ما شيڭرۇي، سىمايىل تىلەۋالدى قاتىناستى
ەركىن تۇنياز ۇكىمەت قىزمەتىنەن بايانداما جاسادى، ٴزۇمىرات وبۇل باسقاردى
نۇرلان ٴابىلماجىن، شاۋكەت يمىن، اسحات كەرىمباي، لي يفي، حى جۇڭيوۋ، جاڭ جۋ ٴتوراعالار مىنبەسىنەن ورىن الدى
1 ـ ايدىڭ 30 ـ كۇنى شينجياڭ ۇيعۇر اۆتونوميالى رايوندىق 14 ـ كەزەكتى حالىق قۇرىلتايىنىڭ 2 ـ ٴماجىلىسى شينجياڭ حالىق سارايىندا اشىلدى. سۋرەتتە: ٴماجىلىس الاڭى.
□ سۋرەتتى انار بۇلت\شينجياڭ گازەتىنىڭ ٴتىلشىسى ساي زىڭلى تۇسىرگەن
انار بۇلت\شينجياڭ گازەتىنىڭ ٴتىلشىسى ۋاڭ شيڭرۇي 1 ـ ايدىڭ 30 ـ كۇنى ۇرىمجىدەن حابارلايدى. اۆتونوميالى رايوندىق 14 ـ كەزەكتى حالىق قۇرىلتايىنىڭ 2 ـ ٴماجىلىسى 1 ـ ايدىڭ 30 ـ كۇنى تۇستەن بۇرىن شينجياڭ حالىق سارايىندا اشىلدى. تيانشان الابىنىڭ ٴار شەبىنەن كەلگەن اۆتونوميالى رايوندىق حالىق قۇرىلتايىنىڭ ۋاكىلدەرى بورىشتى، ماڭىزدى تاپسىرمانى ارقالاپ، جۇڭگو ۇلگىسىندەگى وسىزامانداندىرۋ ۇردىسىندە كورىكتى شينجياڭدى اناعۇرلىم ويداعىداي قۇرۋ ٴۇشىن مىندەت اتقارىپ، جاۋاپكەرشىلىكتى ادا ەتىپ، زەيىن ـ زەردەنى، كۇش ـ قۋاتتى شوعىرلاندىردى.
شينجياڭ حالىق سارايى سالتاناتتى دا قىزۋ مەرەيگە شومدى، مەملەكەت گەربى ٴتوراعالار مىنبەسىندەگى شىمىلدىقتىڭ ورتاسىنا ٴىلىنىپ، ونىڭ ەكى جاعىنا بەس ـ بەستەن 10 قىزىل تۋ قويىلعان ەدى.
اتقارۋشى ٴتوراعا بولعان ٴماجىلىس ٴتوراعالار القاسىنىڭ تۇراقتى ٴتوراعالارى ما شيڭرۇي، ٴزۇمىرات وبۇل، لي يفي، حى جۇڭيوۋ، جاڭ جۋ، لي نيڭپيڭ، توحتى ياقۇپ، مۇقيات جارمۇقامەت، ٴدىلشات قىدىرقان، پيڭ شينلاي، ۋاڭ گوحى، ٴمامتىمىن قادىر، جاۋ تيانجيە، ٴمۇتالىپ روزى ٴتوراعالار مىنبەسىنىڭ الدىڭعى قاتارىنان ورىن الدى. اشىلۋ ٴماجىلىسىن ٴزۇمىرات وبۇل باسقاردى.
سىمايىل تىلەۋالدى، ەركىن تۇنياز، نۇرلان ٴابىلماجىن، شاۋكەت يمىن، اسحات كەرىمباي، ياڭ چىڭ، تيان شياڭلي، چىن ۋيجۇن، ۋاڭ ميڭشان، ۋاڭ جيانشين، ٴيۇسۇپجان مامەت، ەلزات احمەتجان، قادەن كابەن جانە ٴماجىلىس ٴتوراعالار القاسىنىڭ مۇشەلەرى ٴتوراعالار مىنبەسىنەن ورىن الدى.
ماجىلىسكە قاتىناسۋعا ٴتيىستى ۋاكىل 548 ادام، قاتىناسقان ۋاكىل 530 ادام، بۇل زاڭدا بەلگىلەنگەن ادام سانىنا ۇيلەسەدى.
ساعات 10نان 30 مينۋت وتكەن مولشەردە ٴماجىلىس اشىلدى. بارلىق ادام ورىندارىنان تۇرىپ، مەملەكەت ٴانىن اسقاقتاتا شىرقادى.
