جۇڭگو شينجياڭىنىڭ حيكاياسىن ٴبولىسىپ، ىنتىماقتى، دوستىق سۇيىسپەنشىلىكتى بىرگە اڭگىمەلەدى
شينجياڭ بەيجيڭدە قاتىستى ەلدەردىڭ جۇڭگودا تۇراتىن ەلشىلەرىنىڭ اۋىس ـ كۇيىس ءماجىلىسىن وتكىزدى
ما شيڭرۇي قاتىناستى، ەركىن تۇنياز جاعداي تانىستىردى
![](http://xjrbkazakh.ts.cn/xjrbhwb/2024/04/11/659ac482-8af9-4155-948d-906117c32142.jpg)
4 ـ ايدىڭ 10 ـ كۇنى شينجياڭ بەيجيڭدە قاتىستى ەلدەردىڭ جۇڭگودا تۇراتىن ەلشىلەرىنىڭ اۋىس ـ كۇيىس ٴماجىلىسىن وتكىزىپ، 49 ەلدەن كەلگەن جۇڭگودا تۇراتىن 21 باس ەلشىمەن جانە 50 نەشە ديپلوماتپەن ٴبىر ارادا باس قوسىپ، جۇڭگو شينجياڭىنىڭ ەكونوميكالىق، قوعامدىق دامۋ جانە ادامدىق ۇقىقتى قامتاماسىز ەتۋ تابىستارىن ٴبولىسىپ، دوستىق سۇيىسپەنشىلىكتى بىرگە اڭگىمەلەپ، ٴتۇسىنىسۋدى، ٴوزارا سەنىمدىلىكتى ارتتىرىپ، اۋىس ـ كۇيىستى، سەلبەستىكتى جەبەدى.
□ سۋرەتتى انار بۇلت \ شينجياڭ گازەتىنىڭ ٴتىلشىسى سۇي جىجيان تۇسىرگەن
انار بۇلت \ شينجياڭ گازەتىنىڭ ٴتىلشىسى ۋاڭ شيڭرۇي 4 ـ ايدىڭ 10 ـ كۇنى بەيجيڭنەن حابارلايدى. 4 ـ ايدىڭ 10 ـ كۇنى تۇستەن كەيىن شينجياڭ بەيجيڭدە قاتىستى ەلدەردىڭ جۇڭگودا تۇراتىن ەلشىلەرىنىڭ اۋىس ـ كۇيىس ٴماجىلىسىن وتكىزىپ، 49 ەلدەن كەلگەن جۇڭگودا تۇراتىن 21 باس ەلشىمەن جانە 50 نەشە ديپلوماتپەن ٴبىر ارادا باس قوسىپ، جۇڭگو شينجياڭىنىڭ ەكونوميكالىق، قوعامدىق دامۋ جانە ادامدىق ۇقىقتى قامتاماسىز ەتۋ تابىستارىن ٴبولىسىپ، دوستىق سۇيىسپەنشىلىكتى بىرگە اڭگىمەلەپ، ٴتۇسىنىسۋدى، ٴوزارا سەنىمدىلىكتى ارتتىرىپ، اۋىس ـ كۇيىستى، سەلبەستىكتى جەبەدى. اۆتونوميالى رايوندىق پارتكومنىڭ شۋجيى ما شيڭرۇي قيمىلعا قاتىناستى.
اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى ەركىن تۇنياز قيمىلعا قاتىناستى ٴارى شينجياڭنىڭ قاتىستى جاعدايلارىن تانىستىردى. سىرتقى ىستەر مينيسترلىگىنىڭ ورىنباسار مينيسترى چىن شياۋدۇڭ ٴسوز سويلەدى.
بەيجيڭدەگى شينجياڭ سارايىنىڭ مۇقام زالى قىزۋ مەرەيگە، دوستىق بەينەگە شومدى.
اۋىس ـ كۇيىس ٴماجىلىسى «اشىق شينجياڭ» اتتى قىسقا فيلممەن باستالدى.
