انار بۇلت \ شينجياڭ گازەتىنىڭ ٴتىلشىسى حۋاڭ شيڭ 4 ـ ايدىڭ 10 ـ كۇنى ۇرىمجىدەن حابارلايدى. ٴالىشىر ٴومار تاعى رەكورد بۇزدى! 4 ـ ايدىڭ 10 ـ كۇنى 2024 ـ جىلعى مەملەكەتتىك جەڭىل اتلەتيكا سيلىقتى جارىسىنىڭ جاۋچيڭ بەكەتى ەرلەر 200 مەترلىك دايىندىق جارىسىندا ٴالىشىر 20 سەكۋند 72 تاقىلدىق ناتيجەمەن ٴبىرىنشى بولدى، سونىمەن ول ٴوزى ساقتاپ كەلگەن شينجياڭنىڭ ەرلەر 200 مەترلىك رەكوردىن جانە مەملەكەتتىك جاستار مەن ورەندەردىڭ ەرلەر 200 مەترلىك رەكوردىن دا بۇزدى.
2023 ـ جىلى 5 ـ ايدا ٴالىشىر مەملەكەتتىك U18 جەڭىل اتلەتيكا جۇلدەلى جارىسىندا 21 سەكۋند 08 تاقىلدىق ناتيجەمەن شينجياڭ ەرلەر 200 مەترلىك رەكوردىن جاراتتى. سول جىلى 11 ـ ايدا مەملەكەتتىك وقۋشىلار (جاستار) سپورت جارىسىندا ول 45 سەكۋند 71 تاقىلدىق ناتيجەمەن مەملەكەتتىك ورەندەردىڭ ەرلەر 400 مەترلىك رەكوردىن جانە شينجياڭنىڭ ەرلەر 400 مەترلىك رەكوردىن تاعى جاڭالادى. وتكەن ايدىڭ سوڭىندا وتكىزىلگەن مەملەكەتتىك بولمە ٴىشى جەڭىل اتلەتيكا جۇلدەلى جارىسىندا ٴالىشىر تاڭداي قاقتىراتىن 45 سەكۋند 79 تاقىلدىق ناتيجەمەن ٴوزىنىڭ جارتى ايدىڭ الدىندا جاراتقان مەملەكەتتىك بولمە ٴىشى ەرلەر 400 مەترلىك رەكوردىن جاڭالادى.
بۇل رەت مەملەكەتتىك جەڭىل اتلەتيكا سيلىقتى جارىسىنىڭ جاۋچيڭ بەكەتى جارىسىندا ٴالىشىردىڭ نەگىزگى ۇمتىلىس جاساعان ٴتۇرى 200 مەتر بولدى. ”ٴالىشىر ەگەر دە 400 مەتردە ناتيجەگە قول جەتكىزۋدى ويلاسا، ٴسوزسىز، 200 مەترلىك جانە 100 مەترلىك تۇردە دە وتە جوعارى دەڭگەيگە جەتۋى كەرەك. وسىنىڭ الدىنداعى جاتتىعۋ ارقىلى ونىڭ 200 مەترگە جۇگىرۋى دە حالىقارالىق دەڭگەيدەگى سپورت ساڭلاعى بولۋعا ۇمتىلىس جاسايتىن دەڭگەيدى ازىرلەدى“، ـ دەدى اۆتونوميالى رايوندىق دەنە تاربيە مەكەمەسى دەنە تاربيە جاتتىعۋى 1 ـ ۇلكەن اترەتى جەڭىل اتلەتيكا قىسقا ارالىققا جۇگىرۋ جانە الىسقا سەكىرۋ گرۋپپاسىنىڭ باس جاتتىقتىرۋشىسى جاڭ ياڭ.
4 ـ ايدىڭ 10 ـ كۇنى تۇستەن بۇرىن وتكىزىلگەن ەرلەر 200 مەترلىك دايىندىق جارىسىندا ٴالىشىر بابىنا كەلىپ، 20 سەكۋند 72 تاقىلدىق تاماشا ناتيجە جاراتىپ، بارلىق دايىندىق جارىس ساڭلاقتارىنىڭ اراسىندا 21 سەكۋند ىشىندە جۇگىرگەن بىردەن ـ ٴبىر سپورتشىعا اينالدى. بۇل ناتيجە ونىڭ بىلتىر جاراتقان شينجياڭ رەكوردىن 0.36 سەكۋند جوعارىلاتتى، سونىمەن بىرگە نانجيڭ ساڭلاعى لۋ شاڭبين 14 جىل ۋاقىت ساقتاپ كەلگەن 20 سەكۋند 74 تاقىلدىق ەرلەر 200 مەترلىك مەملەكەتتىك جاستار مەن ورەندەر رەكوردىن دا بۇزدى. تۇستەن كەيىنگى شەشۋشى جارىستا دەنە قالجىراۋىن ازايتۋ ٴۇشىن، ٴالىشىر جارىسقا قاتىناسپاۋدى تاڭدادى.
ٴالىشىر وسىنىڭ الدىنداعى بولمە ٴىشى جارىسىندا مەملەكەتتىك رەكوردتى 2 رەت بۇزدى، بۇل جاعداي ونىڭ دەنە قۋاتىن نەداۋىر السىرەتتى، قازىر قالپىنا كەلتىرۋ مەزگىلىندە تۇر. تاياۋ مەزگىلدەگى ونىڭ باستى مىندەتى 4 ـ ايدىڭ سوڭىندا اراب بىرىككەن امىرلىگىنىڭ دۋبايىندا وتكىزىلەتىن 21 ـ كەزەكتى ازيا جاستار U20 جەڭىل اتلەتيكا جۇلدەلى جارىسىنا دايىندالۋ.
