”قولىمنان كەلگەنىنشە اناعۇرلىم كوپ ادامعا كومەكتەسەمىن“
_ اۆتونوميالى رايوندىق 8 ـ كەزەكتى ٴمورال ۇلگىسى يۇي شۋەران تۋرالى
□ انار بۇلت \ شينجياڭ گازەتىنىڭ ٴتىلشىسى ۋي يۇڭگۇي، ەرىكتى ٴتىلشى ما جيڭجيڭ
4 ـ ايدىڭ 13 ـ كۇنى تۇستەن بۇرىن قۇمىل قالاسى يجوۋ رايونى قارا ٴدوۋا قالاشىعى بوستان قىستاعىنىڭ تۇرعىنى يۇي شۋەراننىڭ ۇيىندە اۋىلداستار شاتتىقپەن باس قوستى. بىرنەشە قىستاق تۇرعىنى داپ سوعىپ، راۋاپ، دۇتتار شەرتتى، جاسى 70 تەن اسقان يۇي شۋەران جاتىق ۇيعۇر تىلىندە مۇقامدى شىرقادى، ول ٴان سوزىنە وزگەرىس ەنگىزدى، قوسقان مازمۇنى پارتيانىڭ ابزال ساياساتى بولدى.
”اكەم بوستان قىستاعىنىڭ جالاڭاياق شيپاگەرى ەدى، مەن كىشكەنتايىمنان وسىندا ەرجەتتىم“. يۇي شۋەران بىلاي دەدى: بوستان قىستاعىنداعى اۋىلداستار ىقىلاستى، اق كوڭىل، ەڭبەكشىل دە قاراپايىم، ”نەشە ون جىلدان بەرى ٴبىز جان اشىر جاقىندارداي ارالاسىپ كەلەمىز“.
يۇي شۋەران ساقا پارتيا مۇشەسى ٴارى قىستاقتاعى ساياسات ۇگىتشىسى، قايشىلىق پەن داۋ ـ شاردى جاراستىرۋشى. قىستاقتا ول اۋىلداستاردىڭ كوڭىلىندەگى ىسكەر ادام ٴارى سەنىمدى جاقسى ادام.
يۇي شۋەراننىڭ ”لاۋيۇي كەلىستىرۋ ٴتۇيىنى _ ازاماتتىق ىستەر جاراستىرۋ ەستەلىك داپتەرى“ بار، 2020 ـ جىلى 4 ـ ايدا لاۋيۇي كەلىستىرۋ ٴتۇيىنى قۇرىلعاننان قازىرگە دەيىن جاراستىرۋدان وتكەن ۇلكەندى ـ كىشىلى 50 _ 60 ٴىس ەستەلىككە الىنعان. ەستەلىككە العان ٴاربىر ىسكە ول وتە قانىق.
”بۇل قايشىلىقتار مەن داۋ ـ شارلار اۋىل ـ قىستاقتا ۇنەمى تۋىلىپ تۇرادى، بۇرىن كوپشىلىك تيتتەي ٴىس بولسا بولعانى قىستاق تۇرعىندار كوميتەتىنە، قالاشىق ۇكىمەتكە بارىپ اڭىس ەتەتىن، قازىر بارلىعى مەنىڭ وسى كەلىستىرۋ تۇيىنىمە كەلۋگە داعدىلانىپ كەتكەن، كوپتەگەن ٴىس انىق ايتىلسا بولعانى، قايشىلىق شەشىلەدى“، ـ دەيدى يۇي شۋەران.
قايشىلىق پەن داۋ ـ شاردىڭ ويداعىداي شەشىلۋىندەگى سەبەپ يۇي شۋەراننىڭ ادامگەرشىلىگىندە، ٴىس بىتىرۋدە تۋراشىل بولۋىندا.
2010 ـ جىلى كوكتەمدە گۋاڭدۇڭدىق ٴبىر ساۋداگەر قىستاققا مەيىز ساتىپ الۋعا كەلىپ، ٴار كيلوگرامىنا 20 يۋاندىق باعا قويىپ، يۇي شۋەرانمەن ساتىپ الۋ توقتامىنا قول قويىسادى، الايدا اۋا رايى سەبەبىنەن يۇي شۋەراننىڭ كەپتىرگەن مەيىزىنىڭ ساپاسىنان ماسەلە شىعادى. توقتامعا قول قويعانىمەن، يۇي شۋەران باعانى ىرىقتىلىقپەن تومەندەتىپ، ٴار كيلوگرامىن 15 يۋان باعامەن ساتادى. بۇل ٴىس تارالعاننان كەيىن، قىستاق تۇرعىندارى جابال يۇي شۋەراندى القايدى.
يۇي شۋەران باسقالارعا كومەكتەسۋگە پەيىل، كىمنىڭ ۇيىندە قيىنشىلىق بولسا، بارىنە كومەكتەسەدى.
