_ شينجياڭ ۋاكىلدەر ۇيىرمەسىنىڭ 14 ـ كەزەكتى مەملەكەتتىك قىسقى سپورت جارىسىنا قاتىناسقاندىعى جونىندە جالپى شولۋ
انار بۇلت \ شينجياڭ گازەتىنىڭ ٴتىلشىسى سۇڭ حايبو
”جايلاۋعا بەرگەن سەرتىم بار، ساعىنىشىمدى مۇڭ عىپ شەرتكىم بار...“ كلاسسيكالىق ساحارا ٴانى «جايلاۋعا بەرگەن سەرتىم بار» 14 ـ كەزەكتى مەملەكەتتىك قىسقى سپورت جارىسى جابىلۋ سالتىنىڭ نەگىزگى تاقىرىبى بولدى. 14 ـ كەزەكتى مەملەكەتتىك قىسقى سپورت جارىسى 2 ـ ايدىڭ 27 ـ كۇنى كەشتە ىشكى موڭعۇلدىڭ حولۇنبەر قالاسىندا تولىق تابىسپەن اياقتالدى.
بۇل ٴار كەزەكتى مەملەكەتتىك قىسقى سپورت جارىستارىنىڭ ىشىندەگى كولەمى ەڭ زور، ٴتۇرى ەڭ كوپ، ولشەمى ەڭ جوعارى ٴبىر كەزەكتىسى بولدى. جارىس تۇرلەرى 2026 ـ جىلعى ميلان قىسقى وليمپيادا سپورت جارىسىنىڭ ولشەمىنە جاپپاي تۋرالانىپ، كونكي، شاڭعى، شانا، شاڭعىمەن تاۋعا شىعۋ سياقتى 8 ۇلكەن ٴتۇردى، 16 بولىمشە ٴتۇردى، 176 شاعىن ٴتۇردى بەلگىلەدى.
شينجياڭنان جيىنى 106 سپورتشى وسى كەزەكتى قىسقى سپورت جارىسىنا قاتىناستى. مۇنىڭ ىشىندە 85 دەنە تاربيە ساڭلاعى 4 ۇلكەن ٴتۇر، 9 بولىمشە ٴتۇر، 67 شاعىن تۇردەگى جارىسقا قاتىناسىپ، 8 التىن، 15 كۇمىس، 12 قولا مەدال الۋداي تاماشا ناتيجەگە قول جەتكىزدى. مۇنان سىرت، 21 سپورتشى كونكيمەن جىلدام سىرعاناۋ، دالالىق شاڭعى سياقتى 2 بۇقارالىق جارىسقا قاتىناستى. شينجياڭ ۋاكىلدەر ۇيىرمەسىنىڭ سپورتشىلارى ىنتىماقتاسا سەلبەسۋ، ەرلىكپەن شايقاسۋ رۋحىن اسقاقتاتىپ، سانسىز اسەرلى جانە ۇمىتىلماس ساتتەردى جارىققا شىعاردى.
قار ـ مۇز جارىس الاڭىندا جاڭا بەينە ايگىلەندى
شينجياڭ قۇراماسىنىڭ ”14 ـ كەزەكتى مەملەكەتتىك قىسقى سپورت جارىسىنداعى“ تۇڭعىش التىن مەدالى گۇلجانات ابدۋقيۇمنىڭ شانا ٴتۇرى اشىق گرۋپپاسىنىڭ ايەلدەر قوس ادامدىق شانا جارىسىنداعى ايتاقالارلىقتاي بەينەسىنەن كەلدى. ايتا كەتەرلىك جايت، سول كۇنگى جارىستا اراپات احمەت شانا ٴتۇرى اشىق گرۋپپاسىنىڭ ەرلەر جەكە ادامدىق شانا جارىسىندا قولا مەدالعا يە بولدى.
2015 ـ جىلدان ىلگەرى وڭتۇستىك شينجياڭنان كەلگەن ولاردىڭ شانانىڭ نە ەكەندىگىنەن بەيحابار ەكەندىگىن كىم ويلاعان؟ بۇگىنگى تاڭدا ولار مەملەكەتتىك شانا قۇراماسىنىڭ ٴبىر مۇشەسىنە اينالدى.
