□ انار بۇلت \ شينجياڭ گازەتىنىڭ ءتىلشىسى يىن لۋ
12 - ايدىڭ 22 - كۇنى 17 - كەزەكتى شينجياڭ قىسقى ساياحات كاسىپ سالاسى ساۋدا كورمەسى جانە 2023 - جىلعى شينجياڭ دابىرالى قار مەرەكەسى ۇرىمجىدە باستالدى، قيمىل كەزىندە قار - مۇز ساياحاتى كاسىپ سالاسىن دامىتۋ تالقى مىنبەرى، قىسقى ساياحات بايلىعىن تانىستىرۋ ءماجىلىسى، مەملەكەتتىك ولكە دارەجەلى مەملەكەت مەنشىگىندەگى ساياحات توبى بىرلەستىگىنىڭ جىلدىق جينالىسى، قىسقى مادەنيەت - ساياحات كاسىپ سالاسىنا ساۋداگەر شاقىرىپ قارجى ەنگىزۋدى ءتۇيىلىستىرۋ ءماجىلىسى قاتارلىلار وتكىزىلەدى. كورمەگە كەلگەن ەل ءىشى - سىرتىنداعى كاسىپ سالاسىنىڭ ماماندارى مەن كورمەگە قاتىناسقان ساۋداگەر ۋاكىلدەرى بەلسەنە اقىل - كەڭەس بەرىپ، ىشكەرىلەي اۋىس - كۇيىس جاساپ، قار - مۇز ساياحاتى مەن قار - مۇز كاسىپ سالاسىن گۇلدەندىرۋ - دامىتۋ ءۇشىن سەلبەستىك ورىستەتتى.
قار - مۇز ”مىقتىلارى“ بىلاي دەپ قارادى: شينجياڭنىڭ قار - مۇز ساياحاتىنىڭ تابيعي بايلىق قاينارى كوپ، قار - مۇز كاسىپ سالاسىن دامىتۋ كەڭىستىگى زور، باسەكەلىك قۋاتىن، باۋراۋ قۋاتىن، ىقپالىن ۇزدىكسىز كۇشەيتىپ، دۇنيە جۇزىندەگى قار - مۇز سپورتى اۋەسكەرلەرىن قار قىزىعىنا شاقىرىپ، شينجياڭنىڭ قار - مۇز ساياحاتىنىڭ جان كۇيەرلەرى توبىنا اينالدىرۋ، سونىمەن بىرگە جوعارى دەڭگەيدەگى قار - مۇز سپورت جارىستارىن وتكىزۋگە سايلانۋ كەرەك.
شەتەلدىك ساۋداگەرلەر قار - مۇز ساياحاتى سەلبەستىگىنە قىزىقتى
”قىسقى ساياحات كاسىپ سالاسى ساۋدا كورمەسىنە قاتىناسىپ، جۇڭگو شينجياڭىنىڭ قىسقى قار - مۇز ساياحاتىنىڭ ەرەك كەرەمەتىن كوردىم، تاماشالايتىن جاراتىلىستىق كورىنىستەر كوركەم، شاڭعى الاڭىنداعى قۇرىلعىلار وزىق، توڭىرەكتەگى حالىقتىق تۇسەلحانالاردىڭ كوڭىل اشۋ قيمىلدارى مول ەكەن. بۇل ارانىڭ قار - مۇز ويىن تۇرلەرى وزبەكستاندىق ساياحاتشىلاردى قاتتى باۋرادى، بازار اشۋ ورايى اسا زور“. وزبەكستان مەملەكەتتىك ساياحاتقا قارجى قوسۋ بىرلەستىگىنىڭ ءتوراعاسى ابدۇراسۇل ابدۇحاليلوۆ: الدا شينجياڭنىڭ قار - مۇز ساياحات بايلىعى تاماشا بىرنەشە جەرگە تەكسەرۋگە بارامىن، - دەدى.
ول: ”ءبىر بەلدەۋ، ءبىر جولدى“ بىرگە قۇرۋ باستاماسى العا قويىلعان 10 جىلدان بەرى جۇڭگو مەن وزبەكستان ەتەنە تاتۋ، سەلبەسىپ تەڭ يگىلىككە كەنەلگەن سەرىك بولدى. وسى رەتكى قىسقى ساياحات كاسىپ سالاسى ساۋدا كورمەسىنە قاتىناسۋ ارقىلى شينجياڭنىڭ جاراتىلىستىق جانە گۋمانيتارلىق بايلىقتى اشۋ جانە پايدالانۋ جاعىنداعى كەرەمەت اينالىم تاسىلدەرىن ۇعىستىق، ۇلگى الۋعا جانە يگىلىگىن بىرگە كورۋگە تاتيدى، - دەدى.
