سايكەس مەزگىلدەگىدەن ％14. 195 ارتتى
انار بۇلت \ شينجياڭ گازەتىنىڭ ءتىلشىسى ياۋ گاڭ 1 - ايدىڭ 2 - كۇنى ۇرىمجىدەن حابارلايدى. اۆتونوميالى رايوندىق مادەنيەت جانە ساياحات مەڭگەرمەسىنەن ۇعىسۋىمىزشا، 3 - جاق ساناق سەرىكتەستىگىنىڭ ۇلگى الىپ تەكسەرۋ ساناعىنا نەگىزدەلگەندە، جاڭا جىلداعى 3 كۇندىك دەمالىس كەزىندە شينجياڭ جالپى ءبىر ميلليون 664 مىڭ 900 (رەت) ساياحاتشى قابىلداپ، سايكەس مەزگىلدەگىدەن ％14. 195 ارتقان؛ ساياحات كىرىسى ءبىر ميلليارد 757 ميلليون يۋانعا جەتىپ، سايكەس مەزگىلدەگىدەن ％28. 424 ارتقان.
جاڭا جىل دەمالىسى كەزىندە شينجياڭنىڭ مادەنيەت جانە ساياحات تۇتىنۋى بىردەي ارتىپ، ونىمدەرى جانە قىزمەت وتەۋمەن قامداۋى مول بولىپ، قار - مۇز ساياحاتى بارىنشا جانداندى. التاي گەنەرال تاۋى حالىقارالىق شاڭعى تەبۋ دەمالىس اۋماعى قابىلداعان ساياحاتشى 25 مىڭ 600گە (رەت) جەتىپ، سايكەس مەزگىلدەگىدەن ％76 ارتقان؛ جىكپەلەڭ حالىقارالىق شاڭعى تەبۋ دەمالىس اۋماعى قابىلداعان ساياحاتشى 9800گە (رەت) جەتىپ، سايكەس مەزگىلدەگىدەن ％209 ارتقان. ىلە قازاق اۆتونوميالى وبلىسىنداعى ءارقايسى اۋدان، قالالار ”قارعا ماحاببات“ اتىنداعى قار - مۇز مادەنيەت، ساياحات مەرەكەسى جەلىلەس قيمىلدارىن ورىستەتتى، بايىنعولين موڭعۇل اۆتونوميالى وبلىسى لوپنۇرلىقتار قىستاعى تۇڭعىش كەزەكتى قىسقى بالىق اۋلاۋ قيمىلىن وتكىزدى، سانجى حۇيزۋ اۆتونوميالى وبلىسىنداعى كوپتەگەن جەر قىسقى سوعىم مەرەكەسى، قىسقى ات بايگەسى سياقتى ۇلتتىق سالت - سانا مادەنيەت قيمىلدارىن ورىستەتتى، اقسۋ ايماعىنىڭ اۋدان، قالالارى قار ۇستىندەگى فۋتبول جارىسى، اتەش تالاستىرۋ، قوشقار ءسۇزىستىرۋ سياقتى ەگىنشى - مالشىلاردىڭ قىسقى قىزىقتى سپورتىن ىركەس - تىركەس ورىستەتتى، التاي ايماعى بايىرعى تەرى شاڭعىمەن سىرعاناۋ، قىسقى ات بايگەسى، قار ۇستىندە ساداق اتۋ سياقتى بۇقارالىق قار - مۇز حالىقتىق سالت - سانا جارىس قيمىلدارىن وتكىزدى.
جەر - جەردىڭ مادەنيەت كورمە الاڭدارى، سارايلارى دەمالىس كەزىندەگى ”نەگىزگى اعىمعا“ اينالىپ، دەمالىس كەزىندە شينجياڭنىڭ جەر - جەرىندەگى كىتاپحانالار، مۇراجايلار، مادەنيەت سارايلارى، اسەمونەر سارايلارى ينتەرنەت جەلىسىنەن تىسقارى جالپى 100 مىڭنان استام ساياحاتشى (رەت) قابىلداعان؛ بۇقارالىق مادەنيەت قيمىلدارى تارتىمدى وتكىزىلىپ، بۇكىل شينجياڭ بويىنشا ينتەرنەت جەلىسىندە، ينتەرنەت جەلىسىنەن تىسقارى ادەبيەت - كوركەمونەر ويىن نومىرلەرى جالپى 564 رەت وتكىزىلىپ، ءار دارەجەلى ادەبيەت - كوركەمونەر تەاتر ۇيىرمەلەرى ىركەس - تىركەس ساحناعا كوتەرىلىپ، بۇقارامەن بىرگە جاڭا جىلدى قارسى الدى.