ەركىن تۇنياز ەكونوميكانىڭ ورنىقتى، اقاۋسىز دامۋى، حالىق تۇرمىسىنىڭ ٴۇرتىس جاقسارۋى، از ۇلتتاردىڭ ٴتۇرلى ۇقىق ـ مۇددەسىنىڭ زاڭ بويىنشا قامتاماسىز ەتىلۋى، حالىقارالىق اۋىس ـ كۇيىستىڭ، سەلبەستىكتىڭ ىشكەرىلەي ىلگەرىلەتىلۋى سياقتى جاقتاردان شينجياڭنىڭ جاعدايىن تانىستىردى. ول بىلاي دەدى: شي جينپيڭ جولداستى ۇيتقى ەتكەن جۇڭگو كوممۋنيستىك پارتياسى ورتالىق كوميتەتى شينجياڭ قىزمەتىنە باسا ٴمان بەرىپ، جۇڭگونىڭ مەملەكەتتى قۇدىرەتتەندىرۋ قۇرىلىسىنىڭ، ۇلتتى گۇلدەندىرۋدىڭ جاڭا جورىعىندا شينجياڭعا ەرەكشە ماڭىزدى ستراتەگيالىق ورىن بەلگىلەپ بەردى. باس شۋجي شي جينپيڭ تالاي رەت ٴماجىلىستى باسقارىپ اشىپ، شينجياڭعا كەلىپ كوزدەن كەشىرىپ، قىزمەت مالىمەتىن تىڭداپ، جۇڭگو ۇلگىسىندەگى وسىزامانداندىرۋدىڭ شينجياڭ امالياتىن ىلگەرىلەتۋگە العا باسۋ بەتالىسىن ايقىن كورسەتتى. اۆتونوميالى رايوندىق پارتكوم مەن ۇكىمەت جاڭا داۋىردەگى جۇڭگو كوممۋنيستىك پارتياسىنىڭ شينجياڭدى باسقارۋ جالپى جوباسىن تولىق، دالمە ـ ٴدال، جاپپاي دايەكتىلەندىرىپ، نازاردى جوعارى ساپالى دامۋ سىندى ماڭداي الدى مىندەتكە شوعىرلاندىرىپ، ەكونوميكالىق، قوعامدىق دامۋدى ىلگەرىلەتۋدە بۇرىن بولماعان تابىستارعا قول جەتكىزدى. قازىر شينجياڭنىڭ قوعامدىق كەلەلى جاعدايى جاراسىمدى، ورنىقتى، ەكونوميكانىڭ جوعارى ساپالى دامۋ ارىنى تەبىندى بولىپ، ۇلتتار ىنتىماعى ۇزدىكسىز بەكەمدەلدى، كوپ ٴتۇرلى ٴدىن جاراسىمدى دامىدى، ٴار ۇلت بۇقاراسىنىڭ ادامدىق ۇقىعى تولىق قامتاماسىز ەتىلىپ، ولار كورىكتى شينجياڭدى ىنتىماقتاسا ٴبىر نيەتپەن قۇرۋدا. جۇڭگو شينجياڭىنىڭ ەسىگى قاشاندا ايقارا اشىق، شينجياڭنىڭ ەكونوميكالىق، قوعامدىق دامۋ جانە ادامدىق ۇقىقتى قامتاماسىز ەتۋ تابىستارى جۇرتقا ايان، حالىقارالىق قوعامنىڭ جاپپاي مويىنداۋىنا يە بولدى. ٴبىز كوپشىلىكتىڭ شينجياڭعا كوبىرەك كەلىپ ارالاپ، كورىپ، شينجياڭ حالقىنىڭ قىزۋ سۇيىسپەنشىلىگىن، قوناعۋارلىعىن سەزىنىپ، تيانشان الابىنىڭ ايبىندى كوركەم كورىنىسىن تاماشالاپ، بايتاق تا كورىكتى شينجياڭنىڭ جان تەبىرەنتەرلىك حيكاياسىن زەيىن سالا تىڭداۋىن شىن ىقىلاسپەن قارسى الامىز.