دىلنيگار يىلھامجان مەن بايان جالىن دالالىق شاڭعى اشىق گرۋپپاسىنداعى ايەلدەردىڭ توپتىق قىسقا ارالىق (ەركىن شەبەرلىك) تۇرىنە قول ۇستاسا قاتىناسىپ، ەرلىكپەن التىن مەدالعا قول جەتكىزدى. بايان بىلاي دەيدى: ”ۇجىمنىڭ قولداۋىنا ەرەكشە العىس ايتامىز، بۇگىنگىدەي ناتيجەگە قول جەتكىزۋىمىز كوپشىلىكتىڭ كومەگىنەن ايرىلا المايدى، بۇل التىن مەدال ۇجىمنىڭ داڭقىنا تاۋەلدى، كوپشىلىكتىڭ بىرگە قۇلشىنۋىنىڭ ناتيجەسى“.
سول كۇنگى دالالىق شاڭعى جارىسى توتەنشە قيان ـ كەسكى ٴوتتى، الدىمەن سىرعاناعان بايان كومبەدە دەگبىرسىزدەنە كۇتۋمەن بولدى، ”ماعان ەڭ سوڭعى ٴبىر اينالىمداعى 3 مينۋت سونشاما ۇزاق سەزىلدى“. اقىرى سەرىگى دىلنيگار 0.19 سەكۋندتىق بولماشى باسىمدىقپەن حيلۇڭجياڭ قۇراماسىن جەڭىپ الدى. بۇل شينجياڭ دالالىق شاڭعى قۇراماسىنىڭ مەملەكەتتىك قىسقى سپورت جارىسىندا قول جەتكىزگەن تۇڭعىش التىن مەدالى بولدى، ٴدال وسى ساتتە ولاردىڭ بارلىق اڭساپ كۇتۋلەرى مەن بەرگەن بوداۋلارىنىڭ قارىمجىسى قايتقانداي بولدى.
شاڭعىمەن تاۋعا شىعۋ اشىق گرۋپپاسىنداعى ەرلەردىڭ قىسقا ارالىقتى تۇرىندە يسمايىل توحتارالى اعا جۇلدەگەرلىككە تاياپ بارىپ جىعىلدى. شينجياڭ شاڭعىمەن تاۋعا شىعۋ قۇراماسى قۇرىلعان 2 جىلدان بەرى، تۇڭعىش رەت قىسقى سپورت جارىسى ساپارىنا اتتانىسىمەن قىمباتتى مەدالعا يە بولدى. شينجياڭ شاڭعىمەن تاۋعا شىعۋ قۇراماسىنىڭ جەتەكشىسى شەردان بىلاي دەدى: ”قۇرامامىزدىڭ مۇشەلەرىنىڭ ٴبارى ۇزدىك، ادەتتە قاجىرلى جاتتىعۋ جاسايدى، جارىستا ەشكىم باز كەشكەن جوق، بولاشاقتا ٴتىپتى دە تاماشا ناتيجەگە قول جەتكىزەمىز“.
ونەرسايىس الاڭىندا جەڭىس پەن وكىنىش قاشاندا قاتار ٴجۇرىپ، دەنە تاربيە رۋحىن بىرگە جازادى.
كونكيمەن جىلدام سىرعاناۋ اشىق گرۋپپاسىنداعى ەرلەر توپتىق اتتانعان جارىس الاڭىندا ەرقانات ايتناما 0.45 سەكۋندتىق پارىقپەن 2 ـ بولدى، الايدا ونىڭ بويىنداعى ايانباي كۇرەسۋ رۋحى جۇرت نازارىن اۋداردى، ونان دا ماڭىزدىسى، وزىنە سايىس جاريالاۋ ەرلىگى مەن ەرەن بولۋعا ۇزدىكسىز ۇمتىلۋ بەكىمىن ايگىلەدى.
كونكيمەن جىلدام سىرعاناۋ جاستار گرۋپپاسىنداعى ايەلدەردىڭ 500 مەترلىك جارىسىندا شينجياڭدىق شاباندوز ۋاڭ يىڭيىڭ 0.01 سەكۋندتىق پارىقپەن التىن مەدالدان ايرىلىپ قالدى، سيلىق تاراتۋ راسىمىندە ونىڭ كوزىنە جاس ٴۇيىرىلدى، ول: ”ازعانا پارىق مەنىڭ جاتتىعۋىمداعى قاجىماي ـ تالماي قۇلشىنۋىم مەن قوزعاۋشى كۇشىم بولادى“، ـ دەدى بەكەم تۇردە. انتەك تورىعۋ ونىڭ ەسەيۋ بارىسىنداعى جەبەۋشى بولماق.
