، جۇڭگونىڭ حالىقارالىق مۇگەدەكتەر دەنە تاربيە سپورتىنىڭ دامۋىنا قوسقان تىڭ ۇلەسىن ويىپ جازادى.
قالىڭ مۇگەدەكتەر جونىنەن العاندا، دەنە تاربيە ماڭىزدى قۇنعا يە، دەنە قۋاتىن ارتتىرۋدىڭ، دەنساۋلىقتى قالپىنا كەلتىرۋدىڭ، قوعامعا ات سالىسۋدىڭ، جان - جاقتىلى دامۋدى جۇزەگە اسىرۋدىڭ ءونىمدى جولى. حاڭجوۋ ازيا مۇگەدەكتەر سپورت جارىسىندا 22 ۇلكەن ءتۇر، 564 شاعىن ءتۇر ورنالاستىرىلىپ، مۇگەدەك سپورتشىلاردىڭ ارمانعا قانات قاعۋىنا تاپتىرماس وراي جاراتتى. جۇرەكتىلىكپەن باسەكەگە شىعىپ، وزدەرىنىڭ ەڭ زور مۇمكىندىكتەرىن ساۋلەلەندىرىپ، ءوزىن تىنباي الۋەتتەندىرۋ، قايسارلىقپەن ايقاسۋ رۋحىن ايگىلەگەن قالىڭ مۇگەدەك سپورتشىلار، ءسوز جوق، ءومىر كەرەمەتتەرىن ايگىلەيدى. وسى رەتكى حاڭجوۋ ازيا مۇگەدەكتەر سپورت جارىسىندا جۇڭگو مۇگەدەكتەر بىرلەستىگى 723 ادامنان قۇرالعان ۋاكىلدەر ۇيىرمەسىن ۇيىمداستىرىپ، بارلىق 22 ۇلكەن ءتۇر بويىنشا جارىسقا قاتىناسادى. ءوزىن قادىرلەۋ، وزىنە سەنۋ، ءوز كۇشىنە سۇيەنۋ، ءوزىن الۋەتتەندىرۋ سىندى مۇگەدەكتەر دەنە تاربيە رۋحىن بارىنشا اسقاقتاتىپ، ءاربىر جارىس باسەكەسىندە تىرشىلىك كۇشى مەن كەرەمەت قاسيەتىن تولىق ايگىلەيدى، جۇڭگونىڭ مۇگەدەك سپورتشىلارى، ءسوز جوق، تاعى دا تاماشا ناتيجەلەر جاراتىپ، سپورت ناتيجەسى مەن رۋحاني وركەنيەتتە بىردەي مول تابىسقا قول جەتكىزىپ، ەڭ جوعارى شەككە سايىس جاريالاۋ، جىگەرلەنە العا ىلگەرىلەۋ رۋحىمەن بۇكىل ەل حالقىن جىگەرلەندىرەدى.
مۇگەدەكتەرگە كوڭىل ءبولۋ − قوعامدىق وركەنيەتتىڭ ماڭىزدى بەلگىسى. باس شۋجي شي جينپيڭ بىلاي دەپ باسا دارىپتەدى: ”جۇڭگو مۇگەدەكتەرگە ايرىقشا كوڭىل بولەدى، ايرىقشا نازار اۋدارادى، جۇڭگو ۇلگىسىندەگى وسىزامانداندىرۋ ۇردىسىندە مۇگەدەكتەر قوعامدىق قامتاماسىزداندىرۋ ءتۇزىمى مەن قامقورلىق جاساۋ، قىزمەت وتەۋ جۇيەسىن ونان ارى كەمەلدەندىرىپ، مۇگەدەكتەر ىستەرىنىڭ جان - جاقتى دامۋىن ىلگەرىلەتەدى“. جاڭا داۋىردەن بەرى ءبىز حالىقتى وزەك ەتكەن دامۋ يدەياسىنا تاباندى بولىپ، السىزدەردى دەمەۋگە تاباندى بولىپ، مۇگەدەكتەردىڭ تەڭدىك ۇقىعىن قامتاماسىز ەتىپ، مۇگەدەكتەردىڭ حالىق تۇرمىسى ىرىس - قۇتىن ارتتىرىپ، مۇگەدەكتەر ىستەرىنىڭ دامۋىن ىلگەرىلەتۋدە تاريحي ىلگەرىلەۋشىلىككە جانە تابىستارعا قول جەتكىزدىك. ازيا مۇگەدەكتەر سپورت جارىسىنا دايىندالۋ جانە وتكىزۋ بارىسى مۇگەدەكتەر ءىسىنىڭ دامۋ تابىستارىن ايگىلەيتىن تەرەزە ءارى ەلىمىزدىڭ مۇگەدەكتەر ىستەرىنىڭ دامۋىن ىلگەرىلەتەتىن ماڭىزدى وراي. بولاشاقتى بەتكە العاندا، جۇڭگو باستان - اياق حالىقتى بارىنەن جوعارى قويۋعا تاباندى بولىپ، ادامگەرشىلىك رۋحتى بارىنشا ساۋلەلەندىرىپ، مۇگەدەكتەردىڭ دەنە تاربيە قيمىلىنا قاتىناسۋ ۇقىعىن قامتىعان ءتۇرلى ۇقىق - مۇددەسىنە شىنايى قۇرمەت ەتىپ جانە ونى قامتاماسىزداندىرىپ، مۇگەدەكتەر ىستەرىنىڭ وسىزاماندانۋعا قاراي قادام تاستاۋىن ىلگەرىلەتىپ، قالىڭ مۇگەدەكتەردىڭ تاماشا تۇرمىسقا دەگەن تالپىنىسىن ۇزدىكسىز قاناعاتتاندىرادى ءارى دۇنيە جۇزىندەگى ءار ەلمەن بىرگە حالىقارالىق مۇگەدەكتەر ىستەرى اۋىس - كۇيىسى مەن سەلبەستىگىن بىرگە ىلگەرىلەتىپ، ادامزاتتىڭ سالاماتتىعى مەن قۇت - ىرىسىن ۇزدىكسىز ارتتىرۋدى قالايدى.
دەنە تاربيە ارقىلى ازيانىڭ كۇشىن ۇيىستىرىپ، بولاشاق جولىن سالۋ كەرەك. ازيا مۇگەدەكتەر سپورت جارىسىنىڭ جالىنداعان الاۋى تۇنگى اسپاندى نۇرلاندىرىپ قانا قويماي، ادامدار اراسىنداعى ۇلى سۇيىسپەنشىلىكتى دە نۇرلاندىرىپ، ۇزىلمەي جالعاسقان كۇشتى جەتكىزدى. شيزى كولىنىڭ بويىندا ازيا مۇگەدەكتەر سپورت جارىسىنىڭ سپورتشىلارى، ءسوز جوق، كۇرەس پەن ماڭداي تەرلەرى ارقىلى كەرەمەتتەردى كورسەتىپ، حيكىمەتتەردى جازىپ، دوستىقتى تاراتىپ، ءومىردىڭ اسقاق ءۇنىن بىرگە شىعانداتادى.
حاڭجوۋ 4 - كەزەكتى ازيا مۇگەدەكتەر سپورت جارىسىنىڭ تابىستى بولۋىن تىلەيمىز!
(شينحۋا اگەنتتىگىنىڭ 10 - ايدىڭ 21 - كۇنى بەيجيڭنەن بەرگەن حابارى)