چىن شياۋدۇڭ جۇڭگونىڭ سىرتقى ىستەر مينيسترلىگى اتىنان اۋىس ـ كۇيىس ٴماجىلىسىنىڭ وتكىزىلگەندىگىن قۇتتىقتايتىندىعىن ٴبىلدىردى. ول بىلاي دەدى: جۇڭگو كوممۋنيستىك پارتياسىنىڭ 18 ـ قۇرىلتايىنان بەرى باس شۋجي شي جينپيڭ شينجياڭنىڭ رەفورماسىن، دامۋىن، ورنىقتىلىعىن جانە ٴار ۇلت حالقىنىڭ باقىتتى تۇرمىسىن قاشاندا كوڭىلىنەن شىعارمادى، جۇڭگو كوممۋنيستىك پارتياسى مەن جۇڭگو ۇكىمەتى شينجياڭدى باسقارۋ جالپى جوباسىن ۇزدىكسىز بايىتىپ جانە دامىتىپ، شينجياڭنىڭ ٴتۇرلى ىستەرىنىڭ جان ـ جاقتى ىلگەرىلەۋشىلىكتەرگە جانە تاريحي تابىستارعا قول جەتكىزۋىن ىلگەرىلەتتى. جۇڭگونىڭ شينجياڭدى باسقارۋ ساياساتىنىڭ ونىمدىلىگى كورنەكتى، شينجياڭنىڭ دامۋ تابىستارى جۇرتقا ايان. ايتسە دە، ٴالى دە ات توبەلىندەي ادامدار ”ٴتۇستى كوزىلدىرىك“ تاعىپ شينجياڭعا قاراۋعا ادەتتەنىپ، قاساقانا وسەك ـ اياڭ شىعارىپ، ”ۆيرۋس“ تاراتىپ، شينجياڭنىڭ دامۋىنا، ورنىقتىلىعىنا اۋىر زالال تيگىزىپ، شينجياڭ بۇقاراسىنىڭ نەگىزگى ادامدىق ۇقىعىنا سۇعاناقتىق جاسادى. وسەك ـ اياڭ قاشاندا وسەك ـ اياڭ، شىندىق پەن اقيقات الدىندا، ٴسوز جوق، توزىپ جوعالادى. جۇڭگونىڭ سىرتقى ىستەر مينيسترلىگى ەلشىلەردىڭ جانە ديپلومات دوستاردىڭ ۇزاق ۋاقىتتان بەرى شينجياڭعا كوڭىل ٴبولىپ، قولداۋ كورسەتىپ كەلگەندىگىنە العىس ايتادى. كوپشىلىكتىڭ ۇزدىكسىز شينجياڭنىڭ سىرتقا ەسىك اشۋىن ىلگەرىلەتۋشى بولىپ، اشىق شينجياڭنىڭ ٴار ەل حالقىن اناعۇرلىم كوپ يگىلىككە كەنەلتۋىنە مۇمكىندىك جاساۋىن؛ ۇزدىكسىز شينجياڭنىڭ گۇلدەنۋىن، ورنىقتىلىعىن قولداۋشى بولىپ، گۇلدەنگەن شينجياڭنىڭ تىرشىلىك تىنىسىن جانە ومىرشەڭدىك كۇشىن ۇزدىكسىز تاسقىنداتۋىنا مۇمكىندىك جاساۋىن؛ ۇزدىكسىز شينجياڭ حيكاياسىن تاراتۋشى بولىپ، بايتاق تا كورىكتى شينجياڭدى اناعۇرلىم كەڭ ۇگىتتەۋىن؛ ۇزدىكسىز ادىلدىكتى، تۋراشىلدىقتى قورعاۋشى بولىپ، وبيەكتيۆ تۇرعى ۇستانىپ، ادىلەتتى جاقتاپ، وسەڭ ـ اياڭعا تويتارىس جاساپ، شينجياڭدى قۋاتتاۋىن ٴۇمىت ەتەمىز.
