شينحۋا اگەنتتىگىنىڭ 11 - ايدىڭ 22 - كۇنى مادريدتان بەرگەن حابارى (تىلشىلەر حۋ جياچي، شيە يۇيجى). «شي جينپيڭنىڭ ادامدىق ۇقىققا قۇرمەت ەتۋ جانە ونى قامتاماسىز ەتۋ جونىندەگى بايىمداۋلارىنان ۇزىندىلەردىڭ» (يسپانشا - حانزۋشا سالىستىرماسى) الەمدىك تۇڭعىش تاراتۋ سالتى جانە ”الەمدىك باسقارۋدىڭ ادامزات اقىل - پاراساتى“ اۋىس - كۇيىس زەرتتەۋ - تالقى ءماجىلىسى 11 - ايدىڭ 22 - كۇنى يسپانيانىڭ استاناسى مادريدتا ءساتتى وتكىزىلدى.
يسپانيا كوممۋنيستىك پارتياسىنىڭ ءتوراعاسى حوسە لۋيس سەنتەللا، جۇڭگونىڭ يسپانيادا تۇراتىن باس ەلشىلىگىنىڭ كىشى ەلشىسى چۇي شۇن قاتارلى سيلى قوناقتار قيمىلعا قاتىناستى ءارى ارناۋ ءسوز سويلەدى. ساياسي، ەكونوميكا، مادەنيەت سياقتى سالالاردان كەلگەن 50دەن استام جۇڭگو مەن يسپانيا ماماندارى، وقىمىستىلارى، قوعام جاۋاپتىلارى، جۇڭگومەن دوس قايراتكەرلەر ماجىلىسكە قاتىناستى.
سەنتەللا مىنالاردى ءبىلدىردى: ادامدىق ۇقىقتى قامتاماسىز ەتۋ بارلىق ەلدىڭ بورىشى، ءبىراق اتقارۋ جاعىندا بىرلىككە كەلگەن ولشەم جوق، ادامدىق ۇقىقتى قامتاماسىز ەتۋ ءاربىر ەلدىڭ مەملەكەت جاعدايىنا ۇيلەسۋى قاجەت. ءومىر ءسۇرۋ ۇقىعى مەن دامۋ ۇقىعى − ماڭداي الدى نەگىزگى ادامدىق ۇقىق، جۇڭگو اۋىل - قىستاق پەن ەڭ مەشەۋ وڭىرلەرگە الدىمەن نازار اۋدارىپ، كوپتەگەن ادامداردى كەدەيلىكتەن ارىلتىپ، دوڭگەلەك داۋلەتتى تۇرمىسقا كەنەلتتى. نەگىزگى قاجەتتىڭ قامتاماسىز ەتىلۋىنە بايلانىستى، تۇرمىستارى ءتىپتى دە باردام بولا ءتۇسىپ، جۇڭگو حالقى اناعۇرلىم تەڭ، دەموكراتيالى، ادىلەتتى، حاۋىپسىز قوعامدىق ورتاعا قول جەتكىزدى.
يسپانيا جۇڭگونى تانۋ ساباقحاناسىنىڭ ديرەكتورى، قوسىمشا قۇرىلىم قارىم - قاتىناسى مەڭگەرۋشىسى مارتا مونتولو بىلاي دەپ قارادى: «شي جينپيڭنىڭ ادامدىق ۇقىققا قۇرمەت ەتۋ جانە ونى قامتاماسىز ەتۋ جونىندەگى بايىمداۋلارىنان ۇزىندىلەر» مازمۇنى باي، يدەياسى تەرەڭ قۇزىرلى عىلمي ەڭبەك، دۇنيە جۇزىنە جۇڭگونىڭ ادامدىق ۇقىققا قۇرمەت ەتۋ جانە ونى قامتاماسىز ەتۋ جاعىنداعى ۇستانىمى مەن امالياتىن ايگىلەدى.
