ەركىن تۇنياز ىلە قازاق اۆتونوميالى وبلىسىنا بارىپ تەكسەرۋ ـ زەرتتەۋ جۇرگىزدى، حال سۇرادى
ٴتۇرلى قىزمەتتەردى تىڭعىلىقتى، ويداعىداي ىستەپ، بۇقارانىڭ كوكتەم مەرەكەسىن تىنىش، بەرەكەلى وتكىزۋىنە مۇمكىندىك جاساۋ كەرەك
انار بۇلت \ شينجياڭ گازەتىنىڭ ٴتىلشىسى لي ياڭ، ەرىكتى ٴتىلشى ۋاڭ جىحۋا 2 ـ ايدىڭ 7 ـ كۇنى قۇلجادان حابارلايدى. كوكتەم مەرەكەسى قارساڭىندا، اۆتونوميالى رايوندىق پارتكومنىڭ ٴبىر تۇتاس ورنالاستىرۋى بويىنشا، اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى ەركىن تۇنياز ىلە قازاق اۆتونوميالى وبلىسىنا بارىپ، قۇلجا قالاسىن، قۇلجا اۋدانىن ىشكەرىلەي ارالاپ، ” 1ـ شىلدە وردەنىنىڭ“ يەگەرلەرى، قوعام حاۋىپسىزدىگى شەبىندەگى قاھارمان قۇربانداردىڭ وتباسىنداعىلار، قوسىننان شەگىنگەن اسكەريلەردىڭ ۋاكىلدەرى سياقتىلارعا امانداسىپ حال سۇرادى ٴارى ٴتۇيىندى كاسىپورىندارعا، ساۋدا سارايلارىنا، ەرەن بازارلارعا بارىپ، نىسان قۇرىلىستارىنىڭ، مەرەكە الدىنداعى بازار جانە ٴوندىرىس حاۋىپسىزدىگى جاعدايلارىنا تەكسەرۋ ـ زەرتتەۋ جۇرگىزىپ، بۇكىل شينجياڭداعى ٴار ۇلت كادر ـ بۇقاراسىنا كوكتەم مەرەكەسى بايلانىسىمەن باقىت تىلەدى. ول بىلاي دەپ باسا دارىپتەدى: ساياسي جاۋاپكەرشىلىكتى تاباندىلىقپەن، مىقتاپ شىنايى ارقالاپ، اركىم ٴوز جاۋاپكەرشىلىگىن ٴبىلىپ، اركىم ٴوز جاۋاپكەرشىلىگىن ادا ەتىپ، ٴتۇرلى قىزمەتتەردى مىقتى، ناقتى، ەگجەي ـ تەگجەيلى يگەرىپ، بۇقارانىڭ تىنىش، بەرەكەلى جاڭا كوكتەم مەرەكەسىن وتكىزۋىنە شىنايى كەپىلدىك ەتۋ كەرەك.
”1ـ شىلدە وردەنىنىڭ“ يەگەرى مامەتجان ٴومار كەزىندە قىستاق پارتيا ياچەيكاسىنىڭ شۋجيى بولعان، ەركىن تۇنياز ونىڭ وتباسى تۇرمىسىن جانە دەنساۋلىق جاعدايىن ەگجەي ـ تەگجەيلى سۇراپ، وعان مەرەكەلىك سالەم ارناپ، ونى ”ساقا ياچەيكا شۋجيى“ رولىن ۇزدىكسىز ساۋلەلەندىرىپ، قىستاق ”ەكى كوميتەتىنىڭ“ قىزمەتىنە بەلسەنە ات سالىسۋعا، كومەكتەسۋگە، قاسىنداعى ىستەرمەن ماڭايىنداعىلارعا جەتەكشىلىك ەتىپ، كوپشىلىكتى بۇلجىماي پارتيانىڭ ۇنىنە قۇلاق اسۋعا، پارتياعا العىس ايتۋعا، پارتياعا ىلەسۋگە باستاۋعا شابىتتاندىردى.
ەركىن تۇنياز ”مەملەكەتتىك قوعام حاۋىپسىزدىگى جۇيەسىندەگى 2 ـ دارەجەلى قاھارمان ۇلگى“، توڭكەرىستىك قۇربان نۇرتاي انۋاربەكتىڭ ۇيىنە بارىپ، قۇرباننىڭ تۋىس ـ تۋعاندارىنا امانداسىپ، ولاردان حال سۇراپ، قاتىستى تاراۋلارعا ٴىس جۇزىندىك قيىنشىلىقتارى مەن ماسەلەلەرىن دەر كەزىندە شەشىپ، ولارعا پارتيانىڭ مەيىرى مەن قامقورلىعىن قاي ـ قاشان دا سەزىندىرۋدى تاپسىردى. قوسىننان شەگىنگەن اسكەريلەردىڭ ۋاكىلى يان ليجىنىڭ ۇيىندە ەركىن تۇنياز ونىڭ ارمياعا قاتىناسۋ كەشىرمەسىن، وتباسى جاعدايى جانە قامقورلىق جاساۋ ساياساتىنىڭ تياناقتانۋى سياقتى جاعدايلاردى ەگجەي ـ تەگجەيلى ۇعىسىپ، ونى اسكەريلەردىڭ قاسيەتىن ماڭگى ساقتاۋعا، ٴورىس اشا العا ىلگەرىلەۋگە، قوعامعا ۇلەس قوسۋعا شابىتتاندىردى.
