جۇمىسكەر قابىلداۋ قاجەتى ارتتى، شينجياڭعا كەلگەن جولاۋشىلار اعىنى مولايدى
كوكتەم باسىنداعى شينجياڭنىڭ جالىندى كۇشى تاسقىنداپ، ومىرشەڭدىگى قاۋلادى
انار بۇلت \ شينجياڭ گازەتىنىڭ ٴتىلشىسى لۋ فىڭباۋ
كوكتەم مەرەكەسى دەمالىسى اياقتاسىمەن قىرۋار جۇمىسكەر شينجياڭعا ىلگەرگى جىلدارداعىدان ەرتە، ونىڭ ۇستىنە كوپ كەلدى. 2 ـ ايدىڭ 18 ـ كۇنىنەن 28 ـ كۇنىنە دەيىن كۇنىنە ورتا ەسەپپەن 10نان استام ۋاقىتشا جولاۋشىلار پويەزى شينجياڭعا كىردى. شينجياڭعا كىرەتىن ۋاقىتشا جولاۋشىلار پويەزىنىڭ قاتىناۋى شينجياڭنىڭ ەكونوميكالىق، قوعامدىق دامۋىنىڭ جاندى دا جالىندى ەكەندىگىن، ٴار كاسىپ، ٴار سالانىڭ ومىرشەڭدىك كۇشىنىڭ قاۋلاعاندىعىن ايگىلەدى.
2 ـ ايدىڭ 27 ـ كۇنى ساعات 22دەن 40 مينۋت وتكەندە شاڭحايدان كەلگەن K4667 كەزەكتى پويەزى ءۇرىمجى ۆوگزالىنا جەتىپ، جولاۋشىلار جۇكتەرىن الىپ ۆوگزالدان شىعۋ اۋزىنا قاراي ٴجۇردى.
حىناننىڭ جوۋكوۋىنان كەلگەن جاۋ گۋاڭدى جۇگىن ارقالاپ، سەرىكتەرىمەن بىرگە ٴماز ـ ٴمايرام بولدى. ”بۇل مەنىڭ شينجياڭعا 5 ـ رەت كەلۋىم“، ـ دەدى ول.
41 جاستاعى جاۋ گۋاڭدى شينجياڭنىڭ ٴبىرتالاي جەرىندە عيمارات سالعان، جول جوندەگەن، ەگىن ەككەن، شينجياڭعا توتەنشە قانىق. ”شينجياڭدا ىستەيتىن جۇمىس كوپ، بيىل بىرنەشە نىسان مەنىڭ بارىپ ىستەۋىمدى كۇتىپ تۇر“. ول سوڭىندا ۇرىمجىدەگى ٴبىر قۇرىلىس ورنىندا جۇمىس ىستەۋدى تاڭداعاندىعىن، قازىر قۇرىلىس ورنى جۇمىس باستاماعان بولسا دا، جۇمىس ىستەتۋشى ورىننىڭ ٴوزىن ەرتەرەك جۇمىس ورنىنا كەلىپ جۇمىس باستاۋ دايىندىعىن ىستەۋگە شاقىرعاندىعىن ايتتى.
شينجياڭنىڭ قىسى سۋىق، دالادا قۇرىلىس جۇرگىزۋ شەكتەمەگە ۇشىرايدى، نىسان قۇرىلىسىندا ٴداستۇرلى ”قىستا دەمالۋ“ ورىن تەۋىپ وتىر. سوڭعى جىلدارى شينجياڭ بۇرىنعى ”قۇرىلىستىڭ قىستا دەمالۋ، نىسانداردىڭ قىسقى ۇيقى“ جاعدايىن ٴبىر جولاتا وزگەرتىپ، قىس مەزگىلىنەن پايدالانىپ الدىڭعى مەرزىمدىك قىزمەتتى تىڭعىلىقتى ورىستەتىپ، نىسانداردىڭ ەرتەرەك جۇمىس باستاۋىنا، جۇمىستى قالپىنا كەلتىرۋىنە شارت ـ جاعداي جاراتتى.
