□ انار بۇلت \ شينجياڭ گازەتىنىڭ ٴتىلشىسى ياۋ گاڭ
”سىرتقا شىعىپ“ تاماشا كوكتەم كورىنىسىن تانىستىردى، ونىمدەردى مولايتىپ ساياحاتشىلاردى كوكتەم كورىنىسىن تاماشالاۋعا ۇسىنىس ەتتى، قىزمەت وتەۋ دەڭگەيىن جوعارىلاتىپ، ساياحاتشىلاردى كوكتەم شۋاعىنا شومدىردى... 4 ـ ايدا تيانشان الابى تاماشا كوكتەم شۋاعىنا شومىپ، مادەنيەت ـ ساياحات تاراۋلارى، ساياحات كاسىپورىندارى ىركەس ـ تىركەس قيمىلداپ، ”شينجياڭ جاقسى جەر“ اتتى ٴتورت ماۋسىم ساياحاتىنىڭ كوكتەمگى سيمفونياسىن اسقاقتاتتى.
”شينجياڭنىڭ ٴبىرىنشى كوكتەمى“ تۇرپاندا گۇل اشتى، تۇرپانعا بارىپ ورىك گۇلىن تاماشالاۋ شينجياڭنىڭ گۇل تاماشالاۋ ساياحاتىنىڭ شىمىلدىعىن اشتى. 2024 ـ جىلعى تۇرپان يارعول مارافون جارىسىنا قاتىناسقان ساڭلاقتار جۇگىرىس بارىسىندا كوكتەمنىڭ كوركەم كورىنىسىن تاماشالادى؛ ٴپىشان اۋدانى قۇمتاع قۇمدى ٴشول كورىنىس ٴوڭىرى قاقپاسىنىڭ الدىندا ورىك گۇلى قۇلپىردى، ساياحاتشىلار قۇم تاۋعا شىعۋ، قۇمدى شولدە جاياۋ ٴجۇرۋ سياقتى دەنە شىنىقتىرۋ ٴتاسىلى ارقىلى كوكتەمنىڭ ٴريتىمىن سەزىندى... بيىل تۇرپان قالاسىنىڭ ٴارقايسى رايون، اۋداندارى ورىك گۇلى مەرەكەسى قيمىلىن ىركەس ـ تىركەس وتكىزىپ، ”گۇل تاماشالاۋ + دەنە تاربيە“، ”گۇل تاماشالاۋ + سالت ـ سانا“، ”گۇل تاماشالاۋ + كونسەرت“ سياقتىلار ارقىلى گۇل تاماشالاۋ ٴبىر كۇندىك ساياحاتىن 2 كۇندىك، 3 كۇندىك ساياحاتقا اينالدىردى.
كوكتەم كەلگەننەن بەرى بۇكىل شينجياڭنىڭ جەر ـ جەرىندە گۇل تاماشالاپ كوكتەمگى سەيىلگە شىعۋ، ٴوز اۆتوكولىگىمەن تاماشالاۋ كوكتەمگى ساياحاتى ٴۇرتىس قىزۋ ورلەۋگە كوتەرىلدى. ”ٴبىز كوكتەمگى سەيىلگە شىعىپ، گۇل تاماشالاپ ساياحاتتاۋدى نەگىزگى تاقىرىپ ەتىپ، مادەنيەت ـ ساياحات مەرەكەسى قيمىلى، مادەنيەت ارقىلى حالىققا تيىمدىلىك جاساۋ قيمىلى، ادەبيەت ـ كوركەمونەر كونسەرتى، مادەني ەسكەرتكىش ـ مۇراجاي كورمەسى سياقتىلاردى وتكىزىپ، ساياحاتشىلارعا الۋان ٴتۇرلى، سەزىنۋ سەزىمى كۇشتى كوكتەمگى ساياحات ونىمدەرىن ازىرلەدىك“، ـ دەدى ىلە قازاق اۆتونوميالى وبلىستىق مادەنيەت جانە ساياحات مەكەمەسىنىڭ ورىنباسار باستىعى چۇڭ جيڭ. ەندى عانا وتكەن چيڭميڭ دەمالىسى كەزىندە، ”سايۋاي جياڭنان“ دەگەن ەسىمى بار ىلە وبلىسى جيىنى 704 مىڭ 400 (رەت) ساياحاتشى قابىلدادى، بۇل سالىستىرمالى ولشەم بويىنشا سايكەس مەزگىلدەگىدەن %18.92 ارتتى؛ ساياحات كىرىسى 475 ميلليون يۋانعا جەتىپ، سالىستىرمالى ولشەم بويىنشا سايكەس مەزگىلدەگىدەن %57.64 ارتتى.
