انار بۇلت \ شينجياڭ گازەتىنىڭ ٴتىلشىسى دۇڭ لياڭ 1 ـ ايدىڭ 15 ـ كۇنى التايدان حابارلايدى. 1 ـ ايدىڭ 15 ـ كۇنى كەشتە 1 ـ كەزەكتى ”قار ـ مۇز جىبەك جولى جۇڭگو قار قالاسى“ اتىنداعى التاي تاۋىن اينالۋ قىسقى سپورت جارىسى التاي قالاسىنىڭ گەنەرال تاۋى حالىقارالىق قار شاڭعى دەمالىس اۋماعىندا باستالدى. ەل ٴىشى ـ سىرتىنان كەلگەن 15 ۋاكىلدەر ۇيىرمەسىنىڭ 155 قار ـ مۇز ساڭلاعى ”ادامزات قار شاڭعىسىنىڭ باستالعان جەرىندە“ باس قوسىپ، قار ـ مۇز سپورتى ارقىلى ونەر سىناسىپ، تۇسىنىستىكتى تەرەڭدەتىپ، دوستىقتى نىعايتتى.
وسى كەزەكتى سپورت جارىسىندا ”بەيبىت دامۋ، اۋىس ـ كۇيىس جاساسىپ، تەڭ يگىلىككە كەنەلۋ“ نەگىزگى تاقىرىپ بولىپ، كونكيمەن جىلدام سىرعاناۋ، قىسقا ارالىققا جىلدام سىرعاناۋ، كونكيمەن مانەرلەپ سىرعاناۋ، دالالىق شاڭعى، تاۋ شاڭعى، سىڭار شاڭعى، شاڭعىمەن تاۋعا شىعۋ (بايىرعى تەرى شاڭعىمەن سىرعاناۋ) سياقتى 7 تۇردە 37 كىشى ٴتۇر بويىنشا جارىس ورنالاستىرىلدى. وسى كەزەكتى سپورت جارىسى قازاقستان، رەسەي، موڭعۇليا سياقتى 3 ەلدىڭ كوپتەگەن ۋاكىلدەر ۇيىرمەسىن ارناۋلى ۇسىنىس ەتتى، ولار جيلين ولكەلىك ۋاكىلدەر ۇيىرمەسىندەگى، سونداي ـ اق شينجياڭنىڭ ٴارقايسى ايماق، وبلىس، قالالارى، شينجياڭ ٴوندىرىس ـ قۇرىلىس بيڭتۋانى ۋاكىلدەر ۇيىرمەلەرىندەگى جاستارمەن جانە ورەندەرمەن ٴبىر ساحنادا بەلدەسەدى.
موڭعۇليانىڭ وبسۋ ولكەسى ۋاكىلدەر ۇيىرمەسىندەگى ىنكىتور موڭكىباير ەرلەردىڭ دالالىق شاڭعى جارىسىنا قاتىناسادى، ول مۇنى تاپتىرماس ۇيرەنۋ، اۋىس ـ كۇيىس جاساسۋ ورايى دەپ قارادى، ”جۇڭگو شينجياڭىنىڭ التايىنا كەلىپ وسى رەتكى جارىسقا قاتىناسىپ، كوپتەگەن ەلدىڭ سپورتشىلارىمەن ٴبىر ورتادا جارىساتىن بولعانىما قاباعات قۋاندىم. بۇگىن ٴبىز ۇيلەسۋ سيپاتتى جاتتىعۋ جۇرگىزدىك، قار جولى، قار ساپاسى توتەنشە كەرەمەت ەكەن، جارىستا ٴوز دەڭگەيىمدى تولىق ساۋلەلەندىرىپ، جاقسى ناتيجەگە قول جەتكىزۋدى ٴۇمىت ەتەمىن. سونىمەن بىرگە باسقا سپورتشىلاردان كىشى پەيىلدىلىكپەن ۇيرەنىپ، كوپ تاجىريبە اۋىستىرامىن“.
وسى كەزەكتى سپورت جارىسىن اۆتونوميالى رايوندىق دەنە تاربيە مەكەمەسى، اۆتونوميالى رايوندىق مادەنيەت جانە ساياحات مەڭگەرمەسى، التاي ايماقتىق اكىمشىلىك مەكەمەسى باسقارىپ وتكىزەدى. التاي ايماعى وسى رەتكى سپورت جارىسىنان پايدالانىپ، وسى ٴوڭىر قار ـ مۇزىنىڭ باۋراۋ كۇشىن، ىقپال كۇشىن ونان ارى ارتتىرىپ، التاي تاۋى حالىقارالىق سيپاتتى قار ـ مۇز ماركالى جارىسىن تۇلعالاپ، ”ادامزات قار شاڭعىسىنىڭ باستالعان جەرى . جۇڭگو قار قالاسى التاي“ ماركاسىن جاڭعىرتىپ، قار ـ مۇز جىبەك جولىنىڭ جوعارى ساپالى دامۋىن، دەنە تاربيە ساياحاتى مەن شەكارا وتكەلى ەكونوميكاسىنىڭ جەدەل دامۋىن ونان ارى ىلگەرىلەتىپ، سىرتقا ەسىك اشۋدىڭ دەڭگەيى مەن ورەسىن جوعارىلاتادى.
”دەنە تاربيە _ حالىق اراسىنداعى دوستىقتى نىعايتۋدىڭ دانەكەرى، ٴبىز وسى جولعى سالتاناتتى باس قوسۋ ارقىلى كوپشىلىكپەن قول ۇستاسا العا ىلگەرىلەپ، بولاشاققا بىرگە بەت الىپ، بەيبىتشىلىككە، دوستىققا مۇراگەرلىك ەتىپ، ىنتىماقتى، العا باسۋدى جەبەپ، اۋىس ـ كۇيىستى، سەلبەستىكتى تەرەڭدەتىپ، بىرگە دامۋدىڭ، ەسىك اشىپ توعىسۋ جولىن ونان ارى كەڭەيتۋدى كۇتەمىز جانە ٴۇمىت ەتەمىز“، ـ دەدى التاي ايماقتىق پارتكومنىڭ ورىنباسار شۋجيى، اكىمشىلىك مەكەمەسىنىڭ ٴۋاليى جەڭىس قادىس.
باستالۋ سالتىنان كەيىن تاماشا ٴان ـ ٴبي كونسەرتى جانە جارقىلداۋىق سالتاناتى ٴوتتى.
