شينجياڭدا استىق، ماقتا سياقتى نەگىزگى داقىلدار كەڭ كولەمدە تۇقىم ٴسىڭىرۋ مەزگىلىنە ٴوتتى
16 ميلليون مۋدان استام جەرگە ەگىس داقىلدارىنىڭ تۇقىمى ٴسىڭىرىلىپ بولدى
انار بۇلت \ شينجياڭ گازەتىنىڭ ٴتىلشىسى ليۋ ي 4 ـ ايدىڭ 16 ـ كۇنى ۇرىمجىدەن حابارلايدى. اۆتونوميالى رايوندىق اۋىل شارۋاشىلىعى، اۋىل ـ قىستاق مەڭگەرمەسىنەن ۇعىسۋىمىزشا، اۋا تەمپەراتۋراسىنىڭ ۇزدىكسىز جوعارىلاۋىنا ىلەسە، شينجياڭدا استىق، ماقتا سياقتى نەگىزگى ەگىس داقىلدار قازىر كەڭ كولەمدە تۇقىم ٴسىڭىرۋ مەزگىلىنە وتكەن. اۋىل شارۋاشىلىعى جاعدايى ساندى مالىمەتىندە كورسەتىلۋىنشە، شينجياڭدا 16 ميلليون مۋدان استام جەرگە ەگىس داقىلدارىنىڭ تۇقىمى ٴسىڭىرىلىپ بولعان، كوكتەمگى تۇقىم ٴسىڭىرۋ اياق الىسى بىلتىرعى سايكەس مەزگىلدەگىمەن نەگىزىنەن قارايلاس ەكەن.
سوڭعى مەزگىلدە شينجياڭنىڭ جەر ـ جەرى كوكتەمگى تۇقىم ٴسىڭىرۋ جانە اتىز باپتاۋ جۇمىستارىن ەگىس ۋاقىتىن مىقتى يگەرە ىلگەرىلەتىپ، تۇتاس جىلدا ەگىن شارۋاشىلىعىنان مول ٴونىم الۋ نەگىزىن بەكەمدەدى. وڭىرلەر بويىنشا قاراعاندا، سولتۇستىك شينجياڭدا، شىعىس شينجياڭدا جازدىق ٴبيدايىنىڭ تۇقىمى كەڭ كولەمدە سىڭىرىلە باستاعان، ٴىشىنارا وڭىرلەردە جۇگەرىنىڭ، ماقتانىڭ تۇقىمى دا سىڭىرىلە باستاپتى، وڭتۇستىك شينجياڭنىڭ اقسۋ، قاشقار ەكى جەرىندە ماقتانىڭ، جۇگەرىنىڭ تۇقىمى كەڭ كولەمدە سىڭىرىلە باستادى، باسقا وڭىرلەر دە ىركەس ـ تىركەس تۇقىم سىڭىرە باستادى.
داقىلدار بويىنشا قاراعاندا، ٴبيداي، جۇگەرى، ماقتا شينجياڭنىڭ كوكتەمدە تۇقىم سىڭىرىلەتىن نەگىزگى داقىلدارى بولدى. بۇكىل رايون بويىنشا ٴبىر ميلليون 100 مىڭ مۋدان استام جەرگە جازدىق ٴبيدايدىڭ تۇقىمى ٴسىڭىرىلىپ، تۇقىم ٴسىڭىرۋ جوسپارىنىڭ جارتىسىنا جۋىعى ورىندالدى، 2 ميلليون مۋدان استام جەرگە جۇگەرىنىڭ تۇقىمى ٴسىڭىرىلىپ، تۇقىم ٴسىڭىرۋ جوسپارىنىڭ %10كە جۋىعى ورىندالدى. سونىمەن بىرگە شينجياڭ 9 ميلليون مۋدان استام جەرگە ماقتا تۇقىمىن ٴسىڭىرىپ، ماقساتتاعى تۇقىم ٴسىڭىرۋ جوسپارىنىڭ %25ىن ورىندادى. مۇنان تىس، مايلى داقىل، كوكونىس، جەمىس سياقتىلاردىڭ تۇقىمىن ٴسىڭىرۋ جۇمىستارى دا ۋاعىندا باستالدى، اياق الىسى بىلتىرعىمەن نەگىزىنەن قارايلاس بولدى.
بيىل كوكتەم ماۋسىمىندا سولتۇستىك شينجياڭ ٴوڭىرى جاۋىن ـ شاشىن مەن بوران سىندى اۋا رايىنىڭ ىقپالىنا ٴجيى ۇشىراعاندىقتان، استىق داقىلدارىنىڭ تۇقىمىن ٴسىڭىرۋ بەلگىلى دەڭگەيدە ىقپالعا ۇشىرادى. ونىڭ ۇستىنە قازىر وڭتۇستىك شينجياڭنىڭ دۇمبە ٴبيدايى بۋىن تارتىپ، ٴدان الۋ مەزگىلىندە، سولتۇستىك شينجياڭنىڭ دۇمبە ٴبيدايى بوي تارتىپ، بۋىن الۋ مەزگىلىندە تۇر، ەگىس اتىزدارىن باسقارۋ شارالارىن تياناقتاندىرۋدىڭ ماڭىزى ەلەۋلى.
بۇل ٴۇشىن، اۆتونوميالى رايوندىق اۋىل شارۋاشىلىعى، اۋىل ـ قىستاق مەڭگەرمەسى اۋا رايى تاراۋلارىمەن بايلانىس جاساۋدى، كەڭەسۋدى كۇشەيتىپ، اپاتتان ساقتاندىرۋ ينفورماتسيالارىن دەر كەزىندە جاريالاپ، اپاتتان ساقتانۋدىڭ، اپات زيانىن ازايتۋدىڭ ناقتى شارالارىن شىعارىپ، جەر ـ جەردىڭ اپاتتان ساقتانۋ، اپات زيانىن ازايتۋ، اپاتتان قۇتقارۋ جۇمىستارىن ويداعىداي ىستەۋىنە جەتەكشىلىك ەتتى. سونىمەن بىرگە ايماق، وبلىستار قىزمەت وتەۋ گرۋپپاسىن قۇرىپ، 21 اۋىل شارۋاشىلىعى تەحنيكالىق ماماندارىن اترەت باستاپ، بۇكىل رايونداعى استىق، ماقتا وندىرەتىن 21 ٴىرى اۋداندى ىشكەرىلەي ارالاۋعا جىبەرىپ، تۇيىندە تۇرىپ تەحنيكالىق قىزمەت وتەپ، ٴبيدايدىڭ سۋى مەن تىڭايتقىشىن باسقارۋ، دەرت ـ دەربەز، زياندى جاندىكتەردەن ساقتانۋ سياقتى قىزمەتتەردى ويداعىداي ىستەپ، ٴتۇيىن ارقىلى كولەمدى جەتەكتەۋگە كۇش سالىپ، استىق، ماقتا سياقتى ماڭىزدى اۋىل شارۋاشىلىعى ونىمدەرىنىڭ كەڭ كولەمدە بىرلىك ٴتۇسىمىن جوعارىلاتۋدى جەبەپ، اۋىل شارۋاشىلىعىنىڭ جالپىلىق ٴوندىرىس ونىمدىلىگىن جوعارىلاتتى.
