زەينەتكە شىققاننان كەيىن ”ارمان ٴۇشىن حىڭديانعا بارىپ“ قىسقا فيلمگە شىقتى
شينجياڭدىق اعايدىڭ ٴوزىن باۋلۋى
□ انار بۇلت \ شينجياڭ گازەتىنىڭ ٴتىلشىسى ۋاڭ جيڭجيڭ
”مەن گۇل ەگۋدى، بالىق اۋلاۋدى، ساياحاتتاۋدى ۇناتىپ كەتپەيمىن، تەك كۇشتى شىراق استىندا تۇرىپ تۇرمىسىما كورىك قوسۋدى ويلايمىن، سول سەبەپتى زەينەتكە شىققاننان كەيىن حىڭديانعا كەلىپ ارتيست بولدىم“. 4ـ ايدىڭ 11 ـ كۇنى حىڭديان كينو ـ تەلەۆيزيا قالاسى ارتيستەر قوعامى وتكىزگەن كۋرستىڭ ۇيرەنۋ ارەدىگىندە ٴتىلشى جاقىندا ينتەرنەتتە جۇرتقا تانىلعان، زەينەتكە شىعىپ ”ارمان ٴۇشىن حىڭديانعا بارعان“ شينجياڭدىق ليۋ لين اعايعا تىلشىلىك ىستەدى.
4 جىلدىڭ الدىندا ليۋ لين حىڭديانعا كەلەدى، دەسەدە جول ورتادا ىندەت، ٴۇي شارۋاسى سەبەبىنەن كىدىرىپ قالادى، بىلتىر جىل باسىندا عانا ”ارمان ٴۇشىن حىڭديانعا بارعانداردىڭ“ قوسىنىنا رەسمي قوسىلادى. «ەرەكشە كومەكشى»، «ميڭۋاڭنىڭ قايتا ورالۋى»، «لۋ باس ديرەكتور، حانىم ٴسىزدى سوگىپ جاتىر»... ول رولعا شىققان 10نان استام تۋىندىنىڭ باسىم كوبى ميكرو قىسقا فيلم بولدى. ”باعىم جاندى ـ اۋ دەيمىن، ميكرو قىسقا فيلمنىڭ ورلەۋىنە ۇلگىردىم، ونىڭ ۇستىنە مەنىڭ جاسىمداعى ارتيستەر كوپ بولمادى، سوندىقتان مەن ورىندايتىن رولدار كوپ“.
ليۋ ليننىڭ تۇڭعىش رەت رولعا شىعۋى زەينەتكە شىققاننان كەيىن عانا ەمەس. وسىدان 10 نەشە جىلدىڭ الدىندا، ول اقسۋدا قىزمەت ىستەگەن كەزىندە، بەلگىلى فيلم گرۋپپاسى جەرگىلىكتى ورىنعا كورىنىس الۋعا كەلەدى، دوسى ونى اكە رولىنا شىعۋعا كورسەتەدى، ”سول كەزدە تاعى بىرنەشە سەرياسىنا قاتىناستىم، سول كەزدەن باستاپ، مەن ارتيست بولۋدى ارماندادىم“.
ليۋ لين قىزمەتتە تۇرعان كەزىندە مەكەمە قىزمەت ورنىنىڭ ادەبيەت ـ كوركەمونەر تىرەكتىسى بولاتىن. زەينەتكە ەندى عانا شىققاندا، ونى ارنايى ىزدەپ كەلىپ مۋزيكا اسپاپتارىن ۇيرەنگەندەر كوپ بولدى، ول دا سابىرلىلىقپەن ۇيرەتتى. قىزى اسپيرانتتىقتى بىتىرگەننەن كەيىن جىجياڭنىڭ جينحۋاسىنا بارىپ قىزمەت ىستەيدى، ول جۇبايىمەن بىرگە وسى اراعا كەلىپ قىزىنا سەرىك بولادى. ٴبىر جولى حىڭديانعا ساياحاتتاي كەلگەندە، چينۋاڭ ورداسىندا فيلم ٴتۇسىرىپ جاتقانىن كورىپ، حىڭديانداعى ارتيستەردىڭ جاعدايىن ۇعىسقاننان كەيىن، ”وزگەلەرگە مۋزيكا اسپابىن ۇيرەتۋ ارتيست بولعانداي قىزىقتى ەمەس ەكەن“ دەپ قاراپ، سىناپ كورۋدى ويلادى.