جۇڭگودا تۇراتىن ٴبىر ٴبولىم باس ەلشىلەر پىكىر اۋىستىرىپ سوزگە شىعىپ، جۇڭگونىڭ شينجياڭىنا بەلسەندى باعا بەرىپ، شينجياڭدا ەكسكۋرسيادا، ساپاردا بولعان كەزىندە شىنايى كورگەن ـ بىلگەندەرى مەن ٴتول اسەرىن ەسكە الىپ، ٴوز ەلدەرىنىڭ جۇڭگونىڭ شينجياڭىمەن سەلبەستىكتى تەرەڭدەتۋىنىڭ كوركەم بولاشاعىنا نازار سالدى.
وڭتۇستىك افريكانىڭ جۇڭگودا تۇراتىن باس ەلشىسى شيە شىڭۋىن بىلاي دەدى: 2023 ـ جىلى شينجياڭدا ساپاردا بولىپ، جۇڭگو شينجياڭ حالقىنىڭ قىزۋ سۇيىسپەنشىلىگىن، قوناعۋارلىعىن شىنايى سەزىندىم. شينجياڭ مۇلدەم كەدەيلىكتى جويدى، حالىق ٴدىني سەنىم ەركىندىگىنەن تولىق يگىلىكتەنىپ، الۋان تۇرلىلىك بارىسىندا جاراسىمدى ٴوتىپ جاتىر ەكەن. سونىمەن بىرگە، اۋىل ـ قىستاقتى گۇلدەندىرۋدى بار كۇشپەن ىلگەرىلەتىپ، كەدەيلىكتەن ارىلعان بۇقارانىڭ قايتالاي كەدەيلەسۋىنەن ساقتانىپ، نەگىزدىك قۇرىلعىلار قۇرىلىسىن بەلسەنە جۇرگىزىپ، ٴوڭىردىڭ گۇلدەنۋىن، دامۋىن جەبەدى.
قازاقستاننىڭ جۇڭگودا تۇراتىن باس ەلشىسى نۇرىشەۆ بىلاي دەدى: قازاقستاننىڭ جۇڭگومەن دوستىق بارىس ـ كەلىس جەتىستىكتەرىنىڭ باسىم كوپ بولىگى جۇڭگونىڭ شينجياڭىمەن ەكى جاقتى سەلبەستىگىنىڭ ارقاسى. سوڭعى جىلدارى شينجياڭنىڭ ەكونوميكاسى، قوعامى جەدەل دامىپ، قازاقستان مەن شينجياڭنىڭ ٴوزارا ساپاردا بولۋىندا بەلسەندى ارىن جارىققا شىقتى. شينجياڭنىڭ قازاقستان _ جۇڭگو قارىم ـ قاتىناسىنىڭ جاڭا ”التىن 30 جىلىنا“ اناعۇرلىم زور ۇلەس قوساتىندىعىنا سەنەمىن.
”باتىستاعى ٴىشىنارا ەلدەردىڭ وسەك ـ اياڭدارى جۇڭگو شينجياڭىنىڭ گۇلدەنۋگە جانە تابىسقا بەت الۋىنا بوگەت بولا المايدى“. سيريانىڭ جۇڭگودا تۇراتىن باس ەلشىسى حاسان بىلاي دەدى: شينجياڭنىڭ دامۋ جەتىستىكتەرى جان سۇيىندىرەدى. ”ٴبىر بەلدەۋ، ٴبىر جولدى“ بىرگە قۇرۋ تۇعىرىنان پايدالانىپ، شينجياڭ جۇڭگونىڭ توڭىرەكتەگى ەلدەرمەن سەلبەستىگىنە كوپىر ورناتىپ، ٴوڭىر ساۋدا ـ ساتتىعىنىڭ دامۋىن، مادەنيەت اۋىس ـ كۇيىسىن، مادەنيەت تاراتۋدى جەبەدى.
”جۇڭگو شينجياڭى شاپشاڭ دامىپ، ٴار ۇلت حالقى تاماشا دامۋ ۇقىعىنان يگىلىكتەنگەن ەكەن“. تۇركيانىڭ جۇڭگودا تۇراتىن باس ەلشىسى مۇسا بىلاي دەدى: بۇگىنگى شينجياڭ ”ٴبىر بەلدەۋ، ٴبىر جولدىڭ“ وزەكتى رايونى، وڭىرلەردىڭ ۇلاسۋىنىڭ ـ تۇتاسۋىنىڭ جانە ەكونوميكا ـ ساۋدانىڭ تورابى. تۇركيا مەن جۇڭگو شينجياڭىنىڭ ساۋدا سەلبەستىگىن كۇشەيتۋ كومەسكى كۇشى اسا زور، ەكى جاقتىڭ مول ونىمدىلىككە يە سەلبەستىك ورىستەتۋىن اسىعا كۇتەمىز.