ٴتىلشىنىڭ اۆتونوميالى رايوندىق مادەنيەت جانە ساياحات مەڭگەرمەسىنەن ۇعىسۋىنشا، بۇكىل شينجياڭداعى ايماق، وبلىس، قالالار كوكتەمگى ساياحاتتى ارقاۋ ەتىپ، مادەنيەت، حالىقتىق سالت ـ سانا، دەنە تاربيە، مۋزيكا سياقتى كوپ ٴتۇرلى فاكتورلاردى توعىستىرىپ، مادەنيەت جانە ساياحات قيمىلىنان جيىنى 300دەن استامىن ورىستەتىپ، ساياحاتشىلاردىڭ كوپ نەگىزدى قاجەتىن قاناعاتتاندىرعان.
”قالىڭ ساياحاتشىلاردى شينجياڭنىڭ ’كوكتەمىنە‘ بارىپ، شينجياڭنىڭ ’كوكتەمىنە‘ قۇشاق اشىپ، شينجياڭنىڭ’ كوكتەمىن‘ سەزىنۋگە شىن پەيىلمەن ۇسىنىس ەتەمىن.“ 4 ـ ايدىڭ 9 ـ كۇنى 2024 ـ جىلعى ”شىنجوۋ كوكتەمى“ اتىنداعى مەملەكەت بويىنشا كوكتەمگى ساياحاتتى ۇگىتتەۋ، تانىستىرۋ قيمىلى حىناننىڭ لوياڭىندا وتكىزىلدى، شينجياڭ حىنان، گانسۋ، تيانجين سياقتى 12 ولكە، رايون، قالامەن بىرگە بۇكىل ەلدەگى ساياحاتشىلاردى كوكتەمگى ساياحاتقا ۇسىنىس ەتتى.
3 ـ ايدان بەرى، اقسۋ، تارباعاتاي سياقتى ايماقتاردىڭ مادەنيەت ـ ساياحات تاراۋلارى ورايدى مىقتى يگەرىپ، فۋجوۋ، نانجيڭ، گۋاڭجوۋ سياقتى جەرلەرگە ىركەس ـ تىركەس بارىپ شينجياڭنىڭ كوكتەمگى ساياحاتىن تانىستىردى. وزىندىك ەرەكشەلىككە يە گۇل تاماشالاۋ ساياحات جەلىلەرى، ٴتيىمدى ساياساتتار كوپتەگەن جەرگىلىكتى ساياحات سەرىكتەستىكتەرىنىڭ نازارىن اۋداردى.