يسپانيا جۇڭگومەن دوستىق ادۆوكاتتار قوعامىنىڭ قۇرۋشىسى، قوعام باستىعى انتونيو سەگۋرا مىنالاردى ءبىلدىردى: ءار ەل ادامدىق ۇقىقتى دامىتۋ جونىندە كوپتەگەن ۋادە بەردى، بۇل ازاماتتاردىڭ تۇرمىسىنىڭ تىنىش، حاۋىپسىز، جايلى جانە اقاۋسىز بولۋىن قامتاماسىز ەتۋدى قامتيدى، ال بۇگىنگى بۇل كىتاپ جۇڭگونىڭ ادامدىق ۇقىققا قالاي قۇرمەت ەتكەندىگى جانە ونى قالاي قامتاماسىز ەتكەندىگى جونىندە ايقىن جاۋاپ بەردى.
چۇي شۇن ارناۋ سوزىندە بىلاي دەدى: پارتيا 18 - قۇرىلتايىنان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتى ادامدىق ۇقىققا قۇرمەت ەتۋدى جانە ونى قامتاماسىز ەتۋدى ەل باسقارۋداعى ءبىر كەلەلى قىزمەت ەتۋگە تاباندى بولىپ، ءداۋىر اعىمىنا سايكەسەتىن، ءوز ەلىنىڭ مەملەكەت جاعدايىنا ۇيلەسەتىن ادامدىق ۇقىقتى دامىتۋ جولىمەن ءجۇرىپ، جۇڭگونىڭ ادامدىق ۇقىق ىستەرىنىڭ تاريحي تابىستارعا قول جەتكىزۋىن ىلگەرىلەتتى. بيىل جۇڭگو مەن يسپانيانىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعى، جارتى عاسىردان بەرى، جۇڭگو − يسپانيا قارىم - قاتىناسىنىڭ اقاۋسىز، ءساتتى دامۋى، تۇپتەپ كەلگەندە، ءوزارا قۇرمەت ەتۋ، تەڭ تۇرعىدا ءوزارا پايدا جەتكىزۋ سىندى ديپلوماتيالىق قارىم - قاتىناس ورناتۋ اۋەلگى ماقساتىن ۇستانىپ، تۇرلىشە مادەنيەتتەگى، تۇرلىشە تۇزىمدەگى ەلدەردىڭ تاتۋ - ءتاتتى ءوتۋى سىندى دۇرىس جولمەن جۇرۋگە تاباندى بولعاندىعىندا. دۇنيە جۇزىندە جالپىعا بىردەي ۇيلەسەتىن ادامدىق ۇقىقتى دامىتۋ جولى جوق، ادامدىق ۇقىقتى قامتاماسىز ەتۋدىڭ تەك اناعۇرلىم جاقسىسى بولادى، ەڭ جاقسىسى بولۋى مۇمكىن ەمەس.
«شي جينپيڭنىڭ ادامدىق ۇقىققا قۇرمەت ەتۋ جانە ونى قامتاماسىز ەتۋ جونىندەگى بايىمداۋلارىنان ۇزىندىلەردىڭ» جۇڭگو تىلىندەگى باسىلىمىن جۇڭگو كوممۋنيستىك پارتياسى ورتالىق كوميتەتىنىڭ پارتيا تاريحىن جانە حۇجات زەرتتەۋ ورنى قۇراستىرعان، 9 ارناۋلى تاقىرىپقا ءبولىپ، باس شۋجي شي جينپيڭنىڭ ادامدىق ۇقىققا قۇرمەت ەتۋ جانە ونى قامتاماسىز ەتۋ توڭىرەگىندە جاريالاعان ءبىر قىدىرۋ ماڭىزدى بايىمداۋلارى جۇيەلى تۇردە ەنگىزىلگەن. بۇل كىتاپتىڭ اعىلشىنشا − حانزۋشا، يسپانشا − حانزۋشا، فرانسۋزشا − حانزۋشا، ورىسشا − حانزۋشا، جاپونشا − حانزۋشا سالىستىرما نۇسقاسىن جۇڭگو كوممۋنيستىك پارتياسى ورتالىق كوميتەتىنىڭ پارتيا تاريحىن جانە حۇجات زەرتتەۋ ورنى اۋدارعان، ورتالىق قۇراستىرۋ - اۋدارۋ باسپاسى باسپادان شىعارعان.
