قار ـ مۇز ساياحاتى جانداندى، حالىققا ٴتيىمدى قيمىلدار كوبەيدى، كونسەرت بازارى قىزا ٴتۇستى
□ انار بۇلت \ شينجياڭ گازەتىنىڭ ٴتىلشىسى ياۋ گاڭ
سەيىل ـ سەرۋەن، دەمالىس بازارىنىڭ ٴۇرتىس تەبىندەگەن قاجەتىنىڭ، سونداي ـ اق كوكتەم مەرەكەسى دەمالىسىندا ساياحاتقا شىعۋ ىنتاسىنىڭ جاپپاي جارىققا شىعۋىنان تۋىنداعان پارمەندى قوزعاۋشى كۇشتىڭ ارقاسىندا، بيىل 1 ـ ايدان 3 ـ ايعا دەيىن شينجياڭ 41 ميلليون 13 مىڭ 300 ادام (رەت) ساياحاتشى قابىلدادى، بۇل سايكەس مەزگىلدەگىدەن %15.88 ارتتى؛ ساياحات كىرىسى 43 ميلليارد 744 ميلليون يۋانعا جەتىپ، سايكەس مەزگىلدەگىدەن %53.8 ارتىپ، مولشەرى مەن پايداسى بىردەي ارتتى، شينجياڭنىڭ مادەنيەت ـ ساياحات بازارى العاشقى ماۋسىمدا ”ٴساتتى باستاما“ باستادى.
ٴبىرىنشى ماۋسىمدا شينجياڭداعى قار ـ مۇز تۇرىندەگى دەمالىس اۋماقتارى 2023 ـ جىلى ٴتورتىنشى ماۋسىمداعى تەبىندى ارىنىن ساقتاپ، ٴتۇرلى ساندى مالىمەتتەر ۇزدىكسىز الدىڭعى قاتاردا بولدى. شينجياڭ بويىنشا S دارەجەلى شاڭعى الاڭدارى 2 ميلليون 485 مىڭ 500 ادام (رەت) ساياحاتشى قابىلداپ، ساياحات كىرىسىن 303 ميلليون يۋانعا جەتكىزدى. مۇنىڭ ىشىندە نەگىزگى شاڭعى تەبۋ، دەمالىس اۋماعى ساياحاتشىلاردى باۋرايتىن ”ىرگەلى ورىن“ بولدى _ التاي قالاسى گەنەرال تاۋى حالىقارالىق شاڭعى تەبۋ، دەمالىس اۋماعى 712 مىڭ 200 ادام (رەت) ساياحاتشى قابىلدادى، كوكتوعاي حالىقارالىق شاڭعى تەبۋ، دەمالىس اۋماعى 324 مىڭ 100 ادام (رەت) ساياحاتشى قابىلدادى، جىكبەلەڭ حالىقارالىق شاڭعى تەبۋ، دەمالىس اۋماعى 246 مىڭ 800 ادام (رەت) ساياحاتشى قابىلدادى، نارات حالىقارالىق شاڭعى تەبۋ، دەمالىس اۋماعى 232 مىڭ ادام (رەت) ساياحاتشى قابىلدادى.
