2-ايدىڭ 19-كۇنى سيلىق تاراتۋ سالتىندا دىلنيگار يىلھامجان (سولدا) مەن بايان جالىن التىن مەدالدارىن كورسەتۋدە.
سۋرەتتى اناربۇلت\شينجياڭ گازەتىنىڭ ءتىلشىسى ساي زىڭلى تۇسىرگەن
انار بۇلت \ شينجياڭ گازەتىنىڭ ٴتىلشىسى سۇڭ حايبو 2 ـ ايدىڭ 19 ـ كۇنى ۇلانچابتان حابارلايدى. 2 ـ ايدىڭ 19 ـ كۇنى 14 ـ كەزەكتى مەملەكەتتىك قىسقى سپورت جارىسىنىڭ ىشكى موڭعۇل اۆتونوميالى رايونى ۇلانچاب قالاسى لياڭچىڭ جارىس رايونىندا شينجياڭ قۇراماسىنىڭ سپورتشىسى بايان جالىن مەن دىلنيگار يىلھامجان دالالىق شاڭعى جاريا گرۋپپاسىنىڭ ايەلدەر توپتىق قىسقا ارالىققا سىرعاناۋ (ەركىن تەحنيكا) جارىسىندا ەرەك بەينەسىمەن التىن مەدالدى جەڭىپ الدى. بۇل شينجياڭ قۇراماسى” 14ـ كەزەكتى قىسقى سپورت جارىسى“ باستالعاننان كەيىن العان تۇڭعىش التىن مەدال ٴارى شينجياڭ دالالىق شاڭعى قۇراماسى 2017 ـ جىلى قۇرىلعاننان بەرى قىسقى سپورت جارىسىندا العان تۇڭعىش التىن مەدال.
مۇنان سىرت، سول كۇنى وتكىزىلگەن جارىستا سىچۋان شينجياڭمەن بىرلەسىپ باۋلىعان سپورتشى جاينات سىڭار شاڭعى جاريا گرۋپپاسىنىڭ ايەلدەر كەدەرگىدەن ٴوتىپ قۋالاي سىرعاناۋ تۇرىندە قولا مەدال الدى.
قازىرگە دەيىن وتكىزىلگەن 9 جارىس تۇرىندە شينجياڭ قۇراماسى كەرەمەت بەينە بايقاتىپ، جيىنى 6 التىن مەدال، 9 كۇمىس مەدال، 7 قولا مەدال الدى.
بۇل جولعى دالالىق شاڭعى ايەلدەر توپتىق قىسقا ارالىقتاعى (ەركىن تەحنيكا) جارىسىندا جيىنى 9 قۇراما سايىستى. ٴاربىر قۇراما 2 سپورتشىنى شاڭعى جولىندا كەزەكپەن سىرعاناۋعا شىعارىپ، ٴبىر ادام 3 اينالىم سىرعاناپ، جيىنى 6 اينالىم سىرعاناپ، كومبەدەن الدىمەن وتكەن قۇراما جەڭىسكە جەتتى. بايان جالىن مەن سەرىگى دىلنيگار يىلھامجان 20 مينۋت 27 سەكۋند 66 تاقىلدىق ناتيجەمەن شينجياڭ قۇراماسىنا تاعى ٴبىر التىن مەدال الىپ بەردى، بۇل ناتيجە حيلۇڭجياڭ قۇراماسىن نەبارى 0.19 سەكۋندپەن ارتتا قالدىردى.
شينجياڭ دالالىق شاڭعى قۇراماسىنىڭ ورىنباسار جەتەكشىسى گاۋ ۋي: ”ٴبىز جارىستان ىلگەرى تاكتيكانى دەن قويا بەلگىلەدىك، سپورتشىلار تاكتيكا بويىنشا مۇلتىكسىز اتقارىپ، اسا جوعارى ۇجىمدىق سايكەسۋ مەن باسەكە دەڭگەيىن ايگىلەپ، سوڭىندا ويداعىداي ناتيجەگە قول جەتكىزدى“، ـ دەدى.
جارىستان كەيىن بايان ”بۇل جەڭىس ٴبىزدىڭ جاپالى جاتتىعۋىمىزدىڭ ەڭ تاماشا قارىمجىسى“، ـ دەدى.
بايان جەمەنەي اۋدانىندا تۋعان، 2017 ـ جىلى مەملەكەتتىك دەنە تاربيە باس مەكەمەسى سالا اتتاۋ، ٴتۇر اتتاۋ بويىنشا تاڭداپ العان دالالىق شاڭعى سپورتشىسى بولعان. دىلنيگار كەزىندە 2022 ـ جىلعى بەيجيڭ قىسقى وليمپيادا سپورت جارىسى جۇڭگو دەنە تاربيە ۋاكىلدەر ۇيىرمەسىنىڭ دالالىق شاڭعى ٴتۇرى سپورتشىلارى تىزىمىنە تاڭدالعان ٴارى باستالۋ سالتىندا ەڭ سوڭعى الاۋگەر بولعان.
2 ـ ايدىڭ 21 ـ كۇنى بايان مەن دىلنيگار قاتارلى شينجياڭ قۇراماسىنىڭ سپورتشىلارى تاعى دا قول ۇستاسىپ، جاريا گرۋپپاسىنىڭ ايەلدەر 4×5 كيلومەترلىك ۇتىلامالى (2 ٴداستۇرلى تەحنيكا 2 + ەركىن تەحنيكا) جارىسىنا قاتىناسادى.
