□ انار بۇلت \ شينجياڭ گازەتىنىڭ تىلشىلەرى حۋاڭ شيڭ، ۋاڭ جيڭجيڭ
3 ـ ايدىڭ 8 ـ كۇنى، ەندى عانا 2023 ـ جىلعى جۇڭگو التىن ۇلان سيلىعىن (U21) العان، شىنجىندا جۇڭگو فۋتبول قوعامى ەرەكشە بىرلەسكەن جارىسىنا دايىندالىپ جاتقان شينجياڭ ىلەلىك جىگىت باھرام ابدۇۋالي 21 جاسقا تولعان تۋعان كۇنىنە ٴبىر ەرەكشە تارتۋ _ اعاسى ەكەۋىنىڭ ۋاقىت پەن كەڭىستىكتەن ٴوتىپ، اتا ـ انالارىمەن بىرگە تۇسكەن وتباسىلىق سۋرەتتەرىن تاپسىرىپ الدى.
اتا ـ اناسى ەرتە قايتىس بولىپ، اتاسىنىڭ قاسىندا ەرجەتكەن باھرام مەن اعاسى ەكەۋى ەشقاشان وتباسىلىق سۋرەتكە ٴتۇسىپ كورمەگەن ەدى. ”ىنىمە سەرىك بولىپ شاڭحايدا التىن ۇلان سيلىعىن العاندا، ول اكە ـ شەشەمىز كورگەن بولسا قانداي جاقسى بولار ەدى دەگەن ەدى. شينجياڭعا قايتىپ بارعان سوڭ، مەن كونە سۋرەتتەردى تاۋىپ، سۋرەتحاناعا بارىپ ٴبىر وتباسىلىق سۋرەت جاساتتىم“، ـ دەدى اعاسى كامىران ابدۇۋالي.
بويىنىڭ بيىكتىگى 1.88 مەتر كەلەتىن باھرام بويى سورايعان دوپشى بولعانىمەن، دەنە قۋاتى ەرەكشە جانە قارقىنى دا تەز، اتويشى بولۋمەن بىرگە، تاعى الدىڭعى ٴبۇيىر قورعاۋشى دا بولا الادى، مۇنداي تۋما قاسيەت ەل ىشىندەگى فۋتبولشىلاردىڭ ىشىندە شىنىندا دا سيرەك كەزدەسەدى.
مەملەكەتتىك جاستار فۋتبول قۇراماسىنا، مەملەكەتتىك وليمپيادا فۋتبول قۇراماسىنا ىركەس ـ تىركەس تاڭدالدى، سونداي ـ اق قۇرامانىڭ جۇڭگو فۋتبول قوعامى ەرەكشە بىرلەسكەن جارىسىنا ٴساتتى قاتىناسۋىنا كومەكتەستى، U20 ەرلەر فۋتبولىنىڭ ازيا ساۋىتىنا تالاسۋ جارىسىندا دا ايتا قالارلىقتاي بەينە كورسەتتى، ونەرى تاماشا بولعاندىقتان باھرام بۇكىل ەلدەگى فۋتبول اۋەسكەرلەرىنىڭ نازارىن اۋداردى، تاعى التىن ۇلان سيلىعىن الدى، ال وسىنىڭ ٴبارى قۇلجا قالاسى ايدوڭ كوشەسىندەگى ٴبىر شاعىن تار كوشەنىڭ تەرەڭ تۇكپىرىنەن باستالعان ـ دى.
بالا كەزىندە بۇل شاعىن تار كوشە باھرامنىڭ بۇكىل دۇنيەسى بولاتىن. اتاسىنىڭ زەينەت اقىسى شەكتى بولعاندىقتان، باھرام مەن اعاسى تار كوشەدە جايما جايىپ، جۇگەرى سياقتىلاردى ساتىپ ۇيگە سەپتىگىن تيگىزدى، جاپا ـ ماشاقاتقا شىدامدى، مويىمايتىن اعايىندى ەكەۋى تار كوشەدەگى ەڭ اقىلدى بالالار بولاتىن. ول كەزدە ولاردىڭ ەڭ كوڭىلدى ٴىسى جايماداعى نارسەلەردى ەرتەرەك ساتىپ بولىپ، تار كوشەدە دوپ تەبەۋ ەدى، ”دوپ ويناساق بولدى، قام ـ قايعىمىزدىڭ بارىنەن ارىلعانداي بولۋشى ەدىك“، ـ دەدى باھرام.