بيىل كوكتەمدە، بۇكىل شينجياڭنىڭ جەر ـ جەرى مادەنيەت ـ ساياحات ”ۇلكەن تارتۋىمەن“ ساياحاتشىلاردى باۋرادى، بۇل كورىنىس ٴوڭىرىنىڭ ەسىك بەلەتى اقىسىن ازايتۋ، كەشىرىم ەتۋ، اس ـ سۋ، جاتىن ورىن باعاسىن ارزانداتۋ سياقتى مادەنيەت، ساياحات تيىمدىلىك ساياساتتارىنان 80 نەشەسىن قامتيدى. مۇنىڭ ىشىندە، جانبۇلاق كورىنىس ٴوڭىرى 5 ـ ايدىڭ 1 ـ كۇنىنەن باستاپ ٴبىر بەلەتپەن 2 كۇن ساياحاتتاۋ تيىمدىلىك جاساۋ ساياساتىن اتقارادى؛ تۇرپان قالاسى بويلىق كورىنىس ٴوڭىرى ٴبىر رەت بەلەت ساتىپ السا ٴومىر بويى تەگىن بولۋ ساياساتىن جولعا قويدى؛ سايرام كولى كورىنىس ٴوڭىرىنىڭ ارالىق اۆتوكولىك بەلەت باعاسى 75 يۋاننان 60 يۋانعا رەتتەلدى.
كوكتەمگى ساياحات بازارىنىڭ قىزۋ ورلەۋى ساپالى مادەنيەت، ساياحات قىزمەت وتەۋىنەن ايرىلا المايدى. ەسىك بەلەت باعاسىنان، قىزمەت وتەۋ قۇرىلعىلارىنان قىزمەت وتەۋ ساپاسىنا دەيىن، جەر ـ جەر ساياحاتتىق قىزمەت وتەۋىن جوعارىلاتۋدى ارقاۋ ەتە وتىرىپ وزىندىك قابىلەتتەرىن جەتىلدىرىپ، ساياحاتتىڭ كۇسەت بولۋىن ۇنەمىلىك جاعدايعا اينالدىرۋعا مۇمكىندىك جاسادى، ساياحات كورىنىس وڭىرلەرىنىڭ پايدا ۇلگىسى جالاڭ ەسىك بەلەتىن ساتۋدان قىزمەت وتەۋ ساپاسى ارقىلى ونىمدىلىكتى جوعارىلاتۋعا قاراي بۇرىلىس جاساي باستادى.
3 ـ ايدىڭ 14 ـ كۇنى قاشقار ايماقتىق مادەنيەت، راديو ـ تەلەۆيزيا جانە ساياحات مەكەمەسى، قاشقار قالالىق مادەنيەت، دەنە تاربيە، راديو ـ تەلەۆيزيا جانە ساياحات مەكەمەسى بىرلەسىپ مادەنيەت، ساياحات كاسىبىمەن شۇعىلدانۋشىلاردىڭ جەلىلەس باۋلۋ كۋرسىن وتكىزدى. قاشقار ايماقتىق مادەنيەت، راديو ـ تەلەۆيزيا جانە ساياحات مەكەمەسى پارتيا باسشىلىق گرۋپپاسىنىڭ شۋجيى ليۋ حۇي بىلاي دەدى: باۋلۋ كۋرسى ساياحات كاسىبىمەن شۇعىلدانۋشىلاردىڭ قىزمەت وتەۋ تانىمى مەن قىزمەت وتەۋ قابىلەتىن بارىنشا جوعارىلاتىپ، ساپالى قىزمەت وتەۋ ارقىلى ”قاشقار حيكاياسىن“ ويداعىداي بايانداۋعا تىرەك ازىرلەدى.
بيىل بۇكىل شينجياڭداعى ٴار دارەجەلى مادەنيەت ـ ساياحات تاراۋلارى ”ساياحاتتىق قىزمەت وتەۋ ساپاسىن جوعارىلاتۋ جىلى“ ارەكەتىن ارقاۋ ەتىپ، قىزمەت وتەۋمەن، قامتاماسىز ەتۋمەن قامداۋدى ۇزدىكسىز ساپالىلاندىرىپ، ساياحاتشىلارعا اناعۇرلىم الاڭسىز، قولايلى، جايلى ساياحات ورتاسىن ازىرلەپ، ساياحاتتىق قىزمەت وتەۋ ساپاسىن بار كۇشپەن جوعارىلاتادى.