”جۇڭگونىڭ شينجياڭى مەن قازاقستاننىڭ دا ساپالى قار - مۇز بايلىعى بار، قىسقى ساياحاتتى سەلبەسىپ دامىتۋ كومەسكى كۇشى زور“. قازاقستان الماتى شىمبۇلاق حالىقارالىق تاۋ شاڭعى الاڭىنىڭ ۋاكىلى مۇستافا جەمىس بىلاي دەدى: دۇنيە جۇزىندەگى ماڭداي الدى تاۋ شاڭعى الاڭىن قۇرۋ، اناعۇرلىم قولايلى قاتىناس ءتاسىلىن جوبالاۋ، اناعۇرلىم حاۋىپسىز، جايلى قىسقى ساياحات كەشەندى دەمالىس اۋماعىن ورنالاستىرۋ سياقتى جاقتاردا ەكى جاقتىڭ اناعۇرلىم بەلسەندى، تەرەڭ سەلبەستىك جاساسۋدى سىناۋىنا بولادى.
وسى رەتكى جۇڭگو شينجياڭ ساپارىندا مۇستافا شينجياڭداعى كوپتەگەن قار - مۇز ساياحاتىنىڭ نىسانالى جەرلەرىمەن جانە وزىندىك بايلىق باسىمدىقتارىمەن، ەرەكشەلىكتەرىمەن ايقىن تانىستى، ول ”قار - مۇز +“ سىندى قار شەڭبەرىن ۇزدىكسىز كەڭەيتىپ، شەكارا ساياحاتى، زات ساتىپ الۋ ساياحاتى، سالت - سانا ساياحاتى قاتارلىلاردىڭ ءبارىن وسى شەڭبەرگە ەنگىزۋ ەكى ەل ساياحاتشىلارىن ءتىپتى دە قىزىقتىرادى دەپ قارادى.
شينجياڭنىڭ قار - مۇز ساياحات جان كۇيەرلەرى توبىن كەڭەيتتى
التاي ايماعىنىڭ كورمە اۋماعىندا شاڭعى جابدىقتارى ەكسكۋرسيالاۋشىلاردىڭ نازارىن اۋداردى، كورمەگە قاتىناسقان ساۋداگەر كوپشىلىككە شاڭعى كيىمى، ءتۇبىت قالپاق، مويىن ءشارپى، بىلعارى قولعاپ سياقتى شاڭعى تەپكەندە ەڭ قاجەتتى بۇيىمداردىڭ ەرەكشەلىگى مەن قاسيەتتەرىن ەگجەي - تەگجەيلى تانىستىردى.
سوڭعى جىلدارى شينجياڭداعى ءارقايسى ءىرى شاڭعى الاڭدارىنىڭ قىزمەت وتەۋ يقۋاتىنىڭ جوعارىلاۋىنا ىلەسە، ەل ءىشى - سىرتىنداعى تانىمال نەمەسە جوعارى دەڭگەيدەگى قار - مۇز جابدىقتار ماركاسى ىركەس - تىركەس ىرگە تەۋىپ، گەنەرال تاۋى حالىقارالىق شاڭعى دەمالىس اۋماعى، جىبەك جولى تاۋلى ءوڭىر دەمالىس اۋماعى، نارات حالىقارالىق شاڭعى دەمالىس اۋماعى قاتارلى جەرلەردە شاڭعىشىلاردىڭ شاڭعى تەبۋ جابدىقتارىن تاڭداپ ساتىپ الۋ ورايى وتە كوپ.
”جۇڭگو شاڭعى تەبۋ تۇتىنۋشىلارىنىڭ سۋرەتتەرىنەن قاراعاندا، قار - مۇز سپورتىمەن اينالىساتىن نەگىزگى قاۋىم 26 − 42 جاس ارالىعىندا ەكەن، شينجياڭنىڭ ساپالى قار - مۇز بايلىعىن اشۋدان - پايدالانۋدان تىس، وسى جاس ارالىعىنداعى قاۋىمنىڭ تۇتىنۋ قاجەتىنە، قابىلەتىنە، قۇن كوزقاراسىنا زەرتتەۋ جۇرگىزىپ، تالداۋ جاساۋى ءتىپتى دە قاجەتتى“. GOSKI \ لىڭشان بىرلەستىگىنىڭ قۇرۋشىسى جوۋ حاڭ بىلاي دەدى: تاياۋداعى 4 جىلدان بەرى جۇڭگونىڭ شاڭعى تەبۋ جابدىقتارىنىڭ ينتەرنەت جەلىسىندەگى، جەلىدەن تىسقارعى ساۋدا مولشەرى ۇزدىكسىز ارتقان، تاۋباۋ جانە تيانماۋ تۇعىرىنداعى شاڭعى تەبۋ جابدىقتارىنىڭ بيىلعى ساۋدا مولشەرىن مىسالعا العاندا، بىلتىرعىدان ％40 جوعارى بولعان.
