_ شينجياڭ ۋاكىلدەر ۇيىرمەسىنىڭ ”14 ـ كەزەكتى مەملەكەتتىك قىسقى سپورت جارىسىنىڭ“ باستالۋ سالتىنا قاتىناسۋى جونىندە ەستەلىك
□ انار بۇلت \ شينجياڭ گازەتىنىڭ ٴتىلشىسى سۇڭ حايبو
ٴتۇن پەردەسىنىڭ باياۋ تارتىلۋىنا ىلەسە، اشەكەيلى شامدار جايناپ، شۇعىلالى شام ساۋلەسى حۇلۇنبەر قالاسىنا ورنالاسقان ىشكى موڭعۇل مۇز ٴۇستى سپورتى جاتتىقتىرۋ ورتالىعىنىڭ تەز سىرعاناۋ سارايىن نۇرعا بولەدى. 2 ـ ايدىڭ 17 ـ كۇنى كەشتە، جۇرتتى جالت قاراتقان ٴسات جەتتى _ 14 ـ كەزەكتى مەملەكەتتىك قىسقى سپورت جارىسىنىڭ باستالۋ سالتى وسى ارادا سالتاناتپەن وتكىزىلدى.
8 جىلدىڭ الدىندا، شينجياڭ 13 ـ كەزەكتى مەملەكەتتىك قىسقى سپورت جارىسىن وتكىزگەن ەدى، بۇل مەملەكەتتىك قىسقى سپورت جارىسىنىڭ تۇڭعىش رەت شىعىس سولتۇستىكتەن شىعۋى. بۇگىن، بەيجيڭ قىسقى وليمپيادا سپورت جارىسىنان كەيىن تۇڭعىش رەت وتكىزىلگەن مەملەكەتتىك قىسقى سپورت تۇرلەرى جالپىلىق دەنە تاربيە جارىسى سانالاتىن 14 ـ كەزەكتى مەملەكەتتىك قىسقى سپورت جارىسى بۇكىل ەل حالقىنىڭ قىسقى سپورتقا شىنايى ىنتىزارلىعىن ارقالاپ عانا قويماي، تاعى ەلىمىزدىڭ قىسقى سپورتىنىڭ شىت جاڭا تاراۋ اشقاندىعىن دا اڭعارتتى.
وسى كەزەكتى قىسقى سپورت جارىسىنىڭ جارىس بەلگىسىنىڭ جوبالانۋى وزگەشە، كوك ٴتۇستى نەگىزگى بوياۋ اسپاننىڭ كەڭدىگى مەن تەرەڭدىگىنە سيمۆول بولدى. جارىس بەلگىسىنىڭ سونى ويى موڭعۇل جازۋىنداعى ”قىس“ دەگەن جازۋدىڭ فورماسىنان كەلگەن، سونىمەن بىرگە، جۇڭگو حاتكەرلىگىنىڭ جاتتىقتىعى مەن جايساڭدىعى دا شەبەرلىكپەن ەنگىزىلگەن. جارىس بەلگىسىنىڭ ٴپىشىنى جالپى تۇلعالىق جاقتان ۇيىرىلە كوتەرىلگەندەي كۇيدى كورسەتىپ، بەينە قىسقى سپورتتىڭ ومىرشەڭ كۇشى مەن ارىنداعان كۇيىن ايتىپ تۇرعانداي بولادى.
وسى كەزەكتى قىسقى سپورت جارىسىنا شينجياڭ ۋاكىلدەر ۇيىرمەسىنەن جيىنى 85 سپورتشى 4 ۇلكەن ٴتۇر، 9 تارماق ٴتۇر، 67 شاعىن تۇردەگى باسەكەلىك ٴتۇر جارىستارىنا قاتىناسادى، 14 ـ كەزەكتى مەملەكەتتىك قىسقى سپورت جارىسىندا شينجياڭدى قامتىعان جيىنى 31 ولكە، اۆتونوميالى رايون، قالا، شينجياڭ ٴوندىرىس ـ قۇرىلىس بيڭتۋانى، شياڭگاڭ، اۋمىن رايوندارىنان كەلگەن 35 ۋاكىلدەر ۇيىرمەسىندەگى 3000نان استام سپورتشى باسەكەلىك دەنە تاربيە مەن بۇقارالىق تۇرلەردىڭ جارىسىنا قاتىناسىپ، 8 ۇلكەن ٴتۇر، 16 تارماق ٴتۇر، 180 شاعىن ٴتۇر بويىنشا باسەكە ورىستەتەدى.
