شينحۋا اگەنتتىگىنىڭ 11 - ايدىڭ 22 - كۇنى بەيجيڭنەن بەرگەن حابارى (ءتىلشى ياڭ يجۇن). 11 - ايدىڭ 22 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا رەسەي مەملەكەتتىك دۋماسىنىڭ ءتوراعاسى ۆولودينمەن كەزدەستى.
شي جينپيڭ بىلاي دەپ اتاپ كورسەتتى: جۇڭگو مەن رەسەي ەكى ەل ءوزارا ەڭ ۇلكەن كورشى ەلدەر، ەكەۋى دە بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى، كەڭ كولەمدى ورتاق مۇددەگە يە. بيىل مەن پۋتين زۇڭتۇڭمەن ەكى رەت بەتپە - بەت، ىشكەرىلەي اۋىس - كۇيىس جاساپ، جۇڭگو مەن رەسەيدىڭ جان - جاقتى ستراتەگيالىق ىستەستىگىن جانە ءار سالاداعى ناقتى ىستەر سەلبەستىگىن تەرەڭدەتۋ جونىندە كوپتەگەن جاڭا ورتاق تانىمعا كەلدىم. كەلەر جىلى جۇڭگو مەن رەسەيدىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعى، جۇڭگو جاق رەسەي جاقپەن بىرگە ماڭگىلىك تاتۋ كورشىلىك، دوستىق، جان - جاقتى ستراتەگيالىق ىستەستىك، ءوزارا پايدا جەتكىزىپ، سەلبەسىپ، تەڭ يگىلىككە كەنەلۋ سىندى ەكى جاقتى قارىم - قاتىناستى ۇزدىكسىز تەرەڭدەتىپ، ەكى ەلدىڭ دامۋىنا، گۇلدەنۋىنە تىڭ قوزعاۋشى كۇش ۇستەپ، دۇنيە ءجۇزىنىڭ گۇلدەنۋى مەن ورنىقتىلىعىنا اناعۇرلىم كوپ ورنىقتىلىق ازىرلەۋدى قالايدى.
شي جينپيڭ بىلاي دەپ باسا دارىپتەدى: زاڭ شىعارۋ قۇرىلىمدارىنىڭ سەلبەستىگىن كۇشەيتۋ جۇڭگو − رەسەي قارىم - قاتىناسىنىڭ ورنىقتى، باياندى بولۋىنا شىنايى كەپىلدىك ەتۋدە ماڭىزدى رول اتقارادى. رەسەي مەملەكەتتىك دۋماسىنىڭ جۇڭگو مەملەكەتتىك حالىق قۇرىلتايىمەن زاڭ شىعارۋ تاجىريبەلەرىن اۋىستىرۋدى كۇشەيتىپ، ەكى ەلدىڭ زاڭ شىعارۋ قۇرىلىمدارىنىڭ ارناۋلى كوميتەتتەرىنىڭ، پارلامەنت مۇشەلەرىنىڭ دوستىق گرۋپپالارىنىڭ رولىن تولىق ساۋلەلەندىرىپ، ەكى جاقتىڭ سەلبەستىگىنە اناعۇرلىم كەمەلدى زاڭدىق تىرەك ازىرلەپ، ”ءبىر بەلدەۋ، ءبىر جولدى“ بىرگە قۇرۋ باستاماسى جانە ەۆروپا − ازيا ەكونوميكالىق وداعىن ۇشتاستىرۋدى ويداعىداي قامتاماسىز ەتۋدى، شاڭحاي سەلبەستىك ۇيىمى، بريكس ەلدەرى، 20 ەل توبى سياقتى كوپ جاقتى تۇعىرلارداعى بايلانىستى، سەلبەستىكتى تەرەڭدەتۋدى ءۇمىت ەتەمىن.
ۆولودين مىنالاردى ءبىلدىردى: ءتوراعا شي جينپيڭ مەن پۋتين زۇڭتۇڭنىڭ ستراتەگيالىق جەتەكشىلىگىندە رەسەي − جۇڭگو قارىم - قاتىناسى تاريحتاعى ەڭ جاقسى دەڭگەيگە جەتتى. رەسەي مەملەكەتتىك دۋماسىنداعى ءارقايسى پارتيا - توپتار جۇڭگومەن دوستىق قارىم - قاتىناستى دامىتۋدى قولداۋ جاعىندا ايرىقشا ورتاق تانىمعا يە. رەسەي جاق ءبىر جۇڭگو ساياساتىن باتىل اتقارادى، جۇڭگو جاقتىڭ مەملەكەتتىڭ يەلىك ۇقىعى مەن تەرريتوريا تۇتاستىعىن قورعاۋىن باتىل قولدايدى. رەسەي جاق جۇڭگو جاقپەن ەكى ەلدىڭ زاڭ شىعارۋ قۇرىلىمدارى مەن پارتيالار ارا اۋىس - كۇيىستى، سەلبەستىكتى كۇشەيتىپ، ەكى ەل مەملەكەت باسشىلارىنىڭ ماڭىزدى ورتاق تانىمىن بەلسەنە تياناقتاندىرىپ، حالىقتاردىڭ دوستىعى مەن ءوزارا سەنىمدىلىگىن تەرەڭدەتىپ، رەسەي مەن جۇڭگونىڭ جاڭا داۋىردەگى جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ باياندى دامۋىن پارمەندى زاڭدىق كەپىلمەن قامداپ، ەكى ەلدىڭ قارىم - قاتىناسىن دامىتۋعا ۇلەس قوسۋدى قالايدى.
ۋاڭ ي، پىڭ چيڭحۋا كەزدەسۋگە قاتىناستى.