ساندى مالىمەتتە كورسەتىلۋىنشە، شينجياڭنىڭ قار ـ مۇز تۇرىندەگى دەمالىس اۋماقتارىنداعى ساياحاتشىلاردىڭ كوبى فۋجيان، گۋاڭدۇڭ، شاڭحاي، جىجياڭ، جياڭسۋ سياقتى وڭتۇستىكتەگى ولكە، قالالاردان كەلگەن، شينجياڭعا كەلىپ شاڭعى تەبۋ، قاردا ويناۋ، قاردا كوڭىل اشۋ، قاردى تاماشالاۋ وڭتۇستىكتەگى ساياحاتشىلاردىڭ ماڭىزدى تالعامىنا اينالعان. شينجياڭنىڭ جەر ـ جەرى اۋقىمعا قاراي قيمىلداپ، ”قار ـ مۇز + سپورت“، ”قار ـ مۇز + اراسان“، ”قار ـ مۇز + كوكتەم مەرەكەلىك سالتى“، ”قار ـ مۇز + اتا ـ انا مەن بالا قيمىلى“ سياقتى ەرەكشە ساياحات قيمىلدارى مەن ونىمدەرىن ىركەس ـ تىركەس شىعارىپ، 4 ۇلكەن تاقىرىپ بويىنشا ”ەرەكشە، سارا، شاعىن، اسەم“ 27 سارا جەلىنى، قىسقى ساياحاتتىڭ كوكتەم مەرەكەسىندەگى 158 سارا جەلىسىن العا قويدى، مۇندا قار ـ مۇز سەيىل ـ سەرۋەنى، حالىقتىق سالت ـ سانانى سەزىنۋ، زەرتتەۋ ـ ۇيرەنۋ، عىلىم جالپىلاستىرۋ، اۋىل ـ قىستاقتاردا سالاماتتىق ـ كۇتىنۋ سياقتى ساياحات كاسىپ كۇيى قامتىلىپ، قار ـ مۇز تۇتىنۋىن پارمەندى جەبەدى.
سونىمەن بىرگە شينجياڭنىڭ جەر ـ جەرى ٴبىر قىدىرۋ مادەنيەت ـ ساياحات قيمىلدارىن جۇرگىزىپ، حالىققا ٴتيىمدى ٴبىرسىپىرا تۇتىنۋ ساياساتتارىن اتقارىپ، جالپى 5320 ”شينجياڭ ساياحات سيفرلى كارتچكاسىن“ تاراتتى. سايرام كولى كورىنىس ٴوڭىرى قىسقى ”ۇلكەن تارتۋ“ سيلادى، ەسىك بەلەتى، ارالىق اۆتوكولىك بەلەتى سياقتىلاردى ازايتتى، كەشىرىم ەتتى، جاتىن ورىن، اس ـ سۋ، شاڭعى تەبۋ قاراجاتتارىن ارزانداتتى؛ تيانشان بوعدا كورىنىس ٴوڭىرى شاڭعى تەبۋ، مۇزدا سىرعاناۋ سياقتى نىساندارعا مەڭزەس، تۇتىنۋ تولسا اقىنى ازايتۋ، ارزانداتۋ، تيىمدىلىك بەلەتىن، ناقتى زاتقا اۋىستىرۋ بەلەتىن تاراتۋ سياقتى حالىققا تيىمدىلىك جاساۋ شارالارىن اتقاردى؛ تۇرپان بويلىق كورىنىس ٴوڭىرى شىن اتى ـ ٴجونى بويىنشا سيفرلى بەلەت ساتىپ الۋ جۇيەسىن جەلىگە شىعارىپ، تۇڭعىش رەت شىن اتى ـ جونىمەن بەلەت ساتىپ العانداردان ٴومىر بويى بەلەت اقىسىن الماۋ تيىمدىلىگىن اتقارىپ، ساياحاتتىق تۇتىنۋ كومەسكى كۇشىن قاۋلاتتى. ساناققا قاراعاندا، ”شينجياڭ ساياحات سيفرلى كارتچكاسى“ جەبەگەن تۇتىنۋ ساۋدا سوماسى جيىنى 607 ميلليون يۋان بولىپ، سايكەس مەزگىلدەگىدەن %15 ارتقان.
كوكتەم مەرەكەسى كەزىندە شينجياڭدا سەيىل ـ سەرۋەن، دەمالىس بازارىنىڭ جاندانۋى ۇزدىكسىز كۇشەيىپ، مەملەكەت مەنشىگىندەگى A دارەجەلى 399 كورىنىس ٴوڭىرى ەسىك بەلەتىن كەشىرىم ەتۋ ارقىلى حالىققا تيىمدىلىك جاساۋ قيمىلىن ورىستەتتى، بۇكىل شينجياڭ بويىنشا 7 ميلليون 217 مىڭ 600 ادام (رەت) ساياحاتشى قابىلدانىپ، سالىستىرمالى ولشەم بويىنشا سايكەس مەزگىلدەگىدەن %34.87 ارتتى؛ ساياحات كىرىسى 7 ميلليارد 385 ميلليون يۋانعا جەتىپ، سالىستىرمالى ولشەم بويىنشا سايكەس مەزگىلدەگىدەن %85.85 ارتتى.