باستالۋ سالتى كوپ فورمالى تەحنيكالىق ٴتاسىل، كوپ ولشەمدەگى ورىنداۋ كەڭىستىگى، كوپ ساتىلى كورۋ ـ تىڭداۋ كورسەتىلىمى ارقىلى ٴداۋىر ەرەكشەلىگىن ايگىلەيتىن، دەنە تاربيە رۋحىن اسقاقتاتاتىن، مادەنيەت سەنىمىن كورنەكتىلەندىرەتىن ٴبىر رەتكى دەنە تاربيە مادەنيەتى سالتاناتىن تۇلعالادى. ٴار كەزەكتى سپورت جارىسىنىڭ الاۋ تۇتاندىرۋ سالتى جۇرتتى جالت قاراتىپ كەلگەن، وسى رەتكى نەگىزگى الاۋ مۇناراسى بولمە سىرتىنا ورنالاستىرىلدى ٴارى حاڭجوۋ ازيا سپورت جارىسىنىڭ تابىستى تاجىريبەسىنەن ۇلگى الىپ، ”سيفرلى ٴادىس پەن ناقتى ٴادىستى توعىستىرۋ“ ٴتاسىلىن قولدانىپ، دەنە تاربيە ەلەمەنتى مەن AR تەحنيكاسىن ۇشتاستىرعان، الاۋگەر الاڭنىڭ ٴىشى ـ سىرتىنداعى ورىندى اتتاپ وتكەن سوڭ الاۋ مۇناراسىن تۇتاندىردى.
شينجياڭ ۋاكىلدەر ۇيىرمەسى الاڭعا كىرگەندە شاتىرلاعان شاپالاق ٴۇنى كوتەرىلدى. تاجىريبەسى مول تەز سىرعاناۋ سپورتشىسى الماس شاعانباي شينجياڭ ۋاكىلدەر ۇيىرمەسىنىڭ باستالۋ سالتىنداعى تۋ ۇستاۋشىسى بولىپ تاڭدالدى. ”مەن تۋ ۇستاۋشى بولامىن دەپ مۇلدە ويلاماعان ەدىم، ۋاكىلدەر ۇيىرمەسىنىڭ ماعان سەنىم ارتقاندىعىنا ەرەكشە العىس ايتامىن“. كىشكەنتاي كەزىندە الماس تەلەۆيزوردان جۇڭگونىڭ تەز سىرعاناۋ ەگەيى يۇي فىڭتۇڭنىڭ كەلبەتىنە ٴتانتى بولىپ، مۇزدا سىرعاناۋدى ۇناتىپ قالادى. 12 جاسىندا اۆتونوميالى رايوندىق جارىستا اعا جۇلدەگەر بولعاننان كەيىن، ول باتىلدىقپەن كاسىپتىك سپورتشى بولۋ جولىن تاڭدايدى، ”سول كەزدە مەن باتىلدىقپەن جۇرەگىمنىڭ ۇنىنە قۇلاق اسىپ، ٴارى ـ ٴسارى بولماي مۇزدا سىرعاناۋدى تاڭدادىم“.