باستاۋىش مەكتەپكە تۇسكەننەن كەيىن، اعايىندى ەكەۋى فۋتبولعا سۇيىسپەنشىلىكتەرىنەن اينىعان جوق. فۋتبول جاتتىقتىرۋشىلارى ولارعا دوپ تەبۋ ارقىلى دا ٴومىردى وزگەرتۋگە بولاتىندىعىن ايتتى. ”ٴبىز بار كۇشىمىزبەن جاتتىعىپ، فۋتبول تەۋىپ، ەڭ سوڭىندا ەكەۋىمىز دە كلۋبتاردىڭ كوزىنە تۇستىك، ەڭ ۇلكەن قوزعاۋشى كۇشىمىزدىڭ ٴبىرى فۋتبول تەبۋ ارقىلى اناعۇرلىم ويداعىداي تۇرمىس كەشىرۋ بولدى“، ـ دەدى باھرام.
2015 ـ جىلى كامىران نانجيڭدەگى ٴبىر فۋتبول كلۋبىنا قابىلدانادى، وسىدان كەيىن ٴىنىسى باھرام شاندۇڭعا بارىپ مەملەكەتتىك جاستار مەن ورەندەردىڭ فۋتبول جارىسىنا قاتىناسادى. وتباسى شارت ـ جاعدايى جاقسى بولماعاندىقتان، اتاسى قايتەرىن بىلمەي قالادى. ”مەن اتام ٴۇشىن شەشىم جاسادىم، مەن اعاسىمىن عوي، ۇيگە ٴوزىم قارايلاساتىن بولىپ، ٴىنىمدى اتتاندىرىپ قويدىم“، ـ دەدى كامىران.
كوپ وتپەي، باھرام ىشكى موڭعۇل شىڭلى مىڭياڭ فۋتبول كلۋبىنىڭ كوزىنە تۇسەدى، ول اتاسى بەرگەن 2000 يۋان اقشانى الىپ، اعاسىنىڭ ٴۇمىتىن ارقالاپ مەكەنىنەن اتتانىپ، كاسىپتىك فۋتبول سپورتشىسى بولۋ ارمان جولىنا تۇسەدى. بۇل كلۋبتىڭ سەربيالىق باس جاتتىقتىرۋشىسى دۋشان مەن باس ديرەكتورى ليۋ چاڭ ەكەۋى دە ونى توتەنشە جاقسى كورەدى، كوپتىڭ دەن قويا باۋلۋىندا، باھرام تەز جەتىلەدى. ٴبىر رەتكى مەملەكەتتىك جاستار جارىسىندا، ول 5 مايدان جارىستا 9 دوپ ەنگىزىپ، التىن كەبىس سيلىعىن الادى.
2021 ـ جىلى 10 ـ ايدا باھرام شاندۇڭ لۋنىڭ فۋتبول كلۋبىنا اۋىسىپ، كاسىپتىك فۋتبول جولىنا ٴتۇستى. بۇرىن ٴىنىم مەنىڭ فۋتبول شاقايىمدى كيىپ دوپ تەبەتىن، كەيىن مەن اقشا تاپقان سايىن وعان جاقسى فۋتبول شاقايىن الىپ بەرەتىن بولدىم“، ـ دەدى كامىران.
ناتيجەسىنىڭ بارعان سايىن جاقسارۋىمەن، باھرامعا نازار اۋداراتىندار دا بارعان سايىن كوبەيدى. ”ٴبىر مەزەت مەن ٴبىراز ’شالقىپ‘ كەتتىم“. باھرام بىلاي دەدى: ”اعامنىڭ سىرت جەردە فۋتبول تەبەتىن دوستارى بار، ول كىشى پەيىل جانە تەجەمدى بولۋدىڭ ٴبىر كاسىپتىك فۋتبولشى جونىنەن قانشالىقتى ماڭىزدى ەكەنىن بىلەدى“. تەلەفوندا، ۋيشيندە اعاسى ٴار كۇنى ٴىنىسىنىڭ ىڭعىلىنا نازار اۋدارىپ، وعان تۇرمىستىق جاعداي وزگەرگەننەن كەيىن، فۋتبول ەندىگارى جان باعۋ ٴتاسىلى ەمەس، قايتا شىن جۇرەكتەن قىزۋ سۇيەتىن ٴىس بولۋ كەرەك دەپ بار زەيىنىمەن اقىل ايتادى. ”مەن تەك ٴتىپتى دە تەجەمدى، ٴتىپتى دە ىنتالى بولعاندا عانا، ٴوزىم قىزۋ سۇيەتىن فۋتبولمەن ٴتىپتى دە الىسقا جەتە الاتىندىعىمدى ٴتۇسىندىم“، ـ دەدى باھرام.
