شينجياڭ گازەتى انار بۇلت \ شينجياڭ گازەتىنىڭ ٴتىلشىسى لي ياڭ 3 ـ ايدىڭ 6 ـ كۇنى بەيجيڭنەن حابارلايدى. 3 ـ ايدىڭ 6 ـ كۇنى مەملەكەتتىك ساياسي كەڭەس 14 ـ كەزەكتى كوميتەتىنىڭ 2 ـ ماجىلىسىنە قاتىناسقان ماملەكەتتىك ساياسي كەڭەستىڭ شينجياڭدا تۇراتىن مۇشەلەرى جەكە ـ جەكە ٴار سالاداعى گرۋپپالاردا ۇكىمەت قىزمەتىنەن بايانداما سياقتىلاردى تالقىلادى. مەملەكەتتىك ساياسي كەڭەستىڭ مۇشەسى، اۆتونوميالى رايوندىق ساياسي كەڭەستىڭ ٴتوراعاسى نۇرلان ٴابىلماجىن گرۋپپا تالقىسىنا قاتىناستى.
مۇشە نۇرلان ٴابىلماجىن بىلاي دەدى: باياندامادا كورسەتىلگەن جۇڭگو ۇلگىسىندەگى وسىزامانداندىرۋ قۇرىلىسىندا قول جەتكەن جاڭا تابىستار وڭاي ـ وسپاق كەلگەن جوق، تۇپتەپ كەلگەندە، باس شۋجي شي جينپيڭنىڭ جول باستاپ، رول ۇستاۋىنىڭ، شي جينپيڭ جاڭا ٴداۋىر جۇڭگوشا سوتسياليزم يدەياسىنىڭ عىلمي جەتەكشىلىگىنىڭ ارقاسى، ول ”ەكىنى تۇراقتاندىرۋدىڭ“ ٴبىزدىڭ ٴتۇرلى حاۋىپ ـ قاتەرلەر مەن سىن ـ سايىستارعا توتەپ بەرۋىمىز، جۇڭگو ۇلگىسىندەگى وسىزامانداندىرۋ قۇرىلىسىن ىلگەرىلەتۋىمىز جونىنەن شەشۋشى ماڭىز الاتىندىعىن تولىق دالەلدەدى. وتكەن ٴبىر جىلدا شي جينپيڭ جولداستى ۇيتقى ەتكەن پارتيا ورتالىق كوميتەتى جۇڭگو ۇلگىسىندەگى وسىزامانداندىرۋ جونىندەگى جوعارى دەڭگەيدە جوبالاۋ مەن امالياتتىق ىزدەنىستى كۇشەيتىپ، ٴىس جۇزىندىك ماسەلەلەردى شەشۋدى قىزمەت جاعدايىن اشۋدىڭ قامال الۋ ٴتۇيىنى ەتىپ، اماندىقتا جاماندىقتىڭ بولارىن ويلايتىن تاۋقىمەت تانىمىمەن جانە سىن ـ سايىستارعا بەتپە ـ بەت كەلەتىن باتىل جىگەرمەن بۇكىل ەلدەگى ٴار ۇلت حالقىن باستاپ داعدارىستى جويىپ، قيىن وتكەلدەن ٴوتىپ، وزگەرىسكە توتەپ بەرىپ، پارتيا مەن مەملەكەت ىستەرىندە تىڭ دا ۇلى تابىستارعا قول جەتكىزۋدى ىلگەرىلەتتى. جاڭا باستامادا دامۋ نىساناسى ادامدى العا باسۋعا جەبەيدى. ٴبىز ساياسي كەڭەستىڭ ارناۋلى كەڭەس قۇرىلىمىندىق رولىن تولىق ساۋلەلەندىرىپ، ۇكىمەت قىزمەتىنەن بايانداما ورنالاستىرعان ٴتۇرلى مىندەتتەردى تياناقتاندىرۋدى مىقتاپ ارقاۋ ەتىپ، ىشكەرىلەي تەكسەرۋ ـ زەرتتەۋ جۇرگىزىپ، بەلسەنە اقىل ـ كەڭەس بەرىپ، ورتاق تانىمدى كەڭىنەن ۇيىستىرىپ، جوعارى ساپالى مىندەت اتقارۋ ارقىلى جۇڭگو ۇلگىسىندەگى وسىزامانداندىرۋدىڭ شينجياڭ امالياتىن ىلگەرىلەتۋگە قىزمەت وتەۋىمىز كەرەك.
بايانداماداعى وسىزاماندانعان كاسىپ سالاسى جۇيەسى قۇرىلىسىن زور كۇشپەن ىلگەرىلەتۋ، جاڭا ساپالى وندىرگىش كۇشتەردىڭ دامۋىن جەدەلدەتۋ جونىندەگى ورنالاستىرۋ ايقىن دا انىق، مۇشە ليۋ ۋي وسى بولىكتىڭ استىنا بەلگى سالدى. ول بىلاي دەدى: جاڭا ساپالى وندىرگىش كۇشتەردى دامىتۋ، تۇپتەپ كەلگەندە، عىلىم ـ تەحنيكادا جاڭالىق اشۋ قابىلەتىنە، اسىرەسە، شەشۋشى، وزەكتى تەحنيكالاردا جاڭالىق اشۋ، سەرپىلىس جاساۋ قابىلەتىنە بايلانىستى. حالىقتىق كاسىپورىندار عىلىم ـ تەحنيكادا جاڭالىق اشۋدىڭ نەگىزگى تۇلعاسى ٴارى تەحنيكانى جالپىلاستىرۋ، قولدانۋ جانە كاسىپ سالاسى دارەجەسىن جوعارىلاتۋدىڭ نەگىزگى تۇلعاسى. الدا جوعارى ساپالى دامۋ سىندى ماڭداي الدى مىندەتتى مىقتى يگەرىپ، ٴوز ەرەكشەلىگىمەن جانە باسىمدىعىمەن ۇشتاستىرىپ، عىلىم ـ تەحنيكادا جاڭالىق اشۋ سەرپىنىن ارتتىرىپ، جاڭا ساپالى وندىرگىش كۇشتەردى دامىتۋعا ۇلەس قوسامىن.
