شينحۋا اگەنتتىگىنىڭ 3 ـ ايدىڭ 17 ـ كۇنى بەيجيڭنەن بەرگەن حابارىنا قاراعاندا، جۋىقتا جۇڭگو كوممۋنيستىك پارتياسى ورتالىق كوميتەت كەڭسەسى، مەملەكەتتىك كەڭەس كەڭسەسى «ەكولوگيالىق ورتانى وڭىرلەرگە ٴبولىپ باسقارۋ ـ مەڭگەرۋدى كۇشەيتۋ جونىندەگى پىكىردى» جاريالاعان.
«پىكىردە» مىنالار اتاپ كورسەتىلدى: ەكولوگيالىق ورتانى وڭىرلەرگە ٴبولىپ باسقارۋ ـ مەڭگەرۋ _ ەكولوگيالىق فۋنكتسيانى قامتاماسىز ەتۋدى جانە قورشاعان ورتا ساپاسىن جاقسارتۋدى نىسانا ەتىپ، وڭىرلەرگە ٴبولىپ پارىقتى، دالمە ـ ٴدال باسقارۋ ـ مەڭگەرۋ سىندى قورشاعان ورتانى باسقارۋ ٴتۇزىمىن اتقارۋ، ەكولوگيالىق ورتانى وڭاۋدىڭ وسىزاماندانۋ دەڭگەيىن جوعارىلاتۋدىڭ ماڭىزدى شاراسى. ەكولوگيالىق ورتانى وڭىرلەرگە ٴبولىپ باسقارۋ ـ مەڭگەرۋ جۇمىسىن اتقارىپ، ەكولوگيانى قورعاۋدىڭ قىزىل سىزىعىن، قورشاعان ورتا ساپاسىنىڭ تومەنگى شەگىن، بايلىقتان پايدالانۋدىڭ جوعارعى شەگىن قاتاڭ ساقتاپ، ٴتۇرلى اشۋ، قورعاۋ، گۇلدەندىرۋ قيمىلدارىنا عىلمي جەتەكشىلىك ەتۋ جوعارى ساپالى دامۋدى ىلگەرىلەتىپ، ادام مەن تابيعات جاراسىمدى قاتار ٴومىر سۇرەتىن وسىزامانداندىرۋدى قۇرۋ جونىنەن ماڭىزدى مانگە يە.
«پىكىردىڭ» جالپى تۇلعالىق تالابى مىناداي: ەكولوگيالىق ورتانى وڭىرلەرگە ٴبولىپ باسقارۋ ـ مەڭگەرۋدى كۇشەيتۋدە شي جينپيڭ جاڭا ٴداۋىر جۇڭگوشا سوتسياليزم يدەياسىن، اسىرەسە، شي جينپيڭ ەكولوگيالىق وركەنيەت يدەياسىن جەتەكشى ەتۋگە تاباندى بولىپ، پارتيا 20 ـ قۇرىلتايىنىڭ رۋحىن ىشكەرىلەي دايەكتىلەندىرىپ، ەكولوگيالىق ورتانى قورعاۋ جونىندەگى مەملەكەتتىك جينالىستىڭ ورنالاستىرۋىن تياناقتاندىرىپ، جاڭا دامۋ ۇستانىمىن تولىق، دالمە ـ ٴدال، جاپپاي دايەكتىلەندىرىپ، جاڭا دامۋ ارناسىن جەدەل قالىپتاستىرىپ، كومىر قىشقىل گازىنىڭ شىعارىلۋ مولشەرىن تومەندەتۋدى، لاستانۋدى ازايتۋدى، جاسىلدىقتى كەڭەيتۋدى، ارتۋدى سايكەستى ىلگەرىلەتىپ، جاراتىلىستىق زاڭدىلىق پەن وڭىرلىك پارىققا تولىق قۇرمەت ەتىپ، نەگىزگى تۇلعالىق فۋنكتسيالىق رايون ستراتەگياسىن جاپپاي تياناقتاندىرىپ، مەملەكەت جەر بايلىعى كەڭىستىك جوباسىن جانە پايدالانۋ ورنىن باسقارۋمەن تولىق ۇشتاستىرىپ، جوعارى دەڭگەيلى قورعاۋ ارقىلى جوعارى ساپالى دامۋدى ىلگەرىلەتىپ، جوعارى ساپالى تۇرمىس جاراتىپ، ادام مەن تابيعات جاراسىمدى قاتار ٴومىر سۇرەتىن كورىكتى جۇڭگو قۇرۋعا قۇلشىنۋ كەرەك.