سىناپ كورگەننەن كەيىن، مۇنىڭ قىزىعىنا ٴتۇسىپ كەتەدى. جۇبايى مەن قىزى ونى ەرەكشە قولدايدى، ”ساحنا ٴسوزىن جاتتاۋ، رولعا شىعۋ، ويىن قويۋدى ۇيرەنۋ، وسىلاردىڭ ٴبارى ويلاۋ قابىلەتىم مەن كۇش ـ قايراتىمدى شىنىقتىرۋ بولدى، مەن دە مۇنىڭ قىزىعىنا باتتىم“، ـ دەدى ليۋ لين.
حىڭدياندا فيلم تۇسىرگەننەن سىرت، ليۋ لين فيلم گرۋپپاسىنا ىلەسىپ جينحۋا، ليشۇي، حاڭجوۋ، نيڭبو سياقتى جەرلەرگە دە باردى. كەيدە كەش باتقاندا ۇيگە ارەڭ جەتىپ، ەرتەسى تاعى ٴبىر فيلم گرۋپپاسىنا اسىعىس باراتىن. ”شارشاعانداي بولمادىم، ٴتۇنى بويى كىرپىك ىلمەۋگە دە كونىپ كەتتىم، ەگەر بىرنەشە اپتا رولعا شىقپاسام تۇلا بويىم بەي ـ جاي بولاتىن بولدى“.
رولعا شىققان قىسقا فيلمدەر كوبەيگەن سايىن، ليۋ لين قابىلەتىن تىنباي اسىرۋ كەرەكتىگىن سەزىندى. ”ارتيست جونىنەن جاس ماڭىزدى ەمەس، ماڭىزدىسى اكتەرلىك ونەر“، سول سەبەپتى وسى كاسىپكە كىرىسكەننەن باستاپ، كوپتەگەن اكتەرلىك ونەرگە باۋلۋ كۋرستارىنا قاتىناستى، جۇمساعان اقشاسى از بولمادى، اۋەلى، فيلم اقىسىنان دا كوپ بولدى، دەسەدە ول تاتيدى دەپ قارايدى.
2020 ـ جىلى 4 ـ ايدا حىڭديانعا كەلگەندە، ليۋ لين جارتى جىلدىق نەگىزدىك بىلىمگە باۋلۋ كۋرسىنا قاتىناسادى، ”ۇيرەنگەننەن كەيىن بارىپ كوڭىل كۇيدى قالاي بەينەلەۋدى ٴبىلدىم، سونىمەن تۇرمىستا مەن ادامدار اشۋلانعاندا، قۋانعاندا نەمەسە كوڭىل كۇيىندە وزگەرىس تۋىلعاندا دەنەسىنىڭ قانداي كۇيدە بولاتىندىعىن مۇقيات باقىلادىم، كوپ باقىلاساڭ، كوپ تولعانساڭ رولعا جاقسى شىعا الاسىڭ“.