مۇشە ليۋ تاۋ بىلاي دەدى: ۇكىمەت قىزمەتىنەن باياندامانىڭ ساياسي دەڭگەيى جوعارى، قىزمەتتى تياناقتاندىرۋ ٴتۇيىنى ناقتى، سەنىمدى ارتتىرىپ، قايراتتى تاسقىنداتىپ، ناقتى ٴىس ىستەۋگە ٴمان بەرىپ، جاڭالىق اشۋدى جەبەپ، حالىق تىلەگىن توعىستىرىپ، حالىق تۇرمىسىنا تيىمدىلىك جاسايتىن تاماشا بايانداما. باياندامادا بيىل جوعارى مەكتەپ بىتىرەتىن وقۋشىلار 11 ميلليون 700 مىڭنان اساتىندىعى مەجەلەنىپ، جاستاردىڭ جۇمىستانۋىن جەبەۋ ساياساتتىق شارالارىن كۇشەيتىپ، جۇمىستانۋعا، شارۋاشىلىق قۇرۋعا جەتەكشىلىك ەتۋدى، قىزمەت وتەۋدى ساپالىلاندىرۋ كەرەكتىگى اتاپ كورسەتىلدى. وقۋ ـ اعارتۋ مينيسترلىگىنىڭ شەكارا، شالعاي وڭىرلەردى قولداۋ سەرپىنىن ارتتىرىپ، باۋلۋ بازالارىنىڭ سانى مەن باۋلۋ جوسپارى ادام سانىن ارتتىرىپ، باۋلۋدىڭ اناعۇرلىم كوپ مەكتەپ بىتىرگەن وقۋشىنى قامتۋىن ىلگەرىلەتىپ، جوعارى مەكتەپ بىتىرگەن وقۋشىلاردىڭ ەرتەرەك جۇمىستانۋىنا، جوعارى ساپالى جۇمىستانۋىنا دەم بەرۋىن ۇسىنىس ەتەمىن.
باياندامادا العا قويىلعان مادەنيەت ارقىلى حالىققا تيىمدىلىك جاساۋ ينجەنەرياسىن جاسامپازدىقپەن اتقارۋ شاراسى ادەبيەت ـ كوركەمونەر قىزمەتىمەن شۇعىلداناتىن مۇشە يۇكساك شيجااتتى ەرەكشە تەبىرەنتتى. ”بىلتىر مەن ’انار ٴدانى‘ مادەنيەت شاعىن اترەتىنىڭ نەگىزگى ساتى باۋلۋى قيمىلىنا 2 رەت قاتىناسىپ، ٴار قىستاقتىڭ ەرەكشە مادەنيەت ـ ساياحات ۇگىت اترەتىن قۇرۋىنا كومەكتەستىم. مەن تۇرمىسقا ۇزدىكسىز ىشكەرىلەي ارالاسىپ، حالىققا تامىر تارتىپ، حالىقتان كەلگەن تاماشا تۋىندىلار جاراتىپ، مادەنيەت ارقىلى حالىققا تيىمدىلىك جاساۋدىڭ اتويشىسى بولىپ، شينجياڭدى مادەنيەتپەن نارلەندىرۋدى ىشكەرىلەي ىلگەرىلەتەمىن“، ـ دەدى ول.
مۇشە باۋ انميڭ بىلاي دەدى: باياندامادا ”’ٴبىر بەلدەۋ، ٴبىر جولدى‘ جوعارى ساپالى بىرگە قۇرۋدىڭ تەرەڭدەۋىن، ناقتىلانۋىن ىلگەرىلەتۋ“، ”سيفرلى، جاسىل، جاڭالىق اشۋ، سالاماتتىق، مادەنيەت ـ ساياحات، كەدەيلىكتى ازايتۋ سياقتى سالالارداعى سەلبەستىكتى بەلسەنە ىلگەرىلەتۋ“ العا قويىلدى. ول بىلاي دەپ قارادى: شينجياڭ جىبەك جولى ەكونوميكالىق بەلدەۋىنىڭ وزەكتى رايونى رەتىندە، سيفرلى ەكونوميكانى دامىتۋدا ەرەكشە باسىمدىققا يە. مەملەكەتتىڭ شينجياڭدا ورتا ازياعا، باتىس ازياعا بەت العان ەسەپتەۋ قۋاتى ورتالىعىن ورنالاستىرىپ، سيفرلانۋعا بۇرىلىس جاساۋدى جەدەلدەتىپ، ”ٴبىر بەلدەۋ، ٴبىر جول“ سيفرلى ەكونوميكاسىنىڭ جاڭا كارتيناسىن كەسكىندەۋىن ۇسىنىس ەتەمىن.
مەملەكەتتىك ساياسي كەڭەستىڭ شينجياڭدا تۇراتىن مۇشەلەرى ليۋ ۋانلۇڭ، ەلزات احمەتجان، قادىلبەك قامزا، ابدۇرىقىپ ٴتۇمۇرنياز، ليۋ جيانميڭ، حالمۇرات ابدىراحمان قاتارلىلار ٴارقايسى گرۋپپادا جەكە ـ جەكە تالقىعا قاتىناستى.
