11 - ايدىڭ 22 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن ۋرۋگۆاي زۇڭتۇڭى لاكاللەمەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ سولتۇستىك زالىندا لاكاللەنى قارسى الۋ سالتىن وتكىزۋدە.
□ سۋرەتتى شينحۋا اگەنتتىگىنىڭ ءتىلشىسى ليۋ بين تۇسىرگەن
شينحۋا اگەنتتىگىنىڭ 11 - ايدىڭ 22 - كۇنى بەيجيڭنەن بەرگەن حابارى (ءتىلشى ياڭ يجۇن). 11 - ايدىڭ 22 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن ۋرۋگۆاي زۇڭتۇڭى لاكاللەمەن كەڭەس وتكىزدى. ەكى ەلدىڭ مەملەكەت باسشىلارى جۇڭگو − ۋرۋگۆاي قارىم - قاتىناسىن جان - جاقتى ستراتەگيالىق سەرىكتەستىك قارىم - قاتىناس دەڭگەيىنە كوتەرەتىندىكتەرىن جاريالادى.
شي جينپيڭ بىلاي دەپ اتاپ كورسەتتى: 2023 - جىل جۇڭگو مەن ۋرۋگۆايدىڭ ديپلوماتيالىق قارىم - قاتىناس ورناتقاندىعىنىڭ 35 جىلدىعى جانە ۋرۋگۆايدىڭ ”ءبىر بەلدەۋ، ءبىر جولدى“ بىرگە قۇرۋ باستاماسىنا قاتىناسقاندىعىنىڭ 5 جىلدىعى. ديپلوماتيالىق قارىم - قاتىناس ورناتقان 35 جىلدان بەرى ەكى ەل ءوزارا قۇرمەت ەتۋگە، تەڭ تۇرعىدا مامىلە جاساۋعا، سەلبەسىپ تەڭ يگىلىككە كەنەلۋگە باستان - اياق تاباندى بولىپ، ءار سالاداعى اۋىس - كۇيىس، سەلبەستىك قارىشتاپ دامىدى. اسىرەسە، جاڭا تيپتى ايدارشا ۆيرۋس ىندەتى الدىندا، ەكى ەل ءبىر - بىرىنە قارايلاسىپ، ءبىر نيەتپەن ىندەتكە قارسى اتتانىپ، جۇڭگو مەن ۋرۋگۆايدىڭ ستراتەگيالىق سەرىكتەستىك قارىم - قاتىناسىن جوعارىلاتتى. جۇڭگو جاق ۋرۋگۆاي جاقپەن بىرگە جان - جاقتى ستراتەگيالىق سەرىكتەستىك قارىم - قاتىناس ورناتۋدى جاڭا باستاما، جاڭا كوورديناتا ەتىپ، ەكى جاقتى قارىم - قاتىناستىڭ دەڭگەيىن جوعارىلاتىپ، ەكى ەل سەلبەستىگىنىڭ مازمۇنىن بايىتىپ، جۇڭگو − ۋرۋگۆاي قارىم - قاتىناسىن تۇرلىشە كولەمدەگى، تۇرلىشە تۇزىمدەگى، تۇرلىشە مادەنيەتتەگى ەلدەردىڭ ىنتىماقتاسۋداعى، سەلبەسۋدەگى ۇلگىسى ەتىپ تۇلعالاپ، ءوز ەلدەرىنىڭ دامۋىنا اناعۇرلىم ويداعىداي قىزمەت وتەپ، ەكى ەل حالقىنىڭ قۇت - ىرىسىن ارتتىرۋدى قالايدى.