2 ـ ايدىڭ 26 ـ كۇنى شينجياڭ 2024 ـ جىلعى ٴبىرىنشى ماۋسىمداعى بۇكىل رايوننىڭ كەلەلى نىسانداردى ورنالاستىرۋ ٴماجىلىسىن وتكىزدى. بۇرىنعىمەن ۇقسامايتىنى، بيىلعى كەلەلى نىسانداردى ورنالاستىرۋ ٴماجىلىسى جارتى اي بۇرىن وتكىزىلدى، ورنالاستىرۋ ماجىلىسىندە 72 بەلگى سيپاتتى كەلەلى نىسان قۇرىلىس باستادى، وسى نىسانداردىڭ وزىنە جيىنى 318 ميلليارد 400 ميلليون يۋان قارجى قوسىلدى، جىلدىق قوسىلاتىن قارجى 81 ميلليارد 200 ميلليون يۋان بولادى دەپ جوسپارلاندى.
ەرتە دايىندالىپ، ەرتە كىرىستى. نىسانداردىڭ مەرزىمىنەن بۇرىن جۇمىس باستاۋىنا، جۇمىستى قالپىنا كەلتىرۋىنە بايلانىستى، شينجياڭنىڭ جەر ـ جەرىنىڭ جۇمىسكەر قابىلداۋ قاجەتى ارتتى. كوكتەم مەرەكەسى اياقتالىسىمەن قىرۋار جۇمىسكەر دوس ـ جاراندارىمەن بىرگە شينجياڭعا جەتتى.
”ىلگەرگى جىلداردا شينجياڭعا كەلەتىن جۇمىسكەرلەر اعىنىنىڭ قاۋىرت مەزگىلى ادەتتە يۋانشياۋ مەرەكەسىنەن كەيىن بولاتىن، شينجياڭعا كەلەتىن جۇمىسكەرلەر اعىنىنىڭ قاۋىرت مەزگىلى بيىل يۋانشياۋ مەرەكەسىنەن ىلگەرى جارىققا شىقتى“. ٴۇرىمجى ۆوگزالى جولاۋشى تاسىمال سەحىنىڭ مەڭگەرۋشىسى ۋاڭ چاڭيۋان: ”جۋىقتا شينجياڭعا كەلەتىن جولاۋشى اعىنى زور بولادى، پويەزدەر كوپ كەلەدى، جولاۋشىلار اراسىندا جۇمىسكەرلەردىڭ يەلەيتىن سالىستىرماسى ٴبىرشاما كوپ“، ـ دەدى.
ۆوگزالدان شىققان ادامدار اعىنىندا گانسۋدىڭ ديڭشيىنەن كەلگەن ياڭ جيان سەرىكتەرىن باستاپ العا ٴجۇرىپ كەلەدى. 45 جاستاعى ياڭ جيان ٴۇرىمجىنىڭ اشەكەيلەۋ كاسىبىندە 10 نەشە جىل شىنىعۋدى باستان كەشتى، بەساسپاپ شەبەر، اعاششىلىق جۇمىسىن، توكشىلىك جۇمىسىن ىستەي الادى، سىلاقشىلىق ونەرى دە بار، جىل بويى قولى بوسامايدى. ”شينجياڭنىڭ سوڭعى جىلدارى دامۋى توتەنشە تەز بولدى، جۇمىستىڭ كوپتىگىنەن ىستەپ بولا المايمىز. بيىل 2 اۋىلداسىمدى ەرتىپ كەلدىم، اشەكەيلەۋ اترەتىن قۇرىپ، كوبىرەك اقشا تاپپاقشىمىز“، ـ دەدى ول.
ياڭ جياننىڭ قاسىندا كەلە جاتقان لي يۇنليننىڭ شينجياڭعا تۇڭعىش رەت كەلۋى، پويەزدەن تۇسكەننەن كەيىن ول جان ـ جاعىنا كوز جۇگىرتىپ، بىردە قول تەلەفونىمەن سۋرەتكە ٴتۇسىرىپ جاتتى. ”اۋىلداسىم ىستەۋگە رازى بولساڭ بولعانى، اقشا تابا الاسىڭ دەيدى، بيىل قۇر قولمەن ۇيگە قايتۋىما بولمايدى“، ـ دەدى لي يۇنلين زور ۇمىتپەن.
ٴتۇن قاراڭعىلىعى قويۋلانىپ، شينجياڭعا كەلگەن جولاۋشىلار ٴۇرىمجى ۆوگزالىنان شىعىپ، اۆتوكولىكتەرمەن كوزەۋلى جەرلەرىنە اتتاندى، ولار تۇرلىشە ارمان ارقالاپ، شينجياڭ سىندى وسى قۇتتى مەكەندە قاربالاس ٴبىر جىلدى باستادى.