باستالۋ سالتىنان بۇرىن، شينجياڭ قۇراماسى 14 ـ كەزەكتى مەملەكەتتىك قىسقى سپورت جارىسىندا جيىنى 5 التىن مەدال، 9 كۇمىس مەدال، 5 قولا مەدال الدى. قار ـ مۇز ساحناسىندا شينجياڭ سپورتشىلارى جارىس كەلبەتى مەن دەنە تاربيە رۋحىن تەبىنمەن ايگىلەدى. مۇنىڭ ىشىندە شينجياڭ قۇراماسىنداعى گۇلجانات ابدۋقيۇم شانشي قۇراماسىنداعى جاۋ جيايىڭمەن بىرگە قول ۇستاسا ايەلدەردىڭ قوس ادامدىق شانا تۇرىندە شينجياڭ قۇراماسى ٴۇشىن تۇڭعىش التىن مەدالدى الىپ بەردى؛ تەز سىرعاناۋ جاريا گرۋپپاسى ايەلدەردىڭ 500 مەترلىك جارىسىندا شينجياڭدىق سپورتشى تيان رۇينيڭ جول اۋىستىرۋ اۋماعىندا سوعىلىپ جىعىلىپ قالعاننان كەيىن، باز كەشپەي تەز ورنىنان تۇرىپ، ٴبىر ساعاتتان كەيىن قايتادان جارىسقا تۇسۋگە دايىندالدى، ەڭ سوڭىندا تاماشا ناتيجەمەن تىلەگىنە جەتىپ، التىن مەدال الدى.
اۆتونوميالى رايوندىق دەنە تاربيە مەكەمەسى قىسقى سپورتتى باسقارۋ ورتالىعىنىڭ ورىنباسار مەڭگەرۋشىسى يە بين بىلاي دەپ تانىستىردى: سوڭعى جىلدارى شينجياڭ ”قىسقى وليمپيادان كەيىنگى داۋىردەگى“ قار ـ مۇز سپورتىنىڭ دامۋ شىعىس جەلىنەن پايدالانىپ، قار ـ مۇز الاڭ ـ ساراي قۇرىلعىلارىن بىرتىندەپ كەمەلدەندىرىپ، قار ـ مۇز ساياحاتىن جانە قار ـ مۇز سپورتىن زور كۇشپەن دامىتتى. مۇنان تىس، تاعى بىرلەسىپ باۋلۋ ساياساتىن اتقارىپ، قۇراما اتتاپ بىرلەسۋ ٴادىسىن قولدانىپ، سپورتشىلارعا اناعۇرلىم كوپ پىكىر اۋىستىرۋ جانە ۇيرەنۋ ورايىن ازىرلەدى. مۇنداي جان ـ جاقتى، كوپ ساتىلى دارىندى تاڭداۋ جانە باۋلۋ ۇلگىسى شينجياڭنىڭ قىسقى سپورت تۇرلەرىنىڭ جوعارى ساپالى دامۋىنا بەرىك نەگىز قالادى.
وسى كەزەكتى قىسقى سپورت جارىسى ”قار ـ مۇز ىنتاسىن قاۋلاتىپ، جۇڭگو ارمانىن جالىنداتۋدى“ نەگىزگى تاقىرىپ ەتتى، شينجياڭ سپورتشىلارى ٴتىلشىنىڭ سۇحباتىن قابىلداعاندا مىزعىماس رۋح جانە كورنەكتى بەينە ارقىلى وزدەرىنىڭ داڭقتى تاراۋلارىن جازاتىندىعىن ٴبىلدىردى. قار ـ مۇز ۇستىندە سپورتشىلار تەك جارىستىڭ قاتىناسۋشىسى بولىپ قانا قويماي، ونان دا ماڭىزدىسى، ارمانعا قانات قاعۋشى بولىپ تابىلادى. ولاردىڭ ٴار جولعى قۇلشىنىسى، ٴار جولعى سايىسى قار ـ مۇز سپورتى ٴۇشىن اناعۇرلىم شۇعىلالى نۇر قوساتىن بولادى.
باستالۋ سالتىنان كەيىن، شينجياڭ قۇراماسى كەيىنگى جارىس كۇندەرىندە كەلبەتىن ايگىلەيتىن اناعۇرلىم كوپ ورايدى قارسى الادى، جارىس تۇرلەرى، باستىسى، تەز سىرعاناۋ، سىڭار شاڭعىمەن كەدەرگىدەن اتتاپ سىرعاناۋ جانە دالالىق شاڭعى تەبۋ سياقتىلارعا شوعىرلانعان.