شي جينپيڭ جۇڭگو ۇلگىسىندەگى وسىزامانداندىرۋدىڭ ءمانىن، ماڭىزىن تانىستىرىپ، مىنالاردى ءبىلدىردى: جۇڭگو جاق ۋرۋگۆاي جاقپەن ەل باسقارۋ جونىندە اۋىس - كۇيىس جاساۋدى كۇشەيتىپ، ساياسي ءوزارا سەنىمدىلىكتى ارتتىرىپ، دامۋ ورايىنان بىرگە يگىلىكتەنىپ، ءوز ەلدەرىنىڭ وسىزاماندانۋى مەن دۇنيە ءجۇزىنىڭ وسىزاماندانۋىن جۇزەگە اسىرۋدى ىلگەرىلەتۋدى قالايدى. ەكى جاق زاڭ شىعارۋ قۇرىلىمدارىنىڭ، ساياسي پارتيالاردىڭ، جەرگىلىكتى ورىنداردىڭ دوستىق اۋىس - كۇيىسىن، سەلبەستىگىن جيىلەتىپ، ”ءبىر بەلدەۋ، ءبىر جولدى“ بىرگە قۇرۋ سەلبەستىك جوباسىنا قول قويۋدى وراي ەتىپ، دامۋ ستراتەگياسىن ءتۇيىلىستىرۋدى كۇشەيتىپ، قىزمەت وتەۋ ساۋداسى، سيفرلى ەكونوميكا، تازا ەنەرگيا سياقتى سالالارداعى سەلبەستىكتىڭ جاڭا قوزعالىس قۋاتىن جەتىلدىرىپ، جۇڭگو مەن ۋرۋگۆايدىڭ ”ءبىر بەلدەۋ، ءبىر جولدى“ بىرگە قۇرۋىنىڭ جوعارى ساپالى دامۋدىڭ جاڭا كەزەڭىنە ءوتۋىن ىلگەرىلەتۋ كەرەك. ۋرۋگۆايدىڭ ءتىپتى دە كوپ ساپالى ەگىن، مال شارۋاشىلىق ونىمدەرى مەن ۇستەمە قۇنى جوعارى ونىمدەرىنىڭ جۇڭگو بازارىنا كىرۋىن قارسى الادى، جۇڭگو كاسىپورىندارىن ۋرۋگۆايعا بارىپ قارجى قوسىپ، شارۋاشىلىقتى گۇلدەندىرۋگە شابىتتاندىرادى، ۋرۋگۆاي جاقتىڭ جۇڭگو كاسىپورىندارىنا ۇزدىكسىز تاماشا شارۋاشىلىق - ساۋدا ورتاسىن ازىرلەۋىن ءۇمىت ەتەدى. ەكى جاق مادەنيەت، دەنە تاربيە سياقتى گۋمانيتارلىق اۋىس - كۇيىستى جەبەپ، ەكى ەل ادامدارىنىڭ بارىس - كەلىسىنە اناعۇرلىم كوپ قولايلى شارت - جاعداي جاراتۋى كەرەك، جۇڭگو جاق ۋرۋگۆاي جاققا اناعۇرلىم كوپ وقۋ سيلىق اقشاسى سانىن بەرۋدى قالايدى.
شي جينپيڭ بىلاي دەپ اتاپ كورسەتتى: جۇڭگو مەن ۋرۋگۆايدىڭ كوپتەگەن حالىقارالىق جانە وڭىرلىك ماسەلەلەردەگى ۇستانىمى قارايلاس، كەڭ كولەمدى ورتاق تانىمعا جانە ورتاق مۇددەگە يە، ەكى جاقتىڭ بىرلەسكەن مەملەكەتتەر ۇيىمى، دۇنيە جۇزىلىك ساۋدا ۇيىمى سياقتى كوپ جاقتى مەحانيزمدەگى سايكەسۋدى، سەلبەسۋدى اناعۇرلىم كۇشەيتىپ، دۇنيە ءجۇزىنىڭ اناعۇرلىم بەيبىت بولۋى، گۇلدەنۋى، ءادىل بولۋى ءۇشىن بىرگە قۇلشىنۋىنا بولادى. جۇڭگو جاق جۇڭگو − لاتىن امەريكاسى قارىم - قاتىناسىنىڭ دامۋىنا وسكەلەڭ ءمان بەرەدى، ۋرۋگۆاي جاقتىڭ جۇڭگو مەن لاتىن امەريكاسىنىڭ جالپى تۇلعالىق سەلبەستىگىنە باستان - اياق بەلسەنە ات سالىسىپ كەلگەندىگىن القايدى، وڭتۇستىك جاق ورتاق بازارى سياقتى وڭىرلىك ۇيىمداردىڭ جۇڭگومەن ساياسي تىلدەسۋدى جانە ەكونوميكا - ساۋدا سەلبەستىگىن جيىلەتۋىن قولدايدى، ۋرۋگۆاي جاقتىڭ جۇڭگو − لاتىن امەريكاسىنىڭ جانە جۇڭگو − وڭتۇستىك جاق سەلبەستىگىن بۇرىنعىداي جەبەۋىن ءۇمىت ەتەدى.