بەيجيڭ قىسقى وليمپيادا سپورت جارىسى باياندى دامۋ كوميتەتىنىڭ ورىنباسار مەڭگەرۋشىسى جاۋ يىڭگاڭ دا ”جاستار مەن وسپىرىمدەر قار - مۇز سپورت اۋەسكەرلەرىن مىقتى يگەرىپ، شينجياڭ قار - مۇز ساياحاتىنىڭ ناعىز جان كۇيەرلەرىن باۋلۋ“ ۇسىنىسىن العا قويدى. ”شينجياڭدا كاسىپتىك تاۋ شاڭعى الاڭىنان سىرت، قالادا دا اشۋعا جارايتىن مول قار - مۇز بايلىعى بار، شاڭعى باقشاسى، شاڭعى ويىنى باقشاسى سياقتىلاردى قۇرۋعا ابدەن بولادى. كاسىپتىك باۋلۋ كۇشتەرىنىڭ قولداۋىندا قار - مۇز بازاسى تاربيەسىن ويداعىداي جۇرگىزىپ، قالادان تاۋلى وڭىرگە دەيىن قار - مۇزدىڭ قىزىعىنا باتاتىن ورتا ازىرلەۋ كەرەك“، - دەدى جاۋ يىڭگاڭ.
قار - مۇز ءۇشىن كەلگەنىمەن، تەك قار - مۇزدى عانا كوزدەمەدى
وسى كەزەكتى قىسقى ساياحات كاسىپ سالاسى ساۋدا كورمەسىندە شينجياڭنىڭ جەر - جەرىنىڭ كورمە اۋماعىندا حالىقتىق ادەبيەت - كوركەمونەر كونسەرتى، مادەنيەت جاسامپازدىعى ونىمدەرى كورمەسى، بەيزاتتىق مادەنيەت مۇرالارى ونەرى كورمەلىك قويىلىمى قاتارلىلار ورنالاستىرىلىپ، شينجياڭ قىسقى ساياحاتىنىڭ گۋمانيتارلىق بايلىق مازمۇندارىن بەينەلەدى. دولان مۇقامىنىڭ ءان داۋىسى باسىلىسىمەن - اق، ءمورىنقوردىڭ داۋىسى كوتەرىلدى، قارا جورعا، ساۋىردىن سياقتى بيلەرگە كورەرمەندەر قايتا - قايتا شاپالاق سوقتى.
سوڭعى جىلدارى جيلين مەن شينجياڭ بىرلەسىپ تۇلعالاعان چاڭبايشان تاۋى جانە التاي تاۋى جۇڭگو قار - مۇز كاسىپ سالاسى بيىگى ەكى ءوڭىردىڭ قار - مۇز كاسىپ سالاسىنىڭ دامۋىن ءونىمدى ىلگەرىلەتتى، وسى رەت جيلين ولكەسى نەگىزگى قوناق رەتىندە قىسقى ساياحات كاسىپ سالاسى ساۋدا كورمەسىنە قاتىناستى.
”قىسقى ساياحات كاسىپ سالاسى ساۋدا كورمەسىنەن مەن شينجياڭنىڭ قار - مۇز ساياحات بايلىعىن اشۋ - پايدالانۋ، ۇيلەسىمدى ورنالاستىرۋ جاقتارىنداعى ءىشىنارا بەلسەندى ىزدەنىستەرىن كوردىم، ايتالىق، ساياحاتشىلار قار - مۇزدى اڭساپ كەلگەنىمەن، تەك قار - مۇزدى تاماشالاپ، قار - مۇز شاتتىعىنا شومۋدى عانا كوزدەمەدى، شينجياڭنىڭ ’قار - مۇز +‘ىنىڭ ءتۇرى مول، ەرەكشەلىگى كورنەكتى، سەزىنۋ اسەرى جەتكىلىكتى، گۋمانيتارلىق سۇيىسپەنشىلىككە تولى، بۇل قار - مۇز ساياحاتىن جوعارى ساپالى دامىتۋعا ماڭىزدى دەمەۋ كورسەتەدى“. جيلين ولكەسى بايشان قالاسىنىڭ كورمە اۋماعىنىڭ قىزمەتكەرى جاڭ شۋيۋە قار - مۇز كاسىپ سالاسىنىڭ دامۋىن ىلگەرىلەتۋدە جيلين مەن شينجياڭنىڭ ءوزارا ۇلگى الاتىن كوپتەگەن تۇستارى بار دەپ قارادى.
”شينجياڭ قار - مۇز ساياحاتىنىڭ كاسىپ كۇيىن بايىتۋدىڭ ءالى دە زور كەڭەيۋ ءورىسى بار“. شاندۇڭ سىنلينشۋە شاڭعى جابدىقتارى شەكتى سەرىكتەستىگىنىڭ القا باستىعى ليۋ چاڭلي بىلاي دەدى: ”’قار - مۇز +‘دىڭ دامۋى جاڭالىق اشا، جاسامپازدىقپەن جوبالاۋدى، اشۋدى قاجەت ەتەدى، قاتتى بولشەك تەحنيكاسىنىڭ پارمەندى قولداۋىنا دا مۇقتاج. ءبىز شينجياڭنىڭ جەر - جەرىندەگى شاڭعى الاڭدارىمەن، قالاداعى قار - مۇز سپورت الاڭدارىمەن سەلبەستىكتى ۇزدىكسىز كۇشەيتىپ، بۇكىل ەلدىڭ جەر - جەرىنەن، ءتىپتى، دۇنيە ءجۇزىنىڭ ءار جەرىنەن كەلگەن ساياحاتشىلارعا شينجياڭدى قىستا ساياحاتتاۋدىڭ قىزىعىن سەزىندىرەمىز“.
