نەگىزىنەن نەگىزدىك قۇرىلعىلار قۇرىلىسىنا جۇمىسالادى
انار بۇلت \ شينجياڭ گازەتىنىڭ ٴتىلشىسى ران حۋ 4 ـ ايدىڭ 24 ـ كۇنى ۇرىمجىدەن حابارلايدى. 4 ـ ايدىڭ 23 ـ كۇنى شينجياڭ ورتالىق مەملەكەت زايومىن تىركەۋگە الدىرىپ ەسەپ جابۋ شەكتى جاۋاپكەرشىلىك سەرىكتەستىگى اۆتونوميالى رايوننىڭ 2 ـ توپتاعى 3 ميلليارد 798 ميلليون يۋان جەرگىلىكتى ۇكىمەت زايومىن ٴساتتى تاراتتى.
وسى رەت تاراتىلعان شينجياڭنىڭ جەرگىلىكتى ۇكىمەت زايومى 10 جىلدىق مەرزىمدەگى ۇكىمەتتىڭ 3 ميلليارد 38 ميلليون يۋان ادەتتەگى زايومى مەن 15 جىلدىق مەرزىمدەگى ۇكىمەتتىڭ 760 ميلليون يۋان ارناۋلى زايومىن قامتيدى، بۇلاردىڭ ٴبارى جاڭادان ارتقان زايومدار.
وسى كەزەكتەگى ادەتتەگى زايوم نەگىزىنەن اۆتونوميالى رايوننىڭ ٴوز دارەجەسىندەگى جانە ىلە قازاق اۆتونوميالى وبلىسى، تارباعاتاي ايماعى، سانجى حۇيزۋ اۆتونوميالى وبلىسى سياقتى 10 ايماقتاعى (وبلىس، قالا) قاتىناس نەگىزدىك قۇرىلعىلارىنا، ەگىن، ورمان، سۋ يگىلىگى، وقۋ ـ اعارتۋ سياقتى سالالارىنداعى نىساندارعا جۇمسالادى. ارناۋلى زايوم نەگىزىنەن حوتان ايماعى كۇنگاڭ ەكونوميكالىق، تەحنيكالىق اشۋ رايونى (ٴتۇستى مەتال كاسىپ سالاسى باقشاسى) مەن ىلە وبلىسى كۇيتۇن _ مايتاۋ ەكونوميكالىق، تەحنيكالىق اشۋ رايونى وڭتۇستىك رايونى، قورعاس ەكونوميكالىق اشۋ رايونى شىندىقوزى سايكەستى باقشا رايونى اۋىل شارۋاشىلىعى قوسىمشا ونىمدەرىن جىنتىكتەي وڭدەۋ كاسىپ سالاسى باقشاسى سياقتى كاسىپ سالاسى باقشا رايوندارىنىڭ نەگىزدىك قۇرىلعى نىساندارىنا جۇمسالادى.
اۆتونوميالى رايوندىق قازىنا مەڭگەرمەسى ۇكىمەت قارىزىن باسقارۋ باسقارماسىنىڭ باستىعى لي شي بىلاي دەپ تانىستىردى: سوڭعى جىلدارى شينجياڭنىڭ ٴار دارەجەلى قازىناسى وڭىرلىك ەكونوميكانىڭ دامۋ ٴىس جۇزىندىگىمەن جانە «شينجياڭ ۇيعۇر اۆتونوميالى رايونىنىڭ حالىق شارۋاشىلىعى جانە قوعامدىق دامۋىنىڭ 14 ـ بەسجىلدىق جوباسى مەن 2035 ـ جىلعى بولاشاقتىق نىسانا باعدارلاماسىمەن» ۇشتاستىرىپ، كاسىپ سالاسىنىڭ نەگىزىن قايتا قالاۋ ينجەنەرياسى مەن جاڭا ٴبىر كەزەكتى ٴداستۇرلى كاسىپ سالاسىنىڭ ەلەۋلى تەحنيكاسىن جاڭالاپ، دارەجەسىن جوعارىلاتۋ ينجەنەرياسىن اتقارۋدى ارقاۋ ەتىپ، حيميا ونەركاسىبى، توقىماشىلىق، ەگىن، ورمان، سۋ يگىلىگى سياقتى كاسىپ سالالارىنىڭ ساپاسىن جوعارىلاتىپ، ونىمدىلىگىن ارتتىرۋدى ىلگەرىلەتىپ، كاسىپ سالاسىنىڭ جوعارى دەڭگەيلەنۋىن، زەردەلىلەنۋىن جانە جاسىلدانۋىن جەبەپ، جەرگىلىكتى ۇكىمەتتىڭ ارناۋلى زايوم نىساندارىن بەلسەنە زاپاس ساقتاپ، ارناۋلى زايومنىڭ ارتۋدى ورنىقتىرۋ، ىشكى سۇرانىستى ۇلعايتۋ، ولقىلىقتاردى تولىقتاۋ ماڭىزدى رولىن تولىق ساۋلەلەندىردى.
ۇعىسۋعا قاراعاندا، شينجياڭنىڭ جەرگىلىكتى ۇكىمەت زايومى نەگىزىنەن نەگىزدىك قۇرىلعىلار قۇرىلىسىنا جۇمسالادى ەكەن. مۇنىڭ ىشىندە، قالا اكىمشىلىگى قۇرىلىسى، قامتاماسىز ەتۋ سيپاتىنداعى تۇرعىن ٴۇي جانە لاشىقتى وڭىرلەردى جاڭالاۋ، ەگىنجاي، سۋ يگىلىگى قۇرىلىس نىساندارى قالىپتاستىرعان جەرگىلىكتى ۇكىمەت زايومىنىڭ ۇستاعان سالىستىرماسى جەكە ـ جەكە %28.55، %18.77 جانە %9.91 بولىپ، اۆتونوميالى رايوننىڭ ەكونوميكانىڭ ارتۋىن جەبەۋ، حالىق تۇرمىسىن جاقسارتۋ، كاسىپ سالاسىن شوعىرلاندىرۋ جانە جاڭالىق اشا دەم بەرۋ سياقتى جاقتارىندا بەلسەندى رول اتقارعان.