دۋ قول شاپالاق ٴۇنى ىشىندە ەركىن تۇنياز اۆتونوميالى رايوندىق حالىق ۇكىمەتى اتىنان ماجىلىسكە ۇكىمەت قىزمەتىنەن بايانداما جاسادى.
ەركىن تۇنياز 2023 ـ جىلعى قىزمەتتەردى 11 جاقتان قورىتىندىلادى. ول بىلاي دەدى: باس شۋجي شي جينپيڭ اراعا ٴبىر جىل سالىپ شينجياڭعا تاعى كەلىپ، اۆتونوميالى رايوننىڭ جانە بيڭتۋاننىڭ قىزمەت مالىمەتىن تىڭداپ ٴارى ماڭىزدى ٴسوز سويلەپ، ٴبىزدىڭ جاڭا داۋىردەگى پارتيانىڭ شينجياڭدى باسقارۋ جالپى جوباسىن تولىق، دالمە ـ ٴدال، جاپپاي دايەكتىلەندىرۋىمىزگە ٴتۇبىرلى بويسۇنۋ ولشەمىن ازىرلەدى. 2023 ـ جىلى تۇتاس رايونىمىزدىڭ وڭىرلىك ٴوندىرىس جالپى ٴونىم قۇنى%6.8 ارتتى، كولەمنەن جوعارى ونەركاسىپتىڭ ارتقان قۇنى %6.4 ارتتى، تۇراقتى مۇلىككە قوسىلعان قارجى %12.4 ارتتى، يمپورت ـ ەكسپورت جالپى سوماسى %45.9 ارتتى، قالا مەن اۋىل تۇرعىندارىنىڭ جان باسىندىق ورتاشا قولداعى تابىسى جەكە ـ جەكە %5.6، %8.4 ارتتى، باسىم كوپ ساندى ەكونوميكالىق كورسەتكىشتەردىڭ ارتۋ قارقىنى بۇكىل ەل بويىنشا الدىڭعى قاتارعا ٴوتىپ، جۋىق جىلداردان بەرگى شينجياڭنىڭ ەكونوميكالىق، قوعامدىق دامۋىنىڭ ساپاسى مەن ونىمدىلىگى ەڭ جاقسى ٴبىر جىل بولدى.
ەركىن تۇنياز بىلاي دەدى: 2024 ـ جىلعى قىزمەتتى جاقسى ىستەۋدە بىرنەشە جاقتى ويداعىداي يگەرۋگە باسا ٴمان بەرۋ كەرەك: جۇڭگو ۇلگىسىندەگى وسىزامانداندىرۋدى ىلگەرىلەتۋدى ەڭ ۇلكەن ساياسي ەتۋگە تاباندى بولىپ، مەملەكەت جالپى جاعدايىنداعى شينجياڭنىڭ ستراتەگيالىق ورنىن مىقتاپ يگەرىپ، جۇڭگو ۇلگىسىندەگى وسىزامانداندىرۋدىڭ شينجياڭ امالياتىن تىڭعىلىقتى ىلگەرىلەتۋ كەرەك. جوعارى ساپالى دامۋدى جاڭا داۋىردەگى بۇلجىماس قاعيدا ەتۋگە تاباندى بولىپ، نازاردى ەكونوميكالىق قۇرىلىس سىندى وسى وزەكتى قىزمەت پەن جوعارى ساپالى دامۋ سىندى وسى ماڭداي الدى مىندەتكە شوعىرلاندىرىپ، شينجياڭنىڭ جوعارى ساپالى دامۋ ارناسىنا ٴتۇسۋىن ىلگەرىلەتۋ كەرەك. ەكونوميكالىق، قوعامدىق دامۋعا اناعۇرلىم كوپ ساياسي ٴمان ۇستەۋگە تاباندى بولىپ، دامۋ مەن ورنىقتىلىقتىڭ، دامۋ مەن حالىق تۇرمىسىنىڭ، دامۋ مەن جۇرت تىلەگىنىڭ تىعىز بايلانىسىن تەرەڭ تانىپ، دامۋ جەتىستىكتەرىنىڭ حالىق تۇرمىسىن جاقسارتۋدا، ىنتىماقتى كۇشەيتۋدە، جۇرت تىلەگىن ۇيىستىرۋدا تياناقتانۋىن ىلگەرىلەتۋ كەرەك. جۇڭحۋا ۇلتى ورتاق تۇلعا تانىمىن بەرىك ورناتۋدى شينجياڭنىڭ ٴتۇرلى قىزمەتتەرىنىڭ نەگىزگى جەلىسى ەتۋگە تاباندى بولىپ، جۇڭحۋا ۇلتىنىڭ ورتاقتىق سيپاتىن كۇشەيتۋگە، جۇڭحۋا ۇلتى ورتاق تۇلعا تانىمىن نىعايتۋعا پايدالى ما، جوق پا؟ ـ دەگەندى باستان ـ اياق ماڭداي الدى ورىنعا قويىپ ويلاسىپ، كورىكتى شينجياڭ قۇرۋعا قۇدىرەتتى كۇش ـ قۋات توپتاۋ كەرەك. دامۋ مەن حاۋىپسىزدىكتى اناعۇرلىم ٴونىمدى ٴبىر تۇتاس جوسپارلاۋعا تاباندى بولىپ، ورنىقتىلىقتى يگەرۋ مەن دامۋدى جەبەۋ سىندى ەكى جاقتاعى قىزمەتتى ٴبىر تۇتاس جوسپارلاپ، ۇشتاستىرۋدى كۇشەيتۋ كەرەك.