يراننىڭ جۇڭگودا تۇراتىن باس ەلشىسى باحتيار مىنالاردى ٴبىلدىردى: جۇڭگونىڭ شينجياڭىندا ەكسكۋرسيادا، ساپاردا بولعان كەزىمدە جەرگىلىكتى ورىننىڭ قول جەتكىزگەن اسا زور دامۋ تابىستارىن ٴوز كوزىممەن كوردىم. شينجياڭ ”ٴبىر بەلدەۋ، ٴبىر جولدى“ بىرگە قۇرۋدا كورنەكتى رولىن ساۋلەلەندىرىپ، وڭىردەگى ٴار ەلگە ەكونوميكالىق سەلبەستىك جانە مادەنيەت اۋىس ـ كۇيىس ورايىن ازىرلەدى، جۇڭگونىڭ شينجياڭىمەن سەلبەستىكتى كۇشەيتىپ، ەكى جاق حالقىن اناعۇرلىم ويداعىداي باقىتقا كەنەلتۋدى اسىعا كۇتەمىز.
”مەن پاكيستان _ جۇڭگو ەكى ەلدىڭ، پاكيستان مەن جۇڭگو شينجياڭىنىڭ باياندى دوستىق سەلبەستىگىن ماقتانىش ەتەمىن“. پاكيستاننىڭ جۇڭگودا تۇراتىن باس ەلشىسى حاشيمي بىلاي دەدى: كوپ جىلداردان بەرى جۇڭگو _ پاكيستان ەكونوميكالىق ٴدالىزى ٴۇرتىس دامىدى، جۇڭگونىڭ شينجياڭىمەن ساۋدا، قارجى قوسۋ، مادەنيەت اۋىس ـ كۇيىسى، گۋمانيتارلىق بارىس ـ كەلىس سياقتى ورتاق كوڭىل بولەتىن سالالارداعى سەلبەستىكتى اناعۇرلىم كۇشەيتۋدى ٴۇمىت ەتەمىز.
ورتالىق كوميتەت ۇگىت ٴبولىمىنىڭ ورىنباسار باستىعى ۋاڭ گاڭ، ورتالىق كوميتەت بىرلىكساپ ٴبولىمىنىڭ ورىنباسار باستىعى، مەملەكەتتىك ٴدىن مەكەمەسىنىڭ باستىعى چىن رۇيفىڭ، ورتالىق كوميتەت سىرتقى ىستەر كەڭسەسىنىڭ مەڭگەرۋشىسى گو يەجوۋ، جۇڭگو كوممۋنيستىك پارتياسى ورتالىق كوميتەتى شەتەلدەرمەن بايلانىس جاساۋ ٴبولىمىنىڭ ورىنباسار باستىعى سۇن حاييان، ادام كۇشى بايلىعى جانە قوعامدىق قامتاماسىزداندىرۋ مينيسترلىگى جانە جۇڭگو حالىق شەتەلدەرمەن دوستىق قوعامى، جۇڭگو الەۋمەتتىك ديپلوماتيا قوعامى سياقتى ورتالىقتاعى مينيسترلىك ـ كوميتەتتەردەگى جانە قوعامدارداعى قاتىستى جاۋاپتى جولداستار، جۇڭگو، شەتەل مەديالارى تىلشىلەرى قيمىلعا قاتىناستى.
ۋاڭ جيانشين قيمىلدى باسقاردى. ەلزات احمەتجان، قادەن كابەن، ابدۇرىقىپ ٴتومۇرنياز، اۆتونوميالى رايوننىڭ قاتىستى تاراۋلارىنداعى جاۋاپتى جولداستار جانە قاتىستى سالالارداعى ۋاكىلدەر قيمىلعا قاتىناستى.