8 جىل ەكپىندەي ىلگەرىلەۋدىڭ ارقاسىندا مول تابىسقا كەنەلدى
8 جىلدىڭ الدىندا شينجياڭ ايرىقشا مول قار ـ مۇز بايلىعىنا سۇيەنىپ، ”13 ـ كەزەكتى مەملەكەتتىك قىسقى سپورت جارىسىن“ ٴساتتى وتكىزىپ، شينجياڭنىڭ وزگەشە قار ـ مۇزىنىڭ تارتىمدىلىعىن ايگىلەگەن بولاتىن. بۇگىنگى ”14 ـ كەزەكتى مەملەكەتتىك قىسقى سپورت جارىسىندا“ سپورتشىلار شوعىرىنىڭ جاڭالانۋىنا ىلەسە، شينجياڭنىڭ قار ـ مۇز سپورتى دا ۇزدىكسىز دامىپ، زورايىپ، قار ـ مۇز سپورتى قۇرىلعىلارى كۇن سايىن كەمەلدەنىپ، قيمىلدار كۇن سايىن مول بولىپ، قار ـ مۇز كاسىپ سالاسىنا تىڭ ومىرشەڭدىك كۇش ۇستەدى.
جۇرەلەپ وتىردى، ٴوزىن ەركىن ۇستادى، سىرعاناي جونەلدى... ىشكى موڭعۇل مۇز ٴۇستى سپورتى جاتتىعۋ ورتالىعىنداعى كونكيمەن جىلدام سىرعاناۋ سارايىندا حىبەي مەن شينجياڭ بىرلەسىپ تاربيەلەگەن سپورتشى ۋاڭ زىبين جارىس الدىنداعى جاتتىعۋىن جاساپ جاتقان ەدى. ول مۇز ۇستىندە قۇيعىتا زىمىراعاندا ارتىندا اق سىزىق بولىپ كونكي ٴىزى قالا بەردى.
ۋاڭ زىبين كەزىندە الماس قاقانباي، تاڭبول ەركىنمەن قۇراما بولىپ، 2023 _ 2022 جارىس ماۋسىمى جۇڭگو ساۋىتى كونكيمەن جىلدام سىرعاناۋ ساڭلاقتارى بىرلەسكەن جارىسىنىڭ 2 ـ بەكەتىندەگى ەرلەردىڭ توپتىق ۇتىلامالى جارىسىندا اعا جۇلدەگەر بولعان ەدى. ”14 ـ كەزەكتى قىسقى سپورت جارىسىنا“ قاتىناسقانداعى اسەرىن تىلگە تيەك ەتكەندە، ول بىلاي دەدى: ”ىلگەرى ٴۇرىمجى اۋدانىنداعى كونكيمەن جىلدام سىرعاناۋ سارايىنداعى جاتتىعۋدا مۇز بەتىندە سىرعاناعاندا ەرەكشە كەرەمەت سەزىنۋشى ەدىم، تابىلمايتىن جاتتىعۋ ورايى بولدى“.
ۋاڭ زىبين ايتىپ وتىرعان كونكيمەن جىلدام سىرعاناۋ سارايى اۆتونوميالى رايوندىق دەنە تاربيە مەكەمەسى قىسقى سپورتتى باسقارۋ ورتالىعىنداعى الاڭ ـ سارايلاردىڭ ٴبىرى. بۇل سارايدىڭ تەڭىز دەڭگەيىنەن بيىكتىگى 1650 مەتر، ەل ىشىندەگى تەڭىز دەڭگەيىنەن ەڭ بيىك كونكيمەن جىلدام سىرعاناۋ سارايى.
”13 ـ كەزەكتى مەملەكەتتىك قىسقى سپورت جارىسىندا“ وسى ارادا كوپتەگەن جارىستار وتكىزىلگەن، بۇل جەردە كوپتەگەن مەملەكەتتىك جارىستاردىڭ ەستەلىگى قالدى، كوپتەگەن شينجياڭدىق سپورتشىلار وسى ارادا شەبەرلىگىن شىڭداپ، ناتيجەسىن جوعارىلاتتى. شينجياڭ كونكيمەن جىلدام سىرعاناۋ كومانداسىنىڭ جاتتىقتىرۋشىسى دياۋ مۋليڭ بىلاي دەدى: ”شينجياڭنىڭ الاڭ ـ سارايلارى وتە جاقسى، سپورتشىلار تاماشا الاڭ ـ سارايلاردا جاتتىعۋ جاسايدى، وزدەرىنىڭ تەحنيكالىق جاعدايلارىن اناعۇرلىم ويداعىداي مەڭگەرە الادى، بۇدان بىلايعى جارىستارعا دا كومەگى تيەدى“.
