چيڭميڭ دەمالىسىندا رايونىمىز 2 ميلليون 210 مىڭ (رەت) ساياحاتشى قابىلدادى
سايكەس مەزگىلدەگىدەن %20.53 ارتتى
انار بۇلت \ شينجياڭ گازەتىنىڭ ٴتىلشىسى ياۋ گاڭ 4 ـ ايدىڭ 6 ـ كۇنى ۇرىمجىدەن حابارلايدى. اۆتونوميالى رايوندىق مادەنيەت جانە ساياحات مەڭگەرمەسىنەن ۇعىسۋىمىزشا، چيڭميڭ دەمالىسى كەزىندە بۇكىل رايوندا جالپى قابىلدانعان ساياحاتشى 2 ميلليون 210 مىڭ 200گە (رەت) جەتىپ، سالىستىرمالى ولشەم بويىنشا سايكەس مەزگىلدەگىدەن %20.53 ارتقان؛ ساياحات كىرىسى 2 ميلليارد 198 ميلليون يۋانعا جەتىپ، سالىستىرمالى ولشەم بويىنشا سايكەس مەزگىلدەگىدەن %62.33 ارتقان.
چيڭميڭدە ساعىنىشىن جەتكىزۋ ٴۇشىن، ادامدار قىزىل ساياحات كورىنىس تۇيىندەرىنە بارىپ، ەكسكۋرسيالاۋ، ساياحاتتاۋ، قاھارمان قۇرباندارعا ازا ٴبىلدىرۋ قيمىلى سياقتىلارعا قاتىناسىپ، توڭكەرىستىك قۇربانداردى ساعىنا ەسكە الىپ، قىزىل گەندى جالعاستىردى.
4 ـ ايدىڭ 4 ـ كۇنى ٴۇرىمجى قالالىق قۇرباندار قابىرىستانىندا ادامدار ٴۇنسىز بەينەدە قۇرباندارعا ارناپ سارى، اق گۇل قويدى. ”قاھارمان قۇربانداردىڭ وتان ٴۇشىن جان قيعان، حالىق ٴۇشىن ۇلەس قوسقان رۋحى ادامدى ٴتانتى ەتەدى. پارتيا مۇشەسى رەتىندە، مەن قاھارمان قۇربانداردىڭ رۋحىنا مۇراگەرلىك ەتىپ، ۇلەس قوسىپ، جاۋاپكەرشىلىك ارقالايمىن“، ـ دەدى قاھارمان قۇربانداردى ساعىنا ەسكە الۋعا كەلگەن ٴۇرىمجى قالاسىنىڭ تۇرعىنى جاڭ چيان.
لوپنۇر اۋدانى داشي قىستاعىنداعى قىزىل ساياحات كورىنىس وڭىرىندە، ارال قالاسى 359 ـ لۇيدىڭ تىڭ يگەرۋ ەسكەرتكىش سارايىندا ادامدار كورمە بۇيىمدارىنىڭ الدىندا ايالداپ، ٴتۇسىندىرۋشى بايانداعان توڭكەرىستىك اعا بۋىنداردىڭ ىزگى ىستەرىن تىڭدادى.
كوكتەمگى سەيىل، گۇل تاماشالاۋ، باتپىراۋىق ۇشىرۋ... چيڭميڭ دەمالىسىندا جەر ـ جەردىڭ الۋان ٴتۇرلى مادەنيەت ـ ساياحات قيمىلدارى دەمالىس كەزىندەگى مادەنيەت ـ ساياحات بازارىن ونان ارى جانداندىرىپ، ساياحاتشىلاردىڭ سەيىل ـ سەرۋەن، كوڭىل اشۋ قاجەتىن قاناعاتتاندىردى.
قۇلجا قالاسى ”باۋرامدى قۇلجا ● جاراسىمدى دا كورىكتى ورىك اۋىلىن“ نەگىزگى تاقىرىپ ەتىپ، 7 ۇلكەن بولەك بويىنشا 34 ٴتۇرلى قيمىل ورنالاستىردى. ساياحاتشىلار حايتاڭ جولى، قۇلجا قالاسى شياڭحى ورىك باقشاسى سياقتى جەرلەردە گۇل تاماشالاپ، ولەڭ ـ جىر وقىپ، سالت ـ سانا ويىندارىن تاماشالاپ، ٴداستۇرلى مادەنيەتتىڭ باۋرامدىلىعىن سەزىندى.
دەمالىس كەزىندە كۇشار قالاسى، شايار اۋدانى، توقسۋ اۋدانى سياقتى جەرلەر 43 رەت مادەنيەت ـ ساياحات قيمىلىن وتكىزدى. 4 ـ ايدىڭ 5 ـ كۇنى كۇشار قالاسىنىڭ باتپىراۋىق مادەنيەت ـ ساياحات قيمىلى نەشە مىڭ ساياحاتشىنى قاتىناسۋعا باۋرادى. ادامدار باتپىراۋىق ۇشىرىپ، ادەبيەت ـ كوركەمونەر ويىندارىنان ٴلاززات الىپ، ىقپالداستىق ويىندارىنا قاتىناسىپ، شات ـ شادىمان كوكتەم كۇندەرىن بىرگە وتكىزدى.