بىلتىر الدىڭعى جارتى جىلدا ليۋ لين ارتيست باۋلۋ كۋرسىنا قاتىناسادى ٴارى ەمتيحان بەرىپ ارنايى ۇسىنىس ەتىلەتىن ارتيست تولىمدىعىن الادى، ول جاقىننان بەرى وقىپ جاتقان تاعى ٴبىر كۋرستىڭ ساباعى 4 ـ ايدىڭ ورتا شەنىندە اياقتايدى. ۇيرەنۋ ارقىلى ليۋ لين جاڭا ارتيستەرمەن بىرگە سىناق رولعا شىققاندا، ٴوزىنىڭ كاسىپكە ايتارلىقتاي ىسىلىپ قالعانىن، الايدا مىقتىلارمەن رولعا شىققاندا، ٴالى دە پارىق بار ەكەندىگىن بايقايدى. ”وقۋدىڭ ٴتۇبى جوق. ساباق وقىپ كوپتەگەن رولدارعا شىعا الماعانىمەن، مەنشە، ۇيرەنۋ اسا قاجەتتى، مەنىڭ دە ٴوز قابىلەتىمدى جوعارىلاتقىم كەلدى“، ـ دەدى ليۋ لين كىشى پەيىلدىكپەن.
قىسقا فيلمدە ليۋ لين، نەگىزىنەن، اكە، مەكتەپ باستىعى، القا باستىعى جانە وققاعار سياقتى رولدارعا شىقتى. ونىڭ ەڭ رازى بولعان فيلمى «جاستىقتىڭ قۋات قاينارى»، مۇندا ول مەكتەپ باستىعىنىڭ رولىنا شىعادى، ”رولعا شىققان بولىگىم كوپ بولماسا دا، بۇل ٴبىر ماڭىزدى كەيىپكەر، ورىنداپ بولعاننان كەيىن كوپشىلىكتىڭ ٴبارى دە مويىندادى“.
ٴىشىنارا فيلمدەردە رولعا شىققاننان كەيىن، ليۋ لين ٴوزىنىڭ ارتيست ماتەريالىن جاسادى. ٴار جولى بىرەۋلەر ونى فيلمگە شىعۋعا ىزدەپ كەلگەندە، ول ٴوز ماتەريالىن جولداپ، رەجيسسەرلەردىڭ ٴوزىنىڭ جاعدايىن ۇعىسۋىنا مۇمكىندىك جاراتتى، ”تەك رولعا كوپ شىققاندا عانا، رەجيسسەرلەردىڭ ۇناتۋىنا يە بولۋعا بولادى“.
”مەن ’باس كەيىپكەر اكە‘ سياقتى رولداردى ورىنداۋدى ۇناتامىن، ۋاقىتى ۇزىن، كورىنىسى دە كوپ. جاستارمەن بىرگە بولعاندا، ولار مەنى ’اعا‘ دەپ شاقىرسا، ٴوزىم جاسارىپ قالعانداي سەزىنەمىن“. ليۋ لين بىلاي دەدى: مەن مەملەكەتتىڭ ميكرو قىسقا فيلم كاسىبىن باسقارۋىنا جانە جۇيەگە تۇسىرۋىنە باستان ـ اياق نازار اۋدارىپ كەلەمىن، ”جاسامپازدىقتى جوعارىلاتۋ جوسپارىن اتقارۋعا“ دا وتە قىزىعامىن، ميكرو قىسقا فيلمدەردى كورەتىن قاۋىم نەگىزىنەن جاستار، سوندىقتان مەن قوسالقى رولعا شىعۋعا پەيىلمىن، ٴاربىر بولماشى كەيىپكەردى جاقسى سومداۋدى ٴۇمىت ەتەمىن.
ليۋ لين زەينەتكە شىعىپ حىڭدياندا ارمانىن ورىنداعاننان كەيىن، اقپارات مەديالارى ونى حابارلاپ، ينتەرنەتتە جۇرتقا تانىلدى، كۇدىكتەنگەن ۇندەر دە جەتىپ ۇلگەردى. ”مەنىڭ زەينەتاقىم بار، فيلمگە شىعۋ كۇن كورۋدىڭ ٴتاسىلى ەمەس، جۇلدىز بولۋدى دا ارماندامادىم، مەن تەك باسىم كوپ ادامدارعا ۇقسامايتىن زەينەت تۇرمىسىن تاڭدادىم. مۇنداي تۇرمىستىڭ مازمۇنى باي، مەن قاتتى ۇناتامىن“، ـ دەدى ليۋ لين.