وسى رەتكى جارىستا شينجياڭدىق ايتۋلى ساڭلاق تيان بيڭنيڭ ٴباز ـ باياعىسىنداي ونەرىن ورنىقتى ساۋلەلەندىرىپ، كونكيمەن جىلدام سىرعاناۋ بويىنشا ايەلدەر اشىق گرۋپپاسىنىڭ 500 مەترلىك جارىس تۇرىندە ەرلىكپەن التىن مەدال الىپ، شينجياڭ قۇراماسىنىڭ ابىرويىن تاعى دا اسپانداتتى.
شينجياڭنىڭ دەنە تاربيە ساڭلاقتارى تاماشا الاڭ ـ سارايدا ەمىن ـ ەركىن تەر توگىپ، شىڭدالۋمەن بىرگە، تاعى وزىق عىلمي جاتتىعۋ ٴادىسىن دە ۇيرەندى. 2017 ـ جىلى اۆتونوميالى رايوندىق دەنە تاربيە مەكەمەسى سىۋيكىسى دەنە تاربيە كاسىپ سالاسىن دامىتۋ شەكتى سەرىكتەستىگىمەن ستراتەگيالىق سەلبەستىك جاساسىپ، شينجياڭ دالالىق شاڭعى قۇراماسىن بىرگە قۇردى. دالالىق شاڭعى قۇراماسى قۇرىلعان كۇننەن باستاپ، شينجياڭنىڭ جەر ـ جەرىندەگى تاڭداۋلى سپورتشىلاردى بەلسەنە قابىلداپ، وزىق جابدىق دايىندادى ٴارى نورۆەگيادا بىرەگەي جاتتىقتىرۋشىلاردىڭ شوعىرلى جاتتىقتىرۋىنا جىبەرىپ، ەڭ تاماشا جاتتىعۋ ناتيجەسىنە قول جەتكىزۋىنە شىنايى كەپىلدىك ەتتى.
وسى كەزەكتى مەملەكەتتىك قىسقى سپورت جارىسىندا دىلنيگار مەن بايان سياقتى شەبەرلەردىڭ دالالىق شاڭعى تۇرىندە بىرەگەي قۋاتتارىن ايگىلەۋى ٴدال عىلمي دا وزىق تاربيەلەۋ ٴتاسىلىن قابىلداۋ ناتيجەسىنىڭ بەلگىسى بولدى. شينجياڭ دالالىق شاڭعى اترەتىنىڭ ورىنباسار جەتەكشىسى گاۋ ۋي بىلاي دەدى: ”عىلمي جاتتىقتىرۋ مەن ساياساتتىق قولداۋ بولعاندىقتان، سپورتشىلار جاتتىعۋ مەن جارىسقا نازارلارىن اناعۇرلىم شوعىرلاندىرا الادى، وسى كەزەكتى مەملەكەتتىك قىسقى سپورت جارىسىندا ٴبىز دە قۇرامانىڭ تاريحىنداعى ەڭ تاماشا ناتيجەگە قول جەتكىزدىك“.
قار ـ مۇز جولى اناعۇرلىم كەڭەيدى
”14 ـ كەزەكتى مەملەكەتتىك قىسقى سپورت جارىسى“ دالالىق شاڭعى جاستار گرۋپپاسىنداعى ەرلەردىڭ جەكە قىسقا ارالىقتى (ٴداستۇرلى شەبەرلىك) جارىسىندا التاي قالاسىنان كەلگەن 19 جاستاعى جاس ساڭلاق سامعار سەرىك كورنەكتى بەينەسىمەن التىن مەدالعا ٴساتتى قول جەتكىزدى.
سامعار 15 جاسىندا ”قار ـ مۇز سپورتىن مەكتەپ اۋلاسىنا ەنگىزۋ“ قيمىلى ارقىلى شاڭعى الاڭىنا تۇڭعىش رەت قادام تاستاپ، شاڭعى تەبۋمەن توعىسقان ەدى. ورتالاۋ مەكتەپتە وقىپ جۇرگەنىندە اۋىلىنداعى شاڭعى الاڭدارىنىڭ كوبەيۋىنە ىلەسە، مەكتەپ ارنايى شاڭعى وقىتۋىن ۇيىمداستىردى، بىرتە ـ بىرتە شاڭعى تەبۋ ونىڭ اۋەسىنە اينالدى. سونىمەن نەبارى 4 جىلدا ول ”14 ـ كەزەكتى مەملەكەتتىك قىسقى سپورت جارىسىنداعى“ ەڭ جوعارى سيلىق ساحناسىنا كوتەرىلدى.