ەركىن تۇنياز بىلاي دەدى: تۇتاس رايونىمىزدىڭ بيىلعى ەكونوميكالىق، قوعامدىق دامۋىنىڭ باستى مەجەلى نىسانالارى مىنالار: وڭىرلىك ٴوندىرىس جالپى ٴونىم قۇنىن %6.5 شاماسىندا ارتتىرۋ، كولەمنەن جوعارى ونەركاسىپتىڭ ارتقان قۇنىن %8 شاماسىندا ارتتىرۋ، تۇراقتى مۇلىككە قوسىلعان قارجىنى %10 شاماسىندا مولايتۋ، يمپورت ـ ەكسپورت جالپى سوماسىن %20 شاماسىندا ارتتىرۋ، قالا، اۋىل تۇرعىندارىنىڭ جان باسىندىق ورتاشا قولداعى تابىسىن جەكە ـ جەكە %6.5، %7.5 مولشەرىندە ارتتىرۋ، ت.ب. جوعارىداعى نىسانانى ورىنداۋدى ارقاۋ ەتىپ، ورنىقتىلىق بارىسىندا ىلگەرىلەۋ، ىلگەرىلەۋ ارقىلى ورنىقتىلىقتى جەبەۋ، الدىمەن قۇرىپ، ونان سوڭ كۇشىنەن قالدىرۋ تالابىنا ساي، ەركىن تۇنياز مىناداي 12 جاقتاعى ٴتۇيىندى قىزمەتتى باسا يگەرۋدى العا قويدى: اۋىل شارۋاشىلىعىن، اۋىل ـ قىستاقتى الدىمەن دامىتۋعا تاباندى بولىپ، اۋىل ـ قىستاقتى جاپپاي گۇلدەندىرۋدى تىڭعىلىقتى ىلگەرىلەتۋ؛ نازاردى ”8 ٴىرى كاسىپ سالاسى شوعىرىنا“ شوعىرلاندىرىپ، شينجياڭ ەرەكشەلىگىنە جانە باسىمدىعىنا يە وسىزاماندانعان كاسىپ سالاسى جۇيەسىن بەلسەنە قۇرۋ؛ جاڭالىق اشۋ ارقىلى دامۋعا دەم بەرۋ ستراتەگياسىن ىشكەرىلەي اتقارىپ، جوعارى ساپالى دامۋعا عىلىم ـ تەحنيكا، وقۋ ـ اعارتۋ، دارىندىلار تىرەگىن ازىرلەۋ؛ قىزمەت وتەۋ كاسىبىنىڭ ساپاسىن جوعارىلاتىپ، ونىمدىلىگىن ارتتىرۋدى كۇش سالا جەبەپ، تۇتىنۋ جاڭا كاسىپ كۇيىن جانە ارتۋ ٴتۇيىنىن جەتىلدىرۋ؛ ٴونىمدى قارجى قوسۋدى بەلسەنە كەڭەيتىپ، وسىزاماندانعان نەگىزدىك قۇرىلعىلار جۇيەسىن جەدەل ورناتۋ؛ ”ٴبىر بەلدەۋ، ٴبىر جول“ وزەكتى رايونى قۇرىلىسىن جەدەلدەتىپ، جوعارى دەڭگەيلى ىشكە، سىرتقا ەسىك اشۋدى كەڭەيتۋ؛ ٴتۇيىندى سالالارداعى رەفورمانى تەرەڭدەتىپ، بازارلانعان، زاڭمەن باسقارىلاتىن، حالىقارالانعان شارۋاشىلىق ـ ساۋدا ورتاسىن كۇش سالا قالىپتاستىرۋ؛ وڭتۇستىك شينجياڭدى ٴتۇيىن ەتۋگە تاباندى بولىپ، قالا مەن اۋىلدىڭ توعىسۋىن جانە وڭىرلەردىڭ سايكەستى دامۋىن جەبەۋ؛ جاسىل، تومەن كومىر قىشقىل گازدى دامۋعا تاباندى بولىپ، لاستانۋدان ساقتانۋ ـ وڭاۋدى جانە ەكولوگيالىق قۇرىلىستى ىلگەرىلەتۋ؛ شينجياڭدى مادەنيەتپەن نارلەندىرۋدى ىشكەرىلەي ىلگەرىلەتىپ، جۇڭحۋا ۇلتى ورتاق تۇلعا تانىمىن ناقتى، جاندى، ٴونىمدى تۇردە بەرىك ورناتۋ؛ حالىق تۇرمىسىن جاقسارتۋدى ٴتۇيىن ەتكەن قوعامدىق قۇرىلىستى كۇشەيتىپ، ٴار ۇلت بۇقاراسىنىڭ تۇرمىس ساپاسىن ۇزدىكسىز جوعارىلاتۋ؛ دامۋ مەن حاۋىپسىزدىكتى ٴبىر تۇتاس جوسپارلاپ، تىنىش، جاراسىمدى قوعامدىق ورتا جاراتۋعا قۇلشىنۋ.