وسىدان كەيىنگى ٴبىر جىلدا، باھرام ازيا فۋتبول بىرلەستىگى اعا جۇلدەگەر ساۋىتى جارىسىنىڭ، جۇڭگو فۋتبول قوعامى B دارەجەلى بىرلەسكەن جارىسىنىڭ، U20 ازيا ساۋىتى فۋتبول جارىسىنىڭ الدىن الا سارالاۋ جارىستارىنا قاتىناسىپ، مەملەكەتتىك جاستار قۇراماسىنا تاڭدالىپ، ”دارەجە اتتاعان سپورتشى“ بولىپ، مول تابىسقا قول جەتكىزەدى، ”بۇرىن جاستار قۇراماسىنىڭ جارىسىنا قاتىناسقاندا فۋتبول تەبۋ وتە وڭاي سەزىلەتىن، قازىر جۇگىرۋمەن بىرگە، ٴتىپتى دە كوپ مي جۇمساپ، مەيلى دەنە، تەحنيكا، الدە تانىم بولسىن، ٴار جاعىنان كوپ جوعارىلادىم“، ـ دەدى ول.
2023 ـ جىلى باھرام تۇرعان مەملەكەتتىك جاستار فۋتبول قۇراماسى ارادا 9 جىلدان كەيىن ازيا جاستار فۋتبول جارىسىنىڭ 8 مىقتىسىنا تاعى دا كىرگەندە، ول ماڭىزدى رول اتقاردى. قۇرامانىڭ نەگىزگى كۇشى رەتىندە، ول مەملەكەتتىك وليمپيادا فۋتبول قۇراماسىنا تاڭدالدى. مەملەكەتتىك دەڭگەيدەگى تانىمالى دوپشى بولىپ، مەملەكەت اتىنان فۋتبول تەبە الاتىن بولعاندا، باھرامنىڭ اتاسى قاتتى قۋاندى: ۇلكەن نەمەرەم جانىمدا ەرەكشە وپالى، كىشى نەمەرەم سىرتتا وتانعا داڭق اپەردى، قۋانىشىم قوينىما سيماي قالدى“. اتاسىنىڭ وتانعا داڭق اپەرۋ تاپسىرماسى مەن اعاسىنىڭ ارمانىن ارقالاعان باھرامنىڭ كەلەسى نىساناسى مەملەكەتتىك قۇراماعا كىرىپ، اناعۇرلىم ۇلكەن ساحنادا وتاننىڭ داڭقى ٴۇشىن فۋتبول تەبۋ بولدى.
بىلتىر باھرام جيناعان اقشاسىمەن قۇلجا قالاسىنان جاڭا ٴۇي ساتىپ الىپ، اتاسى مەن اعاسىنا بەردى. ونىڭ سىرتقا شىققان ۋاقىتى ۇزاق، كوز اياسى كەڭ، ماسەلەگە جان ـ جاقتى وي جۇگىرتەدى. وسى رەت ٴۇي ساتىپ العاندا، مەن ونىڭ بارعان سايىن پىسىپ ـ جەتىلگەنىن سەزىندىم“، ـ دەدى كامىران.
كونە ۇيدەن كوشىپ شىققان كەزدە، باھرام ۇيىنە قايتىپ كەلدى، تار كوشە بالا كەزىندەگىسىنەن مۇلدە باسقاشا بولىپ وزگەرىپتى، بىردەن ـ ٴبىر وزگەرمەگەنى، تار كوشەدە فۋتبول تەۋىپ جۇگىرىپ جۇرگەن بالالار ەكەن.