ۇعىسۋعا قاراعاندا، قازىر بۇكىل شينجياڭدا 93 مەكتەپ ”بۇكىل ەلدەگى جاس وسپىرىمدەر مەكتەپ اۋلاسى قار ـ مۇز سپورتى ەرەكشە مەكتەبى“ بولىپ باعالانعان ەكەن. سوڭعى جىلدارى شينجياڭ مەملەكەتتىك قۇراماعا كوپتەگەن قار ـ مۇز ٴتۇرى سپورتشىلارىن جىبەردى. بىلتىر اۆتونوميالى رايوندىق وقۋ ـ اعارتۋ مەڭگەرمەسى «جاس وسپىرىمدەردىڭ قار ـ مۇز سپورتىن مەكتەپ اۋلاسىنا ەنگىزۋ قىزمەتىن ىلگەرىلەتۋ جونىندەگى حابارلاندىرۋدى» جاريالاپ، 2025 ـ جىلعا دەيىن قار ـ مۇز سپورتى بار 200دەن استام ەرەكشە مەكتەپتى تاڭداپ، جاس وسپىرىمدەر قار ـ مۇز سپورتى ٴتۇزىمىن قامتاماسىزداندىرۋ جۇيەسىن كەمەلدەندىرىپ، دارىندىلار نەگىزىن بەكەمدەپ، مەكتەپ اۋلاسى قار ـ مۇز سپورتىن جالپىلاستىرۋ جۇيەسىن ورناتۋدى ماقسات ەتتى.
”شينجياڭنىڭ قار ـ مۇز سپورتى اناعۇرلىم كوپ جاس وسپىرىمدەردىڭ ات سالىسۋىن قاجەت ەتەدى، سوڭعى جىلدارى ٴبىز تالانتى بار ٴارى قاجىرلىلىقپەن جاتتىعۋ جاساي الاتىن وقۋشىلاردى ۇزدىكسىز سارالاپ تاڭدادىق، بولاشاقتا قار ـ مۇز سپورتى تۇرىندەگى اناعۇرلىم كوپ جاس كۇشتى تاربيەلەي بەرەمىز“، ـ دەدى اۆتونوميالى رايوندىق دەنە تاربيە مەكەمەسى قىسقى سپورتتى باسقارۋ ورتالىعىنىڭ ورىنباسار مەڭگەرۋشىسى يە بين.
”14 ـ كەزەكتى مەملەكەتتىك قىسقى سپورت جارىسىندا“ شينجياڭ ٴداستۇرلى قار ـ مۇز سپورتىنداعى باسىمدىققا يە تۇرلەردى ساقتاۋمەن بىرگە، سپورتشىلاردى بىرلەسىپ باۋلۋ ساياساتىنا دا بەلسەنە ٴۇن قوستى. دارىندىلار، الاڭ سياقتى جاقتاردا بايلىقتان ورتاق يگىلىكتەنىپ، باسىمدىقتار ارقىلى ٴوزارا تولىقتاپ، باسەكەلىك قۋاتتى ۇزدىكسىز ارتتىردى. تەك ”14 ـ كەزەكتى مەملەكەتتىك قىسقى سپورت جارىسىنىڭ“ كونكيمەن جىلدام سىرعاناۋ تۇرىندە شينجياڭ مەن حيلۇڭجياڭ بىرلەسىپ تاربيەلەگەن شەبەر نيڭ جۇڭيان مەن يىن چي كەرەمەت بەينە كورسەتىپ، 3 التىن مەدال الدى. مۇنان تىس، ءداستۇرلى ەمەس، باسمدىققا يە تۇرلەر، ماسەلەن، سىڭار تاقتايلى شاڭعى، ەركىن شاڭعى سياقتىلار بويىنشا بىرلەسىپ تاربيەلەنگەن سپورتشىلار دۋ دوۋىن، ساۋ تيانچيڭدەر دە كوپتەگەن مەدالعا قول جەتكىزدى.
بولاشاققا كوز جىبەرسەك، شينجياڭنىڭ قار ـ مۇز سپورتى مەن قار ـ مۇز كاسىپ سالاسىندا اناعۇرلىم سايكەستى ىلگەرىلەۋ، گۇلدەنىپ دامۋ كۇيى جارىققا شىعىپ، ەل ىشىندەگى قار ـ مۇز سپورتىنىڭ قاۋىرت دامۋىنا اناعۇرلىم كوپ كۇش ـ قۋات قوسادى.