لاكاللە مىنالاردى ءبىلدىردى: ۋرۋگۆاي مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 35 جىلدىعى قارساڭىندا ماڭىزدى بيلىك كەڭسەسى جانە ەكونوميكا - ساۋدا ۋاكىلدەر ۇيىرمەسىن باستاپ جۇڭگوعا ساپارلاي كەلگەنىمە توتەنشە قۋانىشتامىن. ۋرۋگۆاي مەن جۇڭگو ديپلوماتيالىق قارىم - قاتىناس ورناتقان 35 جىلدان بەرى ەكى ەل قارىم - قاتىناسىنىڭ دامۋى باستان - اياق تەڭدىك، قۇرمەت ەتۋ، ءوزارا پايدا جەتكىزۋ، تەڭ يگىلىككە كەنەلۋ پرينسيبىن ۇستانىپ كەلەدى، ەكى جاقتىڭ ساياسيداعى ءوزارا سەنىمدىلىگى بەرىك، ۋرۋگۆاي − جۇڭگو قارىم - قاتىناسىن ۇزدىكسىز تەرەڭدەتۋ − ۋرۋگۆايداعى ءار سالا مەن جالپى حالىقتىڭ كۇشتى ورتاق تانىمى. ۋرۋگۆاي ۇكىمەتى دۇنيە جۇزىندە ءبىر عانا جۇڭگو بار ەكەنىن، بەيبىت بىرلىككە كەلۋ جۇڭگونىڭ ىشكى ءىسى ەكەنىن، ونى، ءسوز جوق، جۇڭگو حالقى ءوزى بەلگىلەۋى كەرەكتىگىن مويىندايدى. ۋرۋگۆاي مەن جۇڭگو كوپ جاقتىلىقتى باتىل قورعاپ، ەركىن ساۋدانى قورعاپ، دۇنيە ءجۇزىنىڭ بەيبىتشىلىگى مەن ورنىقتىلىعىن جەبەۋگە كۇش سالادى. ۋرۋگۆاي − جۇڭگو قارىم - قاتىناسى ەكونوميكا - ساۋدا سالاسىنان اسىپ، كوپ ولشەمدى، جوعارى دەڭگەيدەگى دامۋدىڭ تاماشا جاعدايىن جارىققا شىعاردى. ۋرۋگۆاي ”ءبىر بەلدەۋ، ءبىر جولدى“ بىرگە قۇرۋدى بەلسەنە قولدايدى، ءتوراعا شي جينپيڭ العا قويعان الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن قۇپتايدى، ەكونوميكا - ساۋدا، عىلىم - تەحنيكا، دەنە تاربيە، ساياحات سياقتى سالالارداعى سەلبەستىكتى كۇشەيتۋدى ءۇمىت ەتەدى، ءتىپتى دە كوپ جۇڭگو كاسىپورىندارىنىڭ ۋرۋگۆايعا بارىپ قارجى قوسىپ، شارۋاشىلىقتى گۇلدەندىرۋىن قارسى الادى، ۋرۋگۆايدا ءتىپتى دە كوپ كۇڭزى شۋەيۋانىن قۇرىپ، ەكى ەل ادامدارىنىڭ بارىس - كەلىسى مەن گۋمانيتارلىق اۋىس - كۇيىسىن جەبەۋدى قولدايدى. ۋرۋگۆاي جاق جۇڭگو جاقپەن ەركىن ساۋدا سەلبەستىگىن جەدەل ىلگەرىلەتۋدى، سونىمەن بىرگە وڭتۇستىك جاق ورتاق بازارىنىڭ وسى نىساناعا قاراي قادام تاستاۋىن ىلگەرىلەتۋدى ءۇمىت ەتەدى. ۋرۋگۆاي جاق لاتىن امەريكاسى − جۇڭگو قارىم - قاتىناسىنىڭ دامۋىن جانە لاتىن امەريكاسى − جۇڭگو تالقى مىنبەرى قۇرىلىسىن ىلگەرىلەتۋدە بەلسەندى رول اتقارۋدى قالايدى.
كەڭەستەن كەيىن ەكى ەلدىڭ مەملەكەت باسشىلارى ”ءبىر بەلدەۋ، ءبىر جولدى“ بىرگە قۇرۋ سەلبەستىك جوباسىنا، ساۋدا - قارجى قوسۋ، سيفرلى ەكونوميكا، جاسىل دامۋ، اۋىل شارۋاشىلىعى، دەنساۋلىق ساقتاۋ، وقۋ - اعارتۋ، مادەنيەت، عىلىم - تەحنيكادا جاڭالىق اشۋ جانە كەدەندىك تەكسەرۋ - كارانتيندەۋ سياقتى سالالارداعى كوپ ءتۇرلى ەكى جاقتى سەلبەستىك حۇجاتتارىنا قول قويىلۋىنا بىرگە كۋا بولدى.
كەڭەستەن بۇرىن شي جينپيڭ حالىق سارايىنىڭ سولتۇستىك زالىندا لاكاللەنى قارسى الۋ سالتىن وتكىزدى.
تيان - انمىن الاڭىندا 21 رەت ساليۋت اتىلىپ، قۇرمەت قاراۋىلى قاتار تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى، اسكەري وركەستر جۇڭگو مەن ۋرۋگۆاي ەكى ەلدىڭ مەملەكەت ءانىن ورىندادى. لاكاللە شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن تاماشالادى.
سول كۇنى كەشتە شي جينپيڭ حالىق سارايىنىڭ جينسى زالىندا لاكاللەنى قارسى الۋ قوناعاسىن وتكىزدى.
ۋاڭ ي جوعارىداعى قيمىلدارعا قاتىناستى.
لاكاللە جۇڭگودا ساپاردا بولعان كەزدە، ەكى جاق «جۇڭحۋا حالىق رەسپۋبليكاسى مەن ۋرۋگۆاي شىعىس جاعالاۋ رەسپۋبليكاسىنىڭ جان - جاقتى ستراتەگيالىق سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جاريالادى.
