14 ـ كەزەكتى مەملەكەتتىك قىسقى سپورت جارىسى دالالىق شاڭعى جاستار گرۋپپاسى ەرلەر جەكە قىسقا ارالىققا سىرعاناۋ (ٴداستۇرلى تەحنيكا) جارىسىندا
شينجياڭ ساڭلاعى سامعار سەرىك التىن مەدال الدى
انار بۇلت \ شينجياڭ گازەتىنىڭ ٴتىلشىسى سۇڭ حايبو 2 ـ ايدىڭ 25 ـ كۇنى ۇلانچابتان حابارلايدى. 2 ـ ايدىڭ 25 ـ كۇنى ىشكى موڭعۇلدىڭ ۇلانچاب قالاسى لياڭچىڭ شاڭعى الاڭىندا وتكىزىلگەن 14 ـ كەزەكتى مەملەكەتتىك قىسقى سپورت جارىسى دالالىق شاڭعى جاستار گرۋپپاسى ەرلەر جەكە قىسقا ارالىققا سىرعاناۋ (ءداستۇرلى تەحنيكا) جارىسىندا شينجياڭ قۇراماسىنىڭ ساڭلاعى سامعار سەرىك 3 مينۋت 21 سەكۋند 22 تاقىلدىق ناتيجەمەن اعا جۇلدەگەر بولدى. قازىرگە دەيىن شينجياڭ قۇراماسى 14 ـ كەزەكتى مەملەكەتتىك قىسقى سپورت جارىسىندا جالپى 7 التىن مەدال، 12 كۇمىس مەدال، 10 قولا مەدال الدى.
سول كۇنى كۇن اشىق، تەمپەراتۋرا جانعا جايلى بولدى. ساعات 9دا دالالىق شاڭعى جاستار گرۋپپاسى ەرلەر جەكە قىسقا ارالىققا سىرعاناۋ (ٴداستۇرلى تەحنيكا) جارىسى شىمىلدىعىن اشتى، تولىمدىلىق جارىسىنىڭ سارالاۋىنان، 1/4 شەشۋشى جارىسىنىڭ باسەكەسىنەن جانە جارتىلاي شەشۋشى جارىستىڭ قيان ـ كەسكى شايقاسىنان ٴوتىپ، ەڭ سوڭىندا 6 ساڭلاق شەشۋشى جارىسقا كىردى. اۋىزعا الۋعا تاتيتىنى، سامعاردىڭ شەشۋشى جارىستىڭ الدىنداعى ناتيجەسى باستان ـ اياق الدىڭعى ەكى ورىندى ورنىقتى ساقتاپ، مىعىم قۋاتىن ايگىلەدى. شەشۋشى جارىستا سامعار سوڭعى بولىك جارىس تارتىبىندە ٴبىر جولدا قارسىلاسىن باسىپ وزىپ، اعا جۇلدەگەر بولدى. شينجياڭ دالالىق شاڭعى قۇراماسىنىڭ ورىنباسار جەتەكشىسى گاۋ ۋي بىلاي دەدى: ”سامعاردىڭ دەنە ساپاسى جاقسى، دالالىق شاڭعى تۇرىندە ٴبىرشاما باسىمدىققا يە، ادەتتە ماشىقتانعاندا دا توتەنشە سانالى، وسى رەت اعا جۇلدەگەرلىكتى الۋى ونىڭ ادەتتەگى قۇلشىنىسىنىڭ ەڭ جاقسى قارىمجىسى بولدى“.
بيىل 19 جاستاعى سامعار ٴاسىلى التاي قالاسى حۇڭدۇن قالاشىق جاتاقتى مەكتەبىنىڭ ۇزاققا جۇگىرۋ سپورتشىسى ەدى، 15 جاسىندا ”قار ـ مۇز سپورتىن مەكتەپكە ەنگىزۋ“ قيمىلىندا شاڭعى سپورتىمەن جاناسادى. 2020 ـ جىلى ول شينجياڭ دالالىق قار شاڭعى قۇراماسىنا كىرىپ جۇيەلى ماشىقتانعان، 2023 ـ جىلدان 2024 ـ جىلعا دەيىنگى جارىس ماۋسىمىنداعى مەملەكەتتىك دالالىق شاڭعى جۇلدەلى جارىسى جانە 14 ـ كەزەكتى مەملەكەتتىك قىسقى سپورت جارىسىنىڭ دالالىق شاڭعى تولىمدىلىق جارىسىندا جاستار گرۋپپاسى ەرلەر جەكە قىسقا ارالىققا سىرعاناۋ (ٴداستۇرلى تەحنيكا) تۇرىندە جۇلدەگەر بولعان.
دالالىق شاڭعى _ ٴداستۇرلى قار ٴۇستى سپورت ٴتۇرى، 1924 ـ جىلى قىسقى وليمپيادا سپورت جارىسىنىڭ رەسمي جارىس تۇرىنە اينالعان. ٴداستۇرلى تەحنيكا جارىسىندا سپورتشىلار شاڭعىمەن قار ناۋاسىن باسىپ سىرعانايدى، ەكى اياقتى الدىعا ـ ارتقا قوزعالتىپ جانە شاڭعى تاياعىن تايانىپ، قار ۇستىندە تەز جىلدامدىقپەن العا ىلگەرىلەيدى. جەكەلەردىڭ قىسقا ارالىققا سىرعاناۋ جارىسىنىڭ دايىندىق جارىسىندا شۇعىل، قىزىقتى ىرىكتەۋ ٴتۇزىمى قولدانىلادى. سپورتشىلاردىڭ الاڭعا شىعۋ ٴتارتىبى جەرەبە تارتۋ ارقىلى بەلگىلەنەدى، ٴار 15 سەكۋندتا ٴبىر سپورتشى اتتانادى، ەرلەردىڭ ٴبىر اينالىمدا سىرعاناۋ ارالىعى 1.4 كيلومەتر كەلەدى.
