”14 ـ كەزەكتى قىسقى سپورت جارىسى“ تەز سىرعاناۋ جارىسىندا
شينجياڭ دەنە تاربيە ساڭلاقتارى جارىم كۇندە التىن مەدالدى دا الىپ، كۇمىس مەدالدى دا تاعىپ، قولا مەدالعا دا قول جەتكىزدى
انار بۇلت \ شينجياڭ گازەتىنىڭ ٴتىلشىسى سۇڭ حايبو 2 ـ ايدىڭ 26 ـ كۇنى حۇلۇنبەردەن حابارلايدى. 2 ـ ايدىڭ 26 ـ كۇنى تۇستەن كەيىن 14 ـ كەزەكتى مەملەكەتتىك قىسقى سپورت جارىسى ىشكى موڭعۇل اۆتونوميالى رايونى حۇلۇنبەر قالاسى حايلار جارىس اۋماعىندا 3 رەتكى مۇزدا تەز سىرعاناۋ ٴتۇرىنىڭ التىن مەدال جارىسى وتكىزىلدى، شينجياڭ قۇراماسىنداعى شەبەرلەر تاماشا بەينەمەن جارىم كۇندە ـ اق التىن، كۇمىس، قولا مەدالدى تۇگەلىمەن ەنشىلەدى. مۇنىڭ ىشىندە جۇرت نازارىن اۋدارعان مۇزدا تەز سىرعاناۋ جاستار گرۋپپاسى ەرلەر A گرۋپپاسىنىڭ 1500 مەترلىك جارىسىندا لي ۋىنحاۋ كورنەكتى قۋاتىن ايگىلەپ، التىن مەدال الدى؛ جاڭ جيان دا وسالدىق كورسەتپەي، قولا مەدال الدى، ەكەۋى دە حىبەي مەن شينجياڭ بىرلەسىپ تاربيەلەگەن سپورتشى. مۇزدا تەز سىرعاناۋ جاستار گرۋپپاسى ايەلدەر A گرۋپپاسىنىڭ 500 مەترلىك جارىسىندا شينجياڭ قۇراماسىنىڭ شەبەرى ۋاڭ يىڭيىڭ كورنەكتى بەينە بايقاتىپ، 0.01 سەكۋندتىق بولماشى پارىقپەن جۇلدەگەر بولدى.
سول كۇنى ىشكى موڭعۇل مۇز ٴۇستى سپورتىنا جاتتىعۋ ورتالىعىنىڭ مۇزدا تەز سىرعاناۋ سارايىندا ينە شانشار جەر قالمادى. ەرلەر A گرۋپپاسىنىڭ 1500 مەترلىك جارىسىندا لي ۋىنحاۋ ساپتاسى لييۇي حاۋچىنمەن ٴبىر گرۋپپاعا ٴبولىندى ٴارى ەڭ سوڭعى ٴبىر جۇپ شەبەر رەتىندە جارىس الاڭىنا شىقتى. جارىستا لي ۋىنحاۋ تاماشا باسەكەلىك قۋاتىن ايگىلەپ، ەڭ سوڭىندا ٴبىر مينۋت 49 سەكۋند 55 تاقىلمەن كومبەدەن كورىندى. جارىستان كەيىن لي ۋىنحاۋ كىشى پەيىلدىلىكپەن بىلاي دەدى: ”مەن قالىپتى كوڭىل كۇيمەن جارىسقا قاتىناسىپ، جارىستا ٴاربىر ارەكەتتىڭ ولشەمگە جەتۋىنە شىنايى كەپىلدىك ەتتىم، قانشا دەگەنمەن، شاباندوزدىڭ ٴبارى دەرلىك مىقتى“.
ايەلدەر A گرۋپپاسىنىڭ 500 مەترلىك جارىسىندا ۋاڭ يىڭيىڭ مەن حيلۇڭجياڭ قۇراماسىنان كەلگەن يۇي شىحۇي ٴبىر گرۋپپادا سايىسقا ٴتۇستى. جارىس باستالعاندا سىرتقى جولدا تۇرعان ۋاڭ يىڭيىڭ بۇيرىق مىلتىعى اتىلعاننان كەيىن دەرەۋ اتتاندى، الايدا العاشقى جۇگىرۋ ساتىسىندا قارسىلاسىنان ٴسال كەيىن قالدى. العاشقى اينالمادا يۇي شىحۇي ۋاقىتشا الدا كەلە جاتقان ەدى، الايدا ۋاڭ يىڭيىڭ باز كەشپەستەن، قالماي ىلەسىپ وتىردى. اينالما جولدان وتىسىمەن، ۋاڭ يىڭيىڭ جىلدامدىعىن دەرەۋ تەزدەتىپ، قارسىلاسىمەن بولعان ارالىق پارقىن بىرتىندەپ ازايتتى. جارىس ەڭ سوڭعى اينالماعا وتكەندە، ۋاڭ يىڭيىڭ تاماشا اينالما جول تەحنيكاسىن ايگىلەپ، جەدەل بۇرىلعاننان كەيىن، كومبە سىزىعىنا 100 مەتر قاشىقتىقتا يۇي شىحۇيمەن نەگىزىنەن قاتارلاستى. ەڭ سوڭىندا ۋاڭ يىڭيىڭ 38 سەكۋند 97 تاقىلمەن كومبەدەن كورىنىپ، 0.01 سەكۋندتىق بولماشى پارىقپەن كەيىن قالىپ، كۇمىس مەدال الدى.
سيلىق تاراتۋ سالتىندا ۋاڭ يىڭيىڭ ىشكى تولقۋىن جاسىرا الماي، كوزىنە جاس الدى. ول بۇكپەسىز تۇردە: ”بۇل جولعى جارىس مەن ٴۇشىن وكىنىشتى بولعانىمەن، قاناعاتتانارلىقتاي بولدى. وكىنەرلىگى، مەن اعا جۇلدەگەر بولا المادىم، ال ريزا بولعانىم ٴوزىمنىڭ ەڭ تاماشا ناتيجەمدى بۇزعاندىعىم“.
بۇدان سىرت، 2 ـ ايدىڭ 25 ـ كۇنى تۇستەن كەيىن وتكىزىلگەن مۇزدا تەز سىرعاناۋ جاستار گرۋپپاسى ەرلەردىڭ 5000 مەترلىك جارىسىندا حىبەي مەن شينجياڭ بىرلەسىپ تاربيەلەگەن سپورتشى لي ۋىنحاۋ تاعى ٴبىر قولا مەدال الدى. قازىرگە دەيىن شينجياڭ قۇراماسى ”14 ـ كەزەكتى قىسقى سپورت جارىسىندا“ 8 التىن مەدال، 14 كۇمىس مەدال، 12 قولا مەدال ەنشىلەدى.