ٴار جىلى ەگىس قاربالاستىعى كەزىندە يۇي شۋەران تراكتورمەن وتباسىنداعى ەڭبەككۇشى از قىستاق تۇرعىندارىنىڭ جەر جىرتىپ، تىڭايتقىش تاسۋىنا كومەكتەسەدى؛ بىرنەشە جىلدىڭ الدىندا، ٴبىر قىستاق تۇرعىنىنىڭ شىرىك قان اۋرۋىنا شالدىققاندىعى انىقتالعاندا، يۇي شۋەران دەرەۋ قىستاق تۇرعىندار كوميتەتىنە بارىپ جاعدايدى تۇسىندىرەدى ٴارى باستاماشىلدىقپەن جىلۋ اتاپ، وسى قىستاق تۇرعىنىنىڭ قيىن وتكەلدەن وتۋىنە كومەكتەسەدى؛ 2012 ـ جىلدىڭ باسىندا يۇي شۋەران ٴوز قالتاسىنان اقشا شىعارىپ، قىستاقتىڭ جەمىس باعىنا باراتىن 300 مەتردەن استام توپىراق جولدى شاعىل جولعا وزگەرتىپ جوندەپ، جولدىڭ شاڭى شىعىپ جاتاتىن ماسەلەنى شەشتى؛ 2015 ـ جىلى 5 ـ ايدا جەرگىلىكتى ورىندا قاتتى جاڭبىر جاۋدى، يۇي شۋەران اپاتقا ۇشىراعان قىستاق تۇرعىندارىنا 60 قالتا ۇن ساتىپ الىپ جەتكىزىپ بەردى؛ يۇي شۋەران جەرگىلىكتى باستاۋىش مەكتەپكە 10 جىلعا جۋىق وقۋ كومەك قاراجاتىن بەردى... قىسىلعاندارعا قارايلاساتىن جاقسى ىستەرى يۇي شۋەراندى قىستاق تۇرعىندارىنىڭ سەنىمىنە بولەدى.
يۇي شۋەران ۇنەمى بوس ۋاقىتتارىنان پايدالانىپ پارتيانىڭ ساياساتىن ۇيرەنەدى، ونان سوڭ وسى ساياساتتاردان قاراپايىم دا ۇعىنىقتى تىلمەن ۇگىت لەكسيا جاسايدى. قىستاق ”ەكى كوميتەتىنىڭ“ قولداۋىندا، يۇي شۋەران ٴوز ۇيىندە ”شاعىن ساباقحانا“ اشىپ، ٴوزىنىڭ دۇتتار شەرتىپ، بارابان سوعىپ، مۇقام ايتاتىن ەرەكشەلىگىنەن تولىق پايدالانىپ، ۇگىت لەكسيا بارىسىندا ادەبيەت ـ كوركەمونەر نومىرلەرىن قويدى، قىستاقتاعى مۋزيكا اسپاپتارىن بىلەتىن، مۇقام ايتا الاتىن قىستاق تۇرعىندارى دا ونىڭ ۇيىنە جينالىپ، بىرگە كونسەرت قويدى. ٴار رەتكى ۇگىت لەكسيا بارىسىندا يۇي شۋەران وتباسى بۇكىل قىستاقتاعى ەڭ دۋماندى جەر بولادى.
”شاعىن ساباقحانانىڭ“ ىقپالىندا قىستاق تۇرعىندارىنىڭ قارىم ـ قاتىناسى اناعۇرلىم قويۋلادى، ەڭبەك شەبەرلىگى كۋرسىنا ىرىقتىلىقپەن قاتىناساتىندار كوبەيدى، جۇمىس ىستەپ كىرىستى ارتتىراتىن ادامدار دا كوبەيدى.
يۇي شۋەران وتباسىندا ۇلكەندى ـ كىشىلى 13 ادام بار، مۇنىڭ ىشىندە سەگىزى كوممۋنيستىك پارتيا مۇشەسى. وسى ۇلكەن وتباسىندا باسقالارعا كومەكتەسۋ سانالى ارەكەتكە اينالعان. 2023 ـ جىلى قىستاق تۇرعىنى قادىر يمىر بەلى جارالانعاندىقتان، 20 نەشە كۇن شيپاحاناعا جاتىپ ەمدەلۋگە تۋرا كەلەدى، جۇبايىنىڭ شيپاحاناعا بارىپ قاراۋى كەرەك، ۇيىندەگى 50 نەشە قوي مەن 2 سيىردى قارايتىن ادام جوق. يۇي شۋەران مۇنى بىلگەننەن كەيىن، وتباسىنداعىلارمەن اقىلداسىپ، ٴار كۇنى كەزەكتەسىپ قادىردىڭ ۇيىندەگى سيىر، قويعا قارايلاسادى.
2017 ـ جىلى يۇي شۋەراننىڭ وتباسى اۆتونوميالى رايوندىق وركەنيەتتى وتباسى بولىپ باعالاندى. 2023 ـ جىلى اۆتونوميالى رايوندىق 8 ـ كەزەكتى ٴمورال ۇلگىلەرىن باعالاۋدا يۇي شۋەران ادال، سەنىمدى بولۋدىڭ ۇلگىسى بولىپ باعالاندى. داڭق الدىندا ول: ”كوپشىلىككە مەيىر جەتكىزىپ، قولىمنان كەلگەنىنشە اناعۇرلىم كوپ ادامعا كومەكتەسەمىن“، ـ دەدى.
”تالاي جىلدان بەرى لاۋيۇي اعاي قىستاق ’ەكى كوميتەتىنە‘ سەلبەسىپ، كوپتەگەن قىزمەت ىستەدى. اۋىلداستار قانداي ٴىس بولسا دا ونى ىزدەۋدى جاقسى كورەدى، وعان توتەنشە سەنەدى، ٴاربىر قىستاق كادرىنىڭ ۇيرەنۋىنە تاتيدى“، ـ دەدى بوستان قىستاعى پارتكومىنىڭ شۋجيى راۋشانگۇل ٴيۇسۇپ.