_ ەكولوگيانى الدىمەن ەسكەرۋ، جاسىل دامۋ كەرەك. تابيعاتقا قۇرمەت ەتۋگە، تابيعاتقا سايكەسۋگە، تابيعاتتى قورعاۋعا تاباندى بولىپ، جاراتىلىستىق ەكولوگيا حاۋىپسىزدىك شەكاراسى مەن قورشاعان ورتا ساپاسىنىڭ تومەنگى شەگىن ساقتاپ، جاراتىلىستىق ەكولوگيا حاۋىپسىزدىگى جاۋاپكەرشىلىگىن تياناقتاندىرىپ، جاسىل، تومەن كومىر قىشقىل گازدى دامۋدى ىلگەرىلەتۋ كەرەك.
_ تۋ باستان ساقتانۋ، جۇيەلى قورعاۋ كەرەك. ەكولوگيالىق ورتانىڭ تۋ باستان ساقتانۋ جۇيەسىن اقاۋسىزداندىرىپ، تاۋ، سۋ، ورمان، اتىز، كول، جايىلىم، قۇمدى ٴبىر تۇلعالاندىرىپ قورعاۋ مەن جۇيەلى باسقارۋدى ٴبىر تۇتاس جوسپارلاپ، ورگانيزمدەردىڭ الۋان تۇرلىلىگىن قورعاۋدى كۇشەيتىپ، كوپ لاس زاتتاردى سەلبەسىپ تىزگىندەۋ مەن وڭىرلىك سايكەستى جونگە سالۋدى كۇشەيتۋ كەرەك.
_ دالمە ـ ٴدال، عىلمي، زاڭ بويىنشا باسقارۋ ـ مەڭگەرۋ كەرەك. نازاردى وڭىرلىك، الاپتىق كورنەكتى ەكولوگيالىق ورتا ماسەلەسىنە شوعىرلاندىرىپ، دالمە ـ ٴدال، عىلمي شارا قولدانىپ، ماسەلەنى پارىقتاۋدان شەشۋ جوباسىنا دەيىنگى وڭىرگە، تۇرگە ٴبولىپ باسقارۋ ـ مەڭگەرۋ جالپى جوباسىن زاڭ ەرەجە بويىنشا ورناتۋ كەرەك.
_ جاۋاپكەرشىلىكتى ايقىنداپ، سايكەسە ارەكەتتەنۋ كەرەك. مەملەكەت دەڭگەيىندەگى جوعارى دەڭگەيدە جوبالاۋدى ويداعىداي ىستەپ، جەرگىلىكتى پارتكوم مەن ۇكىمەت نەگىزگى تۇلعالىق جاۋاپكەرشىلىكتى تياناقتاندىرىپ، قاتىستى تاراۋلار تىلدەسۋدى، سايكەسۋدى كۇشەيتىپ، جۇمىس ٴبولىسى بويىنشا سەلبەسۋ قىزمەت مەحانيزمىن ورناتىپ، ساياساتتىڭ ٴبىر تۇتاستىعىن، ەرەجەنىڭ بىردەيلىگىن، اتقارۋدىڭ سايكەسىمدىلىگىن جوعارىلاتۋ كەرەك.
2025 ـ جىلعا بارعاندا، ەكولوگيالىق ورتانى وڭىرلەرگە ٴبولىپ باسقارۋ ـ مەڭگەرۋ ٴتۇزىمى نەگىزىنەن ورناتىلىپ، تۇتاس ٴوڭىردى قامتىعان، دالمە ـ ٴدال، عىلمي ەكولوگيالىق ورتانى وڭىرلەرگە ٴبولىپ باسقارۋ ـ مەڭگەرۋ جۇيەسى العاشقى ادىمدا قالىپتاسادى. 2035 ـ جىلعا بارعاندا، جۇيەسى كەمەلدى، مەحانيزمى ىركىلىسسىز، اينالىمى جوعارى ٴونىمدى ەكولوگيالىق ورتانى وڭىرلەرگە ٴبولىپ باسقارۋ ـ مەڭگەرۋ ٴتۇزىمى جاپپاي ورناتىلىپ، ەكولوگيالىق ورتانىڭ تۇبىرىنەن جاقسارۋىنا، كورىكتى جۇڭگو نىساناسىنىڭ نەگىزىنەن جۇزەگە اسۋىنا پارمەندى تىرەك ازىرلەنەدى.
«پىكىردە» تاعى ەكولوگيالىق ورتانى وڭىرلەرگە ٴبولىپ باسقارۋ ـ مەڭگەرۋدى جاپپاي ىلگەرىلەتۋ، ەكونوميكانىڭ، قوعامنىڭ جوعارى ساپالى دامۋىنا دەم بەرۋ، ەكولوگيالىق ورتانى جوعارى دەڭگەيدە قورعاۋ، باقىلاۋ ـ باعالاۋدى كۇشەيتۋ، ۇيىمدىق قامتاماسىز ەتۋ سياقتىلار جونىندە تالاپتار ورتاعا قويىلدى.