ەركىن تۇنياز مەرەكەلىك زاتتار بازارى، ەرەن بازار، ساۋدا سارايى سياقتىلاردى ارالاپ، ەت، جۇمىرتقا، ٴسۇت، كوكونىس، جارقىلداق ـ تورسىلداق سياقتى تاۋارلاردىڭ باعاسىن ەگجەي ـ تەگجەيلى سۇراپ ۇعىسىپ، ىرىقتىلىقپەن قىزمەت وتەپ، الدا ٴجۇرىپ قىزمەت وتەپ، ٴار ۇلت بۇقاراسىنىڭ كوپ نەگىزدى، دارا تۇتىنۋ سۇرانىسىن قاناعاتتاندىرىپ، ازىق ـ تۇلىك حاۋىپسىزدىگى، قورشاعان ورتا تازالىعى، ٴونىم ساپاسى سياقتى جاقتارداعى تۇلعالىق جاۋاپكەرشىلىكتى تياناقتاندىرىپ، تۇتىنۋشىلاردىڭ زاڭدى ۇقىق ـ مۇددەسىن شىنايى قامتاماسىزداندىرۋدى باسا دارىپتەدى.
”سەرىكتەستىكتىڭ ٴوندىرىس ـ تيجارات جاعدايى قانداي؟ وندىرگەن تابيعي گاز قاي جەرلەردى قامدايدى“؟ شينجياڭ چيڭحۋا ەنەرگيا توبى شەكتى سەرىكتەستىگىندە ەركىن تۇنياز كومىردەن تابيعي گاز الۋ نىسانىنىڭ شيكىزاتپەن قامداۋ، تەحنيكانى جاڭالاۋ، ٴونىم قۇنى، ونىمدىلىگى سياقتىلاردى ەگجەي ـ تەگجەيلى ۇعىستى ٴارى جابدىقتاردىڭ اينالىم جاعدايىن جۇمىس باسىندا تەكسەردى. ول بىلاي دەپ باسا دارىپتەدى: جاسىلداندىرۋدى، زەردەلىلەندىرۋدى، سيفرلاندىرۋ دارەجەسىن جوعارىلاتۋدى، جاڭالاۋدى جەدەلدەتىپ، ساپالى كومىر ٴوندىرىس قۋاتىنىڭ جارىققا شىعۋىن جانە تازا پايدالانۋدى ىلگەرىلەتۋ كەرەك. ٴوندىرىس حاۋىپسىزدىگى نەگىزىندە 2 ـ مەرزىمدىك نىساننىڭ قۇرىلىس اياق الىسىن جەدەلدەتىپ، ينجەنەريانىڭ ەرتەرەك سالىنىپ بولۋىن، ەرتە وندىرىسكە قوسىلۋىن، ەرتە ٴونىم بەرۋىن ىلگەرىلەتۋ كەرەك. حالىق تۇرمىسىن گازبەن قامداۋدى قامتاماسىزداندىرۋدى ماڭىزدى قىزمەت ەتىپ، بۇقارانىڭ قىستان جىلى وتۋىنە شىنايى كەپىلدىك ەتۋ كەرەك.
تەكسەرۋ ـ زەرتتەۋ بارىسىندا ەركىن تۇنياز بىلاي دەپ باسا دارىپتەدى: اۆتونوميالى رايوندىق ەكى ٴماجىلىستىڭ رۋحىن ىشكەرىلەي دايەكتىلەندىرىپ، تياناقتاندىرىپ، ۇيرەنشىكتى ويدى تالقانداپ، يدەيانى ۇزدىكسىز ازات ەتىپ، تياناقتاندىرۋدى مىقتاپ يگەرىپ، ساپانى جوعارىلاتىپ، ونىمدىلىكتى ارتتىرىپ، كەلەلى نىسان قۇرىلىسىن جەدەل ىلگەرىلەتىپ، شارۋاشىلىق ـ ساۋدا ورتاسىن كۇش سالا ساپالىلاندىرىپ، ٴبىرىنشى ماۋسىمدا قايراتتانا ۇمتىلىس جاساپ، ”تاماشا باستامانى“ جۇزەگە اسىرۋ كەرەك. تۇتىنۋدىڭ دارەجەسىن جوعارىلاتۋدى كۇش سالا جەبەپ، تۇتىنۋدىڭ جاڭا قالىبىنىڭ، جاڭا ۇلگىسىنىڭ دامۋىن كۇش سالا ىلگەرىلەتىپ، تۇتىنۋدىڭ كومەسكى كۇشىن اشىپ، كوڭىلدى، جاراسىمدى، حاۋىپسىز، ٴتارتىپتى مەرەكەلىك تۇتىنۋ ورتاسىن قۇلشىنا قالىپتاستىرۋ كەرەك. ساياحات كورىنىس ٴوڭىرى سياقتى ادام اينالىمى، زات اينالىمى شوعىرلانعان ٴتۇيىندى ورىنداردى، ٴتۇيىندى جەرلەردى ٴجىتى قاداعالاپ، ٴورت ٴسوندىرۋ، ورتتەن ساقتانۋ حاۋىپسىزدىگىن كۇشەيتىپ، شۇعىل جاعدايعا توتەپ بەرۋ، ٴبىر جاقتى ەتۋ قۋاتىن جوعارىلاتىپ، بۇقارانىڭ ٴومىرى مەن مال ـ مۇلكىنىڭ حاۋىپسىزدىگىنە شىنايى كەپىلدىك ەتۋ كەرەك.
ياڭ شيۋلي قاتىستى قيمىلدارعا قاتىناستى.