ەركىن تۇنياز بىلاي دەدى: ۇكىمەت پارتيانىڭ باسشىلىعىن قىزمەتتىڭ جالپى بارىسىنا سىڭىرۋگە تاباندى بولىپ، حالىققا باقىت جاراتۋدى ەڭ ماڭىزدى ناتيجە ەتىپ، زاڭمەن باسقارىلاتىن ۇكىمەت، قىزمەت وتەۋ ۇلگىسىندەگى ۇكىمەت، پاك ۇكىمەت قۇرىلىسىن ىلگەرىلەتىپ، قىزمەت جاۋاپكەرشىلىگىن جاپپاي زاڭ بويىنشا ويداعىداي اتقارۋى كەرەك. ول بيڭتۋاننىڭ رەفورماسىن، دامۋىن قولداۋ جانە بيڭتۋان مەن جەرگىلىكتى ورىننىڭ توعىسۋىن جەبەۋ، شينجياڭعا باعىتتامالى كومەكتەسۋ قىزمەتىن جوعارى ساپامەن ورىستەتۋ، مەملەكەت قورعانىسى مەن اسكەري ٴبولىم قۇرىلىسىن قولداۋ جونىندە دە بايىمداۋ جاسادى.
ٴماجىلىستىڭ كەڭەستىك تارتىبىنە ساي، ٴماجىلىس اۆتونوميالى رايوننىڭ 2023 ـ جىلعى حالىق شارۋاشىلىعى مەن قوعامدىق دامۋ جوسپارىنىڭ اتقارىلۋ احۋالى جانە اۆتونوميالى رايوننىڭ 2024 ـ جىلعى حالىق شارۋاشىلىعى مەن قوعامدىق دامۋ جوسپار جوباسى جونىندەگى باياندامانى، اۆتونوميالى رايوننىڭ 2023 ـ جىلعى مەجە ەسەبىنىڭ اتقارىلۋ احۋالى مەن اۆتونوميالى رايوننىڭ 2024 ـ جىلعى مەجە ەسەپ جوباسى جونىندەگى باياندامانى تەكسەردى.
اۆتونوميالى رايوندىق ۇكىمەتتەگى، ساياسي كەڭەستەگى، بيڭتۋانداعى باسشى جولداستار، اۆتونوميالى رايوندىق جوعارى حالىق سوتى مەكەمەسىندەگى، اۆتونوميالى رايوندىق حالىق پروكۋراتۋراسىنداعى نەگىزگى جاۋاپتى جولداستار، مەملەكەتتىك حالىق قۇرىلتايىندا، مەملەكەتتىك ساياسي كەڭەستە مىندەت وتەپ جاتقان باسشى جولداستار، قازىرگى مىندەتىنەن شەگىنگەن ٴبىر ٴبولىم ولكە دارەجەلى باسشىلار قاتارلىلار دا ٴتوراعالار مىنبەسىنەن ورىن الدى.
اۆتونوميالى رايوندىق ساياسي كەڭەس 13 ـ كەزەكتى كوميتەتىنىڭ 2 ـ ماجىلىسىنە قاتىناسىپ جاتقان ساياسي كەڭەس مۇشەلەرى ماجىلىسكە سىرتتاي قاتىناستى.
ٴىشىنارا شەتەلدىڭ جۇڭگودا تۇراتىن ەلشىلەرى، حالىقارالىق ۇيىمداردىڭ ۋاكىلدەرى قاتارلىلار ۇسىنىس بويىنشا ٴماجىلىستى سىرتتاي تىڭدادى.