مادەنيەت، سەيىل ـ سەرۋەن قاجەتى شوعىرلى جارىققا شىعىپ، كونسەرت بازارى جاڭا كاسىپ كۇيىنىڭ، جاڭا ۇلگىسىنىڭ، جاڭا قامداۋىنىڭ ۇزدىكسىز جارىققا شىعۋىن جەبەدى. تەاتر «قاشىپ كەتكەن جاس كەلىن»، بالالار تەاترى «مۋلان جىرى»، كورىنىستى تەاتر «ولەڭ . ٴتۇس الەمىندە ۇلى تاڭ پاتشالىعىنا ورالۋ»، ٴداستۇرلى تەاتر «چىن شىمەيدىڭ باسىن الۋ دەلوسى»، ەلىتۋ تەاترى «تيانشانداعى جارىق اي، جىبەك جولىنداعى سالتانات» سياقتىلار ىركەس ـ تىركەس قويىلىپ، ادامداردىڭ ساپالى مادەنيەت بايلىعى سۇرانىسىن اناعۇرلىم ويداعىداي قاناعاتتاندىردى.
ٴبىرىنشى ماۋسىمدا بۇكىل شينجياڭنىڭ جەر ـ جەرىندە 749 الاڭ (رەت) تيجارات سيپاتتى كونسەرت قويىلىپ، سايكەس مەزگىلدەگىدەن %122.92 ارتتى؛ ٴتۇرلى مادەنيەت جانە ساياحات قيمىلدارى 945 رەت ورىستەتىلىپ، جۇرتتى باۋراپ، ساياحاتشىلار لەگىن اكەلىپ، مادەنيەت ـ ساياحات بازارىنىڭ ومىرشەڭدىك كۇشى ونان ارى قاۋلادى.
جۇڭگونىڭ ۆيزاسىز كىرۋ ”دوستار شەڭبەرىنىڭ“ ۇزدىكسىز كەڭەيۋىنە ىلەسە، شينجياڭ شەكارادان كىرۋ ساياحاتىنىڭ قاۋىرت مەزگىلىن قارسى الدى. ٴتىلشىنىڭ اۆتونوميالى رايوندىق مادەنيەت جانە ساياحات مەڭگەرمەسى بازار باسقارۋ باسقارماسىنان ۇعىسۋىنشا، ٴبىرىنشى ماۋسىمدا شينجياڭ ىشىندەگى ساياحات كووپەراتيۆتەرى ورتا ازيا ەلدەرىنىڭ ساياحات ونىمدەرىن اشۋدى كۇشەيتىپ، شينجياڭ سىرتىنداعى ساياحات كووپەراتيۆتەرىمەن سەلبەسىپ، شينجياڭ ىشىندەگى سارا ساياحات جەلىلەرى مەن ورتا ازياداعى ٴوز كولىگىمەن ساياحاتتاۋ جەلىلەرى ونىمدەرىن كوپتەپ شىعارىپ، ورتا ازيا ساياحاتشىلارىنا سالاماتتىق ـ كۇتىنۋ، زەرتتەۋ، ۇيرەنۋ، ساياحاتتاۋ سياقتى جەلى ونىمدەرىن ۇسىندى، شەكارادان كىرگەن ساياحاتشى جيىنى 869 مىڭ 100 ادام (رەت) بولىپ، سايكەس مەزگىلدەگىدەن %421.49 ارتقان؛ حالىقارالىق ساياحات كىرىسى 594 ميلليون امەريكا دوللارىنا جەتىپ، سايكەس مەزگىلدەگىدەن %353.77 ارتقان.